1, 2. ¿Toni ouijkayomej uelis tikpiaskej akin tiktekitiliaj Jehová?

 KEMAN techpanoua teisa tein amo kuali, niman mopata kemej tinemij. Maj tikitakan toni kinpanouani sekin. Se tonal, se tapajtijkej kiluij se tokniuj akin monotsa Luis a ke kipiaya cáncer uan ke nemiskia sayoj seki metsti. Monika semi kitekitilijtoya Jehová iuan itakauj akin katka tayekankej. Sayoj ke se tonal kimatik ke itakauj tajtakolchiujtoya miak xiujmejya. Olivia, akin amo kipia itakatsin monekik cholos de kampa nemia porin yaya mochiuati se tetsaujkaejekat. Keman mokepak, kiitak ke ichan nochi uejueliujka. ¿Kemansa mitsonpanouani teisa kemej nejin uan kipatak kemej tionnemia?

² Akin tiktekitiliaj Jehová no tikpiaj ouijkayomej uan tikokolispeuaj ijkon kemej oksekin. Uan no moneki titaxikoskej keman techixnamikij oso techtajyouiltiaj akin kitauelitaj ixolal Dios. Maski Jehová kikaua maj techpano tein amo kuali, motenkaua ke techpaleuis (Is. 41:10). Komo yejua techpaleuia uelis tiksentokaskej tiyolpakiskej, kuali titaixpejpenaskej uan amo tikauaskej maski tikpiaskej ouijkayomej. Itech nejin tamachtilis tikitaskej naui taman tein Jehová kichiua para techpaleuis maj tikxikokan ouijkayomej. No tikitaskej toni moneki tikchiuaskej tejuan para maj Jehová techpaleui.

JEHOVÁ TECHYEKPIAS

3. ¿Toni techouijmaka tikchiuaskej keman tikpiaj se ouijkayot?

³ Keman tikpiaj ouijkayomej xa amo ueli tiyektanemiliaj uan amo tikmatij toni tikixtaliskej tikchiuaskej. ¿Keyej? Xa porin semi timoyolkokouaj uan kemej semi timotekipachouaj  xa amo tikmatij toni tikchiuaskej. Ijkon momachilijkej ome tokniuan siuamej akin ininka titajtojkej itech yekinika párrafo. Olivia kijtoua: “Keman tetsaujkaejekat nechuejuelouilij nochan, semi nimotekipachoj uan amo nikmatia toni nikchiuas”. Keman Monika kijtoj ke itakatsin kikajkayauj, no kijtoj: “Amo sayoj nechtekipachoj tein kichiuak, ta no semi nechyolkokoj uan nikmachilij kemej yeskia aksa nechyoltsoponij. Nechouijmakaya nikchiuas hasta tein amo ouij. Amo keman niknemilij ke nechpanoskia teisa kemej nejin”. ¿Keniuj Jehová motenkauani ke techpaleuis keman tikmachiliskej ke amo tikxikouajok se ouijkayot?

4. ¿Toni motenkaua Jehová itech Filipenses 4:​6, 7?

⁴ ¿Keniuj techpaleuis Jehová? Yejuatsin motenkaua itech Biblia ke ‘techyolseuis’ (xikonixtajtolti Filipenses 4:​6, 7). Ueli tiyolseuij uan kuali timomachiliaj porin kuali timouikaj iuan Jehová. Tein tikmachiliaj semi kualtsin uan “amo akin ueli kiajsikamati” nion kinemilia keniuj. ¿Semi tikontataujtij Jehová se tonal uan tikonmachilij ke tionyolseuik? Ijkon tikonmachilij porin Jehová kichiuak xionyolseui.

5. ¿Keniuj kiyekpia totanemilil uan toyolo keman ‘Dios techyolseuia’?

⁵ Keman Filipenses 4:7 kijtoua ke ‘Dios techyolseuis’, no kijtoua ke ‘kiyekpias toyolo uan totanemilil’. Itech tajtol tein ika moijkuiloj Biblia keman kikui tajtol “kiyekpias”, kiteajsikamatiltia keman soldados kiyekpiayaj se xolal para maj amo kiteuikan. Akin ompa nemiaj kualtsin kochiaj porin kimatiaj ke soldados kiyekpiayaj xolal. No ijkon panoua keman Dios ‘techyolseuia’, porin nejon kiyekpia toyolo uan totanemilil yejua ika kuali timomachiliaj uan tiyolseuij (Sal. 4:8). Maski amo niman moyektalis se ouijkayot, uelis oksepa tiyolseuiskej ijkon kemej kipanok Ana (1 Sam. 1:​16-18). Nejon techpaleuis maj tiyektanemilikan uan maj kuali titaixpejpenakan.

