1. ¿Keyej kemansa timouij?

 TINOCHIN kemansa timouij. Biblia kijtoua ke amo moneki tikinmouiliskej mikemej, amo kuali ejekamej nion tein panos satepan. Sayoj ke itech taltikpak tikitaj miak taman tein ‘techtetsaujkamoujtia’, xa keman mochiua tein tel amo kuali, neteuilis uan kokolismej (Luc. 21:11). Xa no tikinmouiliaj tekiuanij, tochankauan oso akin techixnamikij porin tikueyichiuaj Jehová. Uan sekin xa mouij maj amo kixikokan se ouijkayot tein kipiaj axkan oso tein kipiaskej satepan.

2. ¿Toni kipanok David keman ajsik Gat?

² Maj ika titajtokan David, se itekitikauj Dios akin mouik. Keman tekiuaj Saúl kinekia kimiktis David, yejua choloj itech xolal Gat kampa nemiaj filisteos. Keman Akís akin tekiuajtia Gat kiluijkej ke David kuali tateuiaya uan ke kinmiktijka “10 mil takamej” filisteos, David ‘semi kimouilij’ tekiuaj (1 Sam. 21:​10-12). Semi kitekipachouaya tein tekiuaj ueliskia kichiuilis. ¿Toni kichiuak David para amo mouisok?

3. Kemej kijtoua Salmo 56:​1-3, 11, ¿toni kipaleuij David maj amo mouiok?

³ Itech Salmo 56, David kijtoua keniuj momachilij keman yetoya Gat. Itech nejon salmo kijtoj keyej mouik uan toni kipaleuij maj amo mouiok: yejua takuaujtamatik iuan  Jehová (xikonixtajtolti Salmo 56:​1-3, 11). Uan kipaleuij keman ijkon kichiuak. Jehová kipaleuij David maj kinemili kichiuas teisa tein xa amo akin kichiuaskia: kichiuak maj kinemilikan ke kuatapolojka. Uan nejon kimakixtij porin Akís amo kinekiaok kimiktis David, ta kinekia maj youi okseko. Ijkon David uelik choloj (1 Sam. 21:​13–22:1).

4. ¿Keniuj uelis okachi titakuaujtamatiskej iuan Jehová? Xikonijto se neskayot.

⁴ Komo titakuaujtamatij iuan Jehová, no uelis techpaleuis maj amo timouikan. Sayoj ke, ¿toni uelis tikchiuaskej para okachi titakuaujtamatiskej iuan keman timouij? Maj tiknemilikan nejin. Xa timomoujtiskej komo techiluiaj ke techajxilijkej se kokolis, sayoj ke komo titakuaujtamatij ke akin techpajtiti se kuali tapajtijkej, xa tiyolseuiskej. Xa no kinpaleuijkaya oksekin akin no kipiayaj nejon kokolis. Yejua kuali techkaki uan tikitaj ke yekmelauj techajsikamati. Uan xa techiluia ke techmakati pajti tein oksekin kinpaleuiani. No ijkon, okachi titakuaujtamatiskej iuan Jehová komo tiknemiliaj tein kichiuania, tein kichiujtok uan tein toka kichiuas. Yejua nejon tein kichiuak David itech Salmo 56. Keman tikitaskej seki versículos, maj tiknemilikan keniuj uelis okachi titakuaujtamatiskej iuan Jehová uan maj amo timouikanok.

¿TONI KICHIUANIA JEHOVÁ?

5. ¿Toni itech tanemilij David para amo mouisok? (Salmo 56:​12, 13).

⁵ Maski David yaya kipanoti tein amo kuali, amo kielkauaya tein Jehová kichiujka achto (xikonixtajtolti Salmo 56:​12, 13). David nochipa itech tanemiliaya nejon. Kemansa itech tanemiliaya tein kichijchiuak Jehová, nejon kielnamiktiaya ke yejuatsin semi chikauak uan ke techtasojta (Sal. 65:​6-9). No itech tanemiliaya keniuj Jehová kinpaleuijka oksekin (Sal. 31:19; 37:​25, 26). Uan okachi itech tanemiliaya keniuj Jehová kipaleuijka yejua uan kiyekpiaka desde keman katka konetsin (Sal. 22:​9, 10). Kemej David itech tanemilij nochi nejon, kipaleuij maj okachi takuaujtamati iuan Jehová.

6. ¿Toni techpaleuis maj titakuaujtamatikan iuan Jehová keman timouij?

