1, 2. ¿Toni moneki tikchiujtoskej axkan ke tikchiaj maj mochiua se xochital?

 SEMI tiktasojkamatiliaj Jehová porin motenkaua kiixpolos nochi tein amo kuali uan itech nochi taltikpak mochiuas tein kuali yetok (2 Ped. 3:13). Maski amo tikmatij kemanian mochiuas xochital, nochi tein tikitaj kinextia ke amo uejkaua mochiuasya (Mat. 24:32-34, 36; Hech. 1:7).

² Tinochin moneki titakuaujtamatiskej ke yekmelauj mochiuas tein Dios motenkaua, hasta maski uejkaujya tiitaixpantijkauan Jehová oso yankuixtok, ¿keyej? Porin hasta akin tel kuali mouika iuan Jehová uelis amo takuaujtamatisok. Tatitanil Pablo kijtoj ke keman amo titakuaujtamatij “tajtakol [...] ijsiujka techijilpia” (Heb. 12:1). Para maj nejon amo techpano, moneki nochipa timomachtiskej tein kinextia ke Jehová amo uejkaua kichiuas xochital (Heb. 11:1).

3. ¿Toni tikitaskej itech nejin tamachtilis?

³ Itech nejin tamachtilis tikitaskej eyi taman tein techpaleuis maj okachi titakuaujtamatikan ke yekmelauj mochiuas se xochital: 1) maj itech titanemilikan inemilis Jesús tein kitemakak, 2) maj itech titanemilikan chikaualis tein Jehová kipia uan 3) maj okachi tiktekitilikan Jehová. Satepan tikitaskej ke tein Jehová kiluij Habacuc techpaleuia maj okachi titakuaujtamatikan. Sayoj ke, yekinika ika titajtoskej keyej semi moneki titakuaujtamatiskej ke mochiuas xochital.

¿KEYEJ SEMI MONEKI TITAKUAUJTAMATISKEJ?

4. ¿Itech toni taman tein tikixpejpenaj moneki tiknextiskej ke semi titakuaujtamatij?

⁴ Mojmostaj moneki tikixpejpenaskej teisa tein kinextis ke semi titakuaujtamatij. Moneki tikixpejpenaskej akonimej  iniuan timouikaskej, toni ika timoixpetaniskej, toni timomachtiskej, akoni iuan timonamiktiskej, ox tikinpiaskej konemej uan toni ika titekitiskej. Uelis timotajtaniskej: “¿Toni kinextia tein nikixpejpena? ¿Niknextia ke nikneltoka ke amo uejkaua tamis tein mochiujtok, uan ke amo uejkaua Dios kichiuas xochital? ¿Oso niknextia ke no nitanemilia kemej akin kijtouaj ke amo tinemiskej nochipaya?” (Mat. 6:19, 20; Luc. 12:16-21). Komo okachi titakuaujtamatij ke amo uejkaua mochiuas xochital, techpaleuis maj kuali titaixpejpenakan.

5, 6. ¿Keyej moneki semi titakuaujtamatiskej keman tikpiaj ouijkayomej? Xikonijto se neskayot.

⁵ No tikixnamikij ouijkayomej kampa moneki tiknextiskej ke titakuaujtamatij, xa keman techtajyouiltiaj, keman tikpiaj se kokolis tein amo pajti oso okseki taman tein uelis kichiuas maj timosenkauakan. Xa yekinika kuali tikixnamikiskej ouijkayot, sayoj ke kemej miakpa okachi uejkaua, moneki semi titakuaujtamatiskej para titaxikoskej uan tiksentokaskej tiyolpakiskej keman tiktekitiliskej Jehová (Rom. 12:12; 1 Ped. 1:6, 7).

⁶ Keman tikpiaj se ueyi ouijkayot, xa ueliskia tiknemiliskej ke Jehová amo keman kichiuas xochital. Sayoj ke nejin amo nochipa kijtosneki ke amo titakuaujtamatij. Maj tiknemilikan nejin, keman semi taseseya xa tiknemiliskej ke amo keman tonasok. Sayoj ke nochipa ejko tiempo keman tona uan taxiujtata, no ijkon panoua keman titayokoxtokej, uelis tiknemiliskej ke amo keman mochiuas xochital. Sayoj ke komo semi titakuaujtamatij iuan Jehová, tikneltokaskej ke tein motenkaua yekmelauj kichiuas (Sal. 94:3, 14, 15; Heb. 6:17-19). Komo titakuaujtamatij iuan Jehová, techpaleuis maj tiksentokakan tiktayekanaltikan tiktekitiliskej.

