1. ¿Toni tikmatij tiitekitikauan Jehová?

 AKIN tiktekitiliaj Jehová tikmatij ke yejuatsin techtasojta uan kineki maj kuali tietokan (Rom. 8:35-39). No tikmatij ke komo tiktakamatij tein kijtoua Biblia, nochipa techpaleuis (Is. 48:17, 18). Sayoj ke, ¿toni uelis tikchiuaskej komo techpanoua teisa tein amo tikchiayaj?

2. ¿Toni ouijkayomej xa tikpiaskej uan toni uelis timotajtaniskej?

² Tinochin tiitekitikauan Jehová tikpiaj ouijkayomej. Xa semej tochankauan techiluia oso techchiuilia teisa tein ika techyolkokoua. Xa timokokouaj uan nejon kichiua maj amo semi tiktekitilikan Jehová. Xa titajyouijtokej porin mochiuak se tetsauit kampa tinemij. Oso xa techtajyouiltiaj porin tiktekitiliaj Jehová. Keman tikpiaj nejin ouijkayomej, xa timotajtaniaj: “¿Keyej nechpanotok nejin? ¿Nikchiuak teisa tein amo kuali? ¿Kijtosneki ke Jehová amo nechtatiochiuijtok?”. Komo ijkon tionmomachiliani, amo xionmosenkaua. Miakej itekitikauan Jehová akin amo keman kikauanij no ijkon kinpanouani (Sal. 22:1, 2; Hab. 1:2, 3).

3. ¿Toni techmachtia Salmo 34:19?

³ (Xikonixtajtolti Salmo 34:19). Itech nejin versículo moijtoua ome taman tein semi moneki: 1) akin yolmelaujkej kipiaj ouijkayomej uan 2) Jehová kinmakixtia. Se taman kemej Jehová techmakixtia yejua keman techpaleuia maj tikajsikamatikan tein yekmelauj ueliskia techpanos. Maski Jehová motenkaua ke tiyolpakiskej komo tiktekitiliaj, nejon amo kijtosneki ke amo keman tikpiaskej ouijkayomej  (Is. 66:14). Dios kineki maj itech titanemilikan tein amo uejkaua tikpiaskej nochipaya, ijkon kineki maj tinemikan (2 Cor. 4:16-18). Uan axkan techpaleuia maj nochipa tiktekitilijtokan (Lam. 3:22-24).

4. ¿Toni tikitaskej itech nejin tamachtilis?

⁴ Itech nejin tamachtilis tikitaskej tein kinpanok seki itekitikauan Jehová akin nenkej ne uejkauj uan akin nemij axkan. Kemej tikitatij, xa uelis tikpiaskej ouijkayomej tein amo tikchiayaj. Sayoj ke, komo titakuaujtamatij iuan Jehová, yejuatsin nochipa techpaleuis (Sal. 55:22). Keman tikitaskej tein kinpanok sejsemej, maj timotajtanikan: “¿Toni nikchiuaskia komo nechpanoskia nejon? ¿Keniuj tein kipanok nechpaleuia maj okachi nitakuaujtamati iuan Jehová? ¿Toni uelis nechmachtis?”.

5. ¿Toni Labán kichiuilij Jacob? (Xikonita taixkopin ipeujyan amaix).

⁵ Seki itekitikauan Jehová akin nenkej ne uejkauj kipiakej ouijkayomej tein amo kichiayaj. Maj itech titanemilikan Jacob. Itat kinauatij maj iuan monamiktiani semej isiuapipiluan Labán, se ichankauj akin kiueyichiuaya Jehová. Uan kiyekiluij ke Jehová semi kitatiochiuiskia (Gén. 28:1-4). Jacob kichiuak tein kiluijkej: kisak de Canaán uan yajki hasta kampa nemia Labán, akin kinpiaya ome isiuapipiluan, Lea uan Raquel. Jacob kitasojtak Raquel akin okachi siuapil katka. Kemej Jacob kinekia iuan monamiktis, kinekik kitekitilis Labán chikome xiujmej (Gén. 29:18). Sayoj ke amo mochiuak tein kinemiliaya. Labán kikajkayauak uan kimakak isiuapil Lea, akin tayekanaya maj iuan monamiktiani. Se semana satepan kikauak maj monamiktiani iuan Raquel, sayoj ke monekia kitekitilisok chikome xiujmej (Gén. 29:25-27). Uan amo sayoj nejon, ta no kichiuiliaya tein amo kuali keman amo kiyektaxtauiaya. ¡Ijkon kitekitiltij 20 xiujmej! (Gén. 31:41, 42).

