1. ¿Keniuj momachiliaj sekin keman tanojnotsaj? (No xikonita taixkopin).

 TIITEKITIKAUAN Jehová titanojnotsaj porin tiktasojtaj toTajtsin uan tiknekij maj oksekin kiixmatikan. Miakej tokniuan semi kiuelitaj tanojnotsaskej, sayoj ke oksekin kiitaj ke ouij porin semi pinauaj uan kimachiliaj ke amo uelis tamachtiskej. Oksekin amo kuali momachiliaj takalpanoskej keman amo akin kinyoleuj. Sekin mouij maj kiniluikan ke amo kinekij kinkakiskej. Uan oksekin kinmachtijkej maj amo takualantikan. Nochin yejuan semi kitasojtaj Jehová, sayoj ke kinouijkisa kinnojnotsaskej akin amo kinixmatij. Maski ijkon, youij tanojnotsatij porin kimatij ke semi moneki kichiuaskej nejin tekit. ¡Jehová semi yolpaki porin kuali tekitij!

2. ¿Keyej amo moneki tionmosenkauas komo mitsonouijkisa tionyolpakis keman tiontanojnotsa?

² ¿Uan tejuatsin? ¿Mitsonouijkisa tionyolpakis keman tiontanojnotsa? Komo ijkon, amo xionmosenkaua. Nejon kinextia ke tionyolyemanik, ke amo tikonneki maj mitsonueyitalikan, uan ke amo tikonneki tionmotajtolteuis iniuan oksekin. Xa amo no tikonuelita maj mitsonixtopeuakan, okachiok komo sayoj tikonneki tiontapaleuis. MoTajtsin kiajsikamati keniuj tionmomachilia, uan kineki mitsonpaleuis (Is. 41:13). Itech nejin tamachtilis tikitaskej  makuil taman tein techpaleuis maj amo ijkon timomachilikan uan maj okachi tiyolpakikan keman titanojnotsaskej.

XIONMOKAUA MAJ ITAJTOL DIOS MITSONPALEUI

3. ¿Toni kipaleuij Jeremías maj moyolchikaua para tanojnotsas?

³ Ijkon kemej panouanij xiujmej, iTajtol Dios kinyolchikauani itekitikauan keman kiitayaj ouij kichiuaskej se tekit. Maj tikitakan tein kipanok tanauatijkej Jeremías. Keman Jehová kinauatij maj tanojnotsati, yejua kinemilij ke amo ueliskia kichiuas uan kijtoj: “Nejua amo nikmati toni nikijtos, porin niokichpilok” (Jer. 1:6). ¿Toni kipaleuij maj ueli tanojnotsa? Tein Dios kiluij kiyolchikauak. Yejua kijtoj: “Itajtoluan katkaj […] kemej tit itech noomiyouan, uan monekia nitajtos” (Jer. 20:​8, 9). Ouij katka para Jeremías tanojnotsas kampa yetoya, sayoj ke tein monekia kitematiltis kiyolchikauak uan kipaleuij maj ueli tanojnotsa.

4. ¿Keniuj techpaleuia keman tikixtajtoltiaj Biblia uan titanemiliaj itech tein timomachtiaj? (Colosenses 1:​9, 10).

⁴ Tejuan no techyolchikaua tein kijtoua iTajtol Dios. Keman tatitanil Pablo kintajkuilouilij tokniuan akin yetoyaj Colosas, kiniluij ke komo kuali kiixmatiskiaj tein Dios kineki kinpaleuiskia maj nemikan “kemej moneki nemiskej akin kitekitiliaj Jehová” uan no ueliskia ‘kichiuaskej tein kuali’ (xikonixtajtolti Colosenses 1:​9, 10). Uan se taman tein kuali tein moneki tikchiuaskej yejua tikteixmatiltiskej kuali tanauatilmej. Kemej tikitaj, keman tikixtajtoltiaj Biblia uan titanemiliaj itech tein timomachtiaj, okachi titakuaujtamatij iuan Jehová uan okachi tikajsikamatij keyej moneki titanojnotsaskej.

5. ¿Toni uelis tikchiuaskej para maj okachi techpaleui tein kijtoua Biblia?

⁵ Komo tiknekij maj iTajtol Dios okachi techpaleui, moneki tikxeloskej tiempo para tikixtajtoltiskej, timomachtiskej uan itech titanemiliskej. ¿Uan toni moneki tikonchiuas komo amo tikonajsikamati se versículo? Xikontemo toni kijtosneki nejon versículo itech Nepaleuil tein ika momachtiaj itaixpantijkauan Jiova oso itech okse amaix tein kimelaua nejon versículo. Komo tikonxeloua tiempo para kuali tionmomachtis, okachi tiontakuaujtamatis itech iTajtol Dios (1 Tes. 5:21). Uan kemej okachi tiontakuaujtamatis  itech Biblia, okachi mitsonyolpaktis tikontapouis oksekin tein tionmomachtiani.

KUALI XIONMOMACHTI ACHTO KE TIONYAS TIONTANOJNOTSATIUJ

6. ¿Keyej moneki kuali timomachtiskej achto ke tiaskej titanojnotsatiuij?

