Sekin takamej moskaltijkej kampa amo kinpoujkaitaj nion kinpatiuitaj siuamej. Hans se tokniuj akin takalpanoua itech circuito ompa Bolivia, kijtoua: “Miakej takamej moskaltijkej kampa kinemiliaj ke yejuan okachi ueyichiuanimej ke siuamej, yejua ika amo kinpoujkaitaj uan kinchiuiliaj tein amo kuali”. Shengxian, se tokniuj de Taiwán, kijtoua: “Kampa ninemi miakej takamej kinemiliaj ke siuamej amo moneki kinyolmajxitiskej takamej. Komo se takat kijtoua tein kinemilia se siuat, okseki takamej amo kipoujkaitaskejok”. Oksekin amo semi kinextiaj ke kinchikoitaj siuamej, sayoj ke kijtouaj teisa para kinkejkeloskej.

Se takat akin ijkon moskaltij uelis mopatasok uan amo kinemilisok ke takamej okachi ueyichiuanimej ke siuamej (Efes. 4:​22-24). ¿Keniuj uelis kichiuaskej? Komo kichiuaj kemej Jehová. Itech nejin tamachtilis tikitaskej keniuj Jehová kinita siuamej, keniuj tokniuan takamej uelis kinitaskej tokniuan siuamej kemej Jehová kinita, uan keniuj tayekananij uelis kinmachtiskej oksekin maj kinpoujkaitakan siuamej.

¿KENIUJ JEHOVÁ KINITA SIUAMEJ?

Jehová yejua akin okachi kuali technextilia keniuj moneki tikinitaskej siuamej. Yejua toTajtsin akin semi teiknelia uan kintasojta nochin ichankauan (Juan 3:16). Jehová semi kintasojta siuamej akin kitekitiliaj uan kinita kemej isiuapipiluan. Maj tikitakan keniuj Jehová kinextia ke kintasojta uan kinpoujkaita siuamej.

Amo kinchikotasojta. Jehová kinchijchiuak takamej uan siuamej kemej yejuatsin tamati (Gén. 1:27). Amo kinchijchiuak takamej maj okachi uelikan kichiuakan teisa uan maj okachi tamatinij  ke siuamej. Kichiuak maj nochin uelikan kiajsikamatikan tein tamachtia Biblia uan maj kinextikan tein kuali tein Jehová kinextia. Yejuatsin nochin kintasojta, takamej uan siuamej (2 Crón. 19:7). Jehová semi kinpatiuita takamej uan siuamej akin iuan takuaujtamatij, uan nochin kiniluia ke uelis nemiskej nochipaya nikan taltikpak, oso ne iluikak uan mochiuaskej tiopixkamej uan tekiuanij (2 Ped. 1:1). Nochi nejin kinextia ke Jehová amo kinchikoita siuamej.

Kinkaki. Jehová kiita uan kimati keniuj momachiliaj siuamej uan toni ouijkayomej kipiaj. Yejuatsin kinkakik uan kinnankilij Raquel uan Ana keman kitataujtijkej (Gén. 30:22; 1 Sam. 1:​10, 11, 19, 20). Jehová no kichiuak maj itech iTajtol moijkuilouani keman sekin takamej kintajtolkakkej siuamej. Semej yejua Abrahán, keman Jehová kiluij maj kikaki Sara uan yejua ijkon kichiuak (Gén. 21:​12-14). Tekiuaj David kikakik Abigaíl. Hasta kijtoj ke Jehová kititanka para maj iuan tajto (1 Sam. 25:​32-35). Uan Jesús, akin kichiua nochi tein Jehová kichiua kikakik imomaj María (Juan 2:​3-10). Nochi nejin kinextia ke Jehová kinpoujkaita siuamej keman kinkaki.