 ⁶ Keman tionmouis, xionmotajtani: “¿Toni kichiuak Jehová ne uejkauj?”. Itech xiontanemili tein kichijchiuak. Keman tikitaj ke Jehová kinyekpia totomej uan xochimej maski amo chijchiujtokej kemej yejuatsin uan amo ueli kiueyichiuaj, techpaleuia maj okachi titakuaujtamatikan ke no techyekpias (Mat. 6:​25-32). No xikonnemili keniuj Jehová kinyekpiani itekitikauan. Xa uelis tionmomachtis keniuj takuaujtamatik se itekitikauj Dios ne uejkauj oso uelis tikonixtajtoltis tein kipanok se itekitikauj Dios itech nejin tonalmej, a uan itech xiontanemili keniuj Jehová mitsonyekpiani hasta axkan. ¿Keniuj Jehová mitsonpaleuij xikonixmati? (Juan 6:44). ¿Keniuj mitsonnankiliani keman tikontataujtia? (1 Juan 5:14). ¿Keniuj mojmostaj mitsonpaleuia tein Jehová kichiuak keman kitemakak ikonetsin? (Efes. 1:7; Heb. 4:​14-16).

7. ¿Keniuj Vanessa kipaleuij tein kipanok Daniel?

⁷ Vanessa b se tokniuj siuat akin nemi Haití kipanok teisa tein kimojmoujtij. Se takat akin ompaka nemia mojmostaj kinotsaya uan kitajkuilouiliaya para maj mochiua inovia. Tokniuj kiyekiluij ke amo, sayoj ke yejua okachi kualanik uan hasta kimojmoujtij. ¿Toni kipaleuij Vanessa maj amo mouiok? Kichiuak seki taman para moyekpias, uan se tokniuj tayekankej kipaleuij maj kinnojnotsa tekiuanij. Sayoj ke no mochikauak kielnamikis keniuj Jehová kinyekpiak itekitikauan ne uejkauj. Yejua kijtoua: “Niman nikelnamik tein kipanok tanauatijkej Daniel. Maski amo kichiujka tein amo kuali ipa kipantamotkej kampa yetoyaj tekuanimej tein mayantoyaj, sayoj ke Jehová kimakixtij. Nikiluij Jehová ke nikchiujkaya nochi tein niuelia uan niktajtanij maj nechpaleuiani. Satepan amo nimouikok” (Dan. 6:​12-22).

¿TONI KICHIUJTOK JEHOVÁ AXKAN?

8. ¿Toni kimatia David? (Salmo 56:8).

⁸ Maski David ueliskia kimiktiskej keman yetoya Gat, amo semi itech tanemilij tein kimoujtiaya, ta itech tanemilij keniuj Jehová kipaleuijtoya. Kiitaya keniuj kiixyekantoya, kiyekpiaya uan kimatia keniuj momachiliaya (xikonixtajtolti Salmo 56:8). David kinpiaya itasojikniuan akin kipaleuijkej uan kiyolchikaujkej, ome de yejuan katkaj Jonatán uan tayekankatiopixkat Ahimélec (1 Sam. 20:​41, 42; 21:​6, 8, 9). Uan maski tekiuaj Saúl kinekia kimiktis, David uelik choloj. Yejua kimatia ke Jehová kiitstoya tein kipanotoya uan kimatia keniuj momachiliaya.

9. ¿Toni kiita Jehová itech sejse itekitikauj?

⁹ Komo tejuatsin tikonpia se ouijkayot tein mitsonmoujtia, xikonelnamiki ke Jehová amo sayoj kiita tein tikonpanotok, ta no kimati keniuj tionmomachilia. Keman itekitikauan Dios katkaj takeualmej ompa Egipto, Jehová kimatia tein kipanotoyaj uan tein ‘kijyouijtoyaj’ (Éx. 3:7). David kijtoj itech se nekuikatil ke Jehová kiitstoya keniuj ‘tajyouijtoya’ uan tein semi ‘kitekipachouaya’ (Sal. 31:7). Uan hasta keman israelitas tajyouiayaj porin kichiuayaj tein amo kuali, Jehová “no tajyouiaya” (Is. 63:9). Semi techyolchikaua tikmatiskej ke Jehová techajsikamati uan kineki techpaleuis maj amo timouikanok.

10. ¿Keyej tikonneltoka ke Jehová moka motekipachoua uan ke mitsonpaleuis?

