1. ¿Toni moneki tikchiuaskej para okachi kuali tiktekitiliskej Jehová?

 ¿MELAUJ ke se kimojkaita keniuj konemej niman moskaltiaj? Moita ke yejuan amo moneki kichiuaskej teisa para moskaltiskej. Sayoj ke tejuan moneki tikchiuaskej teisa komo tiknekij tikchiuaskej kemej Jesús (1 Cor. 13:11; Heb. 6:1). b Para okachi kuali tiktekitiliskej Jehová moneki kuali iuan timouikaskej. No moneki maj techpaleui ichikaualis para tiknextiskej tein kuali, titekitiskej uan timomachtiskej seki taman tein techpaleuis satepan (Prov. 1:5).

2. ¿Toni techmachtia tein kijtoua Génesis 1:27? ¿Uan toni tikitaskej itech nejin tamachtilis?

² Jehová kichijchiuak takat uan siuat (xikonixtajtolti Génesis 1:27). Takat uan siuat tataman kemej chijchiujtokej, sayoj ke no tatamamej itech okseki taman. Jehová kinmakani takamej uan siuamej tataman tekimej, uan para kichiuaskej moneki ueliskej seki taman uan kinextiskej tein kuali (Gén. 2:18). Itech nejin tamachtilis tikitaskej toni moneki kichiuaskej siuapipil para okachi kuali kitekitiliskej Jehová. Uan itech okse tamachtilis tikitaskej tein uelis kichiuaskej okichpipil.

3, 4. ¿Toni moneki kichiuaskej siuapipil para kimatiskej keniuj kichiuaskej tein kuali? (No xikita taixkopimej).

³ Biblia ininka tajtoua siuamej akin kitekitilijkej Jehová uan kitasojtakej. Kemej kijtoua texto tein ika tajtoua nejin  tamachtilis, ‘kuali kiixejekojkej nochi tein kichiujkej uan kinextijkej ke takuaujtamatiaj iuan Dios itech nochi tein kichiuayaj’. Uan xa itech monechikol no yetokej siuamej akin kuali kitekitiliaj Jehová uan yejuan uelis mitsmachtiskej miak taman tein kuali.

⁴ Komo tisiuapilok ininka xitanemili seki tokniuan siuamej akin uelis mitsmachtiskej tein kuali uan xikixtali tikchiuas kemej yejuan. Yejua ika, xikita tein kuali tein kinextiaj uan xiknemili keniuj no ijkon tikchiuas. Itech párrafos tein tikitaskej ika titajtoskej eyi taman tein tokniuan siuamej moneki kinextiskej.

5. ¿Keyej amo moneki moueyinekiskej tokniuan siuamej akin kuali kitekitilijtokej Dios?

⁵ Amo moueyinekij. Siuat akin amo moueyineki, kuali mouika iuan Jehová uan iniuan oksekin (Sant. 4:6). Jehová kiixtalij akoni kinixyekanas tokniuan itech nechikol uan akoni taixyekanas kalijtik. Yejua ika, siuat akin amo moueyineki uan kitasojta Jehová kiixtalia kitakamatis nejon (1 Cor. 11:3). c

6. ¿Keniuj siuapipil uelis kichiuaskej kemej Rebeca?

⁶ Maj ika titajtokan Rebeca. Yejua katka semi tamatkej uan yolchikauak, kimatia kemanian kichiuas teisa uan keniuj kichiuas (Gén. 24:58; 27:5-17). Sayoj ke no tapoujkaitaya uan tatakamatia (Gén. 24:17, 18, 65). Komo amo no timoueyineki kemej Rebeca uan tikinpaleuia akin Dios kinixtalij maj techixyekanakan, mochankauan uan tokniuan itech nechikol kinpaleuis tein tikchiua.

7. ¿Keniuj siuapipil uelis kichiuaskej kemej Ester?

⁷ Kiajsikamatij ke amo nochi ueli kichiuaj. Biblia kijtoua ke akin amo moueyinekij oso “kiajsikamatij ke amo nochi ueli kichiuaj” kinextiaj ke tamattokej (Prov. 11:2). Ester akin kuali kitekitiliaya Dios, kiajsikamatia ke amo nochi uelia  kichiuaya. Keman Ester kiixtalijkej kemej tekiuaj amo moueyinekik. Uan no, kikakia uan kichiuaya tein kiyolmajxitiaya iprimo Mardoqueo (Est. 2:10, 20, 22). No uelis tikchiuas kemej yejua keman tikiniluis oksekin maj mitsyolmajxitikan uan tikchiuas tein mitsiluiaj (Tito 2:3-5).