6. ¿Toni moneki tikchiuaskej para maj Dios techpaleui maj tiyolseujtokan? (No xikonita taixkopimej).

⁶ ¿Toni moneki tikchiuaskej tejuan? Ijkon kemej akin nemiaj itech se xolal uelia kitajtaniayaj soldado maj kinyekpia, tejuan no uelis tiktajtaniskej Jehová maj techyekpia. Yejua ika, moneki maj tiksentokakan tiktataujtikan Dios hasta keman tikmachiliskej ke tiyolseujkejya (Luc. 11:9; 1 Tes. 5:17). Yejua nejon tein kichiujkej Luis uan isiuatsin Ana keman kiniluijkej ke Luis nemiskia sayoj seki metsti. Yejua kijtoj: “Keman ijkon se moajsi semi ouij se kiixpejpenas keniuj se mopajtis uan  okseki taman tein moneki. Sayoj ke semi techpaleuij maj tiyolseujtokan keman tiktataujtijkej Jehová itech nejin ouijkayot”. Nochin omen kijtojkej ke semi kitataujtiayaj Jehová uan kitajtaniayaj maj kinyolseui, maj kiyekpia ininyolo uan maj kinpaleui maj kimatinij toni kichiuaskej. Uan kiitakej ke Jehová kinpaleuij. Komo tejuatsin no tikonpia se ouijkayot xikonsentoka xionmotataujti. Tikonitas keniuj Jehová mitsonyolseuia uan kiyekpia moyolo uan motanemilil (Rom. 12:12).

JEHOVÁ TECHPALEUIS MAJ AMO TIUETSIKAN

7. ¿Keniuj xa timomachiliaj keman tikpiaj se ueyi ouijkayot?

⁷ Keman tikpiaskej se ouijkayot, xa amo kuali timomachiliskej, amo tiyektanemiliskej oso amo tikchiuaskej tein ipa tikchiuayaj. Uelis techpanos kemej se barco tein yetok itech ueyiat keman chikauak kioujtok uan at semi kiuiuika. Xa kemansa kuali timomachiliskej uan kemansa amo. Yejua nejon tein kipanok Ana keman itakatsin Luis momikilij. Yejua kijtoj: “Kemansa amo niknekia nikchiuas nion teyi uan semi nimotayokoltiaya. Uan kemansa nikualantoya porin Luis amo yetoyaok nouan”. No kijtoua ke kemansa momachiliaya iselti uan motekipachouaya porin monekia kiixpejpenas seki taman tein Luis kiixpejpenaya. Yejua kimachiliaya kemej yeskia yetoya itech ueyiat keman chikauak kioujtok. ¿Keniuj techpaleuia Jehová keman amo tikmatijok toni tikchiuaskej porin fiero tikmachiliaj?

8. ¿Toni motenkaua Jehová touan itech Isaías 33:6?

⁸ ¿Keniuj techpaleuis Jehová? Jehová motenkauani ke techpaleuis maj amo tiuetsikan (xikonixtajtolti Isaías 33:6). Keman chikauak kioui, barco peua eliuis mouiuika keman yetok itech ueyiat. Para maj barco amo semi mooliniok inajnakastan kipia seki taman tein kisaj atampa. Ijkon amo semi mouiuikaok uan akin ompa youij amo momoujtiajok uan kuali momachiliaj. Sayoj ke itech seki barcos, nejin teposmej okachi kuali tekitij komo barco yajtok. No ijkon panoua komo tiknekij maj Jehová techpaleui maj kuali tietokan keman tikpiaskej ouijkayomej, moneki maj tiksentokakan tiktekitilikan.

9. ¿Keniuj tein Jehová techmakani techpaleuia maj kemej yeskia amo tiuetsikan? (No xikonita taixkopimej).

