1. ¿Keyej Abrahán uelia kisentokaya kichiaya maj yolini se ikonetsin?

 JEHOVÁ motenkauak iuan itasojikniuj Abrahán ke inintechkopa ikoneuan, kintatiochiuiskia akin nemij itech nochi altepemej (Gén. 15:5; 22:18). Kemej Abrahán semi takuaujtamatia iuan Jehová, senkis kimatia ke mochiuaskia tein motenkaujka. Sayoj ke keman Abrahán kipiaya 100 xiujmej uan isiuatsin 90, ayamo kipiayaj nion se konetsin (Gén. 21:1-7). Biblia kijtoua ke Abrahán “kichiaya uan takuaujtamatia ke yeskia ininuejkaujtat akin nemiskej itech miak altepemej, maski nejin moitaya ke amo ueliskia mochiuas. Yejua kineltokak tein kiluijkaj” (Rom. 4:18). Uan kemej tikmatij, mochiuak tein kichiaya: Abrahán mochiuako ipopaj de Isaac, konetsin akin kichiak miak xiujmej. ¿Keyej Abrahán kimatia ke Jehová kichiuaskia tein motenkaujka?

2. ¿Keyej Abrahán senkis kineltokaya ke Jehová kichiuaskia tein motenkaujka?

² Kemej Abrahán kuali kiixmatia Jehová, “senkis kineltokaya” ke kichiuaskia tein motenkaujka (Rom. 4:21). Abrahán semi takuaujtamatia, yejua ika kiyolpaktij Jehová uan kiitak ke katka yolmelauak (Sant. 2:23). Kemej kijtoua Romanos 4:18, Abrahán takuaujtamatia uan kichiaya maj mochiua tein Jehová motenkaujka. Maj tikitakan tein kijtoj tatitanil Pablo itech Romanos capítulo 5 keman ika tajtoj tein tikchiaj.

3. ¿Toni kimelauak Pablo keman ika tajtoj tein tikchiaj?

³ Pablo kijtoj keyej uelis senkis tikneltokaskej “ke mochiuas  tein tikchiaj” (Rom. 5:5). Tein kijtoj no techpaleuia maj tikajsikamatikan keniuj uelis okachi tikneltokaskej ke yekmelauj mochiuas. Keman tikitstiaskej Romanos 5:1-5, xikonnemili keniuj axkan okachi tiontakuaujtamati ke yekmelauj mochiuas tein tikonchia. Nejin tamachtilis no mitsonnextilis toni uelis tikonchiuas para okachi tiontakuaujtamatis. Yekinika tikitaskej toni tein kualtsin tikchiaj tein Pablo kijtoj ke yekmelauj mochiuas.

4. ¿Toni ika tajtoua Romanos 5:1, 2?

⁴ (Xikonixtajtolti Romanos 5:1, 2). Pablo kinijkuilouilij nejin versículos tokniuan itech nechikol ompa Roma. Yejuan kimatiajya akoni katka Jehová uan Jesús, kinextijkajya ke takuaujtamatij uan mochiujkajya tokniuan. Yejua ika Dios kinitak ke katkaj ‘yolmelaujkej porin takuaujtamatiaj’ uan kinixpejpenak ika ichikaualis. Desde ijkuakya peuak kichiaj maj mochiua se taman tein kualtsin uan senkis takuaujtamatiaj ke mochiuaskia.

5. ¿Toni kichiaj tokniuan taixpejpenalmej?

⁵ Satepan, Pablo ika kinnojnotsak tokniuan taixpejpenalmej de Éfeso tein Jehová kijtojka ke ueliskia kichiaskej. Pablo kinmelauilij ke kiseliskiaj “uejueyi tatiochiualismej tein [Dios] motenkauak kinmakas akin moinxelouilij” (Efes. 1:18). Uan Pablo no kiniluij tokniuan de Colosas kani kiseliskiaj nejon tatiochiualismej tein kichiayaj. Kiniluij: “Dios namechmakas ne iluikak” (Col. 1:4, 5). Yejua ika, tokniuan taixpejpenalmej kichiaj nemitiuij nochipaya ompa iluikak kampa iuan taixyekanaskej Cristo (1 Tes. 4:13-17; Apoc. 20:6).

