1, 2. 1) ¿Keniuj timomachiliaj keman titanemiliaj itech tein Jesús kichiuak? 2) ¿Toni tikitaskej itech nejin tamachtilis?

 KEMAN momikilia se akin tiktasojtaj, semi tiktemouaj. Xa itech yekinika tonalmej sayoj tikmachiliaj tayokol keman tikelnamikij toni panok achto ke momikiliskia, okachiok komo semi tajyouij. Sayoj ke ijkon kemej panouaj tonalmej, xa tikelnamikiskej seki taman tein kichiuaya akin momikilij. Tikelnamikij se taman tein techmachtij oso teisa tein kijtoj oso kichiuak para techyolchikauas oso techuetskitis. Keman tikelnamikij nejon techpaleuia maj kaxani tayokol.

² No ijkon, semi techtayokoltia keman timonemiliaj keniuj Jesús tajyouij achto ke momikiliskia. Uan okachiok titanemiliaj itech nejon tein kipanok Jesús keman tikelnamikij imikilis uan tikixtaliaj tiempo para titanemiliskej keniuj semi techpaleuia inemilis tein kitemakak (1 Cor. 11:24, 25). Sayoj ke keman tiknemiliaj tein kijtoj uan kichiuak keman nemia nikan taltikpak, semi tiyolpakij. No techyolchikaua tiknemiliskej tein axkan kichiujtok uan tein toka kichiuas amo uejkaua. Itech nejin tamachtilis, tikitaskej ke titanemiliskej itech nochi nejin taman uan keniuj Jesús technextilia ke techtasojta, kichiuas maj ika miak taman tiknextikan ke timotasojkamatij.

3. ¿Keyej tiktasojkamatij maj Jesús toka momikiliani?

³ Semi timotasojkamatij keman tikyolnemiliaj tein Jesús kichiuak uan inemilis tein kitemakak. Keman Jesús yetoya nikan taltikpak, kinmachtij oksekin tein kuali tein kichiuas  Dios keman yejua taixyekantos. Tejuan semi tiktasojkamatij tein Biblia kijtoua ke kichiuas iTaixyekanalis Dios. Semi timotasojkamatij maj Jesús toka momikiliani porin nejon techpaleuia maj kuali iuan timouikakan uan no iuan Jehová. Akin titakuaujtamatij iuan Jesús no tikchiaj tinemiskej nochipaya uan oksepa tikinitaskej akin momikilijkejya (Juan 5:28, 29; Rom. 6:23). Tein melauj, amo technamiki tikseliskej nejin tatiochiualismej uan amo keman uelis tikixtauaskej tein Jehová uan Jesús toka kichiuanij (Rom. 5:8, 20, 21). Sayoj ke, ¿keniuj uelis tiknextiskej ke timotasojkamatij? Maj tikitakan.

4. ¿Keniuj kinextij María Magdalena ke kitasojkamatia maj Jesús kipaleuiani? (Xikonita taixkopin).

⁴ Maj tiknemilikan tein kichiuak se siuat judía akin monotsaya María Magdalena. Itech yetoyaj chikome amokuali ejekamej tein semi kitajyouiltiayaj. Xa kinemiliaya ke amo akin ueliskia kipaleuis. ¡Tikmatij ke semi motasojkamatik keman Jesús kikixtilij nejon amokuali ejekamej! Yejua ika mochiuak imomachtijkauj Jesús uan kikuik tein kipiaya para kipaleuis (Luc. 8:1-3). Maski María semi kitasojkamatia maj Jesús kipaleuiani, xa amo senkis kiajsikamatia tein Jesús yaya kichiuati satepan. ToTekotsin yaya motemaktiti para kimakixtis “akin itech takuaujtamatis” uan ijkon nemis nochipaya (Juan 3:16). Maski ijkon, María amo keman kikauak Jesús uan ijkon kinextij ke semi motasojkamatia. Keman Jesús kipilojkej itech kouit, María mokauak ompa inakastan kampa kipilojkaj para kiyolchikauas yejua uan oksekin akin no ompa yetoyaj (Juan 19:25). Uan, keman Jesús yetoya itech miketekoch, María uan okseki ome siuamej kiuikakej se taman tein ajuiyak para kitaliliskej Jesús itech inakayo (Mar. 16:1, 2). Jehová semi kitatiochiuij María porin amo keman kikauak Jesús. ¡Keman Jesús oksepa nemik mosentilij iuan María uan iuan monojnotsak! Nejin se tatiochiualis tein amo nochin akin  kitojtokakej Cristo kipiakej (Juan 20:11-18).