6. ¿Toni okseki ouijkayomej kipiak Jacob?

⁶ Jacob no kipiak okseki ouijkayomej. Ichankauan miakej katkaj uan ikoneuan amo nochipa kuali mouikayaj. Hasta kinamakakej José kemej takeual. Uan ome ikoneuan Jacob, Simeón uan Leví, kipinaujtijkej ichankauan uan kichiujkej maj amo kuali ika tajtokan Jehová. Uan isiuatsin Raquel, akin semi kitasojtaya, momikilij keman kipiak ojpatika ikonetsin. Uan keman miak xiujmej amo onkaya toni kikuaskej, Jacob monekik nemitiuj Egipto keman xiuejya katka (Gén. 34:30; 35:16-19; 37:28; 45:9-11, 28).

7. ¿Keniuj Jehová kinextilij Jacob ke kiyolpaktiaya?

⁷ Maski Jacob kipiak nochi nejin ouijkayomej, nochipa takuaujtamatik iuan Jehová uan kineltokaya ke kichiuaskia tein motenkaujka. Uan Jehová kimatiltij ke kiyolpaktiaya. Maski Labán miakpa kikajkayauj, Jacob kipiak miak taman porin Jehová kitatiochiuij. Uan Jacob xa semi kitasojkamatilij iDios keman miak xiujmej satepan oksepa moajsik iuan José, akin kinemilijka ke momikilijkaya. Jacob uelik kixikoj nochi nejin ouijkayomej porin kuali mouikaya iuan Jehová (Gén. 30:43; 32:9, 10; 46:28-30). Tejuan no uelis tikixnamikiskej ouijkayomej tein tikpiaskej komo kuali timouikaj iuan Jehová.

8. ¿Toni kinekia kichiuas tekiuaj David?

⁸ Tekiuaj David amo uelik kichiuak nochi tein kiuelitaskia para kitekitilis Jehová. Yejua semi kinekia kichijchiuas  templo para iDios. Keman kiluij tanauatijkej Natán, yejua kinankilij: “Xikchiua tein yeski tein moajsis itech moyolo, porin Dios akin melauak yetok mouan” (1 Crón. 17:1, 2). Xa David semi yolpakik keman kikakik nejin tajtolmej. Xa niman peuak kinemilia keniuj kichiuaskia porin katka se ueyi tekit.

9. ¿Toni kichiuak David keman amo panok tein kinemiliaya?

⁹ Tanauatijkej Natán mokepak nejon youak para kinauatis David ke Jehová kimatiltijka ke amo yejua kichijchiuaskia templo, ta semej ikoneuan (1 Crón. 17:3, 4, 11, 12). ¿Toni kichiuak David keman kikakik? Kipatak tein kiixtalijtoya kichiuas. Peuak kisentilia tomin uan tein monekia para maj iokichpil Salomón kichiuani nejon ueyi tekit (1 Crón. 29:1-5).

10. ¿Keniuj Jehová kitatiochiuij David?

¹⁰ Tepitsin satepan ke Jehová kiluij David ke amo yejua kichijchiuaskia templo, motenkauak iuan ke semej ikoneuan tekiuajtiskia nochipaya (2 Sam. 7:16). Itech xochital, keman Jesús tekiuajtitos mil xiujmej, David semi yolpakis keman kimatis ke semej ichankauan tekiuajtitok. Nejin tein panok, techmachtia ke maski axkan amo ueli tiktekitiliaj Jehová kemej tiknekiskiaj, toDios uelis techtatiochiuis kemej amo tikchiaj.

