1. ¿Keniuj kinextij se okichpiltsin ke kineltoka ke akin momikilijkejya oksepa nemiskej?

 SE OKICHPILTSIN akin monotsa Matthew semi mokokoua uan monekini miakpa kitekiskej. Keman kipiaya 7 xiujmej, yejua uan ichankauan kiitstoyaj JW Broadcasting^® tein kisa mejmetstika. Itech nekuikatil tein ika tamik, neskej ke seki tokniuan oksepa kinselijtoyaj itech xochital akin momikilijkaj. b Keman tamik, Matthew motokij kampa yetoyaj itatuan, kinmakitskij uan kiniluij: “Maj, paj, ¿nankiitakej ke komo nimomikilia oksepa ninemis? Uelis nannechchiaskej. Yekmelauj panos”. ¿Keniuj tikonnemilia ke momachilijkej tetatmej keman kiitakej ke ininkonetsin semi takuaujtamati? Matthew kineltoka ke akin momikilijkejya oksepa nemiskej.

2, 3. ¿Keyej semi kuali maj tiknemilikan tein panos keman oksepa nemiskej akin momikilijkejya?

² Kemansa semi kuali maj itech titanemilikan tein panos keman oksepa nemiskej akin momikilijkejya (Juan 5:28, 29). ¿Keyej? Porin amo tikmatij kemanian uelis tikokolispeuaskej oso tikokoxkakuiskej, oso ijsiujka momikilis se akin tiktasojtaj (Ecl. 9:11; Sant. 4:13, 14). Keman tikmatij ke oksepa nemiskej akin momikilijkejya, techpaleuia maj titaxikokan (1 Tes. 4:13). Biblia techiluia ke toTajtsin kuali techixmati uan semi techtasojta (Luc. 12:7). Kemej kuali techixmati, kichiuas maj oksepa tinemikan kemej achto titamatiaj uan maj nochi tikelnamikikan. Uan kemej semi techtasojta kichiuas maj tinemikan nochipaya uan maski timomikiliskej, oksepa tinemiskej.

³ Itech nejin tamachtilis tikitaskej keyej uelis tikneltokaskej ke oksepa nemiskej akin momikilijkejya. No techpaleuis maj okachi titakuaujtamatikan komo tikitaj nochi tein panok kampa mokixtij texto de nejin tamachtilis: “Mokniuj  oksepa nemiti” (Juan 11:23). No tikitaskej toni uelis tikchiuaskej para okachi tikneltokaskej ke oksepa nemiskej akin momikilijkejya.

4. ¿Toni moneki tikchiuaskej para tikneltokaskej ke aksa kichiuas tein touan motenkaua? Xikonijto se neskayot.

⁴ Komo tiknekij tikneltokaskej ke teisa yekmelauj mochiuas, moneki titakuaujtamatiskej ke akin motenkaua kinejneki kichiuas uan ueli kichiua. Maj tiknemilikan ke tochan uejueliuik porin mochiuak se tetsauit uan se totasojikniuj techiluia: “Nimitspaleuis xikyekchijchiua mochan”. Tikmatij ke yekmelauj tein kijtoua uan kineki techpaleuis. Uan no, tikmatij ke uelis techpaleuis porin kuali kalchijchiua uan kipia tein moneki, yejua ika tikneltokiliaj. Uan keman Dios kijtoua ke oksepa nemiskej akin momikilijkejya, ¿no tikonneltoka? ¿Yekmelauj kinejneki uan uelis kichiuas?

5, 6. ¿Keyej tikyekmatij ke Jehová kineki maj oksepa nemikan akin momikilijkejya?

⁵ ¿Kineki Jehová kichiuas maj oksepa nemikan akin momikilijkejya? Kemaj. Yejuatsin kichiuak maj miakej akin kijkuilojkej Biblia ika tajtouanij ke motenkaua ke oksepa nemiskej akin momikilijkejya (Is. 26:19; Os. 13:14; Apoc. 20:11-13). Uan keman Jehová motenkaua teisa, yekmelauj kichiua (Jos. 23:14). Jehová kitelneki kichiuas maj oksepa nemikan akin momikilijkejya. ¿Keyej ijkon tikijtouaj?

⁶ Maj itech titanemilikan tein kijtoj Job. Yejua senkis kimatia ke komo momikiliaya, Jehová kichiuaskia maj oksepa nemini (Job 14:14, 15). Yejuatsin no kineki maj oksepa nemikan nochin itekitikauan akin momikilijkejya, kineki maj paktokan uan maj yolpakikan. ¿Uan toni kineki kichiuas Jehová ininka akin momikilijkejya uan amo keman kiixmatkej? ToTajtsin akin semi techtasojta no kineki maj oksepa nemikan (Hech. 24:15). Kineki maj kuali iuan mouikakan uan maj nemikan nochipaya nikan taltikpak (Juan 3:16). Moyekita ke Jehová kineki maj oksepa nemikan akin momikilijkejya.

