• “Nikmachiliaya ke notakauj miakpa nechkajkayauaya iuan aksa”.

• “Nikmachiliaya ke semi nechpinaujtijka, ke amo nikuakualtsin katka uan ke amo akin nechpatiuitaya”.

• “Semi nimotayokoltiaya uan amo akin uelia niktapouiaya tein nechpanotoya”.

• “Hasta niknemilij ke Jehová amo noka motekipachoua”.

Tein kijtouaj nejin siuamej kinextia keniuj semi tajyouiaj keman inintakauj kiita auilnemilis. Uan komo itakatsin miak metstia oso xiujmejya kiichtakaita auilnemilis, xa isiuatsin kinemilis ke amo uelisok iuan takuaujtamatis. Se siuatsin kijtoj: “Kemansa nikmachiliaya ke amo nikixmatia notakatsin. Niknemiliaya toni okseki taman amo nechiluiaya”.

¿No kiita auilnemilis motakatsin? a Komo ijkon, nejin tamachtilis semi mitsonpaleuis. Nikan momelauaj seki tayolmajxitilismej tein kipia Biblia tein mitsonyolseuis uan mitsonyolchikauas xikonita ke Jehová mitsonpaleuia uan mitsontasojta, no mitsonpaleuis okachi xionmotoki iuan Jehová uan okachi xionyolseujto. b

Maski amo uelis tikonchiualtis motakatsin nochi tein tikonneki, kemaj uelis tikonchiuas tein mitsonpaleuis okachi xionyolseujto. Nikan moajsi ome taman tein uelis mitsonpaleuis.

Amo xionmotajtakolti. Xa se siuatsin kinemilis ke itajtakol maj itakatsin kiita auilnemilis. Alice c kinemiliaya ke amo kuakualtsin katka uan ke itakatsin amo kiueuelitayaok, uan motajtaniaya: “¿Keyej notakatsin kiuelita kinitas okseki siuamej uan amo nejua?”. Uan seki siuamej kinemiliaj ke kemej kualanij amo kipaleuiaj inintakauj, uan yejua ika motajtakoltiaj. Daniela kijtoua: “Semi nechkualantiaya maj notakatsin kisentokani kiitani auilnemilis. Nochipa nimotekipachojtoya uan nikualantoya uan yejua ika niknemiliaya ke nejua nikchiujtoya maj amo kuali timouikakanok”.

Komo no ijkon tionmomachilia, xikonelnamiki ke Jehová amo tejua mitsontajtakoltia tein kichiua  motakatsin. Santiago 1:14 kijtoua: “Sejse kiixnamiki se ouijkayot keman tein kinejneki kiyoltilana uan kitanejnektia” (Rom. 14:12; Filip. 2:12). Yejua ika Jehová amo mitsontajtakoltia, ta semi kitasojkamati porin amo tikonkaua (2 Crón. 16:9).

Semi mitsonpaleuis xikonajsikamati ke komo motakatsin kiita auilnemilis, amo kijtosneki ke amo tionkuakualtsin. Motelmachtianij kijtouaj ke keman se takat kiita auilnemilis semi peua kinejneki auilnemis uan nion se siuat uelis kichiuas maj amo kinejnekiok.

Amo nochipa ika xiontanemilijto. Catherine kijtoua ke nochipa ika tanemilijtinemia ke itakatsin kiitaya auilnemilis. Frances kijtoua: “Nochipa keman amo nikmati kani yetok notakatsin, nochi tonal semi nimotekipachojtok”. Okseki tokniuan siuamej kijtouaj ke semi mopinaujmatij keman yetokej iniuan okseki tokniuan akin xa kimatij tein kichiujtok inintakauj. Uan oksekin kijtouaj ke kimachiliaj ke yetokej ininselti porin kinemiliaj ke amo akin kinajsikamati.

Komo no ijkon tionmomachilia amo xionmotayokolti, sayoj ke komo nochipa tikonnemilijtok tein kichiua motakauj okachi tionmotekipachos. Okachi kuali, xionmochikaua kuali tionmouikas iuan Jehová porin nejon mitsonpaleuis amo xionmosenkaua (Sal. 62:2; Efes. 6:10).

¿Keniuj uelis mitsonpaleuis komo tikonixtajtoltia Biblia uan itech tiontanemilia? Biblia ininka tajtoua seki siuamej akin semi tajyouijkej uan kuali momachilijkej keman kitapouijkej Jehová tein kinpanotoya. Maski amo nochipa kinajchiuilij ouijkayot, kinpaleuij maj yolseujtokan. Xikonnemili tein kipanok Ana, akin “semi tajyouijtoya”. Yejua “uejkauak kitataujtijtoya Jehová”, uan yolseuik maski ayamo kimatia toni panoskia (1 Sam. 1:10, 12, 18; 2 Cor. 1:3, 4).

Xikonilui tokniuan tayekananij maj mitsonpaleuikan. Yejuan yeskij ‘kemej kampa se motatia keman taejeka, kampa se mopaleuia keman kiouaejeka’ (Is. 32:2). Xa hasta mitsoniluiskej xiontajto iuan se tokniuj siuat akin uelis mitsonyolseuis uan akin uelis nochi tikontapouis (Prov. 17:17).

¿Uelis tikonpaleuis motakatsin maj amo kiitaok auilnemilis? Xa kemaj. Biblia kijtoua ke keman se kimelaua se kuejmol oso keman kemej yeskia  iuan timoteuiaj aksa akin techtauelita, ‘okachi kuali mopaleuiaj omen uan amo se’ (Ecl. 4:9-12). Onkak seki taman tein kinextia ke keman takat uan siuat mosenpaleuiaj, tetakauj okachi kipaleuia maj amo kiitaok auilnemilis uan isiuatsin ueli oksepa iuan takuaujtamati.