11. ¿Keniuj Jehová kintatiochiuij tokniuan itech yekinika siglo maski iTaixyekanalis ayamo tekiuajtia? (Hechos 6:7).

¹¹ Tokniuan itech yekinika siglo kipiakej ouijkayomej tein amo kichiayaj. Yejuan kinekiajya maj iTaixyekanalis Dios peuani tekiuajti, sayoj ke amo kimatiaj kemanian mochiuaskia (Hech. 1:6, 7). ¿Toni kichiujtoyaj keman mochixtoyaj? Kisentokayaj tanojnotsayaj. Keman kiitakej ke kuali tanauatilmej moteixmatiltiaya miakkan, kiitakej ke Jehová kitiochiujtoya tekit tein kichiujtoyaj (xikonixtajtolti Hechos 6:7).

12. ¿Toni kichiujkej tokniuan itech yekinika siglo keman tatasojtia uan amo kipiayaj toni kikuaskej?

¹² Itech yekinika siglo peuak tatasojti uan amo onkaya toni kikuaskej “itech nochi taltikpak” (Hech. 11:28). Tein panok, no kinijtakoj tokniuan. Tetatmej xa semi kintekipachouaya keniuj kintekipanoskiaj ininchankauan. Telpochmej uan ichpochmej akin kinekiaj okachi kitekitiliskej Dios, xa hasta kinemilijkej ke okachi kuali maj mochiakan. Maski ijkon, tokniuan mochikaujkej kisentokaskej tanojnotsaskej uan ika nochi ininyolo, kikuikej tein kipiayaj para kinpaleuiskej tokniuan ompa Judea (Hech. 11:29, 30).

13. ¿Toni tatiochiualismej kiselijkej tokniuan keman amo onkaya toni kikuaskej?

¹³ ¿Toni tatiochiualismej kiselijkej tokniuan keman kipanotoyaj nejon ouijkayot? Akin kinmakakej toni kikuaskej kiitakej keniuj Jehová kinyekpiaya (Mat. 6:31-33). Uan xa okachi kuali mouikakej iniuan tokniuan akin tapaleuijkej. Uan no, akin kitemakakej inintomin uan akin tapaleuitoj xa semi yolpakkej (Hech. 20:35). Jehová kintatiochiuij nochin porin kichiujkej tein kuali maski kipanotoyaj ouijkayomej.

14. ¿Toni kinpanok Bernabé uan tatitanil Pablo, uan keniuj tapaleuij tein kichiujkej? (Hechos 14:21, 22).

¹⁴ Tokniuan itech yekinika siglo miakpa kintajyouiltiayaj uan kemansa nion no kichiayaj. Maj tikitakan tein kinpanok tatitanil Pablo uan Bernabé keman tanojnotstoyaj Listra. Keman ajsikej, akin ompa nemiaj kuali kinkakkej uan kuali kinselijkej. Sayoj ke satepan, sekin akin kintauelitayaj kichiujkej maj nochin kiixnamikikan  Pablo, kitetenkej uan hasta kinemilijkej ke kimiktijkajya (Hech. 14:19). Sayoj ke Bernabé uan Pablo yajkej okseko uan kisentokakej tanojnotskej. ¿Keniuj tapaleuij tein kichiujkej? ‘Kinpaleuijkej miakej maj mochiuakan imomachtijkauan Jesús’ uan kinyolchikaujkej tokniuan ika tein kiniluijkej uan tein kichiujkej (xikonixtajtolti Hechos 14:21, 22). Bernabé uan Pablo amo mosenkaujkej maski kintajyouiltijkej, uan nejon kinpaleuij miakej. Komo tejuan amo no timosenkauaj uan tiksentokaj tikchiuaj tekit tein Jehová technauatia, yejuatsin semi techtatiochiuis.

15. ¿Toni mitsonmachtia tein kichiuak tokniuj Alexander Macmillan?