6. ¿Toni kijtoj se tokniuj taixpejpenal keman ika tajtoj tein kichia?

⁶ Tokniuan taixpejpenalmej semi kipatiuitaj tein kichiaj. Itech xiuit 1991 tokniuj Frederick Franz, kijtoj: “Tein tikchiaj yekmelauj mochiuas uan tisejsemej akin tipouij iniuan 144 mil tikseliskej tein  Dios motenkaua, uan yeski okachi kuali ke tein tiknemiliaj”. ¿Keniuj momachiliaya satepan ke miak xiujmej kitekitilij Jehová? Franz kijtoj: “Tiksentokaj tiktelpatiuitaj tein tikchiaj. Uan ijkon kemej panotiuj tiempo, [...] okachi tiktasojkamatiliaj Dios. Tiknekij tiksentokaskej tikchiaskej tein tikseliskej maski amo tikmatij hasta kemanian. Axkan okachi nikpatiuita tein tikchiaj ke achto”.

7, 8. ¿Toni kichiaj kiseliskej miakej itekitikauan Dios? (Romanos 8:20, 21).

⁷ Miakej akin kitekitiliaj Jehová itech nejin tonalmej, kichiaj kiseliskej okse taman. ¿Toni nejon? Tein kichiaya kiselis Abrahán: nemiskej nochipaya nikan taltikpak kampa Dios taixyekantos (Heb. 11:8-10, 13). Pablo no kijtoj keniuj yeski keman mochiuas tein tikchiaj (xikonixtajtolti Romanos 8:20, 21). Keman tionmomachtij tein Biblia kijtoua ke mochiuas, ¿toni okachi tikonuelitak? ¿Tikonuelkakik keman tikonmatik ke amo keman tionmomikilis, ke amo keman tionkokolispeuasok oso ke amo keman tionmochiuas tionxiuejya? ¿Tikonuelkakik keman tikonkakik ke itech xochital oksepa nemis akin tikontasojta? Dios techiluia ke uelis tikchiaskej tein kuali, yejua ika tejuatsin uelis tikonselis miak taman tein kualtsin.

⁸ Tinochin tikchiaj teisa tein techyolpaktia. Xa tikchiaj tinemiskej nikan taltikpak oso ne iluikak, uan uelis okachi tikneltokaskej ke yekmelauj mochiuas nejon tein tikchiaj. Tein Pablo kijkuiloj satepan, kimelaua keniuj uelis okachi titakuaujtamatiskej. Maj tikitakan keniuj itajtoluan techpaleuiaj maj okachi tikneltokakan ke mochiuas tein tikchiaj.

9, 10. Ijkon kemej Pablo kipanok, ¿toni tikmatij ke techpanos? (Romanos 5:3; no xikonita taixkopimej).

⁹ (Xikonixtajtolti Romanos 5:3). Pablo kijtoj ke keman titajyouiaj, techpaleuia maj okachi titakuaujtamatikan ke  mochiuas tein tikchiaj. Sayoj ke xa timotajtaniskej keyej kijtoj nejon. Tejuan tikmatij ke tinochin akin tiktekitiliaj Jehová tikpiaskej ouijkayomej. Maj itech titanemilikan tein Pablo kiniluij tokniuan de Tesalónica: “Keman namouan tietoyaj, miakpa tamechiluiayaj ke tikixnamikiskiaj ouijkayomej, uan kemej nankimatij, ijkon mochiuani” (1 Tes. 3:4). Uan tokniuan de Corinto kinijkuilouilij: “Tiknekij xikmatikan kuejmolmej tein tikpiakej [...] amo tikmatiaj ox timakisaskiaj” (2 Cor. 1:8; 11:23-27).

¹⁰ Akin tiktekitiliaj Jehová tikmatij ke no titajyouiskej (2 Tim. 3:12). ¿Akonimej mitsonixnamikij porin peuak tiontakuaujtamati iuan Jesús uan tikonchiua kemej yejua? Xa mochankauan oso motasojikniuan mitsonkejkelouaj oso mitsonchiuiliaj tein amo kuali. ¿Mitsonixnamiki akin tikontekitilia oso akin iuan tiontekiti porin amo keman tiontakajkayaua? (Heb. 13:18). ¿Mitsonixnamiki tekiuaj porin tikoniluia oksekin tein Dios kichiuati? Maski tikpiaskej tein yeski ouijkayot, Pablo kijtoua ke moneki tiyolpakiskej. ¿Keyej?

