KEMAN tikseliskej se ueyi netetayokolil monekiskia techolinis maj timotasojkamatikan. Jesús kinextij ke moneki se motasojkamatis keman kinpajtij majtakti takamej akin kipiayaj se kokolis tein tepinaujtij uan itech nejon tonalmej amo onkaya pajti. Semej nejon takamej “moualkuepato uan kimouistilijtiualaya Totajtsin Dios ika ueyi itsajtsilis”. Jesús kijtoj: “Namechpajtij nanmajtakme. Uan in oksekin chiknauin” (Lucas 17:12-17). Nejin tajkuilol techmachtia ke niman uelis tikelkauaskej tein toka kichiuaj oksekin.

Kemej tikitanij, amo onkak okse netetayokolil maj okachi kipia ipatiuj kemej taxtauil. Amo techmakanij okse okachi ueyi netetayokolil. Yejua ika, ¿keniuj uelis tiktasojkamatiliskej Dios tein toka kichiuani?

• Xikonixmati akin kitemaka netetayokolil. Taxtauil amo sayoj ijkon kitemaka nemilis nochipaya. Ta, moneki tikchiuaskej tein Jesús kitataujtij iPopaj: “Ne nachipa nemilis kijtosneki yejua nijin:  Ke in taltikpakuani ma mitsonixmatikan Tejuatsin ke tion Dios tion Yolmelauaktsin, uan sayo Tejuatsin tion Dios. Uan in taltikpakuani ma nechixmatikan Nejuatsin ke ni Jesucristo ten Tejuatsin tinechonualtitanik ya nikan taltikpak” (Juan 17:3). Komo tikonmatiskia ke se takat mitsonmakixtij keman katka tionnojnel, ¿amo tikonnekiskia okachi tikonixmatis uan tikontajtanis keyej kichiuak? Jiova Dios, akin kitemakak taxtauil kemej se netetayokolil tein ika techmakixtij, kineki maj tikixmatikan uan maj kuali iuan timouikakan. Biblia kijtoua: “Ximotokikan iuan Dios uan Yejuatsin no motokis namouan” (Santiago 4:8).

• Xiontakuaujtamati itech taxtauil. “Nochi nekes ten takuautamatiske iuan ne Ikonetsin Dios, yejuan nojonkes kipiaske ne yek nemilis nachipa.” (Juan 3:36.) ¿Toni kijtosneki se takuaujtamatis? Kijtosneki se kinextis. Komo titakuaujtamatij itech taxtauil tiknextiskej ika tein tikchiuaskej (Santiago 2:17). Komo tikonneki tikonselis se netetayokolil, moneki tionmomatilanas uan tikonkuis. No ijkon, moneki “tionmomatilanas” uan tikonselis taxtauil tein Dios techmaka kemej se netetayokolil. Nejin kijtosneki ke timomachtiskej keniuj Dios kineki maj tinemikan uan maj ijkon tikchiuakan. * Xikontataujti Dios uan xikonilui maj mitsontapojpolui uan maj mitsonpaleui xikonpia se kuali tanemilil. Xionmotoki iuan uan senkis xikonmati ke taxtauil senkis kinualkuilis tein kuali satepan, yolseuilis uan kuali nemilis akin itech takuaujtamatiskej (Hebreos 11:1).

• Xionmosentili ijkuak moelnamikis imikilis Jesús. Kemej Jesús amo kinekia maj tikelkauakan imikilis, kiixtalij maj moelnamiki xijxiujtika. Yejua kijtoj: “Xiksentokakan xikchiujtokan nejin uan ika xinechelnamikikan” (Lucas 22:19, TNM). Nejin xiuit, tiitaixpantijkauan Jiova tikelnamikiskej imikilis Jesús martes 11 metsti abril, satepan ke pankalakis tonaltsin. Itech nechikol tein ika moelnamiki imikilis Jesús tein uejkaua kemej se hora, momelauas tein kijtosneki imikilis uan keniuj techpaleuia axkan uan keniuj techpaleuis satepan. Xiuit tein tiualpanokej itech nochi taltikpak mosentilijkej kemej 20 millones. Timitsonyoleuaj touan xionmosentili uan ika xikonnexti ke tikontasojkamatilia Dios nejon ueyi netetayokolil tein techmakani.