1, 2. ¿Keyej xijxiujtika tikelnamikij imikilis Cristo?

 JESÚS toka momikilij kemej 2,000 xiujmej achtoya, yejua ika uelis tinemiskej nochipaya. Youak achto ke momikiliskia, kiixtalij maj imomachtijkauan kielnamikikan imikilis, nejon youak kikuik pan uan vino, uan kinnauatij imomachtijkauan maj kisentokakan ijkon kichiuakan para ika kielnamikiskiaj (1 Cor. 11:23-26).

² Akin tikchiuaj kemej Cristo tiktakamatij porin semi tiktasojtaj (Juan 14:15). Xijxiujtika, achto uan satepan ke moelnamikis imikilis, tikixtaliaj tiempo para timotataujtiskej uan titanemiliskej keniuj techpaleuia imikilis, ijkon tiknextiaj ke semi tiktasojkamatij tein toka kichiuak. Uan no semi tiyolpakij okachi titanojnotsaskej para tikinyoleuaskej nochi akin ueliskej maj touan mosentilikan itech nejon tonal tein semi moneki. Uan amo tikauaskej maj nion teyi techtsakuili maj tikelnamikikan imikilis Cristo.

3. ¿Toni tikitaskej itech nejin tamachtilis?

³ Tiitekitikauan Jehová tikchiuaj miak taman para uelis tikelnamikiskej imikilis Cristo. Itech nejin tamachtilis tikitaskej eyi taman tein ijkon kinextia: 1) tikelnamikij imikilis Cristo kemej yejua kijtoj, 2) tikinyoleuaj oksekin maj no touan kielnamikikan uan 3) timosentiliaj nejon tonal maski tikpiaskej ouijkayomej.

4. 1) Xijxiujtika keman tikelnamikij imikilis Cristo, ¿toni ika tajtoua tanojnots tein mopanoltia? (Lucas 22:19, 20). 2) ¿Keyej semi moneki maj tikajsikamatikan nejon tamachtilis?

⁴ Xijxiujtika keman timosentiliaj para tikelnamikiskej imikilis Cristo, tikakij se tanojnots tein mokixtia itech Biblia tein kinankilia seki netajtanilmej, kemej, keyej moneki maj techmakixtikan uan keniuj imikilis sayoj se takat kichiua maj kintapojpoluikan inintajtakoluan miakej. Techelnamiktiaj akonimej kikuaj pan uan tayij vino, uan toni kiixnextiaj (xikonixtajtolti Lucas 22:19, 20). Keman mopanoltia tanojnots titanemiliaj itech tatiochiualismej tein kipiaskej akin kichiaj nemiskej nochipaya nikan taltikpak (Is. 35:5, 6; 65:17, 21-23). Semi moneki maj kuali tikajsikamatikan tein tamachtia Biblia. Miak millones amo kiajsikamatij uan amo kitasojkamatij tein Jesús toka kichiuak. Uan amo kielnamikij imikilis kemej yejua kijtoj. ¿Keyej amo ijkon kichiuaj?

5. Satepan ke momikilijkej miakej tatitanilmej, ¿keniuj sekin peuak kielnamikij imikilis Cristo?

⁵ Satepan ke momikilijkej miakej tatitanilmej, sekin akin kijtouayaj ke kichiuayaj kemej Cristo, peujkej tamachtiaj tein amo melauak itech nechikol (Mat. 13:24-27, 37-39). Kijtouayaj “tein kejkeptok para kintanejnektiskej tokniuan uan kinuikaskej iniuan” (Hech. 20:29, 30). Semej tamachtilis “tein kejkeptok” tein peujkej tamachtiaj, yejua ke Jesús amo “sayoj sepa motemaktij para kinkixtilis inintajtakoluan miakej”. Tamachtiayaj ke Jesús miakpa monekia motemaktis uan nejon se taman tein Biblia amo tamachtia (Heb. 9:27, 28). Miakej akin kinekij kiixmatiskej Dios, no kineltokaj nejon, youij tiopan chijchikueyitika oso mojmostaj para kichiuaskej tein moixmati kemej el sacrificio de la misa. b No moajsij okseki taneltokalismej tein amo semi kielnamikij imikilis Cristo, uan miakej akin ompa pouij amo kiyekajsikamatij tein kijtosneki. Xa sekin motajtaniaj: “¿Yekmelauj nechtapojpoluiskej notajtakoluan porin Jesús momikilij?”. Sekin motajtanianij nejin, porin kinmachtianij ke imikilis Cristo amo kichiua maj techtapojpoluikan totajtakoluan. Uan akin yekmelauj kitojtokaj Cristo, ¿toni kichiuanij?

