¿Tionmotajtaniani keniuj tionnemis satepan tejuatsin uan mokalyetouanij? ¿Tikonnemilia ke nankipiaskej miak tomin uan namechtasojtaskej oso nankipanoskej tatasojtilis uan nanmomachiliskej nanmoselti? ¿Nannemiskej miak xiujmej oso niman nanmomikiliskej? Miak xiujmejya miakej motajtanianij nejon.

Itech totonaluan, tamatinij kiixejekouaj tein panos satepan ika tein mochiujtok semanauak taltikpak. Maski miak taman tein kijtouanij mochiuani, itech okseki senkis mopolouanij. Kemej itech xiuit 1912, Guglielmo Marconi, akin kichijchiuak se taman tein tamati kemej radio kijtoj ke ijkuak mochijchiuaskiaj teposmej kemej nejon kitsakuiliskia neteuilis. Uan se akin taixyekanaya itech Decca Record kampa mochijchiuaj discos kinixtopeuak Beatles itech xiuit 1962 porin kinemiliaya ke akin kitsotsonayaj guitarra amo mokakiskiajok.

No moajsij akin kitemouaj kimatiskej toni panos satepan ika naualot. Sekin kintajtaniaj sitalixmatinij, yejua ika itech miak amatajkuilolmej uan periódicos nochipa nesij horóscopos. Oksekin kintemouaj akin kitekitiltiaj barajas oso akin kijtouaj ke uelij kiitaj itech imay aksa tein kipanos satepan.

Ne uejkauj, miakej akin kinekiaj kimatiskej tein panos satepan, kintajtaniayaj tiopixkamej akin tajtouayaj inintenkopa tiotsin tein kiueyichiuayaj. Yejua nejon tein xa kichiuak Creso, akin tekiuajtia Lidia. Achto ke kiixnamikiskia Ciro akin tekiuajtia Persia, kintitanilij tiopixkamej tein moajsia Delfos (Grecia) netetayokolilmej tein semi patiyojkej porin kinekia kimatis ox tataniskia. Ompa kiluijkej ke komo kiixnamikia Ciro, kiixpoloskia “se ueyi tekiuajyot”. Kemej kineltokak ke tataniskia, Creso kiixnamikito Ciro, sayoj ke tein ixpoliuik yejua itekiuajyo.

Nejon tein kiluijkej Creso amo tapaleuij, porin maski mochiuaskia tein moijtojka amo moijtoj akoni tataniskia. Nejon tein kinekia kimatis Creso senkis amo kipaleuij. ¿Okachi kinpaleuiani axkan akin kitemouaj kimatiskej tein panos satepan?