“Kuak namejuan nanmotatatautiliske iuan Dios, ijkuakon amo yejua san xikkejkeptokan” (Mateo 6:7).

Jiova amo kineki maj miakpa sayoj se taman tikiluikan nion maj tikixtajtoltikan itech se amaix. Yejuatsin kineki maj tikiluikan tein tikmachiliaj. Xikonnemili ke se akin kuali iuan tionmouika mojmostaj mitsoniluia sayoj se taman. ¡Xa mitsonyolajxitiskia! Akin kuali mouikaj amo teyi motatiliaj uan nochi motapouiaj. Keman tikiluiaj Dios tein tikmachiliaj tiknextiaj ke kuali iuan timouikaj.

“Kuak [...] nankitajtaniliaj Dios tensa, ijkuakon amo teyi uelis nankiseliske porin sayo nankitajtaniliaj ika takajkayaualis” (Santiago 4:3).

Maj amo tikchiakan maj Dios technankili keman tiktataujtiaj komo tiktajtaniaj tein amo kiuelita. Xikonnemili ke aksa mauiltiti porin kineki ijsiujka kitanis tomin uan kineki kipias suerte. ¿Kinankilis Jiova tein tajtani maski techyekiluijya maj amo tixijxikuimej nion maj tikneltokakan ke uelis tikpiaskej suerte? (Isaías 65:11; Lucas 12:15). Maj amo tikchiakan maj Jiova technankili komo tiktajtaniaj nejon. Komo tiknekij maj Dios technankili, moneki timotataujtiskej ijkon kemej Biblia techiluia.

 “Akin amo kineki kitakamatis tanauatil, hasta inetataujtil, Dios amo kikaktani” (Proverbios 28:9).

Tein mochiuak ne uejkauj kinextia ke Dios amo kinkakia keman motataujtiayaj akin amo kitakamatiaj uan axkan kisentoka ijkon kichiua (Isaías 1:15, 16; Malaquías 3:6). Komo tiknekij maj Dios techkaki moneki tiktakamatiskej. ¿Uan komo tikchiujkej tein amo kuali? ¿Kijtosneki ke Jiova amo keman techkakis? Amo, yejuatsin techtapojpoluis komo techyolkokoua tein tikchiujkej uan timochikauaj tikyolpaktiskej (Hechos 3:19).