7. ¿Toni amo moneki tiknemiliskej?

⁷ Para titanojnotsaskej no moneki semi titakuaujtamatiskej. Miakej kiuelkakij keman ika titajtouaj ke amo uejkaua Dios kichiuas se xochital, sayoj ke kinemiliaj ke amo keman mochiuas (Mat. 24:14; Ezeq. 33:32). Yejua ika, moneki semi timoyekpiaskej para amo ijkon titanemiliskej, ta maj tikchiuakan tein techpaleuis maj okachi titakuaujtamatikan. Maj tikitakan eyi taman tein uelis tikchiuaskej.

MAJ ITECH TITANEMILIKAN INEMILIS JESÚS TEIN KITEMAKAK

8, 9. ¿Keyej okachi titakuaujtamatij komo itech titanemiliaj inemilis Jesús tein kitemakak?

⁸ Okse taman tein uelis techpaleuis maj okachi titakuaujtamatikan yejua komo itech titanemiliaj inemilis Jesús tein kitemakak. Nejon techpaleuis maj tikneltokakan ke tein Dios motenkaua yekmelauj kichiuas. Semi moneki maj tikxelokan tiempo para itech titanemiliskej keyej monekik momikilis Jesús uan nochi tein monekik kichiuas Jehová. Ijkon okachi titakuaujtamatiskej ke yejuatsin kichiuas se xochital kampa uelis tinemiskej nochipaya. ¿Keyej ijkon tikijtouaj?

⁹ Maj tiknemilikan nochi tein mochiuak para maj Jesús kitemakani inemilis. Jehová monekik kiualtitanis iyojtsin iKonetsin akin semi kitasojta uan akin okachi itasojikniuj para maj yoli nikan taltikpak kemej akin amo kipiaya tajtakol. Keman Jesús yetoya nikan taltikpak semi tajyouij, kipiak miak ouijkayomej uan tel fiero kemej kimiktijkej. Jehová kitemakak tein semi kipia ipatiuj. Kemej yejuatsin semi tetasojta amo kitemakaskia ikonetsin maj tajyouiani para maj kuali tinemikan sayoj  seki tonalmej (Juan 3:16; 1 Ped. 1:18, 19). Kemej Jehová kitemakak tein semi kipia ipatiuj, kichiuas maj ueli tinemikan nochipaya itech xochital.

MAJ ITECH TITANEMILIKAN ICHIKAUALIS JEHOVÁ

10. Kemej kijtoua Efesios 3:20, ¿toni ueli kichiua Jehová?

¹⁰ No uelis okachi titakuaujtamatiskej komo itech titanemiliaj ichikaualis Jehová. Yejuatsin ueli kichiua nochi tein motenkaua. Miakej xa kinemiliaj ke amo uelis tinemiskej nochipaya itech se xochital, sayoj ke Jehová miakpa motenkauani seki taman tein tejuan ueliskia tiknemiliskej ke amo uelis mochiuas. ¿Keyej? Porin Jehová kipia nochi chikaualis (Job 42:2; Mar. 10:27). Yejua ika, amo tikmojkaitaj maj kijto ke kichiuas seki taman tein semi kualtsin (xikonixtajtolti Efesios 3:20).

11. Xikonijto se taman tein Jehová motenkaujka tein se kimojkaita (xikonita recuadro “ Seki taman tein se kimojkaita tein Jehová kichiuak”).

¹¹ Maj itech titanemilikan seki taman tein Jehová motenkaujka iniuan itekitikauan ne uejkauj, tein moitaya ke amo ueliskia mochiuas. Kiniluij Abrahán uan Sara ke kipiaskiaj se konetsin maski xiuejkejya katkaj (Gén. 17:15-17). No kiluij Abrahán ke kinmakaskia ikoneuan tal tein pouia Canaán. Sayoj ke miak tiempo, ikoneuan Abrahán oso israelitas katkaj takeualmej ompa Egipto, yejua ika xa kinemilijkej ke tein Dios motenkaujka amo keman mochiuaskia. Sayoj ke kemaj panok. Uan no, miak xiujmej satepan, Jehová kiluij Elisabet, akin xiuejya katka ke kipiaskia se konetsin. Jehová no kiluij se ichpoch akin monotsaya María, ke kipiaskia iKonetsin, ijkon mochiuaskia tein miak xiujmej achto Jehová motenkaujka itech xochital Edén (Gén. 3:15).

