Rosa kijtoua: “Nikpia se kokolis tein nochankauan no kipianij tein semi nechtajyouiltia. Nejon kichiua maj amo kualtsin ninemi”. Se taman tein semi kitekipachouaya yejua ke kiouijmakaya senkis tanemilis itech tein momachtijtoya itech Biblia. Semi kiyolseuij tein kijtoj Jesús itech Mateo 19:26: “Sayo Dios uelis nochi kichiuas”. Rosa kiitak ke onkak miak taman kemej uelis se momachtis. Kemansa amo semi uelia taixtajtoltiaya porin motelkokouaya, yejua ika peuak kikaki ika grabación Biblia uan amaixmej tein ika tajtouaj Biblia. * Yejua kijtoua: “Komo amo moajsiskia nejin taman, amo ueliskia nikchikauas notakuaujtamatilis itech Dios”.

Keman Rosa motayokoltia porin amo ueli kichiua tein achto kichiuaya, kiyolseuia tein kijtoua 2 Corintios 8:12: “Komo se tokniu kiyolnejneki tapaleuijtinemis, [...] Dios kiueyipouas itapaleuilis [...] ijkon keme ne tokniu ueli tapaleuia. Porin Totajtsin amo kitajtania tapaleuilis komo se tokniu amo kipia tenika tapaleuis”. Nejin kielnamiktia ke Dios yolpaki porin kichiua nochi tein ueli maski mokokoua.

Diana, akin ika titajtojkejya, kielnamiki: “Semi nechyolkokoj  keman momikilij nosiuapil, akin sayoj kipiaya 18 xiujmej, yejua ika niknemilij ke amo ueliskiaok ninemis. Mopatak nonemilis”. Diana semi kiyolchikauak Salmo 94:19, kampa akin kijkuiloj Salmo mokuikatij iixpan Dios: “Keman nonetekipacholuan motelmiakilijkej, tinechyolchikauak uan tinechyolseuij”. No kijtoua: “Niktajtanij Jiova maj nechpaleui maj nikajsi se tekit tein nechyolseuiskia”.

Diana tel tekitik itech se taman tein kichiuaya maj semi yolpaki. Satepan, yejua moitak ke tamatia kemej colores tein konemej ika kintapaluiaj taixkopimej: kinkuij hasta tein postektokej. No ijkon, maski yejua kimachiliaya ke postektoya kemej nejon colores, ueliskiaok kinpaleuis oksekin. Yejua kijtoua: “Nikitak ke, ijkuak nikuia tein Biblia tayolmajxitia uan tanemililmej tein kipia uan ika nikinyolseuiaya akin nikinmachtiaya ika Biblia, Jiova no nechyolseuijtoya nejua”. Kijkuiloj inintokay akin Biblia kijtoua ke kipanokej tekokojkayot. ¿Toni momachtij? “Nochin yejuan semi motataujtiayaj”. No momachtij ke “komo amo se kiixtajtoltia Biblia, amo se kiajsis nepaleuil”.

Sayoj ke Biblia kimachtiani Diana okse taman: maj okachi tanemili itech tein kipias satepan uan amo itech tein kipanouani. Semi kiyolchikaua Hechos 24:15 kampa kijtoua tein mochiuas satepan: “Dios kinpankixtis yoltokke nochi in ánimajme, [oso mikemej] amo sayo in yolkualime. Ta, no nekes ten amo yolkualime”. ¿Yekmelauj kineltoka ke Jiova oksepa kimakas nemilis isiuapil? Yejua kijtoua: “Senkis nikmati ke oksepa nikitas nosiuapil. NoTajtsin Dios kijkuilojya itech ‘iamatajkuilol’ tonal keman oksepa timoitaskej. Kemej yeskia nikitstokya iuan niijkatok kalixpan, niktasojtatok ijkon kemej niktasojtak ijkuak yolik”.