1, 2. ¿Keyej ueli tikajsikamatij toni kimachilia Jehová keman kitakajkayauiliaj?

 XIKONNEMILI ke aksa akin tikontasojta mitsonijtouilia teisa tein tel amo kuali. Tejuatsin tikonmati ke amo melauj, sayoj ke sekin kineltokaj, peua kitetapouiaj uan no kinneltokiliaj. ¿Keniuj tionmomachiliskia? Xa semi tionmotekipachoskia uan tionmoyolkokoskia porin amo kuali mitsonitaskiajok (Prov. 22:1).

² Nejin techpaleuia maj tikajsikamatikan keniuj momachilij Jehová keman semej ikoneuan kitakajkayauilij uan kichiuak maj amo kuali kiitanijok. Kemej Eva kineltokak, yejua uan Adán kiixnamikkej Jehová. Yejua ika, tinochin titajtakolejkej uan timomikiliaj (Gén. 3:​1-6; Rom. 5:12). Kemej Satanás takajkayauak itech xochital Edén, axkan tinochin timomikiliaj, titajyouiaj, mochiua neteuilis uan okseki ouijkayomej. ¿Kiyolkokoj Jehová tein kitakajkayauilijkej uan tein panoua porin Satanás kichiuak nejon? Kemaj, sayoj ke Jehová amo tauelmiktok nion nochipa moyolkokojtok, ta kisentoka yolpaki (1 Tim. 1:11).

3. ¿Toni uelis tikchiuaskej para tiknextiskej ke amo melauj tein Satanás kitakajkayauilia Jehová?

³ Uelis tikchiuaskej teisa para no tiknextiskej ke Satanás kitakajkayauilij Jehová. ¿Keniuj? Komo tiktakamatij nejin tanauatil: “Xikueyitalikan itokay Jehová” (Sal. 113:1). ¿Keniuj uelis tikchiuaskej? Keman tikiniluiaj oksekin nochi tein kuali tein kichiua. ¿Tikonueyitalis itokay Jehová? Maj tikitakan eyi taman tein techpaleuis maj tiknekikan tikueyitaliskej itokay Dios.

 TIKYOLPAKTIAJ JEHOVÁ

4. Xikonmelaua keyej Jehová yolpaki keman tikueyitaliaj (no xikonita taixkopin).

⁴ Jehová yejua toTajtsin uan kiuelita maj tikueyitalikan itokay (Sal. 119:108). ¿Kijtosneki ke Dios tamati kemej tejuan uan kitemoua maj kiueyitalikan oksekin para maj kuali momachili? Amo. Maj itech titanemilikan se siuapiltsin akin motokia iuan ipopaj, kinaua uan kiluia: “¡Amo akin kemej tejua paj!”. Tepopaj kiuetskilia uan yolpaki. ¿Keyej? Amo porin kineki maj isiuapil kiueyitali uan maj kiyolchikaua, ta porin kitasojta uan kiuelita kiitas ke isiuapiltsin semi kitasojta uan kitasojkamatilia. Uan no kimattok ke keman isiuapiltsin moskaltis, okachi yolpakis porin tetasojta uan motasojkamati. Jehová, akin okachi kuali tepopaj, no ijkon yolpaki keman tikueyitaliaj.

5. ¿Toni tiknextