¿Keyej tiknekij tinemiskej nochipaya? Biblia kijtoua ke Dios techchijchiuak maj tiknekikan tinemiskej nochipaya (Eclesiastés 3:11). Biblia no kijtoua ke Dios “tetasojtatinemi” (1 Juan 4:8). Kemej Dios techtasojta, amo taixejekol yeskia maj techchijchiuani maj tiknekikan tinemiskej nochipaya sayoj ke maj timomikilianij.

Tein melauj, amo akin kineki momikilis. Hasta Biblia kijtoua ke mikilis kemej yeskia se ‘taixnamikkej’ (1 Corintios 15:26). Miakej momikiliaj keman telpochmejok, oksekin nemij okachi tonalmej. Sayoj ke, tinochin timomikiliaj. Miakej amo kiuelitaj itech tanemiliskej mikilis, porin kimouiliaj. Sayoj ke, ¿ejkos tonal keman amo timomikiliskejok?

¿Tikonmatia ke Dios amo kinekia maj timomikilikan? Amatajkuilol Génesis, tein moajsi itech Biblia, kinextia ke Dios kinekia maj tinemikan nochipaya nikan taltikpak. Yekinika, Jiova * kualtsin kichijchiuak taltikpak ika nochi tein techpaleuiskia maj tinemikan uan maj tiyolpakikan. Ompa, kichijchiuak yekinika takat, Adán, uan kitalij maj  nemi kampa takualtsinkan ompa Edén. Satepan, Dios kiitak “nochi tein kichijchiujka, uan ¡xikonita!, tel kuali katka” (Génesis 1:26, 31).

Dios kichijchiuak Adán yektik kemej yejuatsin (Deuteronomio 32:4). Uan no, tel kuali kichijchiuak Eva, akin katka inamik Adán, porin amo kipiaya tein amo kuali itech inakayo nion itech itanemilil. Jiova kiniluij: “Xikinpiakan konemej uan ximomiakilikan, ximomoyauakan itech taltikpak uan xikixyekanakan, uan xikinixyekanakan amichimej tein moajsij itech ueyiat uan tapialmej tein patanij iluikak uan nochi tein yoltok tein moolinia itech taltikpak” (Génesis 1:28).

Nejon kijtosneki ke monekia miak tonalmej uan ijkon ueliskia momiakiliskej itech taltikpak. Eva monekia kinpias ikoneuan, uan ikoneuan no kinpiaskiaj ininkoneuan. Ijkon, mochiuaskia tein Dios kinekia porin momiakiliskiaj itech nochi taltikpak (Isaías 45:18). Komo Adán uan Eva amo nemiskiaj miak tonalmej, amo taixejekol yeskia maj Jiova kiniluiani maj momiakilianij komo yejuan amo ueliskia kinixmatiskej nochin ininixuiuan.

Jiova no kinauatij Adán maj kinixyekana tapialmej. Yejua monekia kintalilis inintokay, uan xa itech miak tonalmej kichiuak nejon (Génesis 2:19). Kemej monekia kinyekpias nochin tapialmej, achto monekia kuali kinixmatis, uan nejon no kiuikiliskia miak tonalmej.

Kemej Dios kinnauatij Adán uan Eva maj momiakilianij itech taltikpak uan maj kinyekpianij tapialmej, kinextia ke kinekia maj neminij tel miak tonalmej. Tein melauj, Adán nemik miak xiujmej.

Biblia kijtoua ke achto ke mochiuaskia se tetsaujkakiouit, nochin nemiaj tel miak xiujmej uan amo kemej axkan. Génesis 5:5 kijtoua: “Nochi tonalmej tein Adán nemik ajsik novecientos treinta xiujmej”. Satepan, ininka tajtoua chikuasen takamej akin nenkej panoua novecientos xiujmej: Set, Enós, Quenán, Jared, Matusalén uan Noé, akin kipiaya seiscientos xiujmej keman mochiuak nejon tetsaujkakiouit (Génesis 5:6-27; 7:6; 9:29). ¿Keyej nenkej miak xiujmej?

Yejuan yolkej tepitsin satepan ke Adán uan Eva amo katkajok yektikej. Xa yejua ika itech nejon tonalmej nemiaj okachi xiujmej. Yejua ika, ¿kijtosneki nejon ke komo aksa yektik uelis nemis okachi xiujmej? Uan ¿ejkos tonal keman amo akin momikilisok? Achto ke tiknankiliskej nejin netajtanilmej, moneki tikmatiskej keyej tiueuentsintiaj uan timomikiliaj.