5. ¿Keniuj uelis tiknextiskej ke tiktasojkamatij nochi tein Jehová uan Jesús toka kichiuanij?

⁵ Tejuan no uelis tiknextiskej ke tiktasojkamatij tein Jehová uan Jesús toka kichiuanij. Uan tiknextiaj keman tikuij tein tikpiaj uan tein ueli tikchiuaj para okachi tiktekitiliskej Jehová, kemej titapaleuiskej maj mochijchiua uan moyekchijchiua kalmej kampa tikueyichiuaj Jehová.

6. ¿Keyej tikijtouaj ke Jesús momikilij para techmakixtis tisejsemej?

⁶ Keman tiknemiliaj keniuj Jehová uan Jesús semi techtasojtaj, techolinia maj no tikintasojtakan (1 Juan 4:10, 19). Uan okachi tikintasojtaj keman tikajsikamatij ke Jesús toka momikilij tisejsemej. Tatitanil Pablo semi kitasojkamatia inemilis Jesús tein kitemakak. Yejua ika kijkuiloj: “iKoneuj Dios […] nechtasojtak uan noka motemakak” (Gál. 2:20). Jehová kichiuak iuan xionmotoki uan kuali iuan xionmouika porin Jesús kitemakak inemilis (Juan 6:44). ¿Keniuj tionmomachilia tikonmatis ke Jehová kiitak se taman tein kuali itech moyolo uan yejua ika kitemakak akin okachi kitasojtaya para uelis kuali iuan tionmouikas? ¿Melauj ke techyololinia uan kichiua maj okachi tikintasojtakan Jehová uan Jesús? Yejua ika tinochin maj timotajtanikan: “¿Toni nechyololinia maj nikchiua?”.

7. Kemej nesi itech taixkopin, ¿toni uelis tikchiuaskej tinochin para tiknextiskej ke tiktasojtaj Jehová uan Jesús? (2 Corintios 5:14, 15; 6:1, 2).

⁷ Kemej tikintasojtaj Dios uan Cristo, techolinia maj no tikintasojtakan oksekin (xikonixtajtolti 2 Corintios 5:14, 15; 6:1, 2). Tiknextiaj ke titetasojtaj keman ika yolpakilis akin yeski tiktapouiaj tein kijtoua Biblia. Tikinnojnotsaj akin taman ixtamatij, akin taman kemej nemij, akin ueyichiuanimej  uan akin amo, akin kipiaj tomin oso akin amo kipiaj. Ijkon, titekitij iuan Jehová, “porin yejua kineki maj akin yeski momakixti uan maj kuali kiixmati tein melauak” (1 Tim. 2:4).

8. ¿Keniuj uelis tiknextiskej ke tikintasojtaj tokniuan?

⁸ No tiknextiaj ke tiktasojtaj Dios uan Cristo keman tikintasojtaj tokniuan (1 Juan 4:21). Tiknextiaj keman ininka timotekipachouaj, uan tikinpaleuiaj keman kipanouaj ouijkayomej. Tikinyolseuiaj keman momikilia se akin kitasojtaj, tikinkalpanouaj keman mokokouaj, uan tikchiuaj nochi tein tiuelij para tikinyolchikauaskej keman moyolkokojtokej (2 Cor. 1:3-7; 1 Tes. 5:11, 14). No ininka timotataujtiaj porin tikmatij ke “semi tapaleuia keman chikauak motataujtia akin yolmelauak” (Sant. 5:16).

9. ¿Keniuj no uelis tiknextiskej ke tikintasojtaj tokniuan?

⁹ Uan no, tiknextiaj ke tikintasojtaj tokniuan komo timochikauaj kuali iniuan timouikaskej. Timochikauaj titetapojpoluiskej kemej Jehová kichiua. Maj titanemilikan itech nejin: komo Jehová kikauak maj iKonetsin momikiliani para kiixtauas totajtakoluan, ¿amo monekiskia niman tikintapojpoluiskej tokniuan keman techyolkokouaj? Amo tiknekij tikchiuaskej kemej takeual amo yolkuali akin ika tajtoj Jesús. Iteko kitapojpoluij semi miak tomin tein kitauikiliaya, uan nejin takeual amo kinekik kitapojpoluis itakeualikniuj akin amo miak tomin kitauikiliaya (Mat. 18:23-35). Yejua ika, komo tejuatsin tionmokualantij iuan se tokniuj, ¿ueliskia tikontemos tikonmelauas kuejmol achto ke timosentiliskej para tikelnamikiskej imikilis Cristo? (Mat. 5:23, 24). Komo ijkon tikonchiua tikonnextis ke semi tikontasojta Jehová uan Jesús.

