¿Techkaki Dios keman tiktataujtiaj?
¿Tionmotajtaniani ox Dios mitsonkaki keman tikontataujtia? Komo ijkon, amo sayoj tejuatsin ijkon tikonnemilia. Miakej kitajtanianij maj Dios kinpaleui keman kipiaj kuejmolmej. Sayoj ke, kisentokaj kipiaj kuejmolmej. ¿Kijtosneki ke Dios amo techkaki keman tiktataujtiaj? Amo. Biblia kijtoua ke Dios techkaki keman timotataujtiaj komo tikchiuaj kemej moneki. Maj tikitakan tein kijtoua Biblia.
DIOS TECHKAKI
“NoDios, akin tikaki netataujtilmej, mouan motokiskej nochi[n]” (Salmo 65:2).
Sekin motataujtiaj porin kinpaleuia maj kuali momachilikan maski amo kineltokaj ke aksa kinkaki, sayoj ke amo sayoj techpaleuia maj kuali timomachilikan keman tikpiaj kuejmolmej. Biblia techiluia ke “Jiova * amo uejka moajsi iniuan nochin akin kinotsaj, nochin akin kinotsaj kemej kineki [...]; kinkaki keman kitsajtsiliaj maj kinpaleui” (Salmo 145:18, 19).
Yejua ika, uelis tikneltokaskej ke Jiova kinkaki keman kitataujtiaj akin kiueyichiuaj. Ika netasojtalis yejuatsin techiluia: “Namejuan nanechnotsaskej [...] uan nanechtataujtiskej, uan nejua namechkakis” (Jeremías 29:12).
DIOS KINEKI XIKONTATAUJTI
“Xiksentokakan de nanmotatatautiliske iuan Dios” (Romanos 12:12).
Biblia techiluia maj miakpa tiktataujtikan Dios uan keman yeski. Moyekita ke Jiova kineki maj tiktataujtikan (Mateo 26:41; Efesios 6:18).
¿Keyej Dios kineki xikontataujti? Ika xiontanemili nejin: ¿Keyej se tetat kiuelita maj ikonetsin kitajtani maj kipaleui? Keman kikaki tein kiluia, itat kimati ke iuan takuaujtamati uan kitasojta maski kimattok tein kipoloua oso tein kimachilia. No ijkon, keman tiktataujtiaj Jiova tiknextiaj ke iuan titakuaujtamatij uan tiknekij timotokiskej iuan (Proverbios 15:8; Santiago 4:8).
DIOS MOKA MOTEKIPACHOUA
“Xikpanoltilijtiyakan Dios nochi namoyolkuejmololisuan porin Yejuatsin semi namechyolnejneki de namechyekpixtinemis” (1 Pedro 5:7).
Kemej Dios techtasojta uan toka motekipachoua kineki maj tiktataujtikan, kiitstok tokuejmoluan uan kineki techpaleuis.
Tekiuaj David kitajtanij Jiova maj kipaleui uan kiluij tein kinemiliaya uan tein kimachiliaya (Salmo 23:1-6). ¿Keniuj Dios kiitaya David? Semi kitasojtaya uan nochipa kikakia keman kitataujtiaya (Hechos 13:22). No ijkon, Dios techkaki porin toka motekipachoua.
“NIKTASOJTA JIOVA, PORIN YEJUATSIN KIKAKI NOTAJTOL”
Nejin tajtolmej tikajsij itech se salmo tein kipia Biblia. Akin kijkuiloj nejin salmo senkis kimatia ke Jiova kikakia keman kitataujtiaya uan nejon semi kipaleuij. Kimachiliaya ke Dios iuan yetoya uan uelik kixikoj ouijkayomej tein kipanok (Salmo 116:1-9).
Nochipa timotataujtiskej komo tikneltokaj ke Dios techkaki. Maj tikitakan tein kipanok se takat akin nemi kampa ika norte ompa España uan monotsa Pedro. Ikonetsin akin kipiaya 19 xiujmej momikilij porin se tepos kitopeuak. Semi ouij tein kipanotoya, yejua ika Pedro kiluij Dios keniuj momachiliaya uan miakpa kitataujtij maj kiyolchikaua uan maj kipaleui. ¿Keniuj kipaleuij? Pedro kijtoua: “Jiova nechnankilij keman niktataujtij. Nonamik uan nejua tikitakej keniuj Dios techpaleuij uan techyolseuij inintechkopa tokniuan”.
Miakpa Dios technankilia keman techpaleuiaj uan technextiliaj ke techtasojtaj akin iniuan kuali timouikaj.
Maski keman motataujtijkej amo kichiuak maj ininkonetsin oksepa nemi, semi kinpaleuij Pedro uan ichankauan. Inamik akin monotsa María del Carmen nochipa kielnamiki: “Keman nimotataujtiaya nechpaleuiaya maj nikxiko tayokol. Nikmatia ke Jiova kimatia tein nikmachiliaya porin keman niktataujtiaya, kualtsin nimomachiliaya uan niyolseuia”.
Tein kijtoua Biblia uan tein oksekin kinpanouani kinextia ke Dios techkaki keman tiktataujtiaj. Sayoj ke, Dios amo nochin kinnankilia keman kitataujtiaj. ¿Keyej Dios amo nochin kinnankilia?
^ párr. 5 Jiova yejua itokay Dios (Salmo 83:18).
Xa no tikonuelitas
TANEJMACHTIJKEJ
¿Moneki tikontataujtis Dios?
Dios amo moneki kichiuas uejueyi taman ika ichikaualis uan ijkon kinankilis tein tiktataujtiaj.
SEKI TAMAN TEIN BIBLIA TAMACHTIA TEIN TAYEKANTOKEJ
¿Kikaki Dios nochi netataujtilmej?
¿Kikakis Dios komo aksa kitajtania se taman porin kinejneki se taman tein amo kuali? ¿Uan komo se takat kiteuia inamik uan satepan kitajtania Dios maj kimaka tein kuali?
