1. ¿Toni moneki kichiuaskej tokniuan takamej para kuali kitekitiliskej Jehová?

 TATITANIL Pablo kinyolchikauak tokniuan akin nemiaj Corinto keman kiniluij: “Amo xitanemilikan kemej pipilkonemej, ta okachi kuali ximochiuakan kemej [...] akin moskaltijkejya” (1 Corintios 14:20). Nochin tokniuan takamej akin kinekij kichiuaskej kemej Jesús semi moneki maj kitakamatikan nejin. Uan para kichiuaskej, moneki kitakamatiskej itanauatiluan Dios uan nochipa kichiuaskej tein tayolmajxitia Biblia (Luc. 2:52). ¿Keyej semi moneki maj tokniuan okichpipil okachi kuali kitekitilikan Dios?

2, 3. ¿Keyej semi moneki maj tokniuan okichpipil kuali kitekitilikan Dios?

² Tokniuan takamej moneki kichiuaskej miak taman para kinpaleuiskej ininchankauan uan tokniuan itech nechikol. Komo tiokichipilok, xa tiknemiliani toni tekimej uelis tikchiuas amo uejkaua. Xa tikneki timochiuas precursor, tapaleuijkej itech nechikol uan satepan timochiuas tayekankej. Xa no tiknekis timonamiktis uan tikinpias konemej (Efes. 6:4; 1 Tim. 3:1). Para tikchiuas tein tikixtalijtok, moneki kuali tiktekitilis Dios. b

³ ¿Toni mitspaleuis okachi kuali xiktekitili Dios? ¿Onkak seki taman tein uelis timomachtis uan okachi kuali tikchiuas?  Uan, ¿toni uelis tikchiuas desde axkan para kuali mitskisas tekimej tein tikpias satepan? Maj tikitakan.

4. ¿Akonimej uelis mitsmachtiskej xikchiua tein kuali? (No xikita taixkopimej).

⁴ Xikita kemej akonimej tikneki timochiuas. Okichpipil uelis kichiuaskej kemej takamej akin ininka motajtoua itech Biblia. Yejuan semi kitasojtakej Dios uan kichiujkej tataman tekimej para kiyekpiaskej ixolal, uan tejua uelis tikitas tein kichiujkej. Xa mochankauan oso itech nechikol no moajsij tokniuan akin kuali kitekitilijtokej Dios uan uelis tikchiuas kemej yejuan (Heb. 13:7). No uelis tikchiuas kemej Jesús akin amo tajtakolej (1 Ped. 2:21). Keman tikitas tein kichiujkej yejuan, itech xitanemili nochi taman tein kuali tein kinextijkej (Heb. 12:1, 2). Satepan, xiknemili keniuj uelis tikchiuas kemej yejuan.

5. ¿Toni moneki tikchiuas para achto kuali tiknemilis tein tikchiuas uan keyej motelneki? (Salmo 119:9).

⁵ “Xikyekpia motamatilis uan motanemilil” (Prov. 3:21). Takamej akin kuali tanemiliaj amo niman kichiuaj teisa, ta achto kuali tanemiliaj para taixpejpenaskej. Yejua ika ximomachti ijkon tikchiuas uan nochipa xikchiua. ¿Keyej? Porin itech nejin tonalmej miakej telpochmej amo yektanemiliaj keman kiixpejpenaj kichiuaskej teisa (Prov. 7:7; 29:11). Uan no, televisión, internet uan redes sociales uelis kipatas tein tiknemilia uan tein tikchiua. Komo ijkon, ¿keniuj uelis timomachtis achto kuali tiknemilis tein tikchiuas? Yekinika, ximomachti itech Biblia keniuj tanemilia uan keniuj momachilia Jehová, uan keniuj mitspaleuis komo tikchiua tein yejuatsin kijtoua. Satepan, keman titaixpejpenas xikita tein timomachtijya para tikixpejpenas tein kiyolpaktia Jehová (xikixtajtolti Salmo 119:9). Komo achto kuali tiknemilia teisa, mitspaleuis okachi kuali xiktekitili Dios (Prov. 2:11, 12; Heb. 5:14). Axkan tikitatij keniuj komo achto kuali titanemilia mitspaleuis xikmati 1) keniuj timouikas iniuan tokniuan siuamej uan 2) kuali xiknemili toni timotalilis uan keniuj timochijchiuas.

6. ¿Keniuj se telpoch akin kuali tanemilia kinextis ke kinpoujkaita tokniuan siuamej?

 ⁶ Se takat akin tanemilia kemej Jehová kichiua, kinpoujkaita siuamej. Xa se tokniuj telpoch kiueuelita se ichpoch uan kineki kiixmatis, uan nejon kuali yetok. Sayoj ke se telpoch akin kuali tanemilia, amo kijtos, kijkuilos oso kichiuas teisa tein uelis kiajsikamatiltis tokniuj ichpoch ke kineki kiixmatis komo telpoch amo kinemilijtok iuan monamiktis (1 Tim. 5:1, 2). Oso komo peua okachi kiixmati se tokniuj siuat, kipaleuis maj amo kijijtokan yejua ika kiitas maj amo yetinemikan ininselti, ta iniuan aksa akin kuali kitekitilijtok Jehová (1 Cor. 6:18).

7. ¿Toni kiixpejpena motalilis uan keniuj moxiluia se tokniuj okichpil akin kuali tanemilia?

⁷ Se tokniuj telpoch no kinextia ke tanemilia kemej Jehová kichiua, keman kuali kiita toni motalilis uan keniuj mokuaxiluis. Miakej akin kichijchiuaj tasal uan akin motaliliaj para kinextiskej keniuj moita, amo kipoujkaitaj Jehová uan auilnemij. Yejua ika tasal kichijchiuaj maj tetilinti uan maj pepechiujto oso para maj takamej moitakan kemej siuamej. Yejua ika se tokniuj telpoch akin mochikaua kichiuas kemej Jesús ueli kinemilia toni kiyolpaktia Jehová uan kuali motasaltia kemej kichiuaj tokniuan itech nechikol. Uelis motajtanis: “¿Kinextia tein nikchiua ke kuali nitanemilia uan nechtekipachoua tein kinemiliaj oksekin? ¿Kinextia kemej nimotakentia ke niktekitilia Dios?” (1 Cor. 10:31-33; Tito 2:6). ToTajtsin Jehová uan tokniuan itech nechikol kipoujkaitaj telpoch akin kuali tanemilia.

8. ¿Keniuj se tokniuj okichpil uelis yeski takuaujtamach?

⁸ Xitakuaujtamach. Nejon kijtosneki kuali tikchiuas nochi tekit tein tikpia (Luc. 16:10). Itech xitanemili tein kichiuak Jesús uan tein uelis mitsmachtis. Yejua nochipa kuali tekitia uan kichiuak tekit tein kipiaya. Kichiuak nochi tein Jehová kinauatijka maski kemansa katka ouij. Kintasojtak oksekin uan okachiok imomachtijkauan uan motemakak ininka momikilis (Juan 13:1). Ximochikaua tikchiuas nochi taman tein mitsnauatiaj ijkon kemej Jesús. Komo amo tikmati keniuj tikchiuas teisa, xiyolyemanik uan xiktajtani se tokniuj maj mitspaleui. Amo xikchiua sayoj tein tiueli (Rom. 12:11). Xiktamichiua tein mitsnauatiaj ‘kemej yeskia tiktekitilijtoskia Jehová uan amo oksekin’ (Col. 3:23). Kemej titajtakolej, moneki tikajsimatis ke amo nochi ueli tikchiua uan tikijtos keman timopolos (Prov. 11:2).

9. ¿Keyej se tokniuj okichpil moneki momachtis kichiuas seki taman?

⁹ Para okachi kuali tiktekitilis Dios moneki timomachtis tikchiuas seki taman. Nejin mitspaleuis keman tikpias se tekit itech nechikol, ueli xikajsi se tekit uan xiksentoka  ompa xitekiti para timoixpanoltis oso tikinixpanoltis mochankauan, uan no mitspaleuis kuali ximouika iniuan oksekin. Maj tikitakan seki taman tein uelis tikchiuas.

10, 11. ¿Keyej tokniuj okichpil akin ueli taixtajtoltia uan kuali tajkuiloua kipaleuia yejua uan nechikol? (Salmo 1:1-3; no xikita taixkopin).

¹⁰ Ximomachti okachi kuali titaixtajtoltis uan titajkuilos. Biblia kijtoua ke takat akin mojmostaj kiixtajtoltia Biblia uan itech tanemilia, yolpaki uan kuali kisa tein kichiua (xikixtajtolti Salmo 1:1-3). Ijkon kuali kimati keniuj tanemilia Jehová, uan nejon kipaleuia maj kuali tanemili uan maj kichiua tein Biblia kijtoua (Prov. 1:3, 4). Takamej akin ijkon kichiuaj semi tapaleuiaj itech nechikol. ¿Keyej?