10, 11. ¿Keniuj tayekananij uelis kinextiskej ke kintasojtaj Jehová uan Jesús? (1 Pedro 5:1, 2).

¹⁰ Tayekananij uelis kinextiskej ke kintasojtaj Jehová uan Jesús keman kinyekpiaj uan kintasojtaj iichkauan Jesús (xikonixtajtolti 1 Pedro 5:1, 2). ToTekotsin kipaleuij Pedro maj kiajsikamatini nejin. Kemej Pedro expa kijtojka ke amo kiixmatia xa semi kinekia kiluis Jesús ke kitasojtaya. Keman Jesús oksepa nemik, kitajtanij : “Simón ikoneuj Juan, ¿tinechtasojta?”. Tikyekmatij ke Pedro kichiuaskia tein yeski para kinextilis Jesús ke kitasojtaya. Uan Jesús kinankilij: “Xikinyekpia noichkatsitsin” (Juan 21:15-17). Uan Pedro kemaj peuak kinyekpia uan kintasojta iichkauan toTekotsin uan ijkon kinextilij ke kitasojtaya.

¹¹ Keman tikelnamikij imikilis Cristo, ¿keniuj uelis tayekananij kinextiskej ke kichiuaj kemej tein Jesús kiluij Pedro? Uelis kinextiskej ke kitasojtaj Jehová uan Jesús komo kixelouaj tiempo para kinyolchikauaskej tokniuan uan kitemouaj kinpaleuiskej akin amo monechikouajok nion tanojnotsaj (Ezeq. 34:11, 12). Uan no, uelis kiitaskej maj kuali momachilikan akin momachtiaj ika Biblia uan akin yekinika mosentiliaj keman tikelnamikij imikilis Cristo porin yejuan satepan no uelis mochiuaskej tokniuan.

12. ¿Keyej tein Jesús kijtoj youak achto ke kimiktiskiaj techpaleuia maj tiyolchikaujkej? (Juan 16:32, 33).

¹² Youak achto ke Jesús momikiliskia, kiniluij imomachtijkauan: “Akin nemij nikan taltikpak namechtajyouiltiskej. Sayoj ke ¡ximoyolchikauakan!, nejua niktanik tein amo kuali tein onkak nikan taltikpak” (xikonixtajtolti Juan 16:32, 33).  ¿Toni kipaleuij Jesús maj amo kinmouiliani akin kiixnamikiaj uan maj amo kikauani Jehová hasta keman kimiktijkej? Yejua takuaujtamatik iuan Jehová. Kemej Jesús kimatia ke imomachtijkauan no kipanoskiaj nejon, kitajtanij Jehová maj kinyekpia (Juan 17:11). ¿Keyej techpaleuia nejon maj tiyolchikaujkej? Porin Jehová okachi chikauak ke akin yeski akin techixnamikis (1 Juan 4:4). Uan yejua kiitstok nochi. Senkis tikmatij ke komo titakuaujtamatij iuan Jehová, tiknextiskej ke tiyolchikaujkej.

13. ¿Keniuj kinextij José akin kayot Arimatea ke katka yolchikauak?

¹³ Maj itech titanemilikan José akin kayot Arimatea, se takat akin judíos kipoujkaitayaj uan pouia iniuan uejueyi tamelauanij. Yejua amo katka yolchikauak keman Jesús tanojnotstinemia. Juan kijtoua ke katka se imomachtijkauj Jesús, “sayoj ke amo akin kiluiaya porin kinmouiliaya judíos” (Juan 19:38). Maski kiuelkakia tein Jesús tamachtiaya ika itaixyekanalis Dios, amo kijtouaya ke takuaujtamatia iuan toTekotsin. Xa mouia maj judíos amo kipoujkaitanijok. Maski ijkon, Biblia kijtoua ke satepan ke Jesús momikilij, José “moyolchikauak, kiitato Pilato uan kitajtanij maj kikaua maj kitokati Jesús” (Mar. 15:42, 43). Axkan nochin kimatiajya ke José takuaujtamatia iuan Jesús.