¹⁵ Seki xiujmej achto ke ajsiskia xiuit 1914, itekitikauan Jehová kichiayaj maj mochiua miak taman. Ijkon kemej miakej, tokniuj Alexander Macmillan, no kinemiliaya ke niman yaskia iluikak. Itech septiembre de 1914, kijtoj itech se tanojnots: “Xa amo oksepa niktemakas okse tanojnots”. Sayoj ke nejon amo panok. Satepan yejua kijkuiloj: “Tisekimej xa tiyolijsiujkej keman tiknemilijkej ke niman tiaskiaj iluikak”. No kijtoj: “Sayoj monekia tiksentokaskej tiktekitiliskej Jehová”. Uan yejua nejon tein kichiuak. Yolpakia keman tanojnotsaya, kinyolchikauaya tokniuan akin tsaktoyaj porin amo yajkaj tateuitoj uan maski katka xiuejya nochipa yaya nechikolmej. Keman tokniuj Macmillan kichixtoya yas iluikak, ¿keniuj kisentokas kitekitilis Jehová semi kipaleuij? Itech xiuit 1966, tepitsin achto ke momikiliskia, kijkuiloj nejin: “Niksentoka semi nitakuaujtamati kemej achto”. Tinochin no uelis tikchiuaskej kemej yejua uan okachiok akin miak xiujmejya titaxikojtokej (Heb. 13:7).

16. ¿Toni ouijkayot kiixnamik tokniuj Jennings uan isiuatsin? (Santiago 4:14).

¹⁶ Miakpa, miakej itekitikauan Jehová ijsiujka kokolispeuaj, ijkon kemej kipanok tokniuj Herbert Jennings. Kampa techtapouia inemilis kijtoua ke yejua uan isiuatsin semi yolpakiaj keman tapaleuiayaj kemej misioneros ompa Ghana. b Sayoj ke satepan kiajxilijkej se kokolis itech itsontekon tein kichiuaya maj amo kuali momachiliani. Tokniuj Jennings kijtoj ke kualtsin yetoyaj, sayoj ke nochi sepasan mopatak, tein kipanotoya tamati kemej tein kijtoua Santiago 4:14 (xikonixtajtolti). Yejua kijkuiloj: “Tikitakej ke monekia tikchiuaskej teisa, yejua ika tikixtalijkej tikauaskej altepet Ghana uan totasojikniuan, uan timokepaskej Canadá [para maj nechpajtikan]”. Jehová kinpaleuij tokniuan Jennings uan isiuatsin maj kisentokakan kitekitilijtokan maski kipiayaj ouijkayomej.

17. ¿Keniuj tein kipanok tokniuj Jennings kinpaleuiani tokniuan?

¹⁷ Tein kijtoj tokniuj Jennings kampa techtapouia inemilis semi kinpaleuiani oksekin. Se tokniuj siuat kijkuiloj: “Nejin tamachtilis semi nikuelitak […]. Keman nikixtajtoltij ke tokniuj Jennings monekik mokepas uan kikauas kampa tapaleuijtoya para mopajtis, semi nechpaleuij maj nikita kemej moneki tein nechpanotoya”. Okse tokniuj takat no kijkuiloj: “Keman nikuikaya majtakti xiuit nitekititoya kemej tayekankej, monekik nikauas porin nikpiaya se kokolis itech  notsontekon. Semi nimotayokoltiaya uan hasta amo uelia nikixtajtoltiaya kampa techtapouiaj ininnemilis tokniuan […]. Sayoj ke keman nikitak ke tokniuj Jennings amo mosenkauak, semi nechyolchikauak”. Nejin techelnamiktia ke keman tikpanouaj ouijkayomej uan titaxikouaj, uelis tikinyolchikauaskej oksekin. Yejua ika, maski amo tinemiskej kemej tikuelitaskiaj, uelis titapaleuiskej maj oksekin okachi takuaujtamatikan uan maj taxikokan (1 Ped. 5:9).

18. ¿Toni techmachtia tein kipanok se tokniuj siuat de Nigeria akin amo nemiok itakatsin? (Xikonita taixkopin kampa kinextia tein panok).

