XIONMONEMILI ke itech televisión nesi tein kipanok se tatsotsonkej akin semi tikonuelita kemej tatsotsona. Yekinika nesi keman konetok katka. Ompa, nesi keniuj momamachtiaya tatsotsonas. Satepan, nesi keman tatsotsonak ininixpan tel miakej, keman yajtinemik miak altepemej uan keniuj moteixmatiltijtinemik. Ika tami, nesij seki taixkopimej keman katka xiuejya uan keman momikilij.

Nejin kinextia tein kipanok aksa akin axkan amo nemiok. Akin yeski uelis momikilis maski yeski tamatkej, kuali mauiltia oso okse akin motelixmati. Maski xa kichiujkaya miak taman, xa timotajtaniaj toni okachiok kichiuaskia komo amo ueuentsintiaskia nion momikiliskia.

Tetayokoltij tikijtoskej ke tinochin ijkon techpanoua (Eclesiastés 9:5). Maski tein yeski tikchiuaskej, tiueuentsintiaj uan timomikiliaj. Uan no, uelis techpanos tein amo kuali oso se kokolis uelis kichiuas maj niman timomikilikan. Biblia kijtoua ke titamatij kemej “se mixuak san ten monextia se tepitsin san uan oksepa niman poliui” (Santiago 4:14).

Kemej amo tikmatij kemanian timomikiliskej, miakej kijtouaj: “Ma titatakuakan san uan ma timouintikan san porin mosta timikiske” (1 Corintios 15:32). Sayoj ke, ijkon kichiuaj porin amo kimatij kemanian momikiliskej oso porin kinemiliaj ke amo keman kuali nemiskej. Yejua ika, ajsi tonal keman timotajtaniaj keyej tinemij, uan okachiok ijkon tiknemiliaj keman tikpanouaj se ouijkayot. ¿Kani uelis tikajsiskej tanankilil?

Miakej kitemouaj tanankilil itech tein tamatinij kiajsinij. Seki tamatinij uan tapajtianij kiajsinij seki taman tein tapaleuiani maj tinemikan okachi tonalmej, uan sekin kisentokaj kitemouaj maj okachi tinemikan. Maski ijkon, tiksentokaj timotajtaniaj: ¿Keyej tiueuentsintiaj uan timomikiliaj? ¿Ejkos tonal keman amo akin momikilisok? Itech okseki tamachtilismej tiknankiliskej nejin netajtanilmej. No tiknankiliskej nejin netajtanil: ¿Ixyetok maj tinemikan sayoj seki tonalmej?