8. ¿Keniuj tokniuan siuamej uelis kichiuaskej tein kijtoua 1 Timoteo 2:9, 10 keman kiitaskej toni motaliliskej?

⁸ Maj tikitakan keniuj Ester no kinextij ke amo moueyinekia. Ester kualtsin kemej moitaya “uan kuakualtsin katka”, sayoj ke amo ika moueyinekik (Est. 2:7, 15). ¿Keniuj uelis tikchiuas kemej yejua? Uelis tikchiuas tein kijtoua 1 Timoteo 2:9, 10 (xikixtajtolti). Nikan tatitanil Pablo kiniluia tokniuan siuamej ke moneki kuali kiitaskej toni tasal motaliliskej. Tajtol griego tein Pablo kikuik, kinextia ke tokniuan siuamej moneki kuali kiitaskej toni motaliliskej uan kinemiliskej keniuj kinitaskej oksekin. ¡Semi tamechpatiuitaj tokniuan siuamej akin kuali nankiitaj toni tasal namotaliliskej!

9. ¿Toni techmachtia tein kichiuak Abigaíl?

⁹ Kuali taixejekouaj. Keman aksa kuali taixejekoua kimati toni kuali yetok uan toni amo, uan kiixtalia kichiuas tein kuali yetok. Maj tikitakan tein kichiuak Abigaíl. Itakauj kichiuak tein amo kuali uan Abigaíl kiajsikamatik ke nejon kintajyouiltiskiaj akin nemiaj ichan. Yejua niman kitemoj keniuj kinpaleuis, uan kemej kuali taixejekoj kimatik toni kichiuas para kinmakixtis miakej (1 Sam. 25:14-23, 32-35). Komo kuali titaixejekouaj no techpaleuis maj tikmatikan kemanian titajtoskej uan kemanian amo. No techpaleuis maj ininka timotekipachokan oksekin, sayoj ke amo tikintajtaniskej teisa tein ika mopinaujmatiskej (1 Tes. 4:11).

10, 11. ¿Keniuj mitspaleuis komo kuali titaixtajtoltia uan kuali titajkuiloua? (No xikita taixkopin).

¹⁰ Semi tapaleuia komo tokniuan siuamej ueli kichiuaj seki taman. Tein timomachtis tikchiuas keman tisiuapilok uelis nochipa mitspaleuis. Maj tikitakan seki taman.

¹¹ Ximomachti okachi kuali titaixtajtoltis uan titajkuilos. Itech seki xolalmej kinemiliaj ke amo semi moneki maj siuamej uelikan taixtajtoltikan uan maj tajkuilokan. Sayoj ke tinochin akin tiktekitiliaj Jehová moneki maj tiuelikan titaixtajtoltikan uan titajkuilokan (1 Tim. 4:13). d Yejua ika xiksentoka ximomachti kuali titaixtajtoltis uan titajkuilos. ¿Keniuj mitspaleuis? Uelis tikajsis tekit para timoixpanoltis. No uelis  okachi kuali timomachtis Biblia uan tikinmachtis oksekin. Sayoj ke okachi mitspaleuis porin uelis tikixtajtoltis Biblia uan itech titanemilis, uan nejon kichiuas okachi kuali ximouika iuan Jehová (Jos. 1:8; 1 Tim. 4:15).

12. ¿Toni mitsmachtia tein kijtoua Proverbios 31:26?

¹² Ximomachti keniuj kuali tikinnojnotsas oksekin. Nochin tokniuan moneki ijkon kichiuaskej. Tatitanil Santiago techiluia maj tikchiuakan nejin: “Moneki niman nantekakiskej, amo niman nantajtoskej” (Sant. 1:19). Keman kuali tikakij aksa akin technojnotstok tiknextiliaj ke tikajsikamatij (1 Ped. 3:8). Komo amo tikyekajsikamati tein mitsiluijtok oso keniuj momachilia, xiktajtani seki taman tein mitspaleuis xikajsikamati, uan achto kuali xiknemili toni tikiluis (Prov. 15:28, nota). Ximotajtani ox yekmelauj tein tikijtoti, ox teyolchikaua, ox kinextia ke titapoujkaita, uan ox titeiknelia. Ininka xitanemili tokniuan siuamej akin kuali tekakij uan kuali tenojnotsaj uan xikchiua kemej yejuan (xikixtajtolti Proverbios 31:26). Kuali xikaki tein kijtouaj uan kemej tajtouaj. Keman tikchiuas nejin, tikitas ke amo ouij mitskisas timouikas iniuan oksekin uan tiyolseujkanemis.

