1. ¿Toni kichia Jehová maj tikchiuakan?

 TETATMEJ semi yolpakij keman yoli ininkonetsin. Yejuan semi kiuelitaj keniuj moita ininkonetsin keman tsikitsinok, sayoj ke no kinekij maj moskalti. Uan komo amo moskaltiskia semi motekipachoskiaj. No ijkon, Jehová semi yolpaki keman kiita ke tikixmatij, sayoj ke yejua kineki maj tiksentokakan okachi kuali tikixmatikan (1 Cor. 3:1). Uan kichia maj tikchiuakan tein techpaleuis maj okachi iuan titakuaujtamatikan (1 Cor. 14:20).

2. ¿Toni tiknankiliskej itech nejin tamachtilis?

² Itech nejin tamachtilis tiknankiliskej nejin netajtanilmej: ¿toni kijtosneki maj okachi titakuaujtamatikan oso maj kuali titaixejekokan?, ¿toni moneki tikchiuaskej para kuali titaixejekoskej?, ¿keniuj techpaleuis maj kuali timouikakan iuan Jehová komo timomachtiaj seki tamachtilismej tein ouij tein kipia Biblia? uan ¿keyej amo moneki tiknemiliskej ke kuali titaixejekouajya uan ke amo moneki tikchiuaskejok tein techpaleuis maj okachi kuali timouikakan iuan Jehová?

¿TONI KIJTOSNEKI MAJ KUALI SE TAIXEJEKO?

3. ¿Toni kijtosneki maj kuali titaixejekokan?

³ Keman itech 1 Corintios 14:20 kijtoua “akin moskaltijya” no kijtosneki “akin semi takuaujtamati”, “amo teyi kipoloua” uan “ajsitok” (1 Cor. 2:6). Ijkon kemej se konetsin kisentoka moskaltia, tejuan no moneki tiksentokaskej tikchiuaskej tein techpaleuis maj kuali timouikakan iuan Jehová, nejon techpaleuis maj kuali titaixejekokan (1 Tim. 4:15). Sayoj ke, ¿keniuj uelis tikmatiskej ox kuali titaixejekouaj?

4. ¿Toni kichiuaj akin kuali taixejekouaj?

⁴ ¿Toni kichiuaj akin kuali taixejekouaj? Yejuan kitakamatij nochi tein Jehová kijtoua, amo sayoj tein yejuan kinekij.  Uan maski tajtakolejkej uan mopolouaj, mochikauaj tanemiliskej uan kichiuaskej teisa kemej Jehová kichia de itekitikauan. Yejuan nemij kemej Dios kineki uan mojmostaj mochikauaj tanemiliskej kemej Dios (Efes. 4:​22-24). Kemej kiixmatij itanauatiluan Jehová, okachi kuali taixpejpenaj. Yejua ika amo kipiaj se amat kampa kijtoua sejse taman tein moneki kichiuaskej. Uan no, keman kiixtaliaj kichiuaskej teisa, mochikauaj ijkon kichiuaskej (1 Cor. 9:​26, 27).

5. ¿Toni uelis kinpanos akin amo kuali taixejekouaj? (Efesios 4:​14, 15).

⁵ Sayoj ke akin amo kuali taixejekouaj uelis niman kinneltokiliskej “akin kimatij keniuj tekajkayauaskej”. Xa niman kineltokaskej nochi tein techijtouiliaj akin takajkayauaj uan tein kijtouaj akin kiixnamikij tamachtilis tein melauak (xikonixtajtolti Efesios 4:​14, 15). a Xa no tenexikoluiaj, kiuelitaj takuejmolchiuaskej, niman kualanij oso amo taxikouaj uan niman tajtakolchiuaj (1 Cor. 3:3).

6. ¿Toni uelis techpaleuis maj tikajsikamatikan keniuj se tokniuj uelis kuali taixejekos? (No xikonita taixkopimej).