⁹ ¿Toni moneki tikchiuaskej tejuan? Keman tel amo kuali timomachiliskej, maj tiktataujtikan Jehová, maj tiakan nechikolmej uan maj titanojnotsakan. Xa amo uelis tikchiuaskej nochi tein achto tikchiuayaj, sayoj ke maj tikelnamikikan  ke Jehová techajsikamati (no xikonita Lucas 21:​1-4). No xikonxelo tiempo para tionmomachtis uan itech tiontanemilis tein tionmomachtia. Jehová techmakani tamachtilismej uan videos tein techpaleuiaj maj kuali timomachilikan keman tikpiaj ouijkayomej. Seki tamachtilis tein mitsonpaleuis uelis tikonajsis itech aplicación JW Library^®, uan itech amaix Nepaleuil tein ika momachtiaj itaixpantijkauan Jiova. Monika, akin ika titajtojkej achto, kijtoj ke niman kikuik nochi nejin keman peuak okachi amo kuali momachilia. Peuak kitemoua tajtolmej se tel kualanis, keman tekajkayauaj oso maj amo se tekaua, uan kiixtajtoltiaya nejin tamachtilismej hasta maj kuali momachiliani. Yejua kijtoua: “Ijsiujka nitajkuilouaya keman niktemouaya tamachtilis porin semi amo kuali nimomachiliaya, sayoj ke keman niksentokaya nimomachtiaya niyolseuia uan nikmachiliaya ke Jehová kemej yeskia nechnauaya. Keman nitaixtajtoltijtiaya, nikitaya ke Jehová kiajsikamatia keniuj nimomachiliaya uan nechpaleuijtoya”. Jehová no mitsonpaleuis maj kemej yeskia amo xionuetsi keman tikonpanotos se ouijkayot uan mitsonyolseuis (Sal. 119:​143, 144).

JEHOVÁ TECHPALEUIS

10. ¿Keniuj xa timomachiliaj keman tikpiaj se ouijkayot?

¹⁰ Keman tikpiaskej se ouijkayot, xa kemansa tikmachiliskej ke amo tichikaujkej uan amo tiyolchikaujkej. Xa timomachiliskej kemej aksa akin tsikuini para motatanis sayoj ke amo ueli tsikuiniok porin koxoj. Xa tikitaskej ke techouijmaka tikchiuaskej seki taman tein achto kuali tikchiuayaj oso amo tiknekiskejok tikchiuaskej seki taman tein achto tikuelitayaj. Ijkon kemej kipanok Elías, xa sayoj tiknekiskej tiuetstoskej uan tikochiskej (1 Rey. 19:​5-7). ¿Keniuj motenkaua Jehová ke techpaleuis keman tikmachiliskej ke amo tichikaujkej?

11. ¿Keniuj no techpaleuia Jehová? (Salmo 94:18).

¹¹ ¿Keniuj techpaleuis Jehová? Yejuatsin motenkaua ke nochipa techpaleuis (xikonixtajtolti Salmo 94:18). Ijkon kemej se akin tsikuini moneki maj kipaleuikan keman mometskokoua, tejuan no moneki maj Jehová techpaleui para tiksentokaskej tiktekitiliskej. Keman tikpiaj se ouijkayot, yejuatsin techiluia: “Nejua, Jehová moDios, nikitskijtok moyekmay, akin mitsiluia: ‘Amo ximoui. Nejua nimitspaleuisʼ” (Is. 41:13). Keman tekiuaj David  kipiak miak ouijkayomej uan miakej kitauelitayaj, kiitak ke Jehová kipaleuijtoya, yejua ika kiluij: “Moyekmay nechpaleuia” (Sal. 18:35). Sayoj ke, ¿keniuj techpaleuia Jehová?

12. Komo amo kuali timomachiliaj, ¿keniuj Jehová uelis techpaleuis?

¹² Miakpa Jehová techpaleuia keman kichiua maj sekin kinekikan techpaleuiskej. Se tonal, David kinekia mosenkauas sayoj ke itasojikniuj Jonatán yajki kikalpanoto para kiyolchikauas uan kipaleuis maj okachi takuaujtamati (1 Sam. 23:​16, 17). Jehová no kichiuak maj Eliseo kipaleui Elías (1 Rey. 19:​16, 21; 2 Rey. 2:2). Jehová no uelis kichiuas maj tochankauan, totasojikniuan oso tayekananij techpaleuikan. Sayoj ke keman amo kuali timomachiliskej xa tiknekiskej tietoskej toselti. Uan nejon kuali yetok. Sayoj ke, ¿toni moneki tikchiuaskej para maj techpaleui tein Jehová techmaka?

13. ¿Toni moneki tikchiuaskej para techpaleuis tein Jehová techmaka? (No xikonita taixkopimej).