13. ¿Toni uelis mitspaleuis xikchiua seki tekimej kalijtik? (No xikita taixkopin).

¹³ Xikchiua seki tekimej mochan. Miakkan, yejuan siuamej akin okachi tekitij kalijtik. Xa momaj oso okse tokniuj siuat akin kuali kitekitilijtok Jehová uelis mitsmachtiskej keniuj tikchiuas. Se tokniuj siuat akin monotsa Cindy, kijtoua: “Nomaj nechnextilij ke komo semi nitekiti, nechyolpaktis tein nikchiuas. Nimomachtij nitakualchiuas, nitachipauas, nitajtsomas uan nitakouas, nochin nejin nechpaleuij maj amo semi nitajyoui uan maj okachi niktekitili Jehová. Nomaj no nechmachtij maj kuali nikinseli tokniuan, yejua ika, nikinixmatik miakej akin nechmachtijkej miak taman” (Prov. 31:15, 21, 22). Siuamej akin kuali teseliaj, tekitij, uan ueli kichiuaj seki tekimej kalijtik, semi tapaleuiaj maj ininchankauan uan tokniuan itech nechikol yolpakikan (Prov. 31:13, 17, 27; Hech. 16:15).

14. ¿Toni uelis mitsmachtis tein kijtoua Crystal, uan toni uelis itech titanemilis?

¹⁴ Xikmati keniuj timoixpanoltis. Nochin tokniuan moneki kimatiskej keniuj moixpanoltiskej ininselti uan maj yolpakikan ika tein kipiaj (Filip. 4:11). Se tokniuj siuat akin monotsa Crystal, kijtoua: “Keman katka nisiuapil uan nimomachtijtoya, notatuan nechyolchikaujkej maj nimomachti teisa tein ueliskia ika nitekitis satepan. Nopaj nechiluij maj nikseli se tamachtilis para nikmatis keniuj nikuis uan niktekitiltis tomin, nejon semi nechpaleuij”. Amo sayoj moneki tiktaniskej tomin, ta no  moneki tikmatiskej keniuj kuali tikuiskej para amo niman tiktamiskej (Prov. 31:16, 18). Komo tiyolpaki ika tein tikpia uan amo tikoua tein amo uelis tikixtauas, mitspaleuis okachi xiktekitili Jehová (1 Tim. 6:8).

15, 16. ¿Keyej semi tikinpatiuitaj tokniuan siuamej akin ininselti? (Marcos 10:29, 30).

¹⁵ Komo timomachtia keniuj tikchiuas seki tekimej uan tikchiua tein kiyolpaktia Jehová mitspaleuis satepan. Maj tikitakan seki taman tein uelis tikchiuas.

¹⁶ Ueliskia tikixtalis ayamo timonamiktis. Ijkon kemej kijtoj Jesús, sekin xa kiixpejpenaj amo monamiktiskej maski kampa nemij kinteliluiaj maj monamiktikan (Mat. 19:10-12). Uan no, onkak miak taman tein kichiua maj oksekin amo monamiktikan. Komo amo tikpia motakatsin amo xiknemili ke Jehová uan Jesús amo semi mitspatiuitaj. Itech nochi taltikpak, tokniuan siuamej akin ininselti semi tapaleuiaj itech nechikol. Kemej semi kintasojtaj uan ininka motekipachouaj oksekin, tokniuan kinitaj kemej ininikniuan uan kemej ininnan (xikixtajtolti Marcos 10:29, 30; 1 Tim. 5:2).

17. ¿Toni kinpaleuis siuapipil maj uelikan kitekitilikan Jehová miak tonalmej?