Iniuan takuaujtamati. Jehová takuaujtamatia ke Eva kipaleuiskia Adán maj kiyekpianij nochi taltikpak (Gén. 1:28). Jehová amo kiitaya ke Adán okachi ueyichiujkej katka ke Eva, ta kiitaya kemej akin ueliskia kipaleuis itakauj. No takuaujtamatia ke tanauatianij Débora uan Huldá kiyolmajxitiskiaj ixolal, no kiyolmajxitiskiaj hasta se juez uan se tekiuaj (Juec. 4:​4-9; 2 Rey. 22:​14-20). Axkan Jehová no iniuan takuaujtamati itekitikauan siuamej uan kinnauatia maj kichiuakan seki tekimej. Nejin tokniuan siuamej tanojnotsaj, tapaleuiaj kemej precursoras oso misioneras. Kiitaj keniuj mochijchiuaskej Kalmej kampa tiMosentiliaj uan sucursales, no tapaleuiaj maj mochijchiuakan uan kinyekpiaj. Sekin tapaleuiaj Betel uan oksekin itech Kalmej kampa Motajtolkepaj Amaixmej. Nochi nejon tokniuan kemej yeskia miakej tateuianij akin Jehová kinkui para kichiuas tein kiyolpaktia (Sal. 68:11). Moyekita ke Jehová amo kinemilia ke siuamej amo chikaujkej oso ke amo ueli kichiuaj nion teyi.

¿KENIUJ TOKNIUAN TAKAMEJ UELIS KINITASKEJ TOKNIUAN SIUAMEJ KEMEJ JEHOVÁ KINITA?

Tokniuan takamej, komo tiknekij tikmatiskej ox no tikinitaj tokniuan siuamej kemej Jehová kinita, moneki tikitaskej toni tiknemiliaj uan toni tikchiuaj. Yejua ika moneki tikchiuaskej seki taman tein techpaleuis. Se tapajtijkej uelis kikuis seki teposmej para kimatis ox kuali tekitok toyolo, no ijkon, se totasojikniuj uan iTajtol Dios uelis techpaleuiskej maj tikmatikan ox tikinitaj siuamej kemej Jehová kiyolpaktia. Maj tikitakan keniuj.

Maj tikiluikan se totasojikniuj maj techpaleui (Prov. 18:17). Uelis iuan titajtoskej se totasojikniuj takat oso siuat akin yolkuali uan teajsikamati, uan maj tiktajtanikan: “¿Keniuj tikita ke nimouika iniuan tokniuan siuamej? ¿Kiitaj siuamej ke nikinpoujkaita? ¿Uelis teisa nikchiuas para okachi kuali iniuan nimouikas?”. Komo techiluia toni uelis tikchiuaskej, maj amo niman tikualanikan, ta maj tikchiuakan tein moneki.

Maj timomachtikan iTajtol Dios. Maj tikitakan tein Biblia kijtoua para tikmatiskej ox tein tiknemiliaj uan tein tikchiuaj kinextia ke tikinpoujkaitaj tokniuan siuamej (Heb. 4:12). Keman timomachtiaj, tikitaj keniuj seki takamej kuali mouikakej iniuan siuamej uan sekin amo. Yejua ika uelis timotajtaniskej kemej akoni tikchiuaj. Sayoj ke semi moneki maj amo sayoj tikitakan seki versículos, ta no tein kijtouaj okseki versículos, ijkon amo tikuiskej se texto para tiknextiskej ke Biblia amo kuali ininka tajtoua siuamej. Kemej tein kijtoua 1 Pedro 3:​7, kampa kijtoua ke takat moneki kiajsikamatis isiuatsin akin tamati “kemej se tapalkat tein okachi niman uelis tapanis”. b ¿Kijtosneki nejin versículo ke takat okachi kuali tanemilia uan okachi ueli kichiua teisa ke siuat? ¡Amo! Para kuali tikajsikamatiskej tein Pedro kijtoj, maj itech titanemilikan tein kijtoua Gálatas 3:​26-29. Ompa kijtoua ke Jehová kinixpejpenani takamej uan siuamej para tekiuajtiskej iuan Jesús ompa iluikak. Komo timomachtiaj tein Biblia kijtoua uan tikiluiaj maj techyolmajxiti  se totasojikniuj takat oso siuat, tikmatiskej keniuj tikinpoujkaitaskej tokniuan siuamej.