⁶ Komo kuali tionmomachtia achto ke tionyas tiontanojnotsatiuj, amo semi tionmouis keman tiontajtos iniuan oksekin. Jesús kinmachtij imomachtijkauan keniuj tanojnotsaskej achto ke kintitaniskia (Luc. 10:​1-11). Uan kemej yejuan kichiujkej tein Jesús kiniluij, semi yolpakkej porin kichiujkej miak taman (Luc. 10:17).

7. ¿Keniuj uelis timomachtiskej achto ke tiaskej titanojnotsatiuij? (No xikonita taixkopin).

⁷ ¿Keniuj uelis timomachtiskej achto ke tiaskej titanojnotsatiuij? Moneki tiknemiliskej toni tiknekij tikijtoskej. Uan ijkon uelis kuali tikinmelauiliskej akin tikinnojnotsaskej. No uelis tiknemiliskej keniuj technankiliskej uan toni uelis tikijtoskej. Nejon techpaleuis maj kuali timomachilikan uan maj kuali tikinnojnotsakan.

8. ¿Keyej tikijtouaj ke tejuan titamatij kemej se sokikomit?

⁸ Tatitanil Pablo kiniluij tokniuan: “Tikpiaj nejin kualtsin tekit maski titamatij kemej se sokikomit tein kipia teisa tein tel patiyoj” (2 Cor. 4:7). Sayoj ke, ¿toni nejon tein tel patiyoj? Yejua keman tikteixmatiltiaj iTaixyekanalis Dios, porin nejon tapaleuia maj miakej momakixtikan (2 Cor. 4:1). ¿Uan akonimej kiixnextiaj sokikomit? Tejuan, tiitekitikauan Dios akin tikteixmatiltiaj kuali tanauatilmej. Keman Pablo nemia, kiuikayaj takual, vino oso tomin itech se sokikomit. Itech nejin tonalmej tejuan no tikuikaj teisa tein tel patiyoj, se kualtsin tekit tein Jehová techmakatok: maj tikteixmatiltikan kuali tanauatilmej. Jehová techpaleuis maj tichikaujkej para tiksentokaskej titanojnotsaskej.

XIKONTAJTANI DIOS MAJ MITSONYOLCHIKAUA

9. Komo timouij maj techixnamikikan oso maj amo techkakikan, ¿toni techpaleuis maj amo ijkon timomachilikanok? (No xikonita taixkopin).

⁹ Kemansa xa timouiskej maj techixnamikikan oso maj amo kinekikan techkakiskej. ¿Toni techpaleuis maj amo ijkon timomachilikanok? Maj tiknemilikan itech tein kijtojkej tatitanilmej keman motataujtijkej  satepan ke kinnauatijkej maj amo tanojnotsanijok. Yejuan amo mosenkaujkej, ta kitajtanijkej Jehová maj kinpaleuiani para “maj amo mouikan” uan maj ueli kisentokanij kiteixmatiltianij iTajtol. Uan yejua niman kinnankilij (Hech. 4:​18, 29, 31). Keman timouiskej maj techixnamikikan keman titanojnotsaskej, maj tiktajtanikan Jehová maj techpaleui maj okachi tikintasojtakan oksekin, uan maj tiyolchikaujkej keman tikteixmatiltiskej kuali tanauatilmej.

10. ¿Keniuj techpaleuia Jehová maj tikteixmatiltikan yejuatsin? (Isaías 43:​10-12).

¹⁰ Tejuan tiitaixpantijkauan Jehová porin yejua ijkon kinekik (xikonixtajtolti Isaías 43:​10-12). Uan yejuatsin motenkaua ke techpaleuis maj tiyolchikaujkej. Maj tikitakan naui taman kemej techpaleuia. Yekinika, Jesús techpaleuia keman tikteixmatiltiaj kuali tanauatilmej (Mat. 28:​18-20). Ojpatika, Jehová kinnauatia ángeles maj techpaleuikan (Apoc. 14:6). Expatika, Jehová techpaleuia ika ichikaualis, uan ijkon ueli tikelnamikij tein timomachtijkejya (Juan 14:​25, 26). Naujpatika, Jehová techmaka tokniuan akin iniuan titanojnotsaj. Jehová uan tokniuan techpaleuiaj maj tiyolchikaujkej uan maj tiksentokakan titanojnotsakan.

XIKONPATA KEMEJ TIONTANOJNOTSA UAN AMO KEMAN XIKONNEMILI KE AMO MITSONKAKISKEJ

11. ¿Toni uelis tikonchiuas para okachi tikonnojnotsas oksekin? (No xikonita taixkopin).

¹¹ ¿Tikonneki tionmosenkauas keman amo semi tikinajsi ininchan? Komo ijkon, xionmotajtani: “¿Kani yetokej? ¿Tekititokej oso takouatoj?” (Hech. 16:13). Komo ijkon, xikonixtali tiontanojnotsas itech ojti. Se tokniuj akin monotsa Joshua kijtoua: “Semi nechpaleuiani nitanojnotsas kampa tanamakaj uan kampa miakej panouaj”. Yejua uan isiuatsin, Bridget, kiitanij ke okachi kinajsinij keman youij tiotakia uan domingos satepan de tajko tonal (Efes. 5:​15, 16).