11. ¿Keyej moneki tikixtaliskej titaxikoskej?

¹¹ Tiyolpakij keman titajyouiaj porin tikmatij ke nejon techpaleuia maj tikchiuakan se taman tein motelneki. Romanos 5:3 kijtoua: “Keman titajyouiaj techpaleuia maj titaxikokan”. Kemej tinochin akin tiktekitiliaj Dios tikpiaj ouijkayomej moneki tikixtaliskej titaxikoskej. Jehová techtatiochiuis kemej motenkaua sayoj komo titaxikouaj uan tiksentokaj tiktekitiliaj. Amo tiknekij timochiuaskej kemej xinach tein uetsi tepani tein ika tajtojtoya Jesús. Akin tamati kemej nejon xinach, yolpaki keman kikaki “itajtol Dios”, sayoj ke “keman kipia ouijkayomej oso kitajyouiltiaj” nimantsin kikaua (Mat. 13:5, 6, 20, 21). Amo tiknekij maj techtajyouiltikan oso tikpiaskej ouijkayomej, sayoj ke komo titaxikouaj techpaleuia itech seki taman. Maj tikitakan keniuj.

12. ¿Keniuj techpaleuia komo titaxikouaj?

¹² Tatitanil Santiago kijtoj keniuj tapaleuia komo titaxikouaj. Kijkuiloj: “Moneki nantaxikoskej itech nochi, uan ijkon amo teyi namechpolos uan nochi kuali nankichiuaskej” (Sant. 1:2-4). Yejua ika keman titaxikouaj ueli mochiua teisa. ¿Toni? Techpaleuia maj amo tiyolijsiuikan, maj okachi titakuaujtamatikan iuan Jehová uan maj tikneltokakan tein techiluia. Keman titaxikouaj, no techpaleuia maj tikchiuakan okse taman.

13, 14. ¿Toni panoua keman titaxikouaj, uan keniuj nejon techpaleuia maj tikchiakan tein kuali? (Romanos 5:4).

¹³ (Xikonixtajtolti Romanos 5:4). Pablo kijtoj ke “keman titaxikouaj techpaleuia maj tikyolpaktikan Dios”. Nejon amo kijtosneki ke Jehová yolpaki keman titajyouiaj, ta yolpaki keman titaxikouaj. ¿Melauj ke semi techyolchikaua tikmatiskej ke keman titaxikouaj tikyolpaktiaj Jehová? (Sal. 5:12).

¹⁴ Xikonelnamiki ke Abrahán kipiak ouijkayomej. Keman taxikoj uan amo kikauak Jehová, yejuatsin yolpakik, kiitak kemej itasojikniuj uan ke yolmelauak katka (Gén. 15:6; Rom. 4:13, 22). No ijkon panoua tejuan touan. Ueli tikyolpaktiaj Dios amo porin tikpiaj se tekit itech inechikol oso porin tiktekitiliaj, ta porin titaxikouaj maski titajyouiaj. Uan tinochin uelis tikyolpaktiskej Dios maski tataman xiuit tikpiaj, tataman tein tikpanotokej oso tein ueli tikchiuaj. ¿Tikonpanotok se ouijkayot uan amo tikonkaua Jehová? Komo amo tikonkaua, xikonelnamiki  ke tikonyolpaktijtok yejuatsin. Keman tikmatij ke yolpaki, techpaleuia maj tiksentokakan okachi titakuaujtamatikan ke mochiuas tein tikchiaj.

15. ¿Toni kijtoj Pablo itech Romanos 5:4, 5, uan toni xa timotajtaniskej?