 ¹⁰ Komo tikonpanotok se ouijkayot tein mitsonmoujtia, xa amo tikonita keniuj Jehová mitsonpaleuijtok. ¿Toni uelis tikonchiuas? Xikontajtani Jehová maj mitsonpaleui xikonita tein moka kichiujtok (2 Rey. 6:​15-17). Ompa xionmotajtani: ¿Nechyolchikauani se tanojnots oso se tanankilil tein nikakik itech nechikol? ¿Nechyolchikauani tein kijtoua se amaix, se video oso se nekuikatil? ¿Nechixtajtoltilij se tokniuj se texto oso nechiluij teisa tein nechyolchikauak? Kemansa xa tikelkauaskej ke yejua Jehová akin kichiua maj tokniuan techtasojtakan uan yejua techyolchikaua ika iTajtol (Is. 65:13; Mar. 10:​29, 30). Tein yejuatsin kichiua kinextia ke toka motekipachoua uan ke uelis iuan titakuaujtamatiskej (Is. 49:​14-16).

11. ¿Toni kipaleuij Aida maj amo mouiok?

¹¹ Aida se tokniuj siuat de Senegal kipanok se ouijkayot uan kiitak keniuj Jehová kipaleuiaya. Kemej yejua tayekanaya, itatuan kinekiaj maj kitani miak tomin para motekipanos uan no kintekipanos yejuan. Sayoj ke yejua kiixtalij amo kipias miak taman para mochiuas precursora, yejua ika amo kitania miak tomin. Ichankauan kitauelitakej uan kijijtouayaj. Aida kijtoj keniuj momachiliaya: “Nimouia maj amo uelini nikinpaleuiani notatuan uan maj nochin nechtauelitanij. Niktajtakoltij Jehová porin kikauak maj semi nitajyouiani”. Sayoj ke se tonal kikakik se tanojnots tein semi kiyolchikauak, yejua kijtoua: “Tokniuj techelnamiktij ke Jehová kimati toni techmoujtia tisejsemej. Tayekananij uan okseki tokniuan nechpaleuijkej maj nikita ke Jehová nechtasojta, nejon nechpaleuij maj yolik peua kuali nimomachili. Keman niktataujtiaya Jehová, okachi nikneltokaya ke yejuatsin nechpaleuiskia, uan semi niyolseuia keman nikitaya keniuj nechnankiliaya”. Satepan kiajsik se tekit tein kipaleuiaya maj kisentoka tekiti kemej precursora, maj kinpaleuiani itatuan ika tomin uan no oksekin. Yejua kijtoua: “Axkan senkis nitakuaujtamati iuan Jehová.  Keman niktataujtia nechpaleuia maj amo nimouiok”.

¿TONI KICHIUAS JEHOVÁ SATEPAN?

12. Kemej kijtoua Salmo 56:​9, ¿toni kineltokaya David?

¹² (Xikonixtajtolti Salmo 56:9). Nejin versículo kinextia okse taman tein kichiuak David keman mouia maj kimiktikan: itech tanemilij tein Jehová kichiuaskia satepan. David kimatia ke Jehová kimakixtiskia keman monekiskia porin yejuatsin motenkaujka ke mochiuaskia tekiuaj ompa Israel (1 Sam. 16:​1, 13). David no kimatia ke ipa mochiuaskia porin Jehová motenkaujka.

13. ¿Toni kichiuas Jehová satepan?

¹³ ¿Toni motenkauani Jehová touan? Yejuatsin amo motenkauani ke axkan amo tikpiaskej ouijkayomej. c Sayoj ke maski axkan tikpiaskej tein yeski ouijkayot, Jehová motenkaua ke itech yankuik taltikpak kiixpolos nochi nejon (Is. 25:​7-9). Uelis tikneltokaskej ke kipia chikaualis para techpajtis, para kinixpolos akin techtauelitaj uan para kichiuas maj oksepa nemikan akin momikilijkejya (1 Juan 4:4).

14. ¿Itech toni uelis titanemiliskej?