12. ¿Keniuj uelis tikmatiskej toni kineltokaj uan toni kintekipachoua akin tikinnojnotsaj?

¹² Komo akin tikinnojnotsaj amo kinyolnotsa tein tiknekij tikintapouiskej, maj tiktemokan tikmatiskej toni kineltokaj  uan toni kintekipachoua. Joshua uan Bridget peua kinnojnotsaj ika netajtanilmej tein uitsej ipeujyan tratados. Keman kitemakaj tratado ¿Keniuj tikonita Biblia?, kijtouaj nejin: “Sekin kijtouaj ke Biblia ualeua imako Dios, sayoj ke oksekin amo. Uan tejuatsin, ¿toni tikonnemilia?”. Nejin kinpaleuia maj kisentokakan iniuan tajtokan.

13. ¿Keyej uelis tiyolpakiskej keman titanojnotsaj maski amo akin techkakis? (Proverbios 27:11).

¹³ Maski amo techkakiskej keman titanojnotsaskej, tejuan ipa tikchiujtokejya tein moneki tikchiuaskej. ¿Keyej? Porin tikchiujtokej tein Jehová uan iKonetsin technauatiaj: maj titanojnotsakan (Hech. 10:42). Yejua ika, amo moneki timotekipachoskej komo amo akin ueli tiknojnotsaj oso komo amo akin kineki techkakis. Nochipa uelis tiyolpakiskej porin tikchiuaj tein Jehová technauatia (xikonixtajtolti Proverbios 27:11).

14. ¿Keniuj timomachiliaj keman se tokniuj kiajsi aksa akin kineki momachtis, uan keyej?

¹⁴ No tiyolpakij keman oksekin tokniuan kiajsij aksa akin kineki kimatis okachi. Amaix Tanejmachtijkej kijtoua ke keman titanojnotsaj kemej yeskia tiktemouaj se okichpilkonet akin poliuj. Miakej kitemouaj uan miakkan youij kitemotij. Uan keman kiajsij okichpilkonet, nochin yolpakij amo sayoj akin kiajsik. No ijkon, tinochin itech inechikol Jehová titapaleuiaj maj oksekin no mochiuakan imomachtijkauan Jesús. Titapaleuiaj maj motanojnotsa uan tinochin tiyolpakij keman aksa peua youi nechikolmej.

XIONTETASOJTA

15. ¿Toni uelis techpaleuis maj tiyolpakikan keman titanojnotsaskej? (Mateo 22:​37-39; no xikonita taixkopin).

¹⁵ Okachi tiyolpakiskej titanojnotsaskej komo okachi tiktasojtaj Jehová uan oksekin (xikonixtajtolti Mateo 22:​37-39). Maj tiknemilikan keniuj yolpaki Jehová keman kiita ke tiksentokaj titanojnotsaj, uan keniuj yolpakij akin peua momachtiaj Biblia. Uan amo xikonelkaua ke akin techkakiskej uelis momakixtiskej (Juan 6:40; 1 Tim. 4:16).

16. ¿Keniuj uelis tiyolpakiskej maski amo uelis tikisaskej? Xikonijto se neskayot.

¹⁶ ¿Uan komo tejuatsin amo ueli tionkisaok? Xikonchiua tein kemaj tionueli para  tikonnextilis Jehová ke tikontasojta yejua uan no oksekin. Keman mochiujtoya kokolis COVID-19, Samuel uan Dania monekik mokauaskej ininchan. Ijkuak monekik tanojnotsaskej ika teléfono, kijkuiloskej cartas uan tamachtiskej ika Zoom. Uan kemej Samuel kipiaya cáncer, no tanojnotsaya kampa kipajtiayaj. Yejua kijtoua: “Keman tikpiaj ouijkayomej timotekipachouaj, tisiouij uan hasta uelis kichiuas maj amo semi titakuaujtamatikanok. Yejua ika, moneki tiktekitiliskej Jehová porin nejon techpaleuis maj tiyolpakikan”. Satepan, Dania uetsik uan monekik yetos itech cama eyi metsti. Uan satepan, tajko xiuit monekik kikuis silla de ruedas. Yejua kijtoua: “Nikchiuak nochi tein niuelia. Uelik niknojnotsak se enfermera akin yaya nechitati uan akin yayaj nechkauilitij teisa. Uan no niknojnotsak se siuatsin akin tekitia kampa kinamakaj tein kikuij tapajtianij”. Samuel uan Dania yolpakiaj maski amo ueliaj kichiuayaj miak taman.

17. ¿Keniuj uelis techpaleuis tein axkan timomachtijkej?

¹⁷ Xionmochikaua tikonchiuas makuil taman tein timomachtijkej. Sejse taman kemej yeskia tein kiuika se tapalol. Keman tiktaliliaj nochi tein kiuika, uelik kisa. No ijkon, komo tikchiuaj tein timomachtijkej techpaleuis maj amo tiknemilikan ke amo uelis titanojnotsaskej uan uelis tiyolpakiskej.