7, 8. ¿Keyej tikneltokaj ke Jehová uelis kichiuas maj oksepa nemikan akin momikilijkejya?

⁷ ¿Uelis Jehová kichiuas maj oksepa nemikan akin momikilijkejya? Kemaj, porin yejuatsin “kipia nochi chikaualis” (Apoc. 1:8). Ueli kintani akin kiixnamikij uan hasta mikilis (1 Cor. 15:26). Nejin techyolchikaua uan techyolseuia. Maj tikitakan tein kipanok tokniuj Emma Arnold. Yejua uan ichankauan kinpanok miak taman tein amo kuali keman mochiujtoya Ojpatika Ueyi Neteuilis. Emma kiyolchikauak isiuapil porin kampa nazis tetsakuayaj uan tetajyouiltiayaj, momikilijkaj miakej akin kintasojtayaj, yejua ika kiluij: “Komo Dios amo ueliskia kichiuas maj oksepa nemikan akin momikilijkejya, nejon kijtosnekiskia ke mikilis okachi chikauak ke Dios, ¿melauj?”. Kemaj, amo akin uan nion teyi okachi chikauak ke Jehová. Uan kemej yejuatsin techchijchiuak, ueli tikneltokaj ke uelis kichiuas maj oksepa nemikan akin momikilijkejya.

⁸ No tikmatij ke Dios uelis kichiuas maj oksepa nemikan akin momikilijkejya porin yejuatsin nochi kielnamiki. Biblia kijtoua ke yejuatsin kinnotsa ika inintokay nochi sitalimej (Is. 40:26). Jehová kinelnamiki nochin akin momikilijkejya (Job 14:13; Luc. 20:37, 38). Keman Jehová kichiuas maj oksepa nemikan, yejuatsin uelis kielnamikis keniuj tamatiaj, tein kichiuayaj uan tein kinpanok.

9. ¿Keyej tikonneltoka ke oksepa nemiskej akin momikilijkejya?

 ⁹ Kemej tikitakejya, uelis titakuaujtamatiskej ke oksepa nemiskej akin momikilijkejya porin tikmatij ke Jehová kinejneki uan ueli kichiua. No tikneltokaj ke oksepa nemiskej akin momikilijkejya porin ne uejkauj yejuatsin ipa kichiujkaya maj sekin oksepa nemikan. Kinmakaka chikaualis seki takamej uan no Jesús para maj kichiuanij maj sekin oksepa neminij. Maj tikitakan kampa Biblia ika tajtoua de semej akin Jesús kichiuak maj oksepa nemi. Tikajsij itech Juan capítulo 11.

10. ¿Toni panoua keman Jesús tanojnotsa uejka de Betania, uan toni kichiua? (Juan 11:1-3).

¹⁰ (Xikonixtajtolti Juan 11:1-3). Jesús kinpia seki itasojikniuan akin nemij Betania, yejuan Lázaro uan ome iikniuan, María uan Marta (Luc. 10:38-42). Itamian xiuit 32, Lázaro kokolispeua, iikniuan semi motekipachouaj uan kinauatiaj Jesús, akin yetok oksekopa de ueyiat Jordán uan teuikilia ome tonal se ajsis (Juan 10:40). Sayoj ke, Lázaro momikilij xa keman Jesús kinauatijtoyaj. Maski Jesús kimati ke itasojikniuj momikilijya, kinemilij mokauasok ome tonal achto ke yas Betania. Uan keman ajsik, Lázaro kiuikayaya naui tonal ke momikilijka. Jesús kineki kichiuas teisa tein kinpaleuis itasojikniuan uan tein kiueyitalis Dios (Juan 11:4, 6, 11, 17).

11. ¿Toni techmachtia tein panok kemej moneki tikinpaleuiskej totasojikniuan?

¹¹ ¿Toni techmachtia nejin kemej moneki timouikaskej iniuan oksekin? Keman María uan Marta kinauatijkej Jesús tein panotoya, amo kiluijkej maj yani Betania, ta sayoj kiluijkej ke itasojikniuj mokokouaya (Juan 11:3). Keman Lázaro momikilij, Jesús ueliskia kichiuas maj oksepa nemini desde kampa yetoya. Sayoj ke kiixtalij yas Betania para yetos iniuan itasojikniuan María uan Marta. ¿Tikonpia se motasojikniuj akin kineki mitsonpaleuis maski amo tikontajtanij? Komo ijkon, tikonmati ke uelis mitsonpaleuis nochipa ‘keman tiontajyouis’ (Prov. 17:17). No tikinpaleuiskej totasojikniuan komo tikchiuaj kemej Jesús. Maj oksepa tikitakan tein kijtoua Biblia uan tikitaskej toni panok satepan.