¹¹ Tokniuan takamej uan siuamej moneki maj kinmachtikan ika Biblia uan maj kinyolmajxitikan, uan nejin uelis kichiuaskej takamej akin kuali kitekitilijtokej Dios (Tito 1:9). Komo tiueli titaixtajtoltia uan kuali titajkuiloua, tikmatis keniuj titamachtis itech nechikol uan titanankilis kemej kinpaleuis oksekin uan kinyolchikauas. Uan no, keman timomachtis uan tikakis tanojnotsmej itech nechikolmej uan uejueyi nechikolmej, uelis tikijkuilos tein mitspaleuis okachi xitakuaujtamati uan mitspaleuis xikinyolchikaua tokniuan.

12. ¿Toni mitspaleuis xikmati keniuj tikinnojnotsas oksekin?

¹² Ximomachti keniuj kuali tikinnojnotsas oksekin. Nochin tokniuan moneki ijkon kichiuaskej. Nejin kijtosneki ke moneki kuali tikakis uan tikajsikamatis tein kinemiliaj uan kimachiliaj oksekin (Prov. 20:5). Uelis tikajsikamatis tein mitsiluijtok akin mitsnojnotsa komo tikaki keniuj mitsnojnotstok, keniuj kichiua iixko uan toni kijtoua. Nejin amo uelis tikchiuas komo amo tietok iniuan oksekin. Komo nochipa sayoj tikintajkuilouilia oso tikintitanilia correo, okachi ouij mitskisas titajtos iniuan keman tikinixitstos. Yejua ika, nochipa xiktemo keniuj uelis tikinnojnotsas oksekin keman tikinitstos (2 Juan 12).

13. ¿Toni no moneki kichiuas se tokniuj telpoch? (1 Timoteo 5:8; no xikita taixkopin).

¹³ Xikmati keniuj timoixpanoltis. Akin kuali kitekitilia Jehová kimati keniuj moixpanoltis uan keniuj kinixpanoltis ichankauan (xikixtajtolti 1 Timoteo 5:8). Itech seki altepemej, telpochmej ueli kimatij keniuj kichiuaskej se tekit porin inintatuan oso se ininchankauj kinmachtia, uan oksekin itech escuela kinmachtiaj maj uelikan kichiuakan se tekit. Nochi nejin mitspaleuis xikmati keniuj tikchiuas se tekit para ika timoixpanoltis (Hech. 18:2, 3;  20:34; Efes. 4:28). Xitekitikej uan ximatami tein tikpeualtia. Ijkon, oksekin kuali moka tajtoskej, amo ouij mitskisas xikajsi se tekit uan ompa tiksentokas titekitis. Nochi taman tein tikitakejya ke uelis tikchiuas, no mitspaleuis xikchiua okseki tekimej tein tikpias satepan. Maj tikitakan seki taman.

14. ¿Toni kipaleuis se tokniuj okichpil maj kitekitili Jehová miak tonalmej?

¹⁴ Uelis tiktekitilis Jehová miak tonalmej. Miakej tokniuan takamej akin axkan kuali kitekitilijtokej Dios, mochiujkej precursores keman katkajok okichpipil. Komo timochiua precursor, tikmatis keniuj titekitis iniuan miakej akin tatamamej uan no tikmatis tikuis motomin (Filip. 4:11-13). Xa mitspaleuis komo achto timochiua precursor auxiliar. Nejon kinpaleuiani miakej maj mochiuakan precursores regulares. Keman tikchiuasya nejon tekit mitspaleuis maj mitsmakakan okseki tekimej, xa satepan uelis titapaleuis maj mochijchiuakan kalmej kampa titaueyichiuaj oso xitekiti Betel.

15, 16. ¿Toni moneki kichiuas se tokniuj telpoch akin kineki mochiuas tapaleuijkej oso tayekankej?

¹⁵ Uelis timochiuas tapaleuijkej itech nechikol oso tayekankej. Nochin tokniuan takamej moneki motekitiliskej para mochiuaskej tayekananij itech nechikol. Biblia kijtoua ke tokniuj takat akin kineki kinpaleuis tokniuan itech nechikol “kineki kichiuas se kuali tekit” (1 Tim. 3:1). Para mochiuas tayekankej itech nechikol, achto moneki yeski tapaleuijkej. Tapaleuianij itech nechikol semi kinpaleuiaj tayekananij maj kinyekpiakan tokniuan. Tayekananij uan tapaleuianij semi yolyemankej uan yolpakij keman tanojnotsaj. Se telpoch uelis mochiuas tapaleuijkej maski kipias 17 xiujmej oso 19. Uan se tokniuj tapaleuijkej akin tel kuali tekititok uelis mochiuas tayekankej tepitsin satepan ke kiajxitis 20 xiujmej.

