1. ¿Keniuj tikonnemilia ke tamati Jehová?

 ¿KEMANSA tikonnemiliani keniuj tamati Jehová? Keman tikontataujtia, ¿keniuj tikonnemilia ke tamati? Maski Jehová amo ueli tikitaj, itech Biblia tataman kemej moteixmatiltia. Kijtoua ke yejua kemej yeskia “tonaltsin uan escudo”, uan kemej “se tit tein nochi kiixpoloua” (Sal. 84:11; Heb. 12:29). Keman Jehová kichiuak maj tanauatijkej Ezequiel kiita seki taman kijtoj ke yejuatsin tamati kemej se tetsin tein monotsa zafiro, kemej se tepos tein milini uan kemej se arcoíris tein petani (Ezeq. 1:​26-28). Xa semi tikmojkaitaj keman tiknemiliaj ke Jehová tamati kemej nejon oso xa hasta tikmouiliaj.

2. ¿Keyej sekin kiitaj ke ouij se motokis iuan Dios?

² Kemej Jehová amo ueli tikitaj, xa hasta amo tikneltokaskej ke yejuatsin techtasojta. Oso xa amo tikneltokaj ke Jehová techtasojta porin techpanouani miak taman tein amo kuali, xa porin amo tikpiakej se topopaj akin techtasojtak. Jehová kiajsikamati keniuj timomachiliaj uan kimati keyej ouij techkisa iuan timotokiskej. Itech Biblia techiluia keniuj tamati yejuatsin porin kineki maj tikmatikan ke techtasojta.

3. ¿Keyej ika titajtoskej keniuj tamati Jehová uan keniuj tetasojta?

³ Jehová tetasojta, yejua ika Biblia kijtoua ke Dios yejua tetasojtalis (1 Juan 4:8). Nochi tein kichiua, kichiua porin semi tetasojta. Uan Jehová no kinnextilia hasta akin amo kitasojtaj (Mat. 5:​44, 45). Itech nejin tamachtilis ika titajtoskej keniuj tamati Jehová uan keniuj tetasojta. Keman okachi tikixmatiskej okachi tiktasojtaskej.

JEHOVÁ SEMI TECHTASOJTA

4. ¿Keniuj tionmomachilia keman tikonmati ke Jehová tetasojta? (No xikonita taixkopin).

⁴ “Jehová semi tetasojta” (Sant. 5:11). Biblia kijtoua ke Dios tamati kemej se temomaj akin semi tetasojta (Is. 66:​12, 13). Xikonnemili keniuj se temomaj semi kitasojta ikonetsin  uan kiyekpia. Kitalia itech itankuay uan kualtsin kinojnotsa. Keman pili choka oso teisa kikokoua, temomaj niman kiitati. No ijkon, keman titayokoxtoskej Jehová touan yetos. Yejua ika salmista kijtoj: “Keman semi nimotekipachouaya, tejua tinechyolseuiaya uan tikchiuaya maj kuali nimomachili” (Sal. 94:19).

5. Jehová tetasojta uan amo tekaua, ¿keniuj mitsonpaleuia nejon?

⁵ Jehová amo keman tekaua (Sal. 103:8). Yejuatsin kisentoka techtasojta maski timopolouaj. Israelitas miakpa kiyolkokojkej Jehová, sayoj ke keman yejuan moyolpatakej uan amo kichiujkejok tein amo kuali, Jehová kisentokaya kinnextiliaya ke kintasojtaya. Se tonal kiluij ixolal: “Nimitspatiuitak, nimitspoujkaitak, uan nimitstasojtak” (Is. 43:​4, 5). Jehová amo mopatani uan uelis tikneltokaskej ke yejuatsin no ijkon techtasojta. Uan maski tiueyitajtakoskej yejuatsin amo techsenkaua. Komo timoyolpataj uan oksepa iuan timokepaj, yejuatsin kisentokas techtasojtas. Motenkaua ke ‘techtapojpoluis’ (Is. 55:7). Biblia kijtoua ke ‘tiyolseuij’ keman Jehová techtapojpoluia (Hech. 3:19).

6. ¿Toni techmachtia tein kijtoua Zacarías 2:8 kemej tamati Jehová?