12. ¿Toni motenkauak Jesús iuan Marta, uan keyej ueliskia kineltokas ke kichiuaskia? (Juan 11:23-26).

¹² (Xikonixtajtolti Juan 11:23-26). Keman Marta kimati ke Jesús amo uejka yetok de Betania, niman kiitati, uan kiluia: “Notekotsin, komo nikan tietoskia, noknitsin amo momikiliskia” (Juan 11:21). Maski Jesús ueliskia kipajtis Lázaro, kiixtalij kichiuas teisa tein okachi kimojkaitaskiaj. Jesús kiluia Marta: “Mokniuj oksepa nemiti”. Uan no, kipaleuia maj okachi kineltoka tein iuan motenkauak, keman kiluia: “Nejua nikchiua maj mikemej oksepa nemikan uan nejua nikinpaleuia maj miakej kisentokakan nemikan”.  Kemaj, ika ichikaualis Dios, Jesús ueli kichiua maj oksepa nemikan akin momikilijkejya. Jesús ipa kichiujkaya maj oksepa nemi se okichpiltsin akin xa momikilijka nejon tonal, uan no se siuapiltsin tepitsin satepan ke momikilijka (Luc. 7:11-15; 8:49-55). Sayoj ke, ¿ueliskia kichiuas maj oksepa nemi aksa akin kiuikaya naui tonal ke momikilijka uan tsojyaxtoyaya?

13. Kemej kijtoua Juan 11:32-35, ¿toni kichiua Jesús keman kiita ke María uan oksekin chokatokej? (No xikonita taixkopin).

¹³ (Xikonixtajtolti Juan 11:32-35). Maj itech titanemilikan tein panok. María, okse iikniuj Lázaro, motokia iuan Jesús uan no kiluia tein Marta ipa kiluijkaya: “Notekotsin, komo nikan tietoskia, noknitsin amo momikiliskia”. Yejua uan oksekin semi moyolkokojtokej. Keman Jesús kinita uan kinkaki ke chokatokej, no semi motayokoltia. Kemej kiniknelia itasojikniuan no peua choka. Yejua kimati keniuj momachiliaj, yejua ika kineki kichiuas maj amo tajyouikanok.

14. ¿Toni techmachtia de Jehová tein kichiuak Jesús keman kiitak ke María chokatoya?

¹⁴ Tein kichiuak Jesús keman María chokatoya kinextia ke Jehová semi teiknelia. ¿Keyej tikijtouaj nejon? Itech okse tamachtilis tikitakej ke Jesús kinextia keniuj tanemilia uan toni kimachilia iTajtsin (Juan 12:45). Ijkuak tikixtajtoltiaj ke Jesús chokak keman kinitak itasojikniuan tel tayokoxtoyaj, tikmatij ke Jehová no moyolkokoua keman kiita ke tichokaj porin titajyouijtokej (Sal. 56:8). ¿Melauj ke nejin kichiua maj tiknekikan okachi timotokiskej iuan toDios akin semi techtasojta?

15. Ijkon kemej kijtoua Juan 11:41-44, ¿toni panoua kampa kitalijkej Lázaro? (No xikonita taixkopin).

¹⁵ (Xikonixtajtolti Juan 11:41-44). Jesús ajsi kampa kitalijkej Lázaro uan tanauatia maj kiajchiuakan tet tein ika kitentsakkej. Sayoj ke Marta kiluia ke xa tsojyaxtokya. Jesús kinankilia: “¿Amo nimitsiluij ke komo titaneltoka ueliskia tikitas iueyichikaualis Dios?” (Juan 11:39, 40). Satepan Jesús moixajokui uan kitataujtia Dios ininixpan nochin.  Kineki kiueyitalis Jehová ika tein kichiuati. Ompa chikauak kijtoua: “¡Lázaro, xiualkisa!”. Uan Lázaro kisak. Jesús kichiuak tein sekin kinemiliayaj ke amo ueliskia mochiuas (xikonita nota de estudio tein kipia Juan 11:17).

16. ¿Keniuj tein ika tajtoua Juan capítulo 11 techpaleuia maj okachi tikneltokakan ke akin momikilijkejya oksepa nemiskej?