¹⁵ Kemej tikitakejya, Pablo kijtoj ke uelis tikyolpaktiskej Jehová komo titaxikouaj. Maj tikitakan keniuj kisentokak kimelauak: “Keman tikyolpaktiaj Dios, tikchiaj tein kuali, uan tikyekmatij ke mochiuas tein tikchiaj” (Rom. 5:4, 5). Tepitsin achto, Pablo ipa kijtojkaya itech Romanos 5:2 ke akin nemiaj Roma ‘kichiayaj maj Dios kinueyitali’. Yejua ika xa timotajtaniskej: “Komo nejon tokniuan ipa kichiayaj teisa, ¿keyej Pablo oksepa ika tajtoj?”.

16. Xikonijto keniuj aksa uelis okachi kineltokas ke mochiuas tein Biblia kijtoua. (No xikonita taixkopimej).

¹⁶ Uelis tikajsikamatiskej tein Pablo kijtosnekik komo tikelnamikij ke uelis okachi tikneltokaskej ke mochiuas tein tikchiaj. Xikonnemili keniuj tionmomachilij keman mitsontapouijkej ke uelis tionnemis nochipaya itech xochital nikan taltikpak. Maski tikonuelkakik, xa amo semi tikonneltokak ke yekmelauj mochiuas. Sayoj ke keman okachi tikonixmatik Jehová uan tein Biblia kijtoua, okachi tikonneltokak ke yekmelauj mochiuas tein Dios motenkaua.

17. Satepan ke tionmoauij, ¿toni mitsonpaleuij okachi xikonneltoka ke mochiuas tein tikonchia?

¹⁷ Satepan ke tionmoauij, tikonsentokak okachi tikonixmatik Jehová uan okachi tikontasojtak, nejon mitsonpaleuij okachi xikonneltoka ke mochiuas tein tikonchia (Heb. 5:13–6:1). Xa no mitsonpanouani tein kijtoua Romanos 5:2-4, tikonpiani ouijkayomej uan tikonita ke Jehová kiyolpaktia tein tikonchiua. Uan kemej tikonmati ke tikonyolpaktia yejuatsin, okachi tikonneltoka ke kichiuas tein motenkaujtok.  Axkan okachi tiontakuaujtamati ke achto, okachi tikonneltoka ke mochiuas tein Dios motenkaujtok, okachi tikontasojkamati nejon uan tikonyekmati ke mitsonpaleuis. Uan no mitsonpaleuia itech nochi tein tikonchiua, yejua ika okachi kuali tionmouika iniuan mochankauan, kuali tiontaixpejpena uan tikonchiua tein moneki.

18. ¿Toni techyekiluia Jehová?

¹⁸ Satepan ke Pablo kijtoj ke keman tikyolpaktiaj Dios ueli tikchiaj tein kuali, no kijtoj se taman tein semi moneki: tikyekmatij ke tein tikchiaj yekmelauj mochiuas. ¿Keyej? Porin Pablo kiniluij tokniuan nejin tein Dios motenkaua: “Tikyekmatij ke mochiuas tein tikchiaj; porin Dios kikui ichikaualis tein techmaka para technextilis ke techtasojta” (Rom. 5:5). Yejua ika uelis tikonneltokas ke yekmelauj mochiuas tein tikonchia.

19. ¿Toni tikyekmatij?

¹⁹ Semi techpaleuis komo tikelnamikij tein kipanok Abrahán. Jehová motenkauak iuan ke kimakaskia teisa, no kiitak ke yolmelauak uan kuali iuan mouikak. Uan mochiuak tein yejua kichiaya. Biblia kijtoua: “Kemej Abrahán amo yolijsiuik, kiselij nejin tein Dios motenkauak” (Heb. 6:15; 11:9, 18; Rom. 4:20-22). Kemej Abrahán, tejuan no tikmatij ke komo nochipa tiktekitiliaj Jehová, yekmelauj mochiuas tein tikchiaj uan yejuatsin semi techtatiochiuis. Yejua ika uelis semi tiyolpakiskej porin tikmatij ke mochiuas tein tikchiaj (Rom. 12:12). Pablo kijkuiloj: “Dios techpaleuia maj tikchiakan tein kuali. Maj yejua kichiua semi xiyolpakikan uan xiyolseuikan porin iuan nantakuaujtamatij, uan ijkon ika ichikaualis uelis nankichiaskej tein kuali ika nochi namoyolo” (Rom. 15:13).