¿Tikonixtajtoltiani amaixmej Tanejmachtijkej tein kiskej yankuixtok? Xikonita ox ueli tikonnankilia nejin netajtanilmej:

¿Toni kijtosneki maj tiksentokakan tikpatakan kemej titanemiliaj? (Rom. 12:2).

Amo sayoj moneki tikchiuaskej seki taman tein kuali, ta no moneki kuali tiknemiliskej toni yekmelauj tiknejnekij. Komo moneki tikpataskej teisa, maj tikchiuakan. Ijkon tikchiuaskej tein Jehová technauatia (w23.01, página 8 uan 9).

¿Keniuj moneki tikitaskej tein mochiujtok itech taltikpak?

Tiknekij tikmatiskej toni mochiujtok itech taltikpak uan keniuj nejin kinextia ke mochiujtokya tein Biblia kijtojka. Sayoj ke amo moneki tikijtoskej tein tejuan tiknemiliaj porin tokniuan ueliskia moxexeloskej, ta okachi kuali maj tiktemokan tikmatiskej toni yankuixtok kitematiltiani inechikol Jehová (1 Cor. 1:10) (w23.02, página 16).

¿Keniuj mopata keman Jesús moauij uan keman moauiaj itatojtokakauan?

Jesús amo monekik motemaktisok iuan Jehová porin yolik itech se xolal kampa nochin motemaktijkajya iuan Dios. Uan kemej Jesús amo katka tajtakolej, amo monekik moyolpatas (w23.03, página 5).

¿Toni uelis tikchiuaskej para maj miakej tokniuan tanankilikan itech nechikol?

Maj amo semi tiuejkauakan keman titanankiliskej, ijkon okachi miakej tokniuan uelis tanankiliskej. Uan maj amo tikijtokan nochi tein ika tajtoua párrafo, ijkon oksekin kimatiskej toni uelisok tanankiliskej (w23.04, página 23).

¿Toni kijtosneki “Ojti tein Chipauak” tein ika tajtoua Isaías 35:8?

Para judíos katka ojti tein kisaya Babilonia uan ajsia Israel. ¿Uan toni kijtosneki para tejuan axkan? Miak xiujmej achto ke ajsiskia xiuit 1919, Jehová kichiuak maj seki takamej akin kitasojtayaj kemej yeskia kichipauanij ojti, nejin mochiuak keman moamakixtij uan motajtolkepak Biblia. “Ojti tein Chipauak” techpaleuia maj tiksenueyichiuakan Jehová iniuan tokniuan, uan maj amo uejkaua tikselikan tein yejuatsin touan motenkaua itech iTaixyekanalis (w23.05, páginas 15 hasta 19).

¿Toni kiixnextiaj ome siuamej akin ininka motajtoua itech Proverbios capítulo 9?

Proverbios ika tajtoua “siuat akin amo tanemilia” uan kijtoua ke akin kiseliaj keman kinyoleua, kemej yeskia youij itech “Miketekoch”. No ika tajtoua okse siuat akin kiixnextia “yekmelauj tamatilis” uan kijtoua ke akin kiseliaj keman kinyoleua kemej yeskia youij ‘itech ojti tein kinpaleuia maj yektanemilikan’ uan maj nemikan (Prov. 9:1, 6, 13, 18) (w23.06, páginas 22 hasta 24).

Kemej Jehová kuali mouikak iuan Lot, ¿keniuj yejuatsin kinextia ke yolyemanik uan teajsikamati?

Jehová kiluij Lot maj cholo hasta kampa yetokej tepemej. Keman kitataujtij Dios maj yani Zóar, yejuatsin kikauak maj youi (w23.07, página 21).

¿Toni uelis kichiuas se siuat komo itakatsin kiita auilnemilis?

Moneki kielnamikis ke amo yejua itajtakol. Okachi kuali, maj mochikaua kuali mouikas iuan Jehová uan maj ininka tanemili siuamej akin semi tajyouijkej uan yejuatsin kinyolseuij. No uelis kipaleuis itakatsin maj amo kineki oksepa kiitas auilnemilis (w23.08, páginas 14 hasta 17).

¿Keyej komo tiyektanemiliaj techpaleuia maj tiyolnejmachmej keman techtajtaniaj toni tikneltokaj?

Tein tajtanis aksa, techpaleuis maj tikmatikan toni kinemilia oso toni kitekipachoua. Nejon techpaleuis maj kuali tiknankilikan (w23.09, página 17).

¿Toni techmachtia tein kichiuak María para maj kiyolchikauakan?

Keman María kimatik ke mochiuaskia imomaj Mesías, mokauak maj oksekin kipaleuikan. Gabriel uan Elisabet kiyolchikaujkej ika iTajtol Dios. Tejuan no uelis techyolchikauaskej tokniuan (w23.10, página 15).

¿Keniuj technankilia Jehová keman tiktataujtiaj?

Jehová motenkaua ke techkakis keman tiktataujtiskej, uan keman technankilia kielnamiki tein kiixtalijtok kichiuas (Jer. 29:12). Maski tiitekitikauan Jehová tiktajtaniaj sayoj se taman, yejuatsin tataman kemej technankilia sayoj ke nochipa techpaleuia (w23.11, página 21 uan 22).

Komo Romanos 5:2 ipa ika tajtoua tein tikchiaj, ¿keyej itech versículo 4 oksepa ika tajtoua?

Keman aksa yekinika kikaki kuali tanauatilmej, xa kichia nemis nochipaya itech xochital nikan taltikpak. Sayoj ke keman kipanoua ouijkayomej uan kiita ke Jehová kiyolpaktia tein kichiua, okachi kineltoka ke kichiuas tein motenkaujtok uan kiyekmati ke kipaleuis (w23.12, página 12 uan 13).