¹⁶ Tein ika tajtoua Juan capítulo 11 techpaleuia maj okachi tikneltokakan ke akin momikilijkejya oksepa nemiskej. Maj tikelnamikikan tein Jesús kiluij Marta: “Mokniuj oksepa nemiti” (Juan 11:23). Ijkon kemej iTajtsin, Jesús kineki uan ueli kichiua tein motenkauak. Keman chokak kinextij ke kitelneki kiixpolos mikilis para maj amo akin tayokoyaok. Uan keman Jesús kichiuak maj Lázaro oksepa nemi, oksepa kinextij ke ueli kichiua maj oksepa nemikan akin momikilijkejya. No maj itech titanemilikan tein Jesús kielnamiktij Marta: “¿Amo nimitsiluij ke komo titaneltokaya ueliskia tikitas iueyi chikaualis Dios?” (Juan 11:40). Onkak miak taman tein kinextia ke Dios kichiuas maj oksepa nemikan akin momikilijkejya. Sayoj ke ¿toni moneki tikchiuaskej para okachi tikneltokaskej ke mochiuas?

17. ¿Toni moneki tikelnamikiskej keman tikixtajtoltiskej itech Biblia ke sekin akin momikilijkaj oksepa nenkej?

¹⁷ Maj tikixtajtoltikan uan maj itech titanemilikan tein panok keman sekin oksepa nenkej. Biblia ininka tajtoua chikueyin akin momikilijkaj uan oksepa nenkej nikan taltikpak. c ¿Ueliskia tikixtaliskej timomachtiskej tein kinpanok sejsemej? Keman tikixtajtoltiskej maj tikelnamikikan ke yekmelauj nenkej: takamej, siuamej uan konemej. Maj tiknemilikan toni techmachtia uan keniuj sejse kinextia ke Dios kineki uan ueli kichiua maj oksepa nemikan akin momikilijkejya. Uan no, maj  itech titanemilikan se taman tein semi kipia ipatiuj: keman Jesús momikilij uan oksepa nemik. Xikonelnamiki ke keman Jesús oksepa nemik tel miakej kiitakej, nejin techpaleuia maj tikneltokakan ke yekmelauj oksepa nemiskej akin momikilijkejya (1 Cor. 15:3-6, 20-22).

18. ¿Toni moneki tikchiuaskej para maj techpaleuikan nekuikatilmej tein ika tajtouaj ke oksepa nemiskej akin momikilijkejya? (No xikonita nota).

¹⁸ Maj tikakikan “nekuikatilmej” tein ika tajtouaj ke akin momikilijkejya oksepa nemiskej (Efes. 5:19). d Nejin nekuikatilmej techpaleuiaj maj okachi titakuaujtamatikan ke yekmelauj mochiuas tein tikchiaj. Yejua ika moneki tikinkakiskej. No uelis timokuikatiskej keman titaueyichiuaj iniuan tokalyetonij uan maj ika titajtokan tein techmachtia. Maj miakpa timomamachtikan tein kijtoua para amo tikelkauaskej. Uan keman tikpanoskej se ouijkayot, tein ueliskia kichiuas maj timomikilikan oso momikilia aksa akin tiktasojtaj, ichikaualis Jehová techpaleuis maj tikelnamikikan nejon nekuikatilmej para maj techyolseuikan uan maj techyolchikauakan.

19. ¿Toni moneki tiknemiliskej ke uelis tikchiuaskej keman oksepa nemiskej akin momikilijkejya? (No xikonita recuadro “ ¿Toni tikontajtaniskia?”).

¹⁹ Maj tiknemilikan tein panos. Jehová techchijchiuak kemej uelis tiknemiliskej ke tietokejya itech xochital. Se tokniuj siuat kijtoua: “Semi niknemiliani ke nietokya itech xochital uan hasta nikmachilia ke ueli nikijnekui xochimej”. Maj tiknemilikan keniuj timomachiliskej keman tikinixmatiskej seki itekitikauan Jehová akin amo keman kikaujkej uan Biblia ininka tajtoua. ¿Akoni okachi tikonneki tikonixmatis? ¿Toni tikontajtaniskia? Maj no tiknemilikan keniuj timomachiliskej keman oksepa tikinitaskej akin tikintasojtayaj uan amo nemijok. Maj tiknemilikan toni yekinika tikiniluiskej, keniuj tikinnauaskej uan keniuj tiyolpakiskej keman oksepa tikinitaskej.

20. ¿Toni moneki tiksentokaskej tikchiujtoskej?

²⁰ Semi tiktasojkamatiliaj Jehová porin motenkaua kichiuas maj oksepa nemikan akin momikilijkejya. Tikmatij ke ijkon kichiuas porin kineki uan ueli kichiua. Kemej yeskia tisejsemej techiluiskia: “Akin tikintasojta oksepa nemiskej”. Maj tikchiuakan tein techpaleuis maj okachi titakuaujtamatikan ke akin momikilijkejya oksepa nemiskej. Komo ijkon tikchiuaj, okachi timotokiskej iuan Jehová, akin motenkaua kichiuas nejin tein tel kualtsin.