¿Kimatij taixmatinij keniuj peuak nochi tein onkak uan tein yoltok? Tein melauj amo. Kijtouaj ke taixmatinij akin momachtiaj nochi tein onkak itech iluikak uan taltikpak uelis kijtoskej keniuj peuak nochi. Sayoj ke Marcelo Gleiser, akin ika tamachtia sitalimej itech Universidad Dartmouth uan amo semi kineltoka Dios, kijtoua: “Amo uelini senkis tikmelauanij keniuj peuak nochi tein onkak”.

¿Kimelauanij keniuj peuak nochi tein yoltok? Se tajkuilol itech amaix Science News kijtoua: “Xa amo uelis senkis tikijtoskej keniuj peuak nochi tein yoltok nikan taltikpak. Miak temej uan omimej tein ueliskia kinextis tein panok keman nesik taltikpak ixpoliujkej uejkaujya”. Nejin tein kijtojkej kinextia ke taixmatinij ayamo kimatij keniuj peuak nochi tein onkak uan tein yoltok.

Xa tionmotajtania: “Komo taltikpak kichijchiujkej, ¿akoni kichijchiuak? Uan komo nemi se Tachijchiujkej akin yolkuali uan tamatkej, ¿keyej kikaua maj titajyouikan? ¿Keyej kikaua maj onka miak taneltokalismej? ¿Keyej kikaua maj miakej akin taneltokaj kichiuakan tein amo kuali?”.

Tein kiajsinij taixmatinij amo ueli kinankilia nejin netajtanilmej. Sayoj ke, nejin amo kijtosneki ke amo onkak tanankilil tein uelis se kineltokas, ta miakej kiajsinij itech Biblia.

Miakej taixmatinij kiixtalianij momachtiskej Biblia. ¿Tikonuelitaskia tikonmatis keyej axkan kineltokaj ke aksa tachijchiuak? Xikonita jw.org uan xikontemo “Tein kijtouaj sekin kemej peuak nemilis”.