¹⁶ ¿Toni moneki tikchiuas para titekitis kemej tapaleuijkej uan satepan kemej tayekankej? Moneki tiktasojtas Jehová, mochankauan uan tokniuan itech nechikol uan ijkon uelis tikchiuas tein Biblia tajtani para titekitis kemej tapaleuijkej oso tayekankej (1 Tim. 3:1-13; Tito 1:6-9; 1 Ped. 5:2, 3). Ximochikaua tikajsikamatis nochi tein moneki tikchiuas uan xiktataujti Jehová maj mitspaleui ijkon xikchiua. c

17. ¿Toni kipaleuis se tokniuj telpoch maj mochiua se kuali tetakauj uan maj kuali kinixyekana ichankauan? (No xikita taixkopin).

¹⁷ Ueliskia timonamiktis uan tikinixyekanas  mochankauan. Jesús kijtoj ke seki takamej akin kuali kitekitilijtokej Dios kiixtalijkej amo monamiktiskej (Mat. 19:12). Sayoj ke komo timonamiktia, moneki tikchiuas tein kichiua se tetakauj uan tikinixyekanas mochankauan (1 Cor. 11:3). Jehová kineki maj takat kitasojta isiuatsin, maj kiita toni kipoloua, maj mochiua kuali itasojikniuj uan maj kipaleui maj kisentoka kuali mouika iuan Jehová (Efes. 5:28, 29). Itech nejin tamachtilis tikitakejya toni moneki tiknextis uan tikchiuas, kemej tikinpoujkaitas tokniuan siuamej, yeski titakuaujtamach uan achto kuali tiknemilis tein tikchiuas. Nochi nejin mitspaleuis satepan para timochiuas se kuali tetakauj uan kuali tikinixyekanas mochankauan.

18. ¿Toni uelis kichiuas se telpoch para satepan mochiuas se kuali tepopaj?

¹⁸ Ueliskia tikinpias mokoneuan. Komo timonamiktia, xa tejua uan mosiuatsin uelis nankinpiaskej konemej. Tein Jehová kichiuani uelis mitspaleuis xikmati keniuj uelis timochiuas se kuali tepopaj (Efes. 6:4). Jehová kiluij ikonetsin Jesús ke kitasojtaya uan kiyolpaktiaya (Mat. 3:17). Komo tikinpia mokoneuan moneki nochipa tikinnextilis ke tikintasojta uan tikiniluis keman teisa kuali kichiuaj. Tetatmej akin kichiuaj kemej Jehová kinpaleuiaj ininkoneuan maj kuali kitekitilikan yejuatsin. ¿Toni uelis tikchiuas desde axkan para timochiuas se kuali tepopaj? Xikintasojta uan xikinyekpia mochankauan uan tokniuan itech nechikol, uan no xikinilui ke tikintasojta uan tikinpatiuita (Juan 15:9). Nejin amo sayoj mitspaleuis keman timonamiktis uan keman tikinpias mokoneuan, ta desde axkanya mitspaleuis maj Jehová, mochankauan uan tokniuan itech nechikol semi mitspatiuitakan.

19, 20. ¿Toni moneki kichiuas se tokniuj okichpil para okachi kuali kitekitilis Jehová? (Xikita taixkopimej ipeujyan amaix).

¹⁹ Komo tiokichpilok, xikelnamiki ke moneki timochikauas para uelis tikchiuas kemej Jesús. Moneki tikchiuas kemej sekin akin kuali kitekitiliaj Dios, achto kuali tiknemilis tein tikchiuas, yeski titakuaujtamach, uan timomachtis seki taman tein mitspaleuis satepan.

²⁰ Keman tiknemilis nochi tein moneki tikchiuas, xa timoluis ke semi ouij. Sayoj ke amo ximosenkaua porin kemaj uelis tikchiuas. Amo xikelkaua ke Jehová kineki mitspaleuis (Is. 41:10, 13). Uan tokniuan itech nechikol no mitspaleuiskej. Keman okachi kuali tiktekitilisya Jehová kemej yejuatsin kineki, kuali tinemis uan tiyolpakis. Semi timitstasojtaj uan tiknekij maj Jehová kisentoka mitstatiochiui porin timochikaujtok okachi kuali tiktekitilis (Prov. 22:4).