¿Tikonmatia?
¿Keyej no moajsiaj sekin akin amo katkaj israelitas iniuan isoldados David?
INIUAN isoldados David no moajsiaj seki takamej akin amo katkaj israelitas, kemej Zélec akin pouia iniuan ichankauan Ammón, Urías akin pouia iniuan ichankauan Het uan Itmá akin katka de Moab (1 Crón. 11:39, 41, 46). a No iniuan yetoyaj keretitas, peletitas uan guititas (2 Sam. 15:18). Nesi ke keretitas uan peletitas katkaj ininchankauan filisteos (Ezeq. 25:16). Uan guititas katkaj de Gat se ueyi xolal kampa nemiaj filisteos (Jos. 13:2, 3; 1 Sam. 6:17, 18).
¿Keyej kikauak David maj nejin takamej no moajsinij iniuan isoldados? Porin kimatia ke amo kikauaskiaj yejua uan nion no Jehová. Amaix The New Interpreter’s Dictionary of the Bible kijtoua ke keretitas uan peletitas amo keman kikaujkej David, nion keman tel ouij katka tein panotoya keman taixyekantoya. ¿Keniuj tikmatij? Keretitas uan peletitas amo kikaujkej David keman “nochin takamej israelitas” kikaujkej uan peujkej kitojtokaj ‘se takat akin monotsaya Seba akin peuak takuejmolchiua’, ta kipaleuijkej maj kimiktianij Seba uan akin taixnamikiaj (2 Sam. 20:1, 2, 7). Satepan semej ikoneuan David akin monotsaya Adonías kinekia taixyekanas uan mochiuas tekiuaj. Sayoj ke keretitas uan peletitas amo kikaujkej David uan tapaleuijkej maj Salomón mochiua tekiuaj, porin kimatiaj ke Jehová kiixpejpenka (1 Rey. 1:24-27, 38, 39).
Okse takat akin amo katka israelita uan no kipaleuij David yejua Ittái akin katka kayot Gat. Yejua uan 600 isoldados kipaleuijkej David keman ikoneuj Absalón kiixnamikik uan kitemoj maj israelitas kitojtokanij para maj kiixtalianij kemej tekiuaj. David kiluij Ittái ke kemej amo katka israelita amo monekiskia kipaleuis. Sayoj ke Ittái kinankilij: “¡Nimitsyekiluia itokaykopa Jehová, Dios akin nochipa yoltok, uan no nimitsyekiluia tejuatsin notekiuaj ke kampa tias no ompa nias. Mouan nietos maski uelis nechmiktiskej!” (2 Sam. 15:6, 18-21).
Ittái amo keman kikauak David, tekiuaj akin Jehová kiixpejpenka.
Maski keretitas, peletitas uan guititas amo katkaj israelitas, kineltokayaj ke Jehová yejua Dios akin melauak uan ke yejua kiixpejpenka David para maj taixyekana. David semi motasojkamatik porin nejin takamej amo keman kikaujkej uan kipaleuijkej.
a Itech Deuteronomio 23:3-6 iTanauatil Dios kijtouaya ke nion se ammonita uan nion se moabita ueliskia moajsis itech xolal Israel. Nesi ke nejin kijtosnekia ke amo ueliskiaj yeskij kemej israelitas, porin amo uelia kiseliayaj nochi tein yejuan kipiayaj. Sayoj ke kemaj ueliskia yetoskej iniuan okseki israelitas uan no ueliskia ompa nemiskej. Itech amaix Perspicacia para comprender las Escrituras, xikontemo “Ammonitas” uan satepan xikonita kampa kijtoua “Se casan con israelitas”.
