ITECH griego, tajtol “carro” tein mokui itech Biblia, kijtosneki miak tataman carros (Hech. 8:​28, 29, 38). Carro tein itech yaya takat akin katka kayot Etiopía, amo katka se carro tein ika tateuiayaj oso tein ika motataniaj, ta katka se ueyi carro. Maj tikitakan keyej ijkon tikijtouaj.

Nejon takat de Etiopía katka se ueyichiujkej uan uejka yajka. Katka “se takat ika ueyi tanauatil. Yejua kitekitiliaya siuat akin tekiuajtia Etiopía akin kiluiayaj Candace, uan kiyekpiaya nochi itomin” (Hech. 8:27). Itech nejon tonalmej, Etiopía pouia hasta kampa axkan moixmati kemej Sudán uan hasta tanikopa kampa axkan moixmati kemej Egipto. Maski nejon takat amo yajki sayoj itech se carro, xa kiuikaya miak taman porin uejka yajka. Itech yekinika siglo mokuiaj tataman carros para kinuikaskej akin yayaj okseko. Seki carros chijchiujtoyaj ika naui ruedas uan kuatsaktoyaj. Se amaix tein ika tajtoua Biblia, kijtoua: “Itech nejon carros okachi akia miak taman, kualtsin ompa yayaj uan hasta ueliaj tel uejka yayaj” (Acts—An Exegetical Commentary).

Takat de Etiopía taixtajtoltijtoya keman Felipe motokij. Biblia kijtoua ke “Felipe tsikuinik inakastan carro, uan kikakik ke chikauak kiixtajtoltijtoya tein kijkuiloj tanauatijkej Isaías” (Hech. 8:30). Koujcarros tein kinchijchiujkaj para kinuikaskej akin yayaj okseko, amo ueliaj kintsikuinaltiayaj, ta kinuikayaj yolik. Yejua ika takat de Etiopía uelia taixtajtoltijtiaya uan Felipe uelik tsikuinik para kiajsitiuj.

Takat de Etiopía “kitataujtij Felipe maj tejko uan maj iuan motali” (Hech. 8:31). Akin kiuikaya carro tein ika motataniaj ijkatiaya keman kiuikaya. Sayoj ke koujcarro tein kinuikaya oksekin katka ueyi, yejua ika takat de Etiopía uan Felipe uelik motalijkej.

Tein kijtoua Hechos capítulo 8 uan tein kiajsinij taixmatinij techpaleuij maj itech toamaixuan amo tiknextikanok ke takat de Etiopía yajtok itech se carro tein ika moteuiaj oso tein ika motatanij, ta itech se carro tein okachi ueyi.