⁶ (Xikonixtajtolti Zacarías 2:8). Kemej Jehová techtasojta niman kimati keman amo kuali timomachiliaj uan kineki techpaleuis. Yejua kiyolkokoua keman kiita ke titajyouijtokej. Yejua ika tikmatij ke technankilis keman tiktataujtiskej uan tikiluiskej: “Xinechyekpia kemej moixtololo” (Sal. 17:8). Toixtololo semi kualtsin uan semi tekokoua keman kipanoua teisa. Yejua ika, keman Jehová kijtoua ke titamatij kemej iixtololo, kemej yeskia kijtoskia: “Keman aksa namechchiuilia tein amo kuali, namechchiuilijtok tein amo kuali namejuan akin namechpatiuita”.

7. ¿Keyej moneki tikneltokaskej ke Jehová techtasojta?

⁷ Jehová kineki xikonneltoka ke mitsontasojta. Yejua kiajsikamati ke tein mitsonpanok oso ouijkayomej tein tikonpia, uelis kichiuas amo semi xikonneltoka nejon. Yejua ika moneki xikonneltoka ke Jehová mitsontasojta. ¿Toni mitsonpaleuis? Xikonita keniuj yejuatsin kinextia ke kitasojta Jesús, taixpejpenalmej uan no techtasojta tejuan. Uan yejua nejon tein axkan timomachtiskej.

 ¿KENIUJ JEHOVÁ KINEXTIA KE TETASOJTA?

8. ¿Keyej Jesús kineltokaya ke iTajtsin kitasojtaya?

⁸ Sayoj Jehová uan iKonetsin senyetonij tel miak xiujmejya. Yejuan senneminij miles de millones de xiujmejya, yejua ika kualtsin mouikaj uan semi motasojtaj. Itech Mateo 17:5 Jehová kijtoj ke kitasojtaya Jesús. Yejuatsin amo sayoj kijtoj “Yejua semi nechyolpaktia”, ta kinekia maj tikmatikan ke semi kitasojtaya, yejua ika kijtoj: “Yejua nejin noKonetsin akin niktasojta”. Jehová semi kiyolpaktiaya Jesús, okachiok porin yaya toka momikiliti (Efes. 1:7). Jesús kimatia ke Jehová kitasojtaya. Yejua ika miakpa kijtoj ke iTajtsin kitasojtaya (Juan 3:35; 10:17; 17:24).

9. ¿Keniuj Jehová kintasojta taijitalmej? (Romanos 5:5).

⁹ Jehová no kintasojta taijitalmej (xikonixtajtolti Romanos 5:5). Nejin versículo kiteajsikamatiltia ke Jehová semi kintasojta taijitalmej. Se amaix kijtoua ke semi kintasojta kemej at tein chikauak motaloua. ¡Tel kualtsin kemej Jehová kinextia keniuj semi kintasojta tokniuan taijitalmej! Yejuan kimatij ke ‘Dios kintasojta’ (Jud. 1). Tatitanil Juan kijtoj tein kimachiliaya keman kijkuiloj: “¡Xikitakan keniuj semi techtasojta toTajtsin Dios porin hasta techiluia ke tiikoneuan!” (1 Juan 3:1). ¿Kintasojta Jehová sayoj taijitalmej? Amo, ta kemej tikitaskej, Jehová kintasojta nochin itekitikauan.

10. ¿Keniuj Jehová kinextiani ke semi mitsontasojta?

¹⁰ ¿Keniuj Jehová kinextiani ke semi techtasojta? Yejuatsin kitemakak iKonetsin maj toka momikili. Tein kichiuak kinextia ke sayoj yejuatsin okachi techtasojta (Juan 3:16; Rom. 5:8). Jehová kitemakak iKonetsin akin semi kitasojta uan kikauak maj toka momikili para techtapojpoluis totajtakoluan uan maj timochiuakan tiitasojikniuan (1 Juan 4:10). Keman okachi itech titanemiliskej tein Jehová uan Jesús toka kichiujkej, okachi tikajsikamatiskej keniuj techtasojtaj tisejsemej (Gál. 2:20). Jehová amo kitemakak iKonetsin sayoj para maj mochiuani tein kijtouaya se tanauatil, ta porin yekmelauj techtasojta. Kinextij ke techtasojta keman kitemakak iKonetsin akin semi kitasojtaya uan kikauak maj tajyoui uan maj toka momikili.

11. ¿Toni techmachtia tein kijtoua Jeremías 31:3?

¹¹ Kemej tikitakejya, Jehová amo sayoj techtasojta, ta no kinextia (xikonixtajtolti Jeremías 31:3). Kichiuak maj iuan timotokikan porin techtasojta (no xikonita Deuteronomio 7:​7, 8). Nion teyi uan nion akin uelis kichiuas maj amo techtasojtaok (Rom. 8:​38, 39). ¿Keniuj tionmomachilia keman itech tiontanemilia nejin? Maj tikixtajtoltikan Salmo 23. Keman tikixtajtoltijtoskej, xikonita keniuj kipaleuij David keman Jehová kinextilij ke kitasojtaya uan keniuj no uelis mitsonpaleuis.

