¿Keyej miakej amo mopatiuitaj?
¿KEYEJ SEMI MONEKI MAJ TIMOPATIUITAKAN?
Akin mopatiuitaj yolchikaujkej keman kipiaj ouijkayomej uan amo niman mosenkauaj.
-
Moijtoua ke akin amo mopatiuitaj xa uelis niman motekipachoskej ika tein yeski taman, motayokoltiskej uan amo yektakuaskej. No okachi kinekij tayiskej pajti, kikuiskej drogas uan tayiskej tein teuintij.
-
Akin mopatiuitaj amo kinnexikoluijtokej oksekin porin kinekij mochiuaskej kemej yejuan, yejua ika kuali kinnojnotsaj uan nochipa kuali iniuan mouikaj. Sayoj ke akin amo semi mopatiuitaj semi kinijijtouaj oksekin uan nejon kichiua maj amo kuali mouikakanok iniuan.
-
Akin mopatiuitaj maski kipiaj ouijkayomej moyolchikauaj, amo mokauaj maj ouijkayomej kintsakuili kichiuaskej tein kiixtalijtokej. Sayoj ke akin amo semi mopatiuitaj, kiitaj kemej yeskia tel miak kuejmolmej kipiaj maski amo ijkon uan nejon uelis kichiuas maj mosenkauakan.
¿KENIUJ UELIS OKACHI TIONMOPATIUITAS?
Iniuan xionmouika akin uelis mitsonpaleuiskej. Xionmouika iniuan akin tetakachiuaj, akin yekmelauj moka motekipachouaj uan mitsonyolchikauaj.
Xikonpaleui oksekin. Semi tionyolpakis uan kuali tionmomachilis komo tionkualtakat uan tikinpaleuia oksekin maski yejuan amo uelis mitsonpaleuiskej. Uan ijkon panoua maski amo akin kitasojkamatis tein tikonchiuak.
Xikonpaleui mokoneuan maj kimatikan keniuj mopatiuitaskej. Komo tikonita ke ueli, xikonkaua mokoneuan maj kimelauakan kuejmolmej tein kipiaj. Ijkon tikonpaleuis maj okachi mopatiuitakan, maj kimatikan keniuj kimelauaskej kuejmolmej uan maj amo mosenkauakan. Nejon no kinpaleuis maj okachi mopatiuitakan keman tsikitsitsinok uan keman uejueyiaskej.
¿KENIUJ ITAIXPANTIJKAUAN JEHOVÁ KINPALEUIAJ OKSEKIN MAJ MOPATIUITAKAN?
Nechikolmej tein tikpiaj itaixpantijkauan Jehová uan tein titamachtiaj, kinpaleuiani miakej maj kipatakan kemej nemij, uan nejon kinpaleuia maj okachi mopatiuitakan.
NECHIKOLMEJ TEIN TIKPIAJ SEJSE SEMANA
Itech sejse semana keman timonechikouaj, tikakij tanojnotsmej tein mokixtia itech Biblia. Ompa techiluiaj tein techpaleuis maj okachi timopatiuitakan. Amo se taxtaua uan uelis yas akin kinekis. Ompa tionmomachtis...
-
... keyej Dios semi mitsonpatiuita.
-
... keniuj yekmelauj tionyolpakis.
-
... keniuj kuali tikonnojnotsas oksekin uan nochipa iniuan tionmouikas.
No tikonajsis motasojikniuan akin yekmelauj motekipachouaj se iuan okse (1 Corintios 12:25, 26).
Para okachi tikonmatis keniuj mochiuaj tonechikoluan, xikonita video ¿Keniuj tikchiuaj tonechikoluan? itech jw.org.
TITAMACHTIAJ IKA BIBLIA
Tikiniluiaj oksekin ox kinekij momachtiskej Biblia uan amo tikintaxtaualtiaj. Uan ika tikinmachtiaj amaix ¡Uelis tiyolpakiskej nochipaya! Nejin amaix kipia netajtanilmej tein tepaleuiaj maj se tanemili uan maj se kiajsikamati textos tein moneki se kileros. Amo ouij se kiajsikamati tein kijtoua, no kipia videos uan taixkopimej tein kualtsitsin. Tein tikinmachtiaj kinpaleuia maj mopatiuitakan uan maj okachi kuali nemikan.
Komo tikonneki tikonmatis keniuj mitsonpaleuis komo tionmomachtia Biblia iniuan itaixpantijkauan Jehová, xikonita video ¿Keyej moneki timomachtiskej Biblia? itech jw.org.
Xa no tikonuelitas
TIAKONIMEJ
Xiontajtani maj mitsonkalpanokan
Xikonmati itanankilil se netajtanil tein kisa itech Biblia, oso okachi xikonixmati itaixpantijkauan Jiova.
TIAKONIMEJ
Xionyoui keman timosentiliaj
Xikonmati keniuj tikchiuaj tonechikoluan. Xikontemo kampa uelis tionyas.
