MASKI Adán uan Eva techpanoltilijkej tajtakol uan mikilis porin amo tatakamatkej, Dios kisentoka kineki maj tinochin kualtsin tinemikan. Itech iTajtol, Biblia, miakpa techiluia ke amo kipatatok kemej yekinika kiixtalijka maj tinemikan.

• “Akin yolmelaujkej ininaxkatis taltikpak, uan ompa nemiskej nochipaya.” (Salmo 37:29.)

• “Yejuatsin kitamis mikilis nochipaya, uan toTajtsin Jiova akin okachi Ueyi Taixyekankej yekmelauj kinuachilis ininixayo nochin.” (Isaías 25:8.)

• “Totajtsin Dios [...] kitamitanilis ya in mikilis uan amo teyi chikaualis kipia ok in mikilis.” (1 Corintios 15:26.)

• “Amo aken momikilis ok; uan amo aken mochoktis ok; uan amo aken motekipachos ok; uan amo aken yoltajyouis ok.” (Apocalipsis [Revelación] 21:4.)

¿Toni kichiuas Dios tein tapaleuis maj amo akin momikiliok? Kemej tikitakejya, Biblia kijtoua ke “akin yolmelaujkej [...] nemiskej nochipaya” nikan taltikpak. Sayoj ke, Biblia no kijtoua ke maski moajsiskej akin kichiuaj tein kuali, tinochin titajtakouanij (Eclesiastés 7:20). ¿Kijtosneki nejon ke Dios amo moyekanas ika itanauatiluan uan techkauas maj tinemikan nochipaya maski tikpiaj tajtakol? Amo. Yejuatsin amo keman kichiuaskia nejon, porin “Totajtsin Dios amo tekajkayaua” (Tito 1:2). Komo ijkon, ¿keniuj Dios kichiuas maj kualtsin tinemikan ijkon kemej kiixtalijtoya?

Kemej Jiova techtasojta, kitemakak se taxtauil tein techpaleuis maj amo timomikilikanok. Biblia kijtoua ke se taxtauil yejua ipatiuj tein motemaka tein ika se kiixtaua teisa tein moijtakoj oso tein ika momelaua teisa. Nejon taxtauil moneki yeski ajsitok. Kemej tinochin tikpiaj tajtakol uan timomikiliaj, Biblia kijtoua: “Nion semej yejuan ueli kimakixtia se iikniuj, nion ueli kimaka Dios se taxtauil tein ika mopaleuis (uan ipatiuj taxtauil ika ininnemilis semi ueyi uan nochipa amo uelis se kiixtauas)” (Salmo 49:7, 8).

Keman aksa akin tajtakolej momikilia, kiixtaua itajtakoluan. Amo uelis momakixtis iselti nion kiixtauas itajtakoluan okse (Romanos 6:7). Monekia maj aksa akin amo kipiaskia tajtakol toka kitemakani inemilis. Kemej yektik yeskia, amo kiixtauaskia itajtakoluan, ta totajtakoluan (Hebreos 10:1-4).

Yejua nejon tein Dios kiixtalij kichiuas. Kiualtitanik iKonetsin, Jesús, nikan taltikpak kemej se takat akin amo kipiaya tajtakol (1 Pedro 2:22). Jesús kijtoj keyej kiualtitankej. Yejua kijtoj: “Niktemakas nonemilis para kixtauas in tajtakol uan para ijkon nikinmakixtis miak tagayot” (Marcos 10:45). Yejua momikilij porin kiixtauak totajtakoluan uan ijkon techpaleuiskia maj amo timomikilikanok uan maj ueli tinemikan nochipaya (Juan 3:16).

Axkan mochiujtokya tein Biblia achto kijtojka. Nejin tonalmej semi ouijkej uan nejon kinextia ke amo uejkaua ixpoliuis nochi tein amo kuali (2 Timoteo 3:1). Nejon mochiuas “tech ne tonal de ueyi tatsakuiltilis, ijkuakon Dios kinixpolos  nochi ne taka tamouiskapoloani” (2 Pedro 3:3, 7). Sayoj ke, akin kitasojtaj Dios makisaskej uan kiseliskej “nemilis nachipa” (Mateo 25:46).

Uan no, tel miakej akin momikilijkejya uelis nemiskej nochipaya keman Dios oksepa kinmakas nemilis. Jesús ueli oksepa kinmaka nemilis akin momikilijkejya. Ompa xolal Naín momikilijka ikoneuj se siuatsin akin amo kipiayaok inamik, uan kemej Jesús kiiknelij, oksepa kimakak nemilis ikoneuj nejon siuatsin (Lucas 7:11-15). Pablo kijtoj: “Nitakuautamati iuan Dios de ke se tonal Totajtsin Dios kinpankixtis yoltokke [...] amo sayo in yolkualime. Ta, no nekes ten amo yolkualime”. Nejin tein satepan mochiuas senkis kinextia ke Dios semi techtasojta (Hechos 24:15).

Tel miakej uelis nemiskej nochipaya. Biblia kijtoua: “Akin yolmelaujkej ininaxkatis taltikpak, uan ompa nemiskej nochipaya” (Salmo 37:29). Ijkuak, ika miak yolpakilis kijtoskej tein Pablo kijtoj panoua dos mil xiujmejya: “Amo uelis techtanilis ok ne chikaualis de mikilis. Uan in mikilis [...] amo uelis ok kimiktis totakayo” (1 Corintios 15:55). Itech nejon tonalmej, amo akin momikilisok.