¿KENIUJ TIONMOMACHILIA KEMAN ITECH TIONTANEMILIA KE JEHOVÁ MITSONTASOJTA?

12. ¿Toni ika tajtoua Salmo 23?

¹² (Xikonixtajtolti Salmo 23:​1-6). Itech Salmo 23, David kijtoj ke kimatia ke Jehová kitasojtaya uan ke kuali kiyekpiaya. Kijtoj ke Jehová katka Itajpixkauj, uan no kijtoj keniuj mouikaya iuan. David kuali momachiliaya porin kimatia ke Jehová kiixyekanaya uan yejua nochipa kitemouaya maj kipaleui. Kimatia ke Jehová nochipa kitasojtaskia. Maj tikitakan keyej David kijtoj ke semi takuaujtamatia iuan Jehová.

13. ¿Keyej David kiyekmatia ke Jehová kiyekpiaya?

¹³ “Amo nechpoloua nion teyi”. David kimachiliaya  ke Jehová kuali kiyekpiaya porin nochipa kimakaya tein kipolouaya. No kimatia ke nochipa kuali iuan mouikaskia uan ke kiyolpaktiaya. Yejua ika David kuali kimatia ke keman kipanoskia teisa, Jehová kimakaskia tein kipoloskia. Kemej David kineltokaya ke Jehová kitasojtaya uan kiyekpiaya, amo motekipachouaya uan uelia yolpakia (Sal. 16:11).

14. ¿Keniuj technextilia Jehová ke techtasojta?

¹⁴ Jehová kuali techyekpia, okachiok keman tikpanouaj tein amo kuali. Maj tikitakan tein kipanok Claire, a akin tapaleuijtok Betel panoua 20 xiujmejya. Yejua kijtoua ke kimachiliaya ke amo uelia kinpaleuiaya ichankauan keman kipiakej miak ouijkayomej: itat kikuik se infarto itech itsontekon, se iikniuj siuat kikalankixtijkej itech nechikol, ichankauan monekik tatsakuaskej kampa tanamakayaj uan kemej amo kipiayajok tomin kinkuilijkej ininchan. ¿Keniuj kinnextilij Jehová ke kinyekpiaya? Claire kijtoua: “Jehová kiitak maj nochankauan nochipa kipianij tein kinpoloskia. Jehová nochipa techmakak okachiok ke tein monekia. Nochipa nikelnamiki keniuj yejuatsin nechnextiliani ke nechtasojta. Nejon nechpaleuia maj niksentoka niktekitili keman nikpia okseki ouijkayomej”.

15. ¿Keyej David moyolchikauak? (No xikonita taixkopin).

¹⁵ “Tikchiua maj oksepa nimochikaua”. David kipanotoya miak ouijkayomej, yejua ika motekipachojtoya (Sal. 18:​4-6). Sayoj ke moyolchikauak keman kiitak keniuj Jehová kitasojtaya uan kiyekpiaya. Kiitak ke itasojikniuj Jehová kemej yeskia kiuikak “kampa onkak miak sakat” uan maj  moseuiti “kampa onkak miak at”. Yejua ika David moyolchikauak uan kisentokaya yolpakia keman kitekitiliaya Jehová (Sal. 18:​28-32).

16. ¿Keniuj tikonitani ke Jehová mitsonyolchikauani?

¹⁶ No ijkon tejuan, kemej Jehová semi techtasojta ueli titaxikouaj keman tikpiaj kuejmolmej uan ouijkayomej (Lam. 3:22; Col. 1:11). Maj tikitakan tein kipanok Rachel. Semi tajyouij keman momoyaujtoya ueyi kokolis COVID-19 porin itakauj kikauak Jehová uan no kikaujteuj yejua. ¿Keniuj kipaleuij Jehová? Yejua kijtoua: “Kichiuak maj nikmachili ke miakej nechtasojtaj. Miakej akin iniuan nimouikaya nouan yetoyaj, nechuikiliayaj takual, nechtajkuilouiliayaj uan nechtitaniliayaj textos tein ika nechyolchikauayaj, nechixuetskiliayaj uan nechelnamiktiayaj ke Jehová nechyekpixtoya. Miakpa niktasojkamatilia Jehová porin nechmakani miakej nochankauan akin semi nechtasojtaj”.

