1. ¿Toni kineki Jehová tikixtalikan tikchiuaskej?

 JEHOVÁ techkaua maj toselti titaixpejpenakan uan mojmostaj tinochin tikixpejpenaj tikchiuaskej teisa. Seki taman moneki achto kuali tiknemiliskej ox tikchiuaskej oso amo. Uan keman aksa kiixtalis motemaktis iuan Jehová uan kiueyichiuas iniuan tokniuan, moneki kuali kinemilis achto ke kichiuas. Uan Jehová kineki maj tinochin tikixtalikan tikchiuaskej. ¿Keyej? Porin techtasojta uan kineki maj kuali tietokan. Kineki maj kuali iuan timouikakan uan maj tinemikan nochipaya (Deut. 30:​19, 20; Gál. 6:​7, 8).

2. ¿Toni kineki Jehová maj kichiuakan akin tel tajtakolchiujkej uan ayamo moyolpataj? (1 Juan 2:1).

² Jehová amo akin kichikaujkauia maj kitekitili, ta techkaua maj tisejsemej tikixpejpenakan ox tikchiuaskej oso amo. Sayoj ke, ¿toni moneki kichiuaskej tokniuan tayekananij  komo se tokniuj akin moauijya tel tajtakolchiua? Komo amo moyolpata, moneki kikalankixtiskej de nechikol (1 Cor. 5:13). Sayoj ke maski kikalankixtiskej, Jehová kineki maj moyolpata uan maj oksepa kuali iuan mouika. Uan no yejua ika kitemakak iKonetsin porin ijkon ueliskia kintapojpoluis akin moyolpataj (xikonixtajtolti 1 Juan 2:1). Jehová semi tetasojta, yejua ika kinpaleuia akin tajtakolchiuaj maj moyolpatakan (Zac. 1:3; Rom. 2:4; Sant. 4:8).

3. ¿Toni tikitaskej itech nejin tamachtilis?

³ Jehová techiluia keniuj kiita tajtakol uan keniuj momachilia keman aksa tajtakolchiua. Uan yejuatsin no kineki maj ijkon tikitakan. Itech nejin tamachtilis tikitaskej keniuj no uelis ijkon tikchiuaskej. Timomachtiskej tein Pablo kiniluij maj kichiuanij tokniuan de Corinto keman se tokniuj takat tel tajtakolchiuak. No timomachtiskej tein tatitanil Pablo kiniluij maj kichiuanij tokniuan satepan ke takat moyolpatak. Uan no timomachtiskej keniuj momachilia Jehová keman aksa tel tajtakolchiua.

¿TONI KICHIUJKEJ TOKNIUAN KEMAN SE TOKNIUJ TAKAT TEL TAJTAKOLCHIUAK?

4. ¿Toni mochiujtoya itech nechikol de Corinto? (1 Corintios 5:​1, 2).

⁴ (Xikonixtajtolti 1 Corintios 5:​1, 2). Keman tatitanil Pablo ika expa yajki tanojnotsato kimatik ke mochiujtoya se taman tein tel amo kuali itech yankuik nechikol ompa Corinto: se tokniuj takat auilnemia iuan itakpanan. Tatitanil Pablo kijtoj ke ‘nejon tajtakol amo moita nion iniuan akin taneltokaj’. Sayoj ke tokniuan itech nechikol kuali iuan mouikayaj nejon takat uan kiitayaj ke kuali yetoya tein kichiujtoya. Xa sekin kinemiliayaj ke ijkon kinextijtoyaj ke kiikneliayaj nejon takat ijkon kemej Jehová kiniknelia akin tajtakolchiuaj. Sayoj ke Jehová amo kinkaua maj kisentokakan itech inechikol akin tajtakolchiuaj uan amo moyolpataj. Kemej nejon takat kichiujtoya tein amo kuali, xa sekin akin kiueyichiuayaj Jehová peuak amo kitekitiliajok. Uan komo amo kikalankixtiskiaj, oksekin no ijkon peuaskia kichiuaskiaj. ¿Toni kiniluij tatitanil Pablo maj kichiuanij tokniuan de Corinto?

5. ¿Toni tatitanil Pablo kinijkuilouilij tokniuan de Corinto, uan toni kinekia kiniluis? (1 Corintios 5:13; no xikonita taixkopin).

⁵ (Xikonixtajtolti 1 Corintios 5:13). Jehová kichiuak maj tatitanil Pablo  kinijkuilouiliani tokniuan de Corinto ke monekia kikalankixtiskej de nechikol akin tajtakolchiujka uan amo moyolpataya. ¿Toni amo monekia kichiuaskej tokniuan? Pablo kiniluij maj amo iuan mouikanijok nion maj iuan tamajseuanij (1 Cor. 5:11). Keman titakuaj iuan aksa ipa iuan titajtouaj uan okachi iuan timouikaj. Yejua ika Pablo kiniluij maj amo mouikanijok iuan nejon takat para amo no kichiuaskiaj kemej yejua (1 Cor. 5:​5-7). Nejon no kipaleuiaya akin tajtakolchiuak maj kiitani ke semi kiyolkokojka Jehová, maj mopinaujmatini uan maj moyolpatani.

