KENIUJ TIKCHIUASKEJ MAJ MOTSAKUILI NETAUELITALIS
3 | Xikonkixti netauelitalis itech motanemilil
Biblia kijtoua:
“Xikpatakan namotanemilil para namoyolpataskej. Ijkon uelis kuali nankimatiskej toni kineki Dios xikchiuakan: tein kuali, tein kiyolpaktia uan tein amo teyi kipoloua” (ROMANOS 12:2, TNM).
¿Toni kijtosneki?
Dios kiita tein tiknemiliaj (Jeremías 17:10). Melauj ke moneki kuali tiknemiliskej tein tikijtouaj uan tikchiuaj, sayoj ke amo sayoj nejon moneki. Kemej netauelitalis peua itech toyolo uan totanemilil, moneki amo titanemiliskejok itech tein kichiua maj titetauelitakan. Sayoj ijkon yekmelauj timoyolpataskej uan tiktsakuiliskej netauelitalis.
Uelis tikonchiuas nejin:
Xikonnemili keniuj tikonita oksekin, okachiok akin ixtatamamej oso akin okseko kayomej. Xionmotajtani: “¿Keniuj nikinita? ¿Toni niknemilia ika tein nikmati? ¿No nikinchikoita kemej oksekin?”. Amo xikonita películas oso okseki taman tein uelis kichiuas xiontetauelita oso xiontateui.
ITajtol Dios uelis techpaleuis maj timoijkuanilikan netauelitalis itech totanemilil uan itech toyolo.
Kemansa ouij techkisa tikmatiskej toni tiknemiliaj uan tikmachiliaj. Sayoj ke iTajtol Dios techpaleuia “uan ueli kinextia tein se kiyolnemilia uan tein se kiyolnejneki” (Hebreos 4:12). Yejua ika xionmomachti tein kijtoua Biblia, xikonita ox mouika ika tein tikonnemilia. Uan xionmochikaua tiontanemilis kemej ompa kijtoua. ITajtol Dios ueli “kixitinia tein kemej yeskia uejueyi tepamit” itech totanemilil uan toyolo, kemej netauelitalis (2 Corintios 10:4, 5).