17. ¿Keyej David uelik kijtoj: “Amo nikmouilis nion teyi”?

¹⁷ “Amo nikmouilis nion teyi porin tejua nouan tietok”. Miakej kiixnamikiaj David uan miakpa kinekiaj kimiktiskej. Sayoj ke David amo mouia uan kuali momachiliaya porin kimatia ke Jehová kitasojtaya. Yejua kimachiliaya ke Jehová kemej yeskia nochipa iuan yetoya. Yejua ika mokuikatij: “Nechmakixtij itech nochi tein nechmoujtiaya” (Sal. 34:4). Maski David semi mouik, kiixtalij moyolchikauas porin kimatia ke Jehová kitasojtaya.

18. Keman tikpiaj ouijkayomej tein kichiua maj timomoujtikan, ¿keniuj techpaleuia tikmatiskej ke Jehová techtasojta?

¹⁸ Keman tikpanouaj seki taman tein tikmouiliaj, ¿keniuj techyolchikaua tikmatiskej ke Jehová techtasojta? Se precursora akin monotsa Susi kijtoua keniuj momachilijkej yejua uan itakauj keman ininkoneuj momiktij: “Keman tepanoua teisa tein tel amo kuali, se kinemilia ke amo ueli se mopaleuia uan ke uelis tepanos okseki taman. Sayoj ke kemej Jehová techtasojta kichiua maj tikmachilikan ke techyekpia”. Rachel, akin ika titajtojkej itech párrafo 16, kijtoua: “Se youak semi nitayokoxtoya uan nimouia uan nikmachiliaya ke amo nitaxikouayaok, yejua ika niktataujtij Jehová uan nichokatiaya porin semi nitajyouijtoya. Ijsiujka nikmachilij kemej yeskia Jehová nechnauaj para nechyolseuis,  ijkon kemej se temomaj kinaua ikonetsin. Uan satepan uelik nikochik. Amo keman nikelkauas nejon”. Se tokniuj tayekankej akin monotsa Tasos naui xiuit tsaktoya porin amo kinekik mochiuas soldado. Yejua kijtoua ke Jehová kualtsin kiyekpiak: “Yejua nechmakak okachi ke tein nechpolouaya uan nejon kichiuak maj okachi nitakuaujtamati iuan. Uan ika ichikaualis, Jehová nechpaleuij maj niyolpaki maski kampa nietoya ueliskia nimotayokoltis. Nejin nechpaleuij maj nikita ke keman okachi iuan nitakuaujtamatia, okachi nikmachiliaya ke nechtasojta. Yejua ika maski nitsaktoya nikixtalij nimochiuas precursor regular”.

MAJ TIMOTOKIKAN IUAN DIOS AKIN TECHTASOJTA

19. 1) ¿Keniuj tiktataujtiaj Jehová keman tikmatij ke techtasojta? 2) ¿Katiyejua textos okachi tikonuelita tein ika tajtouaj ke Jehová techtasojta? (Xikonita recuadro “ Versículos tein techpaleuiaj maj tikmatikan ke Jehová techtasojta”).

¹⁹ Tein kinpanok sekin akin ininka titajtojkejya, kinextia ke Jehová yejua “Dios akin tetasojta” (2 Cor. 13:11). Yejuatsin toka motekipachoua tisejsemej. Uan tikmatij ke amo teyi techpanos porin Jehová ‘techtasojta’ (Sal. 32:10). Keman okachi itech titanemiliskej keniuj Jehová techtasojta, okachi tikneltokaskej ke yekmelauj nemi uan okachi iuan timotokiskej. Yejua ika uelis tiktataujtiskej uan tikiluiskej ke semi tiknekij maj techtasojta. Uelis tikiluiskej nochi tein techtekipachoua porin tikmatij ke yejuatsin techajsikamatis uan techpaleuis (Sal. 145:​18, 19).

20. ¿Keyej timotokiaj iuan Jehová keman tikitaj ke techtasojta?

²⁰ Ijkon kemej kualtsin tikmachiliaj keman timototoniaj itech tit keman tel taseseya, no ijkon kualtsin tikmachiliaj keman tikitaj keniuj Jehová techtasojta, porin nejon techyolseuia keman titajyouiaj uan keman tikpiaj ouijkayomej. Yejua ika xionmokaua maj Jehová mitsontasojta, maj mitsonyolseui uan maj mitsonyolchikaua. Tinochin tiknekij tikijtoskej: “Niktasojta Jehová” (Sal. 116:1).