14. ¿Toni moneki tikchiuaskej komo techtekipachoua tein oksekin kijtoskej?

¹⁴ Ijkon kemej José akin kayot Arimatea, ¿mitsontekipachoua tein kijtoskej oksekin? ¿Kemansa tionpinaua tikoniluis akin iniuan tionmomachtia oso akin iniuan tiontekiti ke tionitaixpantijkauj Jehová? ¿Tikonmouilia tionpeuas tiontanojnotsas uan tionmoauis? Amo xikonkaua maj tein oksekin kijtoskej mitsontsakuili xikonchiua nejon. Xikontataujti Jehová maj mitsonpaleui uan maj mitsonyolchikaua para tikonchiuas itanejnekilis. Keman tikonitas ke yejua kinankilia monetataujtiluan, okachi tionmoyolchikauas uan amo tionmouis (Is. 41:10, 13).

15. ¿Keniuj momachilijkej imomachtijkauan Jesús keman yejua monextij ininixpan uan toni kinolinij maj kichiuakan? (Lucas 24:52, 53).

¹⁵ Keman Jesús momikilij, imomachtijkauan semi motayokoltijkej. ¿Keniuj tionmomachiliskia komo ompa tionyetoskia? Amo yetoyaok inintasojikniuj uan amo kuali momachiliayaj (Luc. 24:17-21). Sayoj ke satepan, Jesús monextij ininixpan  uan kinmelauilij ke itech mochiujka tein Biblia kijtojka. Uan no, kinnauatij maj kichiuakan se tekit tein motelneki (Luc. 24:26, 27, 45-48). Uan 40 tonalmej satepan, keman Jesús oksepa yajki iluikak, imomachtijkauan semi yolpakiajya. Semi yolpakiaj kimatiskej ke Jesús oksepa nemia uan kinpaleuiskia maj kichiuakan tekit tein kinmakak. Kemej semi yolpakiaj, amo teyi kintsakuiliaya maj kiueyitalikan Jehová (xikonixtajtolti Lucas 24:52, 53; Hech. 5:42)

16. ¿Keniuj uelis tikchiuaskej kemej imomachtijkauan Jesús?

¹⁶ Tejuan no uelis tikchiuaskej kemej imomachtijkauan Jesús komo techyolpaktia tiktekitiliskej Jehová nochipaya uan amo sayoj keman tikelnamikij imikilis Cristo. Moneki tiktayekanaltiskej itaixyekanalis Dios. ¿Keniuj kichiuanij seki tokniuan? Yejuan amo tekitijok kemej achto para uelis okachi tanojnotsaskej, amo kintsakuilis maj monechikokan uan uelis taueyichiuaskej kemej kalyetouanij nochi semanas. Sekin kiixtalianij amo kipiaskej seki taman tein oksekin kitayekanaltiaj porin kinekij okachi tapaleuiskej itech nechikol oso yaskej tanojnotsatiuij kampa okachi monekij tanojnotsanij. Maski moneki se mochikauas para se kisentokas se tiktekitilis Jehová. ToDios motenkaua ke semi techtatiochiuis komo tiktayekanaltiaj itaixyekanalis (Prov. 10:22; Mat. 6:32, 33).

17. ¿Toni moneki tikchiuaskej achto ke tikelnamikiskej imikilis Cristo? (Xikonita taixkopin).

¹⁷ Tiknekijya maj ejko martes 4 de abril keman tikelnamikiskej imikilis Cristo. Amo hasta itech nejon tonal uelis titanemiliskej itech nochi tein Jesús kichiuak uan keniuj kitemakak nemilis uan keniuj yejua uan Jehová technextilianij ke techtasojtaj. Itech tonalmej achto uan satepan ke tikelnamikiskej imikilis Cristo uelis itech tiontanemilis nejon. Uelis tikonixtalis tionmomachtis uan itech tiontanemilis tein kiualkui Traducción del Nuevo Mundo itech apéndice B12-A uan B12-B tein itokay “La última semana de Jesús en la tierra”. Keman tionmachtijtias, xikontemo katiyejua textos mitsonpaleuis okachi xionmotasojkamati, xionyolchikauak, xionyolpaki uan xiontetasojta. Uan xikonnemili keniuj uelis tikonnextis ke semi tionmotasojkamati. Maj amo tikelkauakan: Jesús kitasojkamati nochi tein tikchiuaskej para tikelnamikiskej inemilis tein kitemakak (Apoc. 2:19).