12. ¿Toni techmatiltia Josué 23:14 uan Isaías 55:10, 11 tein Jehová ueli kichiua ika ichikaualis?

¹² Keman itech titanemiliaj nochi tein Jehová motenkauak uan keniuj kichiuak, tikitaj ke tel chikauak. Nejin kichiua maj okachi titakuaujtamatikan ke yejuatsin kichiuas xochital (xikonixtajtolti Josué 23:14; Isaías 55:10, 11). Ijkon okachi uelis tikinpaleuiskej oksekin maj kiajsikamatikan ke keman Jehová motenkaua kichiuas xochital, yekmelauj kichiuas uan ke amo sayoj timokajkayauaj. Jehová kijtoj nejin keman ika tajtoj yankuik iluikak uan yankuik taltikpak: “Tein nikijtoua takuaujtamach uan melauak” (Apoc. 21:1, 5).

MAJ OKACHI TIKTEKITILIKAN JEHOVÁ

13. ¿Keniuj nechikolmej techpaleuiaj maj okachi titakuaujtamatikan?

¹³ Expatika taman tein techpaleuis maj okachi titakuaujtamatikan iuan Jehová yejua komo okachi tiktekitiliaj. Maj tiknemilikan nejin, keman tiyouij nechikolmej tikitanij ke semi techpaleuia. Anna, b akin miak xiujmejya tataman kemej kitekitiliani Jehová miak tonalmej, kijtoua: “Nechikolmej kemej yeskia tepos tein kitsikoua barco, uan nechpaleuiaj maj okachi nitakuaujtamati. Maski akin kipanoltia tamachtilis amo semi ueli tamachtia oso amo kijtoua teisa tein yankuik, nochipa nikaki teisa tein nechpaleuia maj okachi nikajsikamati se tamachtilis tein kipia Biblia, uan ijkon okachi nitakuaujtamati”. Itech nechikolmej no tikakij tanankililmej tein kichiuaj maj okachi titakuaujtamatikan (Rom. 1:11, 12; 10:17).

14. ¿Keniuj keman titanojnotsaj techpaleuia maj okachi titakuaujtamatikan?

¹⁴ Keman titanojnotsaj no techpaleuia  maj okachi titakuaujtamatikan (Heb. 10:23). Barbara, akin kiuika panoua 70 xiujmej ke itaixpantijkauj Jehová, kijtoua: “Keman nitanojnotsa ika Biblia nochipa nechpaleuia maj okachi nitakuaujtamati. Nikitani ke keman okachi ika nitajtoua Jehová uan tein kualtsin tein motenkaua kichiuas, okachi nitakuaujtamati”.

15. ¿Keniuj komo timomachtiaj Biblia toselti techpaleuia maj okachi titakuaujtamatikan? (No xikonita taixkopimej).

¹⁵ Maj tikitakan okse taman tein techpaleuia maj okachi titakuaujtamatikan: timomachtiskej Biblia toselti. Susan kijtoua ke kemej kiixtalijtok kemanian momachtis semi kipaleuiani. Yejua kijtoua: “Domingos nimomachtia amaix Tanejmachtijkej tein timomachtiskej semana tein uitseok. Lunes uan martes, nimomachtia tein tikitaskej itech nechikol tein tikpiaj itajkotian semana. Uan itech okseki tonalmej niktemoua okseki taman tamachtilis”. Kemej Susan nochipa kichiua tein kiixtalijtok, kipaleuia maj okachi takuaujtamati. Irene, se tokniuj siuat akin kiuika miak xiujmejya tapaleuijtok itech ueyi kali kampa techixyekanaj, semi kipaleuiani maj okachi takuaujtamati keman momachtia tein Biblia achto kijtojka ke mochiuaskia. Yejua kijtoua: “Semi nikmojkaita nikitas ke tein Jehová achto kijtojka yekmelauj mochiua”. c

“YEKMELAUJ MOCHIUAS”

16. ¿Keniuj tikmatij ke tein Jehová kiluij Habacuc no techyolchikaua tejuan? (Hebreos 10:36, 37).

