¿Keyej tel miakej amo kipatiuitaj ininnemilis uan ininnemilis oksekin?

MAJ MOITA ITECH

¿KEYEJ MONEKI TIKPATIUITASKEJ TONEMILIS UAN ININNEMILIS OKSEKIN?

Keman tikchiuaj teisa tein uelis techkokolispeualtis, techijtakos oso kinijtakos oksekin, tiknextiaj ke amo tikpatiuitaj tonemilis nion ininnemilis oksekin.

Komo se tachichina amo sayoj tekui cáncer, ta no kichiua maj se inakayo amo taxikook para pajtis. Tel miakej momikiliaj porin kinkui cáncer itech ininpulmón uan ijkon kinpanoua porin miakej tachichinayaj oso porin nochipa iuan yetoya aksa akin tachichinaya.
Sejse xiuit, miakej kinmojkakalakiaj porin kintatojtoponiliaj. Universidad de Stanford tein moajsi ompa Estados Unidos, kitematiltij: “Maski sekin amo momikiliaj keman [kintatojtoponiliaj itech tamachtiloyan], semi kinmojkakalakiaj uan tel miak xiujmej ijkon momachiliaj”.
Keman aksa kinejnemiltia carro uan uinti oso drogado, uelis kinkokos oksekin akin no kiuikaj carro oso akin nejnentokej. Miakej amo kipatiuitaj ininnemilis nion ininnemilis oksekin uan yejua ika tel miakej tajyouiaj maski amo teyi kichiujtokej.

¿KENIUJ UELIS TIKONNEXTIS KE TIKONPATIUITA MONEMILIS UAN ININNEMILIS OKSEKIN?

Xionmoyekpia para amo tionkokolispeuas. Uelisok tikonkauas seki taman tein mitsonijtakoua, uelis amo tiontachichinasok, amo tiontachichinasok ika tepos oso vapeo, amo tionmouintisok uan amo tikonkuisok drogas. Nochi nejin mitsonkokolispeualtia, uan ika tikonnextia ke amo tikonpatiuita monemilis, ininnemilis oksekin nion de mochankauan.

“Maj timochipauakan de nochi tein kipitsotilia tonakayo” (2 Corintios 7:1).

Maj timoyekpiakan uan maj tikinyekpiakan oksekin. Xikonita maj mochan amo uejueliujto para maj amo akin mokoko. Kuali xikonnejnemilti carro oso motocicleta uan xikonita maj kualtiakan. Amo xionmokaua maj oksekin mitsonchikaujkauikan xikonchiua teisa tein uelis ika tionmokokos oso hasta mitsonmiktis.

“Komo tikchijchiua se kali, kalpani moneki titentatsakuas para maj amo akin panuetsi nion maj motajtakol komo miki” (Deuteronomio 22:8). a

Xionyolkuali iniuan oksekin. Komo tikpatiuitaj tonemilis, kuali timouikaskej iniuan nochin akin seseko kayomej, tataman kemej ixtamatij, akin kitelpiaj tomin oso amo uan akin motelmachtijkej oso amo. Axkan okachi miakej tateuiaj uan mochiua uejueyi neteuilis porin miakej techikoitaj uan tetauelitaj.

“Nion tepitsin xiyolkualantinemikan nion xitetauelitakan, nion xitauelmiktinemikan, nion xitetsatsajtsilikan, nion xikijtokan tein teyolkokos, uan amo no xikchiuakanok nion tepitsin tein amo kuali. Okachi kuali, xikualtakamej se iuan okse” (Efesios 4:31, 32).

¿KENIUJ ITAIXPANTIJKAUAN JEHOVÁ KINEXTIAJ KE KIPATIUITAJ ININNEMILIS UAN ININNEMILIS OKSEKIN?

Itaixpantijkauan Jehová kinmachtiaj oksekin keniuj uelis nemiskej kemej amo mokokolispeualtiskej. Miakej kinpaleuiani tein tikinmachtiaj ika Biblia porin kipatanij kemej nemiaj uan amo kichiuajok seki taman tein kinijtakouaya.

Keman tikalchijchiuaj, tikchiuaj seki taman tein techpaleuis maj amo timokokokan. Akin tapaleuiaj keman mochijchiua se Kali kampa tiMosentiliaj oso okseki kalmej kampa titaueyichiuaj, kinmachtiaj maj tekitikan kemej amo mokokoskej. Nochi nejin kalmej nochipa kinitaj maj kisentokakan kualtiakan ijkon kemej tajtani tekiuaj.

Tikinpaleuiaj akin kinpanoua se tetsauit. Itech xiuit 2022 mochiuak kemej 200 uejueyi tetsaujmej, uan inechikol Jehová kinpaleuij miakej akin tajyouijkej. Tikuikej tomin kemej 12 millones de dólares tein tokniuan kitemakaj para tikinmakaskej tein kinpolouaya.

Keman itech xiuit (2014) peuak momoyaua kokolis ébola ompa África Occidental uan itech xiuit (2018) ompa República Democrática del Congo, tiitaixpantijkauan Jehová tikinmachtijkej sekin toni kichiuaskej para amo momauaskej ika nejin kokolis tein temiktij. Tikintitankej sekin maj kitemakatij se tanojnots tein ika tajtoua ke komo titatakamatij timomakixtiskej. Uan nejin kikakkej miak grupos. Itech nochi kalmej kampa titaueyichiuaj, tiktalijkej kani momapajpakaskej achto ke kalakiskej. Tikiniluijkej ke semi monekia maj momapajpakakan uan no tikinmelauilijkej toni okseki taman ueliskia kichiuaskej para amo momauaskej.

Ompa Sierra Leona, itech radio kijtojkej ke itaixpantijkauan Jehová tel kuali tein kichiujtoyaj porin kiitayaj keniuj amo momauaskej yejuan uan no kinpaleuijkej oksekin maj amo momauakan ika kokolis Ébola.

Ompa Liberia, itech xiuit 2014 keman momoyaujtoya kokolis Ébola, kitalijkej kampa momapajpakaskej itech se Kali kampa tiMosentiliaj.

a Tein monekia kichiuaskej ne uejkauj ompa Oriente Medio kinextia ke monekia moyekpiaskej kemej kalyetonij uan no kinyekpiaskej oksekin.

¡TAIJXITILIS!