6. Itech xiuit 1872, ¿toni kiajsikamatkej sekin akin momachtiayaj Biblia?

⁶ Itech xiuit 1870, Charles Russell peuak kinixyekana sekin akin momachtiayaj Biblia akin peujkej kitemouaj toni yekmelauj tamachtiaya. Yejuan kinekiaj kiajsikamatiskej keniuj tapaleuia imikilis Cristo uan keniuj monekia kielnamikiskej. Itech xiuit 1872 ika tein momachtijkej itech Biblia kiajsikamatkej ke Jesús sayoj sepa motemaktij para techmakixtis tinochin. Peuak kiniluiaj oksekin tein kiajsikamatkej, uan kiteixmatiltijkej itech amatajkuilolmej, periódicos uan revistas. Tepitsin satepan, peuak kielnamikij imikilis Cristo sayoj sepa itech xiuit, ijkon kemej kichiuayaj tokniuan itech yekinika siglo.

7. ¿Keniuj techpaleuia axkan tein ne uejkauj kiajsikamatkej yekinika momachtianij ika Biblia?

⁷ ¿Keniuj techpaleuia axkan nochi tein momachtijkej nejon tokniuan? Jehová kitiochiuak tein kichiujkej, yejua ika axkan tikajsikamatij toni kijtosneki imikilis Cristo uan nochi tein kichiuas (1 Juan 2:1, 2). No timomachtianij itech Biblia ke sekin akin kitakamatij Dios kichiaj nemiskej  nochipaya ne iluikak uan oksekin millones kichiaj nemiskej nochipaya nikan taltikpak. Okachi timotokiaj iuan Jehová keman titanemiliaj keniuj semi techtasojta uan keniuj techpaleuia tisejsemej imikilis Cristo (1 Ped. 3:18; 1 Juan 4:9). Yejua ika, ijkon kemej kichiujkej tokniuan ne uejkauj, tejuan no tikinyoleuaj oksekin maj touan mosentilikan keman tikelnamikij imikilis Cristo, ijkon kemej yejua kijtoj maj mochiuani.

8. ¿Toni tikchiuanij para tikinyoleuaskej oksekin maj no touan mosentilikan keman tikelnamiki imikilis Jesús? (Xikonita taixkopimej).

⁸ Tiitekitikauan Jehová miak xiujmej tikinyoleuanij oksekin maj touan mosentilikan keman tikelnamikij imikilis Cristo. Itech xiuit 1881, nejin amaix kinyoleuak tokniuan kayomej Estados Unidos maj mosentilikan ichan se tokniuj ompa Allegheny (Pensilvania) para kielnamikiskej imikilis Cristo. Satepan, tokniuan itech sejse nechikol peuak kielnamikij imikilis Cristo. Itech marzo de 1940 kiniluijkej tokniuan ke ueliskiaj kinyoleuaskej nochin akin kinekiskiaj touan mosentiliskej. Uan itech xiuit 1960, ompa Betel yekinika kiamakixtijkej tayoleualismej uan kintitanilijkej nechikolmej. Ijkuak uan hasta axkan tiitaixpantijkauan Jehová tikmoyauanij tel miak millones nejon tayoleualismej. ¿Keyej semi timochikauaj tikinyoleuaskej oksekin?

9, 10. ¿Akonimej tikinpaleuiaj keman titayoleuaj maj touan mosentilikan keman tikelnamikij imikilis Cristo? (Juan 3:16).

