1. ¿Keyej titanankiliaj itech nechikolmej?

 ¿KEYEJ tiouij nechikolmej? Porin tiknekij tikueyichiuaskej Jehová uan yejua nejon tein okachi moneki (Sal. 26:12; 111:1). Kemej tinemij itech tonalmej tein semi ouijkej, nechikolmej no techpaleuiaj maj timosenyolchikauakan (1 Tes. 5:11). Keman titanankiliaj tikchiuaj nejin ome taman.

2. ¿Kemanian uelis titanankiliskej itech nechikolmej?

² Itech sejse semana keman tikpiaj nechikolmej ueli titanankiliaj. Itech nechikol itamian semana ueli titanankiliaj keman timomachtiaj amaix Tanejmachtijkej. Uan itech nechikol tein tikpiaj itajkotian semana ueli titanankiliaj itech taxelol “Maj tiktemokan tamachtilis ika nejmachkayot”, itech “Nemachtil ika Biblia itech nechikol” uan kampa motajtani maj titanankilikan.

3. 1) ¿Toni uelis techtsakuilis maj titanankilikan? 2) ¿Keniuj techpaleuia tein kijtoua Hebreos 10:24, 25?

³ Tinochin tiknekij tikueyichiuaskej Jehová uan tikinyolchikauaskej tokniuan keman titanankiliskej. Sayoj ke onkak seki taman tein uelis techtsakuilis: xa titelmouiskej uan amo tiknekiskej titanankiliskej, oso miakpa timomaajokuiskej sayoj ke amo techmakaskej nochi tanankililmej tein tiknekiskiaj. ¿Toni uelis techpaleuis? Tein tatitanil Pablo kinijkuilouilij hebreos, kinextia se taman tein uelis tikchiuaskej. Keman Pablo ika tajtoj keyej motelneki tiyaskej nechikolmej, kijtoj toni okachi moneki maj tikchiuakan: “Maj timoyolchikauakan se iuan okse” (xikonixtajtolti Hebreos 10:24, 25). Amo semi timouiskej timomaajokuiskej komo tikelnamikij ke tikinyolchikauaskej tokniuan, maski amo miak taman tikijtoskej keman titanankiliskej  tein ika tiknextiskej ke titaneltokaj. Uan komo amo ueli titanankiliaj kemej tiknekiskiaj, tiyolpakiskej keman tikitaskej ke oksekin ueli kichiuaj (1 Ped. 3:8).

4. ¿Toni eyi taman tikitaskej itech nejin tamachtilis?

⁴ Itech nejin tamachtilis yekinika tikitaskej keniuj uelis timosenyolchikauaskej itech se nechikol tein amo ueyi, kampa tokniuan amo miakej uan miakpa ueli tanankiliaj. Satepan tikitaskej keniuj uelis tikchiuaskej itech se nechikol tein ueyi, kampa nochin kinekij tanankiliskej. Uan no tikitaskej keniuj moneki titanankiliskej para tikinyolchikauaskej oksekin.

5. ¿Keniuj timosenyolchikauaskej komo amo timiakej timonechikouaj?

⁵ Itech se nechikol tein amo ueyi, oso kampa sayoj sekin mosentiliaj amo miakej tanankiliaj keman tokniuj akin taixyekana kipanoltia se tamachtilis. Kemansa, tokniuj moneki mochias maj aksa momaajokui. Nejon uelis kichiuas maj nechikol uejkaua, uan amo teyolchikaua. ¿Toni uelis tikchiuaskej komo ijkon panoua? Maj timochikauakan miakpa titanankiliskej, ijkon tikinyolchikauaskej oksekin maj no tanankilikan.

6, 7. ¿Toni uelis tikonchiuas para amo semi tionyolmouis?

⁶ Miakej tokniuan semi yolmouij hasta keman sayoj kinemiliaj ke moneki tanankiliskej. Komo ijkon mitsonpanoua, ¿toni uelis tikonchiuas? Xikontemo toni uelis mitsonpaleuis amo semi xionyolmoui para tikonyolchikauas oksekin keman tiontanankilis.

⁷ Se taman tein uelis mitsonpaleuis yejua komo tionmomachtia tein tayolmajxitianij amaixmej Tanejmachtijkej b tein kisanijya. Semej de nejon tayolmajxitilismej yejua maj kuali se momachti (Prov. 21:5). Komo kuali tikonmati toni ika tajtoua tamachtilis, amo tionyolmouis tionmomaajokuis. Okse taman tein no uelis tikonchiuas yejua amo xionuejkaua keman tiontanankilis (Prov. 15:23; 17:27). Komo amo tikonijtoua miak taman, amo semi tionmouis. Keman tiontanankilis uelis tikonijtos sayoj seki tajtolmej, ijkon tokniuan okachi mitsonajsikamatiskej ke komo tikonijtoua miak taman. Komo tiontanankilia ika motajtoluan uan amo semi ueyi, oksekin kiitaskej ke kuali tionmomachtij uan ke kuali tikonajsikamati.