⁶ Kemej tikitakejya, Biblia kijtoua ke keman aksa amo kuali taixejekoua tamati kemej ijkuak aksa yolik moskaltia. Se konetsin amo kimati miak taman. Yejua ika moneki maj kiyekpiakan. Kemej keman moneki panoskej itech se ojti kampa panouaj miak carros, se temomaj xa kiluis isiuapiltsin maj kimakitski. Xa ijkon kemej moskaltijtiuj, imomaj uelis kikauas maj pano iselti, maski ijkon nochipa kiluia maj kuali motachili. Keman siuapil moskaltiaya ueli panouaya iselti porin kimatia ke moneki moyekpias. No ijkon, tokniuan akin kuali taixejekouaj, moneki kinpaleuiskej tokniuan akin amo kuali taixejekouaj para maj amo kichiuakan tein amo kuali uan maj kuali taixpejpenakan. Tokniuan akin kuali taixejekouaj tanemiliaj itech seki textos para kiitaskej toni kinemilia Jehová de seki taman uan ijkon kuali taixpejpenaskej.

7. ¿No moneki maj kinpaleuikan tokniuan akin kuali taixejekouajya?

⁷ ¿Kijtosneki ke akin kuali taixejekouaj  amo monekiok maj kinpaleuikan? Amo. Ta kemansa no moneki maj kinpaleuikan. Akin amo kuali taixejekoua kichia maj oksekin kiixpejpenakan tein kichiuas oso maj kiluikan tein moneki kichiuas. Sayoj ke se tokniuj akin kuali taixejekoua kikaki tein kiluiaj tokniuan akin yekyolmajsitokej, sayoj ke yejua moneki kiixtalis toni kichiuas (Gál. 6:5).

8. ¿Keyej uelis tikijtoskej ke ome tokniuan akin kuali taixejekouajya tatamamej?

⁸ Ijkon kemej tinochin titatamamej, tokniuan akin kuali taixejekouaj no tatamamej. Sekin kinextiaj ke tamatinij, sekin ke yolchikaujkej, sekin ke kualtakamej uan oksekin ke teajsikamatij. Uan no, xa kemansa ome tokniuan akin kuali taixejekouaj, tataman tein kiixtaliskej kichiuaskej, okachi keman moneki kiixpejpenaskej teisa tein oksekin amo kuali kiitaj. Uan xa tein kiixtalis kichiuas sejse tokniuj amo kitapanauilis itanauatiluan Jehová. Yejua ika, amo moijijtoskej komo tataman tein kiixpejpenkej kichiuaskej, ta mochikauaskej kuali mouikaskej (Rom. 14:10; 1 Cor. 1:10).

¿TONI MONEKI TIKCHIUASKEJ PARA KUALI TITAIXEJEKOSKEJ?

9. ¿Keyej moneki tikchiuaskej teisa para kuali titaixejekoskej?

⁹ Se konetsin iselti moskaltijtiuj ijkon kemej panouaj xiujmej, sayoj ke tejuan moneki tikchiuaskej seki taman para kuali timouikaskej iuan Jehová. Ijkon kemej kinpanok tokniuan de Corinto. Yejuan kuali kiselijkaj kuali tanauatilmej, moauijkej, kiselijkej ichikaualis Dios uan tein Pablo kichiuak kinmachtij miak taman (Hech. 18:​8-11). Maski ijkon, seki xiujmej satepan ke moauijkej miakej kisentokayaj amo kuali taixejekouayaj (1 Cor. 3:2). ¿Toni moneki tikchiuaskej tejuan para maj amo ijkon techpano?

10. ¿Toni moneki tikchiuaskej para kuali titaixejekoskej? (Judas 20).

¹⁰ Para uelis kuali titaixejekoskej, monekis tiknejnekiskej tikchiuaskej. Akin amo tamatinij mosenkauaj uan amo mochikauaj mouikaskej okachi iuan Jehová (Prov. 1:22). Amo tiknekij tikchiuaskej kemej akin kisenkauaj inintekiuj uan kichiaj maj inintatuan kiniluikan toni kichiuaskej, ta tiknekij timochikauaskej okachi kuali timouikaskej iuan Jehová (xikonixtajtolti Judas 20). Komo tejuatsin tikonita ke ayamo kuali tiontaixejekoua, xikontajtani Jehová maj mitsonpaleui ‘xikonnejneki tikonchiuas nochi tein kiuelita’ (Filip. 2:13).

11. ¿Keniuj techpaleuia Jehová para maj kuali titaixejekokan? (Efesios 4:​11-13).