¿KENIUJ TAYEKANANIJ KINEXTIAJ KE KINPOUJKAITAJ TOKNIUAN SIUAMEJ?

Tokniuan takamej itech nechikol no uelis kimatiskej keniuj kinpoujkaitaskej tokniuan siuamej komo kiitaj keniuj kichiuaj tayekananij. ¿Keniuj tayekananij kinextiaj ke kinpoujkaitaj uan kintasojtaj tokniuan siuamej? Maj tikitakan keniuj kichiuaj.

Kiniluiaj ke kuali yetok tein kichiuaj. Tein kichiuak tatitanil Pablo uelis kinmachtis tayekananij. Itech carta tein kinijkuilouilij tokniuan de Roma, kiniluij miakej tokniuan siuamej ke kuali tein kichiujtoyaj (Rom. 16:12). Maj tiknemilikan keniuj yolpakiaj nejin tokniuan siuamej keman itech nechikol kiixtajtoltijkej carta tein Pablo kijkuilojka. No ijkon tokniuan tayekananij nochipa kiniluiaj tokniuan siuamej ke kuali tein kichiujtokej porin kitekitiliaj Jehová uan kinextiaj miak taman tein kuali. Nejin kinpaleuia tokniuan siuamej maj kimatikan ke itech nechikol kinpatiuitaj uan kinpoujkaitaj. Tein se tokniuj tayekankej kiluis se tokniuj siuat, xa yejua tein kiyolchikauas maj kisentoka kitekitili Jehová (Prov. 15:23).

Tokniuan tayekananij ika nochi ininyolo moneki kiniluiskej tokniuan siuamej ke kuali tein kichiujtokej uan kiniluiskej toni kuali kichiujtokej. ¿Keyej? Maj tikitakan tein kijtoua Jessica: “Semi tiyolpakij keman tokniuan takamej techiluiaj ‘Kuali tein tikchiujtok’. Sayoj ke okachi techyolchikaua keman techiluiaj toni tein kuali tikchiujtokej, xa porin tikinmachtiaj tokoneuan maj amo mauiltikan itech nechikol oso porin tikuitij se akin tikmachtiaj ika Biblia para maj youi nechikol”. Keman tayekananij kiniluiaj tokniuan siuamej toni tein kuali kichiujtokej, yejuan kimachiliaj ke tapaleuiaj itech nechikol uan kinpatiuitaj.

Kinkakij. Tayekananij akin amo moueyimatij kimattokej ke amo sayoj yejuan kijtouaj tein  tapaleuia. Yejua ika kiniluiaj tokniuan siuamej maj kijtokan tein kinemiliaj ke uelis tapaleuis uan kuali kinkakij. Ijkon, kinyolchikauaj tokniuan siuamej uan nochin mosenpaleuiaj. ¿Keniuj nejon kinpaleuia tayekananij? Gerardo se tokniuj akin tapaleuia Betel, kijtoua: “Nikitani ke keman nechyolmajxitiaj tokniuan siuamej nechpaleuia maj okachi kuali nikchiua tekit tein nikpia. Miakej tokniuan siuamej, yejuan akin miak xiujmejya kichiujtokej se tekit uan akin okachi kuali kimatij keniuj kichiuaskej ke tokniuan takamej”. Itech nechikol moajsij miakej tokniuan siuamej precursoras, yejua ika kuali ixmatij kampa motanojnotsa. Se tokniuj tayekankej akin monotsa Bryan kijtoua: “Tokniuan siuamej uelis semi tapaleuiskej itech inechikol Jehová porin ueli kichiuaj miak taman uan kinextiaj tein kuali”. ¡Maj tikchiuakan kemej yejuan!

Tokniuan tayekananij moneki kikakiskej tein kiniluiaj tokniuan siuamej. ¿Keyej? Se tokniuj tayekankej akin monotsa Edward kijtoj: “Tein kinemilia uan tein kipanouani se tokniuj siuat, semi kipaleuia se tokniuj takat maj okachi kuali kiajsikamati teisa uan maj okachi kiajsikamati tein kimachiliaj oksekin” (Prov. 1:5). Maski tayekananij amo nochipa kichiuaskej tein kinyolmajxitia se tokniuj siuat, moneki kitasojkamatiliskej porin kijtoua tein kimati uan tein kiajsikamati.