8. ¿Keniuj momachilia Jehová keman kiita ke timochikauaj tikchiuaskej tein tiuelij?

⁸ ¿Tikonchiuakya nochi tein tayolmajxitiaj nejon amaixmej uan sayoj ueli tiontanankilia sepa oso ojpa? ¿Toni uelis tikonchiuas komo tikonsentoka tionmoui? Xikonelnamiki ke Jehová semi kipatiuita tein tikonchiua para tiontanankilis (Luc. 21:1-4). Sayoj ke yejuatsin amo kichia xikonchiua tein amo tionueli (Filip. 4:5). Yejua ika, kuali xikonita tein ueli tikonchiua uan xikonixtali tikonchiuas, no xikontajtani Jehová maj mitsonpaleui xionyolseujto. Yekinika, xikonixtali tikontemakas se tanankilil tein amo ueyi.

9. ¿Toni ueliskia panos itech se nechikol kampa miakej mosentiliaj?

⁹ ¿Toni uelis panos komo itech monechikol onkakej miakej tanojnotsanij? Xa  miakpa amo ueli tiontanankilia porin onkakej miakej tokniuan akin no kinekij tanankiliskej. Maj itech titanemilikan Danielle, yejua se tokniuj siuat akin semi kiuelita tanankilis itech nechikolmej. c Keman tanankilia, yejua kiita kemej okse taman tein ika kiueyichiua Jehová, ika kinyolchikaua oksekin uan kipaleuia maj amo kielkaua tamachtilismej tein kipia Biblia. Sayoj ke keman tapaleuito itech okse nechikol kampa miakej mosentiliaj, amo ueliaok miakpa tanankiliaya, uan kemansa nion sepa. Yejua kijtoua: “Amo kuali nimomachiliaya. Nikmachiliaya kemej yeskia nikpolojka se tekit itech nechikol. Keman amo miakpa mitsmakaj se tanankilil, peua tiknemilia ke xa amo mitsyekitaj”.

10. ¿Toni uelis tikonchiuas para okachi tiontanankilis?

¹⁰ ¿Kemansa tionmomachiliani kemej Danielle? Komo ijkon, xa tikonnemiliani ke okachi kuali sayoj xiontakaki uan amo xionmomaajokuiok. Sayoj ke amo xionmosenkaua. ¿Toni uelis tikonchiuas para okachi tiontanankilis? Amo xionmomachti sayoj se tanankilil. Ijkon, komo amo ueli tiontanankilia itech yekinika párrafos, uelis tiontanankilis itech párrafos tein kisentoka. Keman tionmomachtis amaix Tanejmachtijkej, xikonita keniuj sejse párrafo kimelaua itokay tamachtilis, ijkon nochipa tikonmatis toni tiontanankilis. No uelis tionmomachtis párrafos kampa ika tajtouaj tamachtilismej tein ouijkej (1 Cor. 2:10). Kemej okachi ouij se kimelauas nejon párrafos, amo miakej momaajokuij. Sayoj ke, ¿toni uelis tikonchiuas komo tikonchiuakya nochi nejin uan kisentoka amo ueli tiontanankilia? Achto ke peuas nechikol uelis tikoniluis tokniuj akin kiixyekana tamachtilis itech katiyejua párrafo tikonuelitaskia tiontanankilis.

11. Kemej kijtoua Filipenses 2:4, ¿toni uelis tikchiuaskej?

¹¹ (Xikonixtajtolti Filipenses 2:4). Dios kichiuak maj tatitanil Pablo kinyolchikauani tokniuan maj ininka motekipachouanij oksekin. ¿Keniuj no uelis  tikchiuaskej tein tayolmajxitij keman timonechikouaj? Keman tikelnamikij ke oksekin no kinekij tanankiliskej.

12. ¿Keniuj no uelis tikinyolchikauaskej tokniuan itech nechikolmej? (No xikonita taixkopin).

¹² Maj tikitakan se taman tein techpaleuis maj tikajsikamatikan nejon. ¿Melauj ke keman tionyetok iniuan motasojikniuan amo sayoj tejua tiontajtoua, ta tikonkaua maj yejuan no tajtokan? No ijkon panoua itech tonechikoluan. Tiknekij maj nochin tokniuan tanankilikan. Se taman kemej okachi uelis tikinyolchikauaskej yejua keman tikinkauaj maj kijtokan tein kineltokaj (1 Cor. 10:24). Maj tikitakan toni uelis tikchiuaskej para maj miakej tanankilikan.

13. ¿Toni uelis tikchiuaskej para maj miakej tokniuan tanankilikan?

¹³ Maj amo semi tiuejkauakan keman titanankiliskej, ijkon okachi miakej tokniuan uelis tanankiliskej. Tayekananij uan okseki tokniuan akin miak xiujmejya kitekitilijtokej Jehová uelis kinextiskej keniuj tikchiuaskej. Keman tiontanankilis, amo xionuejkaua uan amo xikonijto nochi tein ika tajtoua párrafo. Komo tikonijtoua nochi, oksekin amo kimatiskejok toni uelis tanankiliskej. Itech nejin párrafo tikajsij ome taman tein uelis tikchiuaskej: maj amo tiuejkauakan keman titanankiliskej, uan maj amo miak taman tikijtokan. Komo mitsonmakaj yekinika tanankilil de nejin párrafo, ¿keyej amo tikonijtoua sayoj se taman tein nikan tayolmajxitia?

