Tatitanil Pablo kiniluij tokniuan de Tesalónica: “Komo aksa amo kichiua tein tikijtouaj itech nejin amatajkuilol, kuali xikitakan akoni” (2 Tes. 3:14). Achto, tokniuan tayekananij kitemakayaj se tanojnots komo aksa amo kitakamattoya itanauatiluan Dios maski miakpaya kiyolmajxitijkaj. Yejua ika, maski tokniuan kisentokayaj iuan tanojnotsayaj oso monojnotsayaj itech nechikol, amo kitemouayaj iuan kichiuaskej seki taman nion iuan moixpetaniskej.

Sayoj ke, axkan tikajsikamatij ke tein Pablo tayolmajxitij kijtosneki ke sejse tokniuj monekis kiixtalis toni kichiuas. Yejua ika tayekananij amo monekiok kitemakaskej se tanojnots. ¿Keyej mopatak kemej tikajsikamatiaj tein kijtouaj 2 Tesalonicenses 3:14? Maj tikitakan tein ika tajtojtoya tatitanil Pablo.

Pablo kijtoj ke seki tokniuan itech nechikol ‘amo tatakamattoyaj’. Amo kichiuayaj tein Pablo kinyolmajxitiaya ika iTajtol Dios, kemej tein kiniluijka achto: “Komo aksa amo kineki tekitis, maj amo no takua”. Maski ijkon, sekin ipa amo kinekiaj tekitiskej maski ueliaj. Uan no, sekin mokalakiayaj kampa amo inintekiuj. ¿Keniuj monekia mouikaskej tokniuan iniuan akin amo tatakamatiaj? (2 Tes. 3:​6, 10-12).

Pablo kijtoj: “Kuali xikitakan akoni”. Itech griego, nejin tajtol kijtosneki kuali tikmatiskej akonimej ijkon kichiuaj uan amo iniuan timouikaskej porin ueliskia no ijkon tikchiuaskej. Pablo kinyolmajxitijtoya nejin nochin tokniuan itech nechikol uan amo sayoj tayekananij (2 Tes. 1:1; 3:6). Yejua ika komo se tokniuj kiitaya ke aksa amo kitakamattoya itanauatiluan Dios, iselti kiixtaliskia ox ‘amo iuan mouikasok’.

¿Monekia kiitaskej kemej aksa akin kikalankixtijkej de nechikol? Amo, porin Pablo no kiniluij: “Xiksentokakan xikyolmajxitikan kemej se namokniuj”. Yejua ika kisentokaskiaj iuan mosentiliskiaj itech nechikolmej uan iuan tanojnotsaskiaj, sayoj ke amo kitemoskiaj iuan kichiuaskej teisa oso iuan moixpetaniskej. Uan Pablo kijtoj keyej: “Para maj mopinaujmati”. ¿Keniuj tapaleuiskia nejon? Xa nejon tokniuj mopinaujmatiskia uan kipaleuiskia maj mopata (2 Tes. 3:​14, 15).

¿Uan tejuan? ¿Keniuj uelis tikmatiskej akoni amo uelis iuan timouikaskej? Yekinika komo tikitaj ke aksa yekmelauj ‘amo tatakamattok’, ijkon kemej kijtoj Pablo. Yejua amo ininka tajtojtoya tokniuan akin kichiuaj seki taman tein tejuan tiknemiliaj ke amo kuali yetok sayoj ke amo kitapanauiliaj itanauatiluan Dios. Uan amo no ininka tajtojtoyaj akin kijtouaj oso kichiuaj teisa tein ika techyolkokouaj. Ta ininka tajtojtoya akin miakpa kinyolmajxitijkajya uan ipa amo kinekiaj tatakamatiskej.

Komo tikitaj ke se tokniuj amo kitakamattok itanauatiluan Dios, a tisejsemej uelis tikixtaliskej amo iuan tikchiuaskejok seki taman oso iuan timoixpetaniskejok. Komo tejuan tikixtalijkej ijkon tikchiuaskej, amo tikiniluiskej oksekin akin amo nemij tochan. Uan tiksentokaskej iuan timosentiliskej itech nechikolmej uan keman titanojnotsaj. Uan keman amo kichiuasok tein kichiujtoya, oksepa uelis kuali iuan timouikaskej.