María, Raúl, Arne uan miakejok, kiitaj ke se kualtsin netetayokolil maj ueli motataujtikan. Keman motataujtiaj ueli tajtouaj iuan Dios, kitasojkamatiliaj uan kiluiaj maj kinpaleui. Yejuan kineltokaj ke amo nenkaj keman kitataujtiaj Dios ijkon kemej Biblia kijtoua: “Tikpiaj ya se ueyi yoltakuautamatilis iuan Dios porin [...] komo tiktajtaniliaj Dios tensa ijkon keme yejua in itanejnekilis [...], ijkuakon Totajtsin Dios techkakilia” (1 Juan 5:14).

Sayoj ke, miakej kinouijmaka kineltokaskej tein Biblia kijtoua. Steve techiluia tein kinemilia: “Keman nikpiaya 17 xiujmej, momikilijkej eyin akin kuali iniuan nimouikaya, se momikilij keman kitelojkej carro uan omen moaeltsimijkej”. ¿Toni  kichiuak Steve? “Niktataujtij Dios uan niktajtanij keyej ijkon mochiuak, sayoj ke amo nechnankilij. Yejua ika nimotajtanij: ‘¿Tapaleuia maj se motataujti?’”. Miakej no ijkon momachilianij, uan yejua ika kinemiliaj ke xa nenkaj motataujtiaj.

Miak taman kichiua maj kinemilikan ke amo tapaleuia maj se motataujti. Miakej kijtouaj ke kemej Dios nochi kimati, kiitstok tokuejmoluan uan tein techpanoua. Yejua ika amo monekiok maj se kilui tein techpanoua.

Miakej kinemiliaj ke Dios amo kinekiok kinkakis porin kichiujkej tein amo kuali. Jenny kijtoua: “Nikmachilia ke amo teyi nichiujkej uan nejon amo nechpaleuia. Nikchiuak seki taman tein satepan niknemilij maj amo nikchiuani, yejua ika niknemilia ke amo kinamiki maj Dios nechkaki”.

¿Toni tikonnemilia tejuatsin? ¿No ijkon tiontanemilia keman tionmotataujtia? Komo ijkon, mitsonyolpaktis tikonmatis ke Biblia kinankilia tein tikonneki tikonmatis. Uelis tikonneltokas tein Biblia tamachtia keman ika tajtoua netataujtil. * No mitsonpaleuis xikonnankili nejin netajtanilmej:

• ¿Techkaki Dios keman tiktataujtiaj?

• ¿Keyej amo nochin kinnankilia keman motataujtiaj?

• Komo tiknekij maj Dios techkaki, ¿keniuj moneki tiktataujtiskej?

• ¿Keniuj mitsonpaleuis xionmotataujti?