6. ¿Keniuj kinpaleuij tokniuan uan takat akin tajtakolchiujka tein Pablo kinijkuilouilijka?

⁶ Satepan ke Pablo kintajkuilouilij tokniuan ompa Corinto, xa motajtaniaya keniuj kiseliskiaj tein kinijkuilouilijka. Tepitsin satepan, Tito kiluij Pablo ke tokniuan kichiujtoyajya tein kiniluijka (2 Cor. 7:​6, 7). Uan no, tepitsin satepan ke Pablo kintajkuilouilij, nejon takat akin tajtakolchiujka moyolpatakaya uan amo kichiuayaok tein amo kuali uan peuak kichiua tein Jehová tanauatia (2 Cor. 7:​8-11). ¿Toni kiniluij Pablo maj kichiuanij tokniuan?

 ¿TONI KICHIUJKEJ TOKNIUAN KEMAN TAKAT AKIN TAJTAKOLCHIUJKA MOYOLPATAKAYA?

7. ¿Keniuj tapaleuij maj kikalankixtianij de nechikol akin tajtakolchiujka? (2 Corintios 2:​5-8).

⁷ (Xikonixtajtolti 2 Corintios 2:​5-8). Pablo kijtoj: “Nankitatsakuiltijkejya nejon takat. Amo xikixtopeuakanok”. Nejin kijtosneki ke keman takat akin tajtakolchiujka kikalankixtijkaj de nechikol, kiitak ke monekia maj moyolpata uan satepan ke moyolpataskia tokniuan amo monekiaok kiixtopeuaskej (Heb. 12:11).

8. ¿Toni kiniluij Pablo tokniuan itech nechikol?

⁸ Satepan, Pablo kiniluij tayekananij ke monekia kikauaskej maj oksepa poui itech nechikol takat akin moyolpatakaya, yejua kijtoj: “Xiktapojpoluikan ika nochi namoyolo uan xikyolseuikan”. Uan no kijtoj: “Namechyolchikaua xiknextilikan ke nankitasojtaj”. Pablo amo sayoj kinekia maj kikauanij maj oksepa pouini itech nechikol, ta maj kinextianij ika tein kijtouayaj uan kichiuayaj ke senkis kitapojpoluijkajya uan kitasojtayaj. Nejin kipaleuiskia takat akin moyolpataka maj kiita ke tokniuan yolpakiaj porin oksepa pouia itech nechikol.

9. ¿Keyej sekin kinouijmakaya kitapojpoluiskej tokniuj akin moyolpatakaya?

⁹ Sekin xa amo kiuelitakej maj nejon takat oksepa pouini itech nechikol, ¿keyej? Sekin xa kualantoyajok porin tajtakolchiujka oso porin kinyolkokojka. Oksekin xa kinemiliayaj ke amo kuali yetoya maj kuali kiselianij nejon takat akin kichiujka se ueyi tajtakol porin yejuan nochipa mochikaujkej kitakamatiskej itanauatiluan Jehová (no xikonita Lucas 15:​28-30). ¿Keyej semi monekia maj kinextilianij nejon takat akin moyolpatakaya ke kitasojtayaj?

10, 11. ¿Toni ueliskia panos komo tayekananij amo kitapojpoluiskiaj takat akin moyolpatakaya?

¹⁰ ¿Keniuj momachiliskia takat komo tayekananij amo kikauaskiaj maj oksepa poui itech nechikol satepan ke moyolpatakaya? ¿Oso keniuj momachiliskia komo tokniuan amo kitasojtaskiaj satepan ke mokepaskia? Nejon takat akin moyolpatakaya xa kinekiskia mosenkauas uan semi tayokoxtoskia. Xa kinemiliskia ke amo kemanok ueliskia kitekitilis Jehová uan hasta kinemiliskia ke yejuatsin amo keman kitapojpoluiskia uan ke amo monekia mopatas.

¹¹ ¿Toni no ueliskia panos komo tokniuan amo kitapojpoluiskiaj takat akin moyolpataka? Nejon kichiuaskia maj amo kuali mouikanijok iuan Jehová. ¿Keyej? Porin amo kichiujtoskiaj kemej Jehová akin kintapojpoluia akin moyolpataj, ta kichiujtoskiaj kemej Satanás akin tel amo yolkuali uan amo teiknelia. Kikaujtoskiaj maj Satanás kinchiualtiani tein kinekia para maj nejon takat amo kinekiniok kitekitilis Jehová (2 Cor. 2:​10, 11; Efes. 4:27).

12. ¿Keniuj tokniuan ueliskia kichiuaskej kemej Jehová?

