JEHOVÁ techtayokolia miak taman, uan semi tiktasojkamatiliaj maj techkaua maj tejuan tikixtalikan keniuj timoyolpaktiskej ika nejon. Vino no se taman tein techmaka Jehová. Biblia kijtoua: “Tapalol uan vino mochijchiua para ika timoyolpaktiskej” (Ecl. 10:19; Sal. 104:15). Sayoj ke xa tikitanij ke sekin tel tayij uan no, noyampa taltikpak miakej kiitaj ke kuali yetok maj se teltayi uan oksekin kinemiliaj ke amo kuali yetok. ¿Toni techpaleuis maj tikmatikan ox titayiskej oso amo?

Keman tikixpejpenaskej ox titayiskej moneki tikelnamikiskej toni kiyolpaktia Dios, uan amo tein kinemiliaj kampa tinemij oso tein techmachtijkej keman timoskaltijkej. Nejin techpaleuis maj okachi tiyolpakikan.

Xa tikitanij ke miakej nochipa tayitokej uan tel miak tayij. Sekin tayij para kuali momachiliskej uan oksekin para kielkauaskej tein amo kuali tein kinpanotok. Uan itech seki xolalmej tayij para kinextiskej ke uejueykejya oso ke amo teyi kimouiliaj.

Sayoj ke Dios akin semi techtasojta techiluia toni moneki tikchiuaskej. Itech Biblia techiluia toni uelis techpanos komo titeltayij. Itech Proverbios 23:​29-35 ika tajtoua aksa akin tel tauana uan kijtoua nochi kuejmolmej tein kipia. a Daniel se tokniuj tayekankej akin kayot Europa kijtoua toni kichiuaya achto ke mochiuaskia itaixpantijkauj Jehová, yejua kijtoua: “Kemej niteltayia nikchiuak tein tel amo kuali, yejua ika semi nitajyouij uan hasta axkan nitayokoyaok keman nikelnamiki”.

¿Toni techpaleuis maj amo titeltayikan uan maj amo tikpiakan kuejmolmej? Moneki tikixpejpenaskej tein kiyolpaktia Dios.

Maj tikitakan toni kijtoua Biblia keman ika tajtoua tayil uan keyej miakej tayij.

Biblia kijtoua ke amo tajtakol komo amo semi titayij. Uan kijtoua ke uelis techyolpaktis keman titayiskej porin Eclesiastés 9:7 kijtoua: “Kualtsin xitamajseua uan xiyolpaki keman titayis movino”. Biblia kijtoua ke kemansa Jesús uan seki itekitikauan Jehová tayikej vino (Mat. 26:​27-29; Luc. 7:34; 1 Tim. 5:23).

Sayoj ke semi taman se kiyekos tayil uan se tauanas. Biblia kiyekijtoua: “Amo xitauantinemikan” (Efes. 5:18). No kijtoua ke “tauananij […] amo kalakiskej itech iTaixyekanalis Dios” (1 Cor. 6:10). Jehová kitauelita maj titeltayikan oso maj titauanakan. Tejuan amo tikchiuaj tein kichiuaj kampa tinemij, ta tikitaj toni kiyolpaktia Dios.

Sekin kijtouaj: “Nejua uelis niteltayis uan amo nimouintis”. Sayoj ke nejon amo kuali yetok. Biblia kijtoua ke akin tel tayij vino, takamej oso siuamej uelis semi tajtakolchiuaskej uan amo kuali mouikaskejok iuan Jehová (Tito 2:3; Prov. 20:1). Jesús tanejmachtij ke sekin amo nemiskej itech xochital porin ‘teltayij’ (Luc. 21:​34-36). Yejua ika, ¿toni uelis kichiuas se tokniuj para amo teltayis uan mokuejmolkalakis?

Komo titeltayij vino ijkon kemej kichiuaj kampa tikayomej uelis timokuejmolkalakiskej. Yejua ika, tejuan tikitaj toni kiyolpaktia Jehová keman titakuaj uan keman titatayij. Biblia kijtoua: “Ijkuak nantakuajtoskej,  nantatayitoskej oso nankichiujtoskej tein yeski, nochi xikchiuakan para nankiueyitaliskej Dios” (1 Cor. 10:31). Maj itech titanemilikan nejin netajtanilmej uan textos tein uelis techpaleuiskej.

¿Nitayi porin nikneki nikinyolpaktis oksekin? Éxodo 23:2 kijtoua: “Amo xikchiua tein amo kuali sayoj porin miakej ijkon kichiuaj”. Jehová kiniluijtoya israelitas itech nejin versículo maj amo kichiuanij tein amo kuali ijkon kemej oksekin kichiuayaj. Uan nejon tein kiniluij kisentoka techpaleuia. Komo peua tikchiuaj tein oksekin kichiuaj, xa amo tiktakamatiskejok Jehová uan amo iuan timouikaskejok (Rom. 12:2).

¿Nitayi para maj oksekin kiitakan ke amo teyi nikmouilia? Itech seki xolalmej, miakej kiitaj ke kuali yetok maj aksa nochipa tayito uan maj miak tayi (1 Ped. 4:3). Maj tikitakan tein kijtoua 1 Corintios 16:13 ke uelis tikchiuaskej, ompa kijtoua: “Xiijsatokan, xiksentokakan semi xitakuaujtamatikan, xiyolchikaujkej uan xichikaujkej”. Sayoj ke tayil amo kichiua maj aksa yolchikauak, ta kichiua maj aksa amo yektanemili uan maj amo kuali taixpejpena. Yejua ika keman aksa tel tayi, amo kinextia ke chikauak ta kinextia ke amo tamati. Isaías 28:7 kijtoua ke akin teltayij amo yeknejnemij uan uetsisnekij.