Moneki tikonnemilis ox motakatsin yekmelauj amo kineki kiitasok auilnemilis uan ox ijkon kiixtalijya. ¿Tikonmati ox kitataujtijya Jehová maj kipaleui uan kitemojya maj tayekananij kipaleuikan? (2 Cor. 4:7; Sant. 5:14, 15). ¿Kiixtalijya toni kichiuas para amo kiitasok auilnemilis? Xionmotajtani: ¿kiixtalijya amo semi kikuisok icelular uan amo yetok kampa uelis kiitas auilnemilis? (Prov. 27:12). ¿Kinekis xikonpaleui uan mitsontapouis nochi tein kipanoua? Komo ijkon, xa uelis tikonpaleuis.

¿Keniuj? Xikonita toni kichiua Felicia. Yejua iuan monamiktij Ethan, akin peuak kiita auilnemilis desde ke katka okichpil. Felicia kichiua tein moneki para maj Ethan kilui keman kineki kiitas auilnemilis. Ethan kijtoua: “Ueli niktapouia nochi nosiuatsin. Yejua semi nechtasojta uan nechpaleuia maj amo nikita auilnemilis. Uan no nechtajtania keniuj nietok, uan nechpaleuia maj amo semi nikui internet”. Sayoj ke Felicia ipa kiyolkokoua maj itakatsin kineki kiitas auilnemilis. Yejua kijtoua: “Nikmati ke komo semi nikualani oso nimoyolkokoua, nejon amo kipaleuia Ethan maj amo kiitaok auilnemilis. Yejua ika, achto ika timonojnotsaj tein yejua kipanoua, uan satepan tikitaj toni nechpaleuis maj amo semi nimotayokoltiok”.

Keman monojnotsaj, kipaleuia takatsin maj amo kiitaok auilnemilis, uan no kipaleuia isiuatsin maj oksepa iuan takuaujtamati. Keman se takat kiluia isiuatsin toni tein amo kuali kinejneki, toni kichiujtok oso kani yetok, siuatsin iuan takuaujtamati porin kimati ke nochi kiluia.

¿Tikonnemilia ke no uelis ijkon tikonchiuas para tikonpaleuis motakatsin? Xa uelis tikonixtajtoltis uan tionmomachtis nejin tamachtilis iuan motakatsin. ¿Toni moneki kichiuas motakatsin? Amo kiitasok auilnemilis uan kitemos oksepa iuan xiontakuaujtamati. Yejua amo moneki kualanis keman tikonnekis ika tikonnojnotsas nejin taman, ta moneki mochikauas mitsonajsikamatis keyej mitsonyolkokoua tein kichiua. Uan tejuatsin, ¿toni moneki tikonchiuas? Moneki tikonpaleuis maj amo kiitaok auilnemilis uan xikonkaua maj kichiua tein monekis para oksepa iuan tiontakuaujtamatis. Semi moneki xikmatikan keyej miakej kiitaj auilnemilis uan toni kinpaleuia maj amo kiitakanok. d

 Komo tikonnemilia ke uelis namokualantiskej keman namonojnotstoskej, xa keman nantajtoskej ueliskia namouan yetos se tayekankej. Komo ijkon, xikonixpejpena se tayekankej akin nanomen uelis nankitapouiskej tein nankimachiliaj. Xikonelnamiki ke maski motakatsin amo kiitasok auilnemilis, xa tejuatsin amo niman uelis iuan tiontakuaujtamatis, sayoj ke amo xionmosenkaua. Xikonita keniuj yolik okachi kualtsin namouikaj. Komo amo nanyolijsiuij satepan oksepa kualtsin namouikaskej (Ecl. 7:8; 1 Cor. 13:4).

Komo motakatsin oksepa kiita auilnemilis, ¿kijtosneki ke amo keman kikauas oso ke amo kiyolkokoua tein kichiua? Xa amo. Komo amo keman ueli kikaua, xa nochipa monekis mochikauas amo kiitasok. Xa uelis oksepa kiitas maski miak xiujmejya amo kiitstoyaok. Para amo oksepa kiitas, takat moneki kiixtalis kichiuas okseki taman tein okachi kipaleuis, uan moneki kisentokas kichiuas maski xa moitas ke kikauakya tein kichiuaya (Prov. 28:14; Mat. 5:29; 1 Cor. 10:12). Moneki ‘kipatatos kemej tanemilia’ uan kitauelitas “tein amo kuali”; nejin kijtosneki maj amo kiita auilnemilis uan maj amo kichiua okseki taman tein pitsotik kemej momajmatokas (Efes. 4:23; Sal. 97:10; Rom. 12:9). ¿Mochikaua amo kichiuasok tein pitsotik? Komo ijkon, xa uelis kikauas tein kichiuaya. e

¿Uan komo motakatsin amo kineki kichiuas nion teyi para amo kiitasok auilnemilis? Xa tejuatsin miakpa tionmotayokoltis, mitsonyolkokos uan semi tionkualanis. Xikonilui Jehová maj mitsonpaleui, ijkon uelis tionyolseujtos (1 Ped. 5:7). Xikonsentoka xionmomachti, xionmotataujti, uan ika xiontanemili tein tionmomachtia para okachi tionmotokis iuan Jehová, uan yejuatsin okachi motokis mouan. “Jehová iniuan yetok akin tajyouijtokej” uan kineki maj oksepa yolpakikan (Sal. 34:18). Xikonsentoka kuali xionmouika iuan Jehová, xikontemo maj tayekananij mitsonpaleuikan uan amo xikonnemili ke motakatsin amo keman kinekis mopatas (Rom. 2:4; 2 Ped. 3:9).