⁹ Tiknekij maj kimatikan tein Jehová  uan Jesús toka kichiuanij, yejua ika tikinyoleuaj oksekin maj touan mosentilikan keman tikelnamikij imikilis Cristo (xikonixtajtolti Juan 3:16). Tein kiitaskej uan tein kikakiskej nejon youak, tiknekij maj kinyololini maj okachi kuali kiixmatikan Jehová uan maj kitekitilikan. Sayoj ke no moajsij oksekin akin kinpaleuia keman titayoleuaj.

¹⁰ No tikinyoleuaj akin amo tanojnotsajok nion mosentiliaj. Keman tikinyoleuaj tikinelnamiktiaj ke Jehová kisentoka kintasojta. Semi tiyolpakij tikitaskej ke miakej touan mosentiliaj. Nejon youak kinelnamiktia keniuj yolpakiaj keman kitekitiliayaj Jehová. Maj tikitakan tein kipanok Mónica. c Keman momoyaujtoya kokolis COVID-19 peuak oksepa tanojnotsa. Satepan ke kielnamikik imikilis Cristo itech xiuit 2021, kijtoj: “Amo nitanojnotstoya 20 xiujmej, uan keman tikelnamikkej imikilis Cristo, oksepa peuak nikinyoleua oksekin maj touan mosentilikan nejon tonal. Senkis nikixtalij nitayoleuas porin semi niktasojkamatiliaya Jehová uan Jesús tein noka kichiujkej” (Sal. 103:1-4). Maski touan mosentiliskej oso amo, tejuan timochikauaj tikinyoleuaskej porin tikmatij ke Jehová kitasojkamati nochi tein tikchiuaj.

11. ¿Keniuj Jehová kitiochiuani tekit tein tikchiuaj keman tikinyoleuaj oksekin maj touan mosentilikan keman tikelnamikij imikilis Cristo? (Ageo 2:7).

¹¹ Jehová kitiochiuani tekit tein tikchiuanij keman tikinyoleuaj oksekin maj touan mosentilikan keman tikelnamikij imikilis Jesús. Itech xiuit 2021, maski amo tiueliaj timosentiliayaj porin momoyaujtoya kokolis COVID-19, timosentilijkej 21,367,603 keman tikelnamikkej imikilis Cristo. Nejin okse achiok ke nochi itaixpantijkauan Jehová akin nemi itech nochi taltikpak. Sayoj ke Jehová amo sayoj kiita kanachin mosentiliaj, ta akonimej mosentiliaj (Luc. 15:7; 1 Tim. 2:3, 4). Uelis senkis tikmatiskej ke keman tiktemakaj amat tein ika titayoleuaj, Jehová techpaleuia maj tikinajsikan akin kinekij kiixmatiskej yejuatsin (xikonixtajtolti Ageo 2:7).

12. ¿Toni ouijkayomej ueliskia kichiuas maj amo timosentilikan para tikelnamikiskej imikilis Cristo? (Xikonita taixkopin).

¹² Jesús kijtoj ke itech tonalmej keman tatamitiya, tikixnamikiskiaj miak tataman ouijkayomej: tochankauan techixnamikiskiaj, techtajyouiltiskiaj, kampa yeski moteuiskiaj, onkaskiaj tetsaujkakokolismej uan okseki tamanok (Mat. 10:36; Mar. 13:9; Luc. 21:10, 11). Semej nejin ouijkayot ueliskia kichiuas maj amo timosentilikan para tikelnamikiskej imikilis Cristo. ¿Toni kichiuanij tokniuan keman kipanouaj nejon ouijkayomej uan keniuj kinpaleuiani Jehová?

13. ¿Keniuj Jehová kitiochiuak Artiom porin moyolchikauak uan kiixtalij kielnamikis imikilis Cristo kampa tsaktoya?

