Ijkon kemej achto kijtoj Jesús, kuali tanauatilmej ika iTekiuajyo Dios moteixmatiltijtok semanauak taltikpak (Mateo 24:14). Biblia, itech amatajkuilol Daniel kimelaua ke nejin Tekiuajyot yejua se taixyekanalis tein Dios kiixtalij. Itech Daniel capítulo 2 achto moijtojka ke uejueyi tekiuajyomej taixyekanaskiaj tein peuaskia iuan ne uejkauj altepet Babilonia uan oksekin moajsiskiaj hasta axkan. Itech versículo 44, techiluia tein panos satepan:

“Dios akin nemi iluikak kitalis se tekiuajyot tein amo keman ixpoliuis. Uan nejin tekiuajyot amo panos imako okse xolal. Kikuechos uan kitalis itamilis nochi nejin tekiuajyomej, uan yejua uejkauas nochipaya”.

Nejin uan okseki taman tein Biblia achto kijtojka kinextia ke iTekiuajyo Dios kiixpatas nochi tekiuajyomej uan ke kiualkuis yekyetolis uan yeknemilis nikan taltikpak. ¿Keniuj tinemiskej keman iTekiuajyo Dios taixyekantos? Maj tikitakan seki  taman tein Dios motenkauani uan tein amo uejkaua mochiuas.

Amo akinok kipias tajtakol uan nemiskej nochipaya itech taltikpak tein mochiuas se xochital. Yejua nejon tein motenkauani Jiova toTachijchiujkauj akin semi techtasojta.

• AMO ONKASOK NETEUILISMEJ

  Salmo 46:9. Dios “kitamia neteuilismej hasta kampa tami taltikpak. Kiposteki arco uan yekmelauj kikojkotona lanza; kinchichinoua carruajes itech tit”.

  Xikonnemili keniuj tinemiskiaj komo taixmatilis uan tomin tein mokui keman mochijchiuaj teposmej tein ika tateuiaj ika kinpaleuiskiaj oksekin. Keman iTekiuajyo Dios taixyekanas, tamis neteuilis ijkon kemej Dios motenkauani.

• AMO AKINOK KOKOLISPEUAS

  Isaías 33:24. “Nion se taltikpaknenkej kijtos: ‘Nimokokoua’.”

  Xikonnemili ke tinemij kampa amo akinok kipia se kokolis itech iyolo, nion cáncer, diabetes nion okse kokolis. Amo monekiskejok kaltapajtiloyamej nion pajti. Yejua nejon tein mochiuas: amo akinok kokolispeuas.

• ONKAS TEL MIAK TAKUAL

  Salmo 72:16. “Onkas tel miak tatet nikan taltikpak; uan ininkuapan tepemej onkas okachi miak.”

  Onkas miak takual itech taltikpak tein kinajsis nochin uan kuali moxejxelos. Amo akinok kipanos tatasojtilis nion kokolispeuas porin kipanoua mayan.

• AMO AKINOK TAJYOUIS NION MOMIKILIS

  Apocalipsis (Revelación) 21:4. Dios “kinelkaualtis de ninchokilisuan de nochi itaneltokakauan. Uan amo aken momikilis ok; uan amo aken mochoktis ok; [...] uan amo aken yoltajyouis ok. Uan ijkon yeski porin nochi tajtamik ya de ne achtopa onkaya”.

¿Tikonnemilia ke amo keman mochiuas nejon? Maski miakej kinyolnotsa tein Biblia kijtoua ke mochiuas, miakej amo uelij kineltokaj ke uelis nemiskej nochipaya. Uan nejon amo se kimoujkaita porin amo akin kiitanij maj nemi nochipaya.

Tinochin titajtakolejkej uan timomikiliaj, yejua ika miakej kinemiliaj ke ixyetok titajyouiskej. Sayoj ke, Dios amo kinekia maj tikpanokan nejon.

Dios kineki maj titakuaujtamatikan itech tein motenkaua kichiuas, yejua ika itech iTajtol senkis techiluia: “Ijkon mochiuas tajtol tein kisa notenoj. Amo ijkon mokauas, ta yekmelauj mochiuas ijkon kemej nikyolnejneki, uan mochiuas ijkon kemej niktitani maj mochiua” (Isaías 55:11).

Biblia kijtoua ke Dios “amo tekajkayaua” (Tito 1:2). Uan kemej yejua Jiova akin motenkauani kiualkuis nejin tatiochiualismej, kuali tikchiuaj komo timotajtaniaj nejin: “¿Yekmelauj uelis tinemiskej nochipaya itech taltikpak keman mochiuas se xochital? ¿Toni moneki tikchiuaskej uan ijkon tikpiaskej nochi tein Dios motenkauani?”. Okseki tamachtilismej mitsonpaleuiskej xikonnankili nejin netajtanilmej.