XA SEMI tionmotekipachoj keman mitsoniluijkej ke tikonpia se ueyi kokolis tein uelis kichiuas xionmomikili. Oso xa se mochankauj kipanoua nejon. Uan no, semi se moui uan tesioujtij. Uelis okachi ijkon se momachilis keman moneki miakpa se yas tapajtiloyan, keman patiyoj tekisa se mopajtis oso keman pajti semi teijtakoua. Nejon uelis kichiuas maj se kinemili ke amo se taxikos.

¿Toni uelis mitsonpaleuis? Miakej yolseuij keman kichiuaj netataujtil uan keman kiixtajtoltiaj itech Biblia textos tein kinyolchikauaj. No kinyolchikaua  keman ininchankauan uan akin iniuan mouikaj kintasojtaj uan kinpaleuiaj.

Robert, se takat akin kipia 58 xiujmej, kijtoua: “Xiontakuaujtamati iuan Dios uan yejuatsin mitsonpaleuis xikonxiko kokolis. Xikontataujti Jiova uan xikonilui keniuj tionmomachilia. Xikontajtani maj mitsonpaleui maj ueli xikonnextili mochankauan ke amo tionmosenkaua uan maj ueli xionyolseujto”.

Robert no kijtoua: “Semi tepaleuia keman se ichankauan teyolchikauaj. Mojmostaj, semej nechnotsa uan nechtajtania keniuj niyetok. Uan no, oksekin akin iniuan nimouika akin okseko nemij no nechyolchikauaj. Nejon nechpaleuia maj kuali nimomachili uan maj amo nimosenkaua”.

Komo tikonnemilia tikonkalpanos aksa akin mokokoua uan kuali iuan tionmouika, mitsonpaleuis tein kijtoua Linda. Yejua kijtoua: “Kokoxkej kineki nemis kemej ipa uan kemansa xa amo kinekis ika tajtos kokolis tein kipia. Yejua ika, ximonojnotsakan ika okseki taman”.

Maski tikonpias se ueyi kokolis, uelisok tionyolpakis porin Dios mitsonmakas chikaualis uan no mitsonyolseuis textos itech Biblia. No mitsonpaleuis netasojtalis tein mitsonnextiliskej mochankauan uan akin iniuan tionmouika.