14. ¿Toni moneki itech titanemiliskej keman tikitaskej kanachpa timomaajokuiskej? (No xikonita taixkopimej).

¹⁴ Kuali xikonixejeko kanachpa tionmomaajokuis. Komo nochipa timomaajokuij, xa tokniuj akin kiixyekana tamachtilis kimachilis ke moneki techmakas tanankilil, uan ijkon kichiuas maski sekin tokniuan ayamo tanankiliaj. Uan  no, oksekin kinemiliskej ke nenkaj komo momaajokuij (Ecl. 3:7).

15. 1) ¿Toni amo moneki tikchiuaskej keman amo techmakaj se tanankilil? 2) ¿Toni moneki kichiuas tokniuj akin kiixyekana tamachtilis? (Xikonita recuadro “ Keniuj moneki tikonixyekanas se tamachtilis kampa moneki se tanankilis”).

¹⁵ Keman miakej tokniuan momaajokuij, amo ueli titanankiliaj miakpa kemej tiknekiskiaj. Xa hasta tami nechikol uan amo ueli titanankiliaj nion sepa. Nejon ueliskia kichiuas maj amo kuali timomachilikan, sayoj ke amo monekiskia tikualaniskej (Ecl. 7:9).

16. ¿Keniuj uelis tikinyolchikauaskej akin tanankiliaj?

¹⁶ Maski amo ueli tiontanankilia kemej tikonnekiskia, uelis tikonkakis tein tanankiliaj oksekin uan keman tamis nechikol xikonilui ke tel kuali tanankilijkej. Tein tikonijtos uelis kinyolchikauas tokniuan ijkon kemej tikonchiuaskia komo tiontanankiliskia (Prov. 10:21). Keman tikiniluiaj oksekin ke kuali tein kichiujkej, no tikinyolchikauaj.

17. 1) ¿Toni uelis kichiuaskej tetatmej? 2) Kemej kinextia video, ¿toni naui taman moneki tikchiuaskej keman timomachtiskej tein titanankiliskej? (Xikonita nota).

¹⁷ ¿Toni okseki taman uelis tikchiuaskej para timosenyolchikauaskej itech nechikolmej?  Komo tikonpia konemej, xikonmachti keniuj tanankiliskej kemej amo ouij kinkisas (Mat. 21:16). Kemansa itech seki nechikolmej ika motajtouaj seki taman tein motelneki, kemej kuejmolmej tein kipiaj akin monamiktijkejya oso keniuj moneki se chipaujkanemis. Maski ijkon, xa ipa onkas se oso ome párrafos kampa konemej uelis tanankiliskej. No uelis tikonmelauilis mokoneuan keyej amo nochipa kinmakaskej se tanankilil keman momaajokuiskej. Komo ijkon tikonchiua, yejuan amo tayokoyaskej keman kinmakaskej tanankilil oksekin uan amo yejuan (1 Tim. 6:18). d

18. ¿Toni moneki tikchiuaskej para amo sayoj toka titajtoskej keman titanankiliskej? (Proverbios 27:2).

¹⁸ Tinochin uelis kuali timomachtiskej para titanankiliskej uan ika tikueyitaliskej Jehová uan tikinyolchikauaskej tokniuan (Prov. 25:11). Maski kemansa uelis tikijtoskej se taman tein techpanok, amo moneki semi toka titajtoskej (xikonixtajtolti Proverbios 27:2; 2 Cor. 10:18). Okachi kuali maj ika titajtokan Jehová, iTajtol uan nochin akin kitekitiliaj (Apoc. 4:11). Sayoj ke komo netajtanil kijtoua maj tikijtokan teisa tein techpanok, uelis tikijtoskej. Itech okse párrafo tikitaskej se neskayot.

19. 1) ¿Keniuj tapaleuis komo ininka titanemiliaj oksekin itech nechikolmej? (Romanos 1:11, 12). 2) ¿Keyej tikonuelita tiontanankilis itech nechikolmej?

¹⁹ Maski amo tikpiaj tanauatilmej kampa kijtouaj keniuj moneki titanankiliskej, tinochin uelis tikinyolchikauaskej oksekin ika tein tikchiuaj itech nechikolmej. Nejin kijtosneki ke seki tokniuan moneki okachi tanankiliskej. Uan oksekin maj yolpakikan maski amo miakpa tanankiliskej, uan no maj yolpakikan keman oksekin momaajokuiskej. Komo itech nechikolmej ininka titanemiliaj oksekin, tinochin tiyolpakiskej keman timosenyolchikauaskej (xikonixtajtolti Romanos 1:11, 12).