Noyampa taltikpak millones kineltokaj ke itech Navidad Jesucristo xiuajsi, yejua ika iluichiuaj. Sayoj ke ¿tionmotajtaniani ox yekinika itatojtokakauan Cristo akin okachi iuan moajsiaj, kichiuayaj Navidad? Uan no, ¿tikonmati toni kijtoua Biblia keman aksa iluichiua ijkuak xiuajsi? Tikmatiskej itanankililuan nejin netajtanilmej techpaleuis maj tikixejekokan ox itatojtokakauan Cristo moneki tikchiuaskej Navidad.

Itech Biblia amo moijtoua maj iluichiuanij itech tonal keman Jesús yolik nion ijkuak yolik okse itekitikauj Dios. ITajtol Dios sayoj ika tajtoua omen akin iluichiujkej keman xiuajsikej, sayoj ke nion semej kitekitiliaya Jiova, Dios akin ika tajtoua Biblia. Uan ompa mochiuak tein amo kuali (Génesis 40:20; Marcos 6:21). Ijkon kemej kijtoua Encyclopædia Britannica, itatojtokakauan Cristo itech yekinika siglo senkis kiixtopeujkej kichiuaskej “iluit tein kichiuayaj akin amo taneltokayaj keman aksa xiuajsia”.

Biblia amo kijtoua kemanian yolik Jesús. Diccionario de historia de la Iglesia kijtoua: “Amo moajsi nion se taman tein senkis kinextia tonal oso metsti keman yolik Cristo”. Senkis tikmatij ke komo Jesús kinekiskia maj imomachtijkauan iluichiuakan keman xiuajsiskia, kiitaskia maj kimatikan tonal keman yolik.

Uan no, itech Biblia nion seko ixnesi maj Jesús oso semej imomachtijkauan kichiuanij Navidad. New Catholic Encyclopedia, kijtoua ke Navidad yekinika ika motajtoj itech “Cronógrafo de Filócalo, se calendario tein kikuiaj romanos kemej itech xiuit 336”. Kemej tikitaj, nejon moijtoj miak xiujmej satepan keman motamiijkuiloj Biblia uan tel miak xiujmej satepan keman Jesús moajsia nikan taltikpak. Uan no, Cyclopedia de McClintock y Strong kijtoua ke Navidad amo se iluit tein Dios tanauatij maj mochiua nion ualeujtok itech Nuevo Testamento. *

Ueyi Tamachtijkej, Jesús, senkis kiniluij imomachtijkauan tein kinekia maj kichiuakan uan nejon moajsi itech Biblia. Sayoj ke, amo keman kiniluij maj kichiuakan Navidad. Ijkon kemej se tamachtijkej kichia maj imomachtijkauan amo kichiuakan tein yejua amo kinnauatij, Jesús amo no kineki maj imomachtijkauan ‘kipanauikan san in tanauatilme de Dios’ tein moajsij itech Biblia (1 Corintios 4:6).

Sayoj ke, moajsi se taman tein motelneki tein yekinika imomachtijkauan Jesús kemaj kichiuayaj: kielnamikiskej imikilis Jesús. Yejua kiniluij kemanian monekia kichiuaskej uan kinnextilij keniuj kichiuaskiaj. Tein kinnauatij, ijkon kemej tonal keman momikilij, ijkuiliujtok itech Biblia (Lucas 22:7, 19; 1 Corintios 11:25, TNM).

Kemej tikitakejya, Navidad mochiua porin aksa xiuajsi, uan itatojtokakauan Cristo itech yekinika siglo amo kichiuayaj nejon tein ualeuaya itech taneltokalis tein amo melauak. Uan no, Biblia amo kijtoua maj Jesús nion okse aksa kichiuani Navidad. Yejua ika, millones akin kichiuaj kemej Cristo noyampa taltikpak kiixtalianij amo kichiuaskej Navidad.