¹⁴ Keman tionmouis, itech xiontanemili nochi tein Jehová kichiuas satepan. Xikonnemili keniuj tinemiskej keman Satanás ixpoliuis, keman ixpoliuiskej akin amo yolkualmej uan sayoj nemiskej akin yolkualmej, uan keman yolik amo tikpiaskejok tajtakol. Itech xiuit 2014, itech ueyi nechikol tein uejkaua eyi tonal, seki tokniuan kinextijkej keniuj techpaleuia komo itech titanemiliaj tein tikchiaj maj mochiua. Ompa monextij ke se tokniuj takat uan ichankauan ika monojnotsaj tein kijtoskia 2 Timoteo 3:​1-5 komo ika tajtoskia xochital: “Itech yankuik taltikpak semi tiyolpakiskej. Porin miakej motasojtaskej, semi kinekiskej kichiuaskej tein itajtol Dios kijtoua, amo moueyichiuaskej nion moueyimatiskej, kiueyitaliskej Dios, kintakamatiskej inintatuan, motasojkamatiskej uan amo tekauaskej, kintasojtaskej ininchankauan, kinekiskej moyektenkauaskej iniuan oksekin, amo tetakajkayauiliskej, motsakuiliskej, kichiuaskej tein kuali, kitasojtaskej tein kuali, kinchiuiliskej tein kuali inintasojikniuan uan takakiskej, nion tepitsin moueyimatiskej, kitasojtaskej Dios uan amo sayoj yejuan moyolpaktiskej uan yekmelauj taneltokaskej. Iniuan ximouika”. ¿Uan tejuan? ¿Timomattokej ika titajtoskej tein mochiuas itech yankuik taltikpak iniuan tochankauan oso iniuan tokniuan?

15. ¿Toni kipaleuij Tanja maj amo mouiok?

¹⁵ Maj tikitakan tein kipanok Tanja, se tokniuj siuat akin nemi Macedonia del Norte. Itatuan Tanja semi kiixnamikkej keman yejua peuak momachtia Biblia. Sayoj ke keman itech tanemilij tein Jehová kichiuas satepan, kipaleuij maj amo kikauani yejuatsin maski mouia. Yejua kijtoua: “Nechpanok tein amo niknekia maj nechpano, nomaj nechmagaya nochipa keman nimokepaya de nechikol. Uan notatuan nechiluijkej ke nechmiktiskiaj komo nimochiuaya itaixpantijkauj Jehová”. Satepan kikixtijkej de ichan. ¿Toni kichiuak? Yejua kijtoua: “Nikmatia ke komo amo keman nikauaya Jehová, ueliskia niyolpakis nochipaya. Uan ke maski itech nejin tonalmej nikpolos seki taman, itech yankuik taltikpak Jehová semi nechtatiochiuis,  uan kichiuas maj amo nikelnamikiok tein amo kuali tein nechpanok”. Tanja amo keman kikauak Jehová, uan yejuatsin kipaleuij maj kiajsi kani nemis. Tanja monamiktij iuan se tokniuj akin semi kitasojta Jehová uan nochin omen kisentekitiliaj miak tonalmej.

AXKANYA MAJ OKACHI IUAN TITAKUAUJTAMATIKAN JEHOVÁ

16. ¿Toni techpaleuis maj tiyolchikaujkej keman mochiuas tein kijtoua Lucas 21:​26-28?

¹⁶ Keman mochiujtos tetsaujkatajyouilis tel miakej “ixtayouaskej porin semi mojkamikiskej”. Sayoj ke tiitekitikauan Dios tiyeskij tiyolchikaujkej uan amo keman tikauaskej Jehová (xikonixtajtolti Lucas 21:​26-28). ¿Keyej? Porin nochipa iuan titakuaujtamatiskej. Tanja kijtoua ke tein kipanok kipaleuia maj taxiko keman kipia okseki ouijkayomej, yejua kijtoua: “Nikitani ke Jehová ueli techpaleuia maj tikxikokan tein yeski ouijkayot uan techtatiochiuia. Kemansa tiknemiliaj ke oksekin ueli techchiuiliaj tein yejuan kinekij uan tejuan amo teyi ueli tikchiuaj, sayoj ke Jehová okachi chikauak ke yejuan. Maski axkan semi titajyouiskej tikmatij ke amo nochipa ijkon yeski”.

17. ¿Keniuj techpaleuis texto para xiuit 2024? (Xikonita taixkopin ipeujyan amaix).

¹⁷ Maski axkan mochiujtok miak taman tein techmoujtia, uelis tikchiuaskej kemej David uan amo tikauaskej maj nion teyi techmojkakalaki. Texto para xiuit 2024 yejua nejin tein David kiluij Jehová: “Keman nimoui, mouan nitakuaujtamati” (Sal. 56:3). Se amaix tein ika tajtoua Biblia ijkon kimelauak nejin versículo: “David amo itech tanemilia tein kimoujtia oso itech ikuejmoluan, ta iuan takuaujtamati akin uelis kimakixtis”. Nochipa itech xiontanemili nejin texto uan okachiok keman tikonpias se ouijkayot. Itech xiontanemili tein Jehová kichiuania, tein kichiujtok uan tein kichiuas satepan. Ijkon no uelis tikonijtos kemej David: “Itech Dios nitakuaujtamati; amo nimoui” (Sal. 56:4).