¹⁶ Seki itekitikauan Jehová miak xiujmejya kichixtokej maj ixpoliuia nochi tein amo kuali. Xa ueliskia tiknemiliskej ke tel uejkaujtokya. Jehová kimati keniuj momachiliaj itekitikauan. Yejua ika, kiluij tanauatijkej Habacuc: “Tein tikitak mochiuas  itech tonal keman ixyetok, uan ijsiujka motokijtok itamilis, uan kemaj mochiuas. Maski nesis ke uejkaua, ¡xiksentoka xikchia maj mochiua! Yekmelauj mochiuas. Amo motajkajtilis” (Hab. 2:3). ¿Keyej Jehová kijtoj nejin? ¿Sayoj para kiyolchikauas Habacuc oso no para techyolchikauas tejuan? Jehová kichiuak maj tatitanil Pablo kiniluiani nejin, tokniuan akin kichiaj maj mochiua xochital (xikonixtajtolti Hebreos 10:36, 37). Maski tiknemiliskej ke Jehová tel uejkaua, maj tikelnamikikan ke tein motenkaua “yekmelauj mochiuas. Amo motajkajtilis”.

17. ¿Keniuj se tokniuj siuat kichiuak tein Jehová kiyolmajxitij Habacuc?

¹⁷ Miakej itekitikauan Jehová kichiujtokej tein yejuatsin tayolmajxitij porin miak xiujmejya ‘kisentokaj kichiaj maj mochiua’ tein motenkaua. Maj tikitakan tein kipanok se tokniuj siuat akin monotsa Louise, akin peuak kitekitilia Jehová itech xiuit 1939. Yejua kijtoua: “Niknemilij ke achto ke nikajxitiskia 18 xiujmej ejkoskia Armagedón. Sayoj ke amo ijkon panok. Nochi nejin xiujmej semi nechpaleuiani nikixtajtoltis tein kinpanok ‘akin nion tepitsin yolijsiujkej’, kemej Noé, Abrahán, José uan oksekin itekitikauan Jehová akin monekik mochiaskej para kiseliskej tein Jehová iniuan motenkaujka. Kemej nikneltoka ke Jehová kichiuas tein motenkaua, nechpaleuiani nejua uan oksekin maj amo tikelkauakan ke amo uejkaua mochiuasya xochital”. Xa miakej akin kitekitilianij Jehová miak xiujmejya no ijkon kinemiliaj.

18. ¿Keniuj techpaleuia tein Jehová kichijchiuak maj tikneltokakan ke yekmelauj kichiuas xochital?

¹⁸ Maski xochital ayamo ueli tikitaj, onkak seki taman tein kemaj ueli tikitaj: sitalimej, koujmej, tapialmej uan tejuan. Maski keman peuak nochi amo onkayaj, amo akin ueliskia kijtos ke nejin amo onkak. Axkan onkak porin Jehová kinchijchiuak (Gén. 1:1, 26, 27). Jehová motenkauani ke kichiuas xochital uan tikmatij ke yekmelauj kichiuas. Nochipa tinemiskej uan amo keman tikokolispeuaskejok. Uelis tikmatiskej ke keman ejkos tonal tein kiixtalijtok, xochital yekmelauj mochiuas uan tikitaskej ijkon kemej axkan ueli tikitaj nochi tein Jehová kichijchiuak (Is. 65:17; Apoc. 21:3, 4).

19. ¿Toni techpaleuis maj okachi titakuaujtamatikan?

¹⁹ Axkan ke tikchixtokej maj mochiua xochital, maj tikchiuakan tein moneki para okachi titakuaujtamatiskej, maj itech titanemilikan inemilis Jesús tein kitemakak, itech ichikaualis Jehová uan maj okachi tiktekitilikan. Komo tikchiuaj nochi nejin, tietoskej iniuan “akin takuaujtamatkej uan amo yolijsiujkej, uan nejon kinpaleuij maj kiselikan tein Dios motenkauak” (Heb. 6:11, 12; Rom. 5:5).