¹¹ Jehová techpaleuia maj kuali titaixejekokan, yejua ika kiixtalij maj seki tokniuan techixyekanakan itech nechikol “hasta maj timoskaltikan kemej se akin ueyiya uan titamatikan kemej Cristo itech nochi” (xikonixtajtolti Efesios 4:​11-13). No techpaleuia ika ichikaualis para maj ‘titanemilikan kemej Cristo’ (1 Cor. 2:​14-16). Uan no, kichiuak maj moijkuilo naui Evangelios tein techpaleuiaj maj tikmatikan toni kichiuako Jesús keman yetoya nikan taltikpak. Komo titanemiliaj, titajtouaj uan tikchiuaj kemej yejua, uelis kuali titaixejekoskej.

MONEKI TIMOMACHTISKEJ SEKI TAMAN TEIN OUIJ SE KIAJSIKAMATIS TEIN KIPIA BIBLIA

12. ¿Katiyejua tamachtilismej “tein yekinika timomachtijkej de Cristo”?

¹² Komo tiknekij kuali titaixejekoskej, amo moneki sayoj tikitaskej “tein yekinika timomachtijkej de Cristo”. Seki taman  tein timomachtijkej yejua ke moneki timoyolpataskej, titakuaujtamatiskej ke moneki se moauis uan ke mikemej oksepa nemiskej (Heb. 6:​1, 2). Nochin akin tikchiuaj kemej Cristo moneki kuali tikajsikamatiskej nejin. Yejua ika, Pedro ika tajtoj nejin keman kinnojnotsak miakej itech Pentecostés (Hech. 2:​32-35, 38). Moneki tikneltokaskej nochi nejin tamachtilismej para uelis timochiuaskej imomachtijkauan Cristo. Yejua ika Pablo kijtoj ke komo amo tikneltokaj ke mikemej oksepa nemiskej amo uelis tikijtoskej ke tikneltokaj Cristo (1 Cor. 15:​12-14). Yejua ika, amo sayoj moneki tikmatiskej seki taman tamachtilis.

13. ¿Toni moneki tikchiuaskej para maj techpaleui tein ika tajtoua Hebreos 5:14? (No xikonita taixkopimej).

¹³ No onkak okseki taman tamachtilis tein ouij se kiajsikamatis tein kipia Biblia. Amo sayoj moneki timomachtiskej itanauatiluan, ta no moneki tikmatiskej tein yejuatsin kiita ke kuali yetok uan tein amo, porin nejin techpaleuia maj tikajsikamatikan keniuj tanemilia. Yejua ika, moneki timomachtiskej Biblia, itech titanemiliskej uan timochikauaskej tikchiuaskej tein ompa timomachtiaj. Nejon techpaleuia maj tikixpejpenakan tein kiyolpaktia Jehová (xikonixtajtolti Hebreos 5:14). b

14. ¿Keniuj Pablo kinpaleuij maj kuali taixpejpenakan tokniuan akin nemiaj Corinto?

¹⁴ Tokniuan akin amo kuali taixejekouaj kinouijkisa kuali taixpejpenaskej keman amo moajsi itech Biblia se tanauatil tein kijtoua toni moneki kichiuaskej. Uelis kinemiliskej ke uelis kichiuaskej tein kinekiskej. Oksekin kinemiliskej ke moneki moixtalis se tanauatil, maski amo moneki. Kemej ijkuak tokniuan de Corinto kiluijkej Pablo maj kiixtaliani ox ueliskia kikuaskej takual tein kinmaktilijkaj tatadiosmej. Pablo amo kiniluij toni monekia kichiuaskej, ta kinmelauilij ke sejse monekia kiixpejpenas toni kichiuas ijkon kemej momachtijka. Kinelnamiktij seki tamachtilis tein kipia Biblia tein kinpaleuiskia maj kuali taixpejpenanij uan tein amo kinuetsiltiskia oksekin (1 Cor. 8:​4, 7-9).  Pablo kinmachtijtoya akin nemiaj Corinto maj kikuinij iTajtol Dios para maj kuali taixpejpenanij uan maj amo kichiuanij tein oksekin kichiuayaj.

15. ¿Keniuj kinpaleuij Pablo tokniuan hebreos maj kuali mouikanij iuan Jehová?