Kinmachtiaj. Tayekananij akin tamattokej kitemouaj keniuj kinmachtiskej tokniuan siuamej. Uelis kinmachtiskej keniuj kichiuaskej nechikol tein mochiua achto ke se tanojnotsatiuj komo amo yetok se tokniuj akin moauijya. No uelis kinmachtiskej keniuj uelis kinkuiskej teposmej uan máquinas para tapaleuiskej keman kichijchiujtoskej oso kiyektalijtoskej se kali kampa titaueyichiuaj. Ompa Betel, akin taixyekanaj kinmachtianij tokniuan siuamej para maj uelikan tapaleuikan itech miak tataman tekimej, sekin kinmachtiaj maj kiitakan maj amo uejueliui teisa, maj kitalilikan computadoras seki taman tein ika se tekiti, maj tekitikan itech compras uan contabilidad. Tayekananij akin kinmachtiaj tokniuan siuamej, kinextiaj ke iniuan takuaujtamatij uan kimatij ke uelis kichiuaskej tein kiniluiaj.

Miakej tokniuan siuamej kichiuaj tein tayekananij kinmachtijkej para kinpaleuiskej oksekin. Sekin akin kinmachtijkej maj kalchijchiuakan, tapaleuiaj keman moyekchijchiuaj kalmej keman panoua se tetsauit. Oksekin kichiuaj tein kinyolmajxitijkej keman tanojnotsaj senteixtenoj, uan kinmachtiaj okseki tokniuan siuamej para maj no ijkon kichiuakan. ¿Toni kinemiliaj tokniuan siuamej den tayekananij akin kinmachtijkej? Jennifer kijtoua: “Keman mochijchiuak se Kali kampa tiMosentiliaj uan nitapaleuij, semej akin ompa taixyekanaya nechmachtij maski kipiaya miak tekit. Tokniuj kiitaya tekit tein nikchiuaya uan nechiluiaya ke kuali nikchiuak. Semi nikuelitaya iuan nitekitis porin nikitaya ke nouan takuaujtamatia uan nechpatiuitaya”.

¿KENIUJ TAPALEUIA KOMO TIKINITAJ TOKNIUAN SIUAMEJ KEMEJ TOCHANKAUAN?

Tikintasojtaj tokniuan siuamej ijkon kemej Jehová kichiua. Tikinitaj kemej tochankauan (1 Tim. 5:​1, 2). Tikinpatiuitaj uan tiyolpakij iniuan tikueyichiuaskej Jehová. No tiyolpakij keman kimatij ke tikintasojtaj uan tikinpaleuiaj. Vanessa kijtoua: “Semi niktasojkamatilia Jehová porin nechkaua maj nipoui iuan inechikol kampa moajsij miakej tokniuan takamej akin nechyolchikauaj”. Se tokniuj siuat de Taiwán kijtoua: “Semi niktasojkamati maj Jehová uan inechikol kintasojtakan siuamej uan maj kinpoujkaitakan. Nejon nechpaleuia maj okachi nitakuaujtamati uan maj nimotasojkamati nipouis itech ixolal Jehová”.

Tikmatij ke Jehová semi yolpaki keman kiita ke tokniuan takamej mochikauaj kinpoujkaitaskej uan kinpatiuitaskej tokniuan siuamej ijkon kemej yejua (Prov. 27:11). Benjamin se tokniuj tayekankej akin nemi Escocia kijtoua: “Itech nochi taltikpak miakej takamej nion tepitsin kinpoujkaitaj siuamej, yejua ika keman tokniuan siuamej yetoskej itech Kali kampa tiMosentiliaj, tiknekij maj kimachilikan ke tikinpoujkaitaj uan tikintasojtaj”. Maj timochikauakan tikchiuaskej kemej Jehová. Maj tikinpoujkaitakan uan maj tikintasojtakan tokniuan siuamej kemej kinnamiki (Rom. 12:10).