Biblia amo kijtoua ke tisejsemej tikpiaj se ángel akin techyekpia. Semi melauak ke Jesús kijtoj: “Amo no xikinixtopeuakan nion senme de nijin nokonetsitsin ten nouan pouij [imomachtijkauan Jesús]; uan no namechilia ke nepa eluiyaktsinko in ángeles [...] kinyekpixtokke nijin konetsitsin ne ten nouan taneltokatokke” (Mateo 18:10). Sayoj ke, nejin amo kijtosneki ke tisejsemej tikpiaj se ángel akin techyekpia; ta Jesús kijtojtoya ke ángeles ininka motekipachouaj nochin akin kichiuaj kemej Cristo. Yejua ika, itatojtokakauan Cristo amo kichiuaj teisa tein uelis kinijtakos porin kinemiliaj ke ángeles kinmatampauiskej.

¿Kijtosneki nejon ke ángeles amo techpaleuiaj? Amo (Salmo 91:11). Sekin kineltokaj ke Dios kinyekpiani uan kinyekanani inintechkopa ángeles, ijkon kemej kijtoua Kenneth, akin ika titajtojkej itech yekinika tamachtilis. Maski amo uelis tikijtoskej ke yekmelauj ijkon panok, xa melauak tein kijtoua. Miakpa, itaixpantijkauan Jiova kimachilianij ininnepaleuil ángeles keman kiteixmatiltiaj iTajtol Dios. Sayoj ke, kemej ángeles amo ueli tikinitaj, amo uelis tikijtoskej hasta kani Dios techpaleuia inintechkopa. Sayoj ke kuali yetok maj tiktasojkamatilikan toTajtsin Dios tein yeski nepaleuil tein tiknemiliaj ke techmakani (Colosenses 3:15; Santiago 1:17, 18).