¹⁵ Tein kinijkuilouilij Pablo tokniuan hebreos no techmachtia se taman. Sekin amo kuali mouikayajok iuan Jehová, yejua ika kiniluij: “Oksepa namechpoloua leche uan amo tapalol” (Heb. 5:12). Amo kiselijtoyaj yankuik taman tein Jehová kinmachtijtoya itechkopa nechikol (Prov. 4:18). Miakej judíos kinemiliayaj ke monekiaok kitakamatiskej iTanauatil Moisés, maski panokajya 30 xiujmej ke Cristo kichiuak maj amo tapaleuiok nejon tanauatil (Rom. 10:4; Tito 1:10). Itech nochi nejon tiempo judíos monekia kiajsikamatiskejya ke amo monekiaok kichiuaskej tein kijtouaya nejon tanauatil. Yejua ika, Pablo kinekia kinpaleuis maj kiajsikamatikan tamachtilis tein ouij. Tein Pablo kinijkuilouilij kinpaleuij maj kiitakan ke kemej kiueyichiuaskiaj Jehová okachi kuali katka, kinpaleuiskia maj yolchikaujkej uan maj kisentokanij tanojnotsanij maski kinixnamikiaj judíos (Heb. 10:​19-23).

¿KEYEJ MONEKI TIMOCHIKAUASKEJ TIKSENTOKASKEJ KUALI TITAIXEJEKOSKEJ?

16. ¿Toni no moneki tikchiuaskej?

¹⁶ Moneki timochikauaskej tiksentokaskej kuali titaixejekoskej. Yejua ika amo moneki tiknemiliskej ke kuali titaixejekouajya uan ke amo moneki tiksentokaskej timochikauaskej kuali timouikaskej iuan Jehová (1 Cor. 10:12). Yejua ika, moneki tiksentokaskej tikitaskej ox tiksentokaj titakuaujtamatij (2 Cor. 13:5).

17. ¿Keniuj techmachtia amatajkuilol Colosenses maj kuali titaixejekokan?

¹⁷ Itech amatajkuilol tein kinijkuilouilij Pablo tokniuan akin yetoyaj Colosas no kijtoj ke monekia maj kisentokakan takuaujtamatikan. Maski tokniuan kuali taixejekouayajya, kiniluij ke monekia moyekpiaskej para maj amo kinkajkayauanij ika inintamachtilis tamatinij (Col. 2:​6-10). Uan Epafras, akin kuali kinixmatiaya nochipa ininka motataujtiaya ‘para maj kisentokanij semi takuaujtamatinij’ oso maj  kuali taixejekouanij (Col. 4:12). ¿Toni techmachtia nejin? Ke Pablo uan Epafras kimatiaj ke moneki timochikauaskej para tiksentokaskej kuali titaixejekoskej uan moneki maj Jehová techpaleui. Yejuan kinekiaj maj akin nemiaj Colosas kuali taixejekouanij maski kipanotoyaj ouijkayomej.

18. ¿Toni uelis kipanos se tokniuj akin kuali taixejekouaya? (No xikonita taixkopin).

¹⁸ Pablo kiniluij tokniuan hebreos ke maski se tokniuj kuali taixejekouaya uelis kichiuas teisa tein amo kiyolpaktia Jehová uan amo kuali mouikasok iuan. Nejin uelis panos komo amo kitakamatiok Jehová uan amo kineki moyolpatas nion maj Jehová kitapojpolui. Semi kuali ke nejon ayamo kinpanotoya tokniuan hebreos (Heb. 6:​4-9). ¿Toni kinpanoua komo moyolpataj akin amo tanojnotsajok nion monechikouajok uan akin kinkalankixtianij itech nechikol? Komo yolyemankej uan moyolpataj kinextiaj ke amo kichiuaj kemej akin ininka tajtoj Pablo. Keman mokepaj iuan Jehová, moneki mokauaskej maj yejuatsin kinpaleui (Ezeq. 34:​15, 16). Yejua ika, xa tokniuan tayekananij kiluiskej se tokniuj akin kuali taixejekoua maj kipaleui maj oksepa kuali mouika iuan Jehová.

19. ¿Toni moneki tikixtaliskej tikchiuaskej?

¹⁹ Komo tejuatsin tionmochikaujtok kuali tiontaixejekos, amo xionmosenkaua. Xikonsentoka xionmomachti tamachtilismej tein ouijkej tein moajsij itech Biblia, nejon mitsonpaleuis okachi xiontanemili kemej Jehová. Uan komo kuali tiontaixejekouaya, xikonsentoka ijkon xikonchiua.