¹⁷ Uelis tiktekitilis Jehová miak tonalmej. Itech nochi taltikpak yejuan tokniuan siuamej akin okachi tanojnotsaj (Sal. 68:11). ¿Uelisya tikixtalis tiktekitilis Jehová miak tonalmej? Xa uelis timochiuas precursora, titapaleuis maj mochijchiuakan kalmej kampa titaueyichiuaj oso titapaleuis Betel. ¿Toni mitspaleuis xikchiua tein tikixtalij? Xiktataujti Jehová, xitajto iniuan akin kichiujtokejya nejon tekit, uan xitajtani toni moneki para uelis tikchiuas nejon tekit. Ompa xikijkuilo keniuj tikchiuas tein tikixtalijtok uan ijkon xikchiua. Komo tiktekitilia Jehová miak tonalmej, uelis tikchiuas miak taman tein mitsyolpaktis keman tiktekitilis yejuatsin.

18. ¿Keyej tokniuj siuat moneki kuali kiixpejpenas akoni iuan monamiktis? (No xikita taixkopin).

¹⁸ Ueliskia timonamiktis. Seki taman tein tikitakejya ke uelis tiknextis uan tikchiuas, mitspaleuis xikmati keniuj tikpaleuis motakatsin keman timonamiktis. Komo tikneki timonamiktis, moneki kuali tikixpejpenas akoni iuan. Nejin se taman tein moneki kuali tikixpejpenas ox tikchiuas oso amo, porin takat akin iuan timonamiktis  yejua mitsixyekanas (Rom. 7:2; Efes. 5:23, 33). Yejua ika ximotajtani: “¿Mochikaujtok tanemilis uan kichiuas kemej Jesús? ¿Mochikaua nochipa kitekitilis Jehová? ¿Kuali taixpejpena? ¿Kijtoua keman mopoloua? ¿Kinpoujkaita siuamej? ¿Nechpaleuis maj kuali nimouika iuan Jehová, nechtekipanos uan yeski kuali notasojikniuj? ¿Kuali kichiua tekit tein kipia? ¿Toni tekimej kipia itech nechikol, uan kuali kichiujtok?” (Luc. 16:10; 1 Tim. 5:8). Uan komo tikneki tikajsis se takat akin mitspaleuis, desde achtook no moneki timomachtis para uelis tikpaleuis.

19. ¿Keyej siuat akin monamiktia yolpaki maj Biblia kijto ke ‘kipaleuia’ itakauj?

¹⁹ Biblia kijtoua ke se kuali tesiuatsin ‘kipaleuia’ itakatsin (Gén. 2:18). ¿Kijtosneki nejin ke siuat amo kipia ipatiuj? Amo, ta tein kichiua para kipaleuis itakatsin semi kipia ipatiuj. Tein melauj hasta Biblia kemansa no kijtoua ke Jehová ‘techpaleuia’ (Éx. 18:4; Heb. 13:6). Siuat semi kipaleuia itakauj para maj kuali kisa tein yejua kiixpejpena para ichankauan. Uan kemej semi kitasojta Jehová kipaleuia itakatsin para maj kuali ika tajtokan (Prov. 31:11, 12; 1 Tim. 3:11). Komo tikneki timonamiktis, moneki timochikauas okachi tiktasojtas Jehová uan desde axkanya xikinpaleui mochankauan uan tokniuan itech nechikol.

20. ¿Keniuj temomaj uelis tapaleuis maj yolpakikan ichankauan?

²⁰ Ueliskia tikinpias mokoneuan. Komo timonamiktia, xa tejua uan motakatsin nankinpiaskej konemej (Sal. 127:3). Yejua ika semi moneki xiknemili keniuj kuali tikiniskaltis. Seki taman tein tikitakejya ke uelis tiknextis uan tikchiuas semi mitspaleuis. Komo titetasojta, tiyolkuali uan amo tiyolijsiui, titapaleuis maj mochankauan yolpakikan uan mokoneuan kimachiliskej ke tikinyekpia uan tikintasojta (Prov. 24:3).

21. ¿Keyej semi tikontasojta tokniuan siuamej? (Xikonita taixkopimej ipeujyan amaix).

²¹ Tokniuan siuapipil, semi tamechtasojtaj porin nankitekitiliaj Jehová uan nankipaleuiaj ixolal (Heb. 6:10). Semi namochikauaj nankinextiskej tein kuali uan nankichiuaj miak taman tein namechpaleuia xiyolpakikan namejuan uan oksekin. No namomachtiaj tein namechpaleuis satepan. ¡Semi tamechtasojtaj itech inechikol Jehová porin semi nantapaleuiaj!