¹⁸ Ouijkayomej kemej COVID-19 kintajyouiltiani miakej itekitikauan Jehová, ijkon kemej kipanok se tokniuj de Nigeria akin amo nemiok itakatsin. Yejua amo kipiaya miak takual nion tomin. Se tonal keman kualkanok katka, keman sayoj kipiayaj se taza arroz, isiuapiltsin kitajtanij toni kikuaskiaj satepan. Tokniuj kinankilij ke amo kipiayajok tomin nion takual, sayoj ke kiluij ke monekia kichiuaskej kemej siuatsin de Sarepta akin momikilijkaya itakatsin. Kichijchiuaskiaj tein ijkuak kikuaskiaj uan takuaujtamatiskiaj iuan Jehová (1 Rey. 17:8-16). Achto ke kinemiliskiaj toni kikuaskiaj nejon tonal, seki tokniuan kinuikilijkej despensa. ¡Tein kinmakakej kinajsiskia panoua ome semana! Tokniuj kiitak ke Jehová kuali kikakik tein kiluijka isiuapiltsin. Nejin kinextia ke keman tikpiaskej ouijkayomej, komo titakuaujtamatij iuan Jehová, okachi iuan timotokiskej (1 Ped. 5:6, 7).

19. ¿Toni kipanok tokniuj Alexéi Yershov?

¹⁹ Miak xiujmejya, miakej tokniuan kipanouanij seki taman tein amo kichiayaj: keman kintajyouiltiaj. Maj tikitakan tein kipanok Alexéi Yershov, se tokniuj akin nemi Rusia. Itech xiuit 1994 keman moauij, itaixpantijkauan Jehová ueliajok taueyichiuayaj  kampa nemiaj. Sayoj ke seki xiujmej satepan nochi mopatak ompa Rusia. Itech xiuit 2020, seki policías kalakitoj ichan Yershov, kitatemolijkej uan kikuilijkej seki taman tein kipiaya. Seki metsti satepan, tekiuanij kiteluilijkej ke kichiujtoya tein amo kuali. Uan videos tein kijtouayaj ke kinextiaya ke kichiujtoya tein amo kuali, kinchiuak aksa akin kinextiaya ke kinekia momachtis Biblia. ¡Tel amo kuali tein kichiuak!

20. ¿Toni kichiuani tokniuj Yershov para okachi kuali mouikas iuan Jehová?

²⁰ ¿Kipaleuij tein kipanok tokniuj Yershov? Kemaj. Axkan okachi kuali mouika iuan Jehová. Yejua kijtoua: “Nosiuatsin uan nejua okachi timosentataujtiaj. Nikmati ke komo Jehová amo nechpaleuiskia amo nitaxikoskia”. No kijtoua: “Nimomachtis Biblia nechpaleuia maj amo nimosenkaua. No ininka nitanemilia itekitikauan Jehová akin nenkej ne uejkauj. Biblia ika tajtoua tein kinpanok miakej tein kinextia ke moneki maj se yolseujto uan maj se takuaujtamati iuan Jehová”.

21. ¿Toni tikitakej itech nejin tamachtilis?

²¹ ¿Toni tikitakej itech nejin tamachtilis? Ke maski amo tikmatij toni uelis techpanos, komo titakuaujtamatij iuan Jehová, yejuatsin nochipa techpaleuis. Kemej kijtoua texto kampa kisa nejin tamachtilis, “miak ouijkayomej kipia akin yolmelauak, sayoj ke Jehová kimakixtia itech nochi nejon” (Sal. 34:19). Yejua ika, maj amo itech titanemilikan ouijkayomej tein tikpiaj, ta okachi kuali maj tikitakan keniuj Jehová techpaleuia ika ichikaualis. Komo ijkon tikchiuaj no uelis tikijtoskej tein kijtoj tatitanil Pablo: “Nikpia chikaualis para nikixnamikis nochi porin Dios nechmaka chikaualis” (Filip. 4:13).