Komo tiknekij tikchiuaskej tein kuali, moneki maj Jehová techpaleui uan moneki tiixpetantoskej uan nochipa titakuaujtamatiskej (Sal. 18:32). Yejua ika moneki tikyekitaskej toni tikchiuaj uan amo tikchiuaskej tein Jehová amo kiyolpaktis. Yejua nejon kichiuak Jesús keman yetoya nikan taltikpak, yejua ika miakej kipoujkaitayaj porin katka yolchikauak uan nochipa kichiuaya tein kuali.

¿Nitayi para nikelkauas tein amo kuali tein nechpanotok? Akin kijkuiloj se salmo kiluij Jehová nejin: “Keman semi nimotekipachouaya, tejua tinechyolseuiaya uan tikchiuaya maj kuali nimomachili” (Sal. 94:19). Komo teisa mitsontekipachojtok amo xionteltayi, ta xikontajtani Jehová maj mitsonpaleui. Uan uelis ijkon tikonchiuas komo nochipa tikontataujtia. Miakej no kinpaleuiani kiluiskej se tokniuj akin kuali kitekitilijtok Jehová maj kinpaleui. Sayoj ke, keman aksa teltayi para kixikos tein kipanotok, amo  uelis kichiuas tein kuali nion kiixtopeuas tein amo kuali (Os. 4:11). Daniel akin achto ika titajtojkej, kijtoua: “Semi nimotekipachouaya uan nechyolkokouaya tein nikchiuak. Nitauanaya para amo ijkon nimomachilis, sayoj ke okachi nikpiaya kuejmolmej, kichiuak maj nimopinaujti uan maj amo kuali nimouikaok iniuan oksekin”. ¿Toni kipaleuij? Yejua kijtoua: “Nikitak ke nechpaleuiskia Jehová uan amo tayil. Jehová nechpaleuij maj nikmati toni nikchiuas uan maj nikyektali nokuejmoluan”. Maj tikelnamikikan ke Jehová nochipa techpaleuis maski tiknemiliskej ke amo uelis moyektalis se kuejmol (Filip. 4:​6, 7; 1 Ped. 5:7).

Komo kemansa tiontayi, uelis tionmotajtanis nejin. “¿Nechiluiani se nochankauj oso akin kuali iuan nimouika ke niteltayi?”. Nejon kinextiskia ke titeltayitokejya uan ke amo tikauajok. “¿Okachi nitayi ke achto?”. Nejon uelis kinextis ke maski ayamo titeltayij, satepan ijkon tikchiuaskej. “¿Fiero nikmati komo amo nitayi oso komo nikaua seki tonalmej?”. Nejon uelis kinextis ke timomatkejya uan ke amo ueli tikauajok. Komo ijkon, xa monekis maj se tapajtijkej techpaleui maj tikauakan tayil.

Kemej seki tokniuan amo kinekij mokuejmolkalakiskej, kiixtalianij amo tayiskej nion tepitsin. Sekin amo tayij porin amo kiueliliaj. Komo tikixmatij aksa akin ijkon kiixtaliani, maj tikpoujkaitakan uan maj amo tikijijtokan.

Oksekin kiixtalianij kanachi tayiskej. Xa kiixtalianij amo miak tayiskej oso xa amo nochipa tayiskej, ta sayoj tepitsin keman takuaskej oso sepa itech semana. Oksekin kiixtalianij katiyejua tayil tayiskej oso katiyejua amo. Sekin tayij tepitsin vino oso cerveza, sayoj ke amo tayij okseki tayil tein okachi niman teuintij tein maneliujtok ika okseki taman. Keman tikmatij kanachi titayiskej uan toni titayiskej amo tiktelpanoltiaj. Se tokniuj akin ijkon kiixtaliani uan ijkon kichiua amo moneki mopinaujmatis.

Sayoj ke no moneki tikitaskej toni kinemiliaj  oksekin. Romanos 14:21 kijtoua: “Okachi kuali amo xikua nakat, nion xitayi vino nion xikchiua teisa tein kichiuas maj amo yektakuaujtamatiok mokniuj”. Nejin kijtosneki ke moneki tikpoujkaitaskej tein oksekin kinemiliaj uan tikintasojtaskej. Komo tikitaj ke se tokniuj kikuejmoloua komo titayij, amo titayiskej iixpan. Ijkon tiknextiskej ke tikinpoujkaitaj, tikintasojtaj, uan ke amo sayoj tiktemouaj tein tejuan techpaleuis, ta no tein kinpaleuis oksekin (1 Cor. 10:24).

Uan no, tekiuaj uelis kiixtalis seki tanauatilmej para techiluis kemanian se tayis uan kemanian amo, uan akin tiktekitiliaj Jehová moneki tiktakamatiskej. Xa tekiuaj kiixtaliani maj amo tayikan akin pilimejok, akin kinejnemiltitij se carro oso akin kikuiskej okseki teposmej (Rom. 13:​1-5).

Jehová techkauani maj tejuan tikixtalikan keniuj tikuiskej miak taman tein techtayokoliani. Yejua ika tejuan tikmatij toni tikuaskej uan toni titayiskej. Maj nochipa kuali titaixpejpenakan para tiknextiliskej toTajtsin Dios akin nemi iluikak ke tiknekij tikyolpaktiskej.