¹³ ¿Toni moneki tikchiuaskej tejuan? Maj amo tiktemokan nochipa tietoskej toselti. Keman tietokej toselti okachi toka titanemiliaj uan okachi techtekipachoua tein techpanotok, yejua ika xa amo kuali titaixpejpenaj (Prov. 18:1). Tinochin tiknekij tietoskej toselti, okachiok keman techpanoua teisa tein amo kuali. Sayoj ke komo nochipa tiktemouaj tietoskej toselti, tikixtopeujtoskiaj tein Jehová kikui para techpaleuis. Maski tel amo kuali timomachiliskej, maj timokauakan maj techpaleuikan tochankauan, totasojikniuan uan tayekananij. Maj tikitakan ke yejua Jehová akin kichiua maj techpaleuikan (Prov. 17:17; Is. 32:​1, 2).

JEHOVÁ TECHYOLSEUIS

14. ¿Toni ouijkayomej uelis techmoujtiskej?

¹⁴ Xa kemansa semi timouiskej. Biblia ininka tajtoua seki itekitikauan Dios akin kijtojkej ke kinmouiliayaj akin kintauelitayaj uan oksekin mouiaj porin kipiayaj okseki ouijkayomej (Sal. 18:4; 55:​1, 5). ¿Uan tejuan? ¿Techixnamikij kampa timomachtiaj, kampa titekitij, tochankauan oso tekiuanij? ¿Timouij timikiskej porin semi timokokouaj? Keman techpanoua nejin, uelis timomachiliskej kemej se konetsin akin amo ueli mopaleuia. ¿Toni kichiua Jehová para techpaleuis?

15. Kemej kijtoua Salmo 94:​19, ¿toni motenkaua kichiuas Jehová?

¹⁵ ¿Keniuj techpaleuis Jehová? Yejuatsin  techyolseuia uan kichiua maj kuali timomachilikan (xikonixtajtolti Salmo 94:19). Maj itech titanemilikan se siuapilkonet akin moui uan amo ueli kochi porin semi kioui, tatitikuini uan tapepetani. Yejua ika ipopaj kiajsiti, kiyolseuia uan kinaua hasta maj kochi. Maski kisentoka tel kioui, amo mouiok keman ipopaj kinaua. Tejuan no ijkon, keman semi timouiskej, xa tiknekiskej maj kemej yeskia toTajtsin technaua hasta maj kuali timomachilikan. ¿Toni moneki tikchiuaskej para maj Jehová techyolseui?

16. ¿Toni moneki tikchiuaskej komo tiknekij maj Jehová techyolseui? (No xikonita taixkopimej).

¹⁶ ¿Toni moneki tikchiuaskej tejuan? Semi moneki maj tikxelokan tiempo para tiktataujtiskej Jehová uan tikixtajtoltiskej Biblia (Sal. 77:​1, 12-14). Ijkon keman tikpiaskej se ouijkayot, xa niman tiktemoskej maj toTajtsin techpaleui. Maj tikiluikan Jehová tein techtekipachoua uan tein techmoujtia, uan maj tikauakan maj yejuatsin technankili uan maj techyolseui ika iTajtol (Sal. 119:28). Seki amatajkuilolmej tein kipia Biblia okachi mitsonyolchikauaskej keman tionmouis, kemej amatajkuilolmej Job, Salmos uan Proverbios, uan tein kijtoj Jesús itech Mateo capítulo 6. Komo tejuatsin tikontataujtia Jehová uan tikonixtajtoltia iTajtol, tikonitas keniuj mitsonyolseuia.

17. ¿Toni moneki tikelnamikiskej?

¹⁷ Maj tikelnamikikan ke Jehová nochipa techpaleuis hasta keman tikpanoskej tein tel amo kuali. Amo keman techkauas toselti (Sal. 23:4; 94:14). Maj tikelnamikikan ke yejua motenkauak techyekpias, amo techkauas maj kemej yeskia tiuetsikan, techpaleuis uan techyolseuis. Isaías kiluij Jehová: “Tikinyekpias akin senkis mouan takuaujtamatij, tikinpaleuis maj nochipa yolseujtokan, porin mouan takuaujtamatij” (Is. 26:3). Yejua ika xiontakuaujtamati iuan Jehová uan xikonseli tein ika mitsonpaleuia. Komo ijkon tikonchiua, uelis tiontaxikos hasta keman mitsonpanos tein tel amo kuali.