¹³ Keman techtsakuaj. Tokniuan akin tsaktokej porin kiueyichiuaj Jehová semi mochikauaj kielnamikiskej imikilis Cristo. Maj tikitakan tein kipanok Artiom. Keman tikelnamikkej imikilis Cristo itech xiuit 2020, tsaktoya kampa sayoj taueyikan katka 17 metros cuadrados, uan ompa kintsakuayaj hasta makuilmej. Maski tsaktoya, uelik kiajsik seki taman tein kikuiskia para kielnamikis imikilis Cristo, uan kiitak keniuj iselti  mopanoltiliskia tanojnots. Sayoj ke onkaya okse kuejmol: akin iniuan tsaktoya tachichinayaj uan nochi tonal kijtouayaj pitsotik tajtolmej. ¿Toni kichiuak Artiom? Kintajtanij ox ueliskiaj amo tachichinaskej nion kijtoskej pitsotik tajtolmej sayoj se hora. Kimoujkaitak keman kiluijkej ke kemaj. Yejua kijtoua: “Nikiniluij ke ueliskia nikinmelauilis keniuj tikelnamikij imikilis Cristo”. Maski kiluijkaj ke amo kinekiaj kimatiskej, satepan ke kiitakej keniuj kichiuak, kiluijkej ke kinekiaj kimatiskej okachi.

14. ¿Toni kichiujkej itekitikauan Jehová para kielnamikiskej imikilis Cristo maski momoyajtoya kokolis COVID-19?

¹⁴ Kokolis COVID-19. Maski nejin ueyi kokolis kichiuak maj amo tiuelikan timosentilikan itech Kali kampa tiMosentiliaj, nejon amo techtsakuilij. d Tokniuan itech nechikolmej kampa kipiayaj internet uelik mosentilijkej ika Zoom. Uan, ¿toni kichiujkej millones tokniuan akin amo kipiayaj internet? Itech miak altepemej  kipanoltijkej tanojnots itech televisión oso itech radio. Uan no, ompa Betel kichiujkej grabación itech panoua 500 tataman tajtolmej para maj tokniuan akin nemij kampa amo onkak internet uelinij kikakinij nejin tanojnots. Uan okseki tokniuan kinuikilijkej nejon grabaciones.

15. ¿Toni techmachtia tein kipanok Sue akin kimachtijtokej ika Biblia?

¹⁵ Keman tochankauan techixnamikij. Sekin okachi ouij kinkisani kielnamikiskej imikilis Cristo porin ininchankauan kinixnamikij. Yejua nejon tein kipanok Sue akin kimachtijtokej ika Biblia. Itech xiuit 2021, se tonal achto ke moelnamikiskia imikilis Cristo, Sue kiluij itamachtijkauj ke kemej ichankauan kiixnamikiaj amo ueliskia kielnamikis imikilis Cristo. Tokniuj kinextilij tein kijtoua Lucas 22:44. Kimelauilij ke keman tikpiaj kuejmolmej, okachi kuali maj tikchiuakan kemej Jesús uan maj tiktataujtikan Jehová ika nochi toyolo porin tikmatij ke techpaleuis. Mostika, Sue kichijchiuak pan uan kitemoj vino, uan kiitak itech jw.org tamachtilis tein mopanoltia kualkampa. Tiotakpa, motatsakuij itech icuarto uan kikakik tanojnots ika iteléfono. Satepan kijkuilouilij itamachtijkauj nejin: “Yalua semi tinechyolchikauak. Nikchiuak nochi tein niuelik para nikelnamikis imikilis Cristo, uan Jehová nechpaleuij. Semi niyolpaki uan nimotasojkamati”. Komo tejuatsin no ijkon tikonpanotok, ¿tikonnemilia ke Jehová uelis mitsonpaleuis?

16. ¿Keyej senkis tikmatij ke Jehová kitiochiuas tein tikchiuaskej para tikelnamikiskej imikilis Cristo? (Romanos 8:31, 32).

¹⁶ Jehová semi kitasojkamati tein timochikauaj tikchiuaskej para tikelnamikiskej imikilis Cristo. Uelis senkis tikmatiskej ke yejua techtiochiuas komo tiknextiaj ke tiktasojkamatiliaj tein toka kichiuani (xikonixtajtolti Romanos 8:31, 32). Maj amo tikauakan maj nion teyi techtsakuili maj tikelnamikikan imikilis Cristo nejin xiuit. Uan maj okachi titanojnotsakan nejon tonalmej.