¹² ¿Keniuj tokniuan de Corinto ueliskia kichiuaskej kemej Jehová uan amo kemej Satanás? Keman kintapojpoluiskiaj akin moyolpatayaj ijkon kemej Jehová kichiua. Maj tikitakan toni kijtojkej sekin akin kijkuilojkej Biblia keman ika tajtojkej Jehová. David kiluij: “Tiyolkuali uan tikneki titetapojpoluis” (Sal. 86:5). Miqueas kijkuiloj: “¿Akoni se Dios kemej tejua, akin titetapojpoluia keman se mopoloua uan amo titeelnamikilia tein se kichiua [...]?” (Miq. 7:18). Uan no, Isaías kijtoj: “Akin amo yolkuali maj amo  kichiuaok tein amo kuali, uan akin kinchiuilia tein amo kuali oksekin maj amo kinemiliok tein amo kuali, uan maj mokepa iuan Jehová akin kiiknelis, maj mokepa iuan toDios porin kitapojpoluis” (Is. 55:7).

13. ¿Keyej kikaujkej maj oksepa poui itech nechikol takat akin moyolpatakaya? (Xikonita recuadro “ ¿Kemanian mokepak itech nechikol takat de Corinto?”).

¹³ Para kinextiskiaj tokniuan de Corinto ke kichiuayaj kemej Jehová, monekia kitapojpoluiskej takat akin moyolpatakaya uan kinextiliskej ke kitasojtayaj uan ke yolpakiaj porin oksepa mokepka. Pablo kijtoj ke komo kitapojpoluiayaj takat akin moyolpatakaya, kinextiskiaj ke “tatakamatiaj itech nochi” (2 Cor. 2:9). Maski takat amo miak metsti kikalankixtijkaj de nechikol, nejon kipaleuij maj moyolpata. Yejua ika tokniuan tayekananij amo monekia uejkauak mochiaskej para kikauaskej maj oksepa poui itech nechikol.

¿KENIUJ UELIS TITEIKNELISKEJ KEMEJ JEHOVÁ UAN TIKCHIUASKEJ TEIN KUALI YETOK?

14, 15. ¿Toni techmachtia tein panok itech nechikol ompa Corinto? (2 Pedro 3:9; no xikonita taixkopin).

¹⁴ Jehová kichiuak maj moijkuilo itech iTajtol tein panok itech nechikol de Corinto ‘para ika techmachtis’ (Rom. 15:4).  Nejin techmachtia ke Jehová amo kinkaua maj kisentokakan itech nechikol akin tajtakolchiuaj uan amo moyolpataj. Sekin kinemiliaj ke kemej yejuatsin teiknelia kikauas maj kisentoka itech nechikol aksa akin amo moyolpata. Sayoj ke nejon amo melauj. Jehová kemaj teiknelia, sayoj ke amo kipata tein kijtoua ke kuali yetok uan tein kijtoua ke amo kuali yetok (Jud. 4). Komo Jehová kikauaskia maj se tajtakolchiujkej akin amo moyolpata kisentoka poui itech nechikol, amo kinextiskia ke teiknelia porin xa nejon kichiuaskia maj oksekin no peua amo kuali monejnemiltikan (Prov. 13:20; 1 Cor. 15:33).

¹⁵ Nejin tein panok no techmachtia ke Jehová amo kineki maj nion akin ixpoliui. Yejuatsin kineki maj miakej momakixtikan, kiniknelia akin mopataj uan mochikauaj oksepa kuali iuan mouikaskej (Ezeq. 33:11; xikonixtajtolti 2 Pedro 3:9). Yejua ika, keman takat de Corinto moyolpatak uan amo kichiuakok tein amo kuali, Jehová kichiuak maj tatitanil Pablo kiniluiani tokniuan ke monekia kitapojpoluiskej uan oksepa kuali kiseliskej.

16. ¿Toni tiknekij tikchiuaskej keman timomachtiaj tein panok itech nechikol de Corinto?

¹⁶ Keman timomachtiaj tein panok itech nechikol de Corinto techpaleuia maj tikitakan ke Jehová tetasojta, kichiua tein kuali uan yolmelauak (Sal. 33:5). Nejin techpaleuia maj okachi tiknekikan tikueyichiuaskej. Semi tiktasojkamatiliaj maj techikneli porin tinochin titajtakolejkej uan moneki maj techtapojpolui. No semi tiktasojkamatiliaj porin kitemaktij iKonetsin para techtapojpoluis totajtakoluan. Semi techyolseuia porin Jehová semi kintasojta itekitikauan uan kineki maj kuali yetokan.

17. ¿Toni tikitaskej itech okseki tamachtilismej?

¹⁷ Komo se tokniuj tel tajtakolchiua, ¿keniuj tayekananij uelis tetasojtaskej kemej Jehová uan kipaleuiskej maj moyolpata? ¿Uan toni moneki tikchiuaskej komo tayekananij kiixtaliaj ke aksa moneki kikalankixtiskej oso kikauaskej maj oksepa poui itech nechikol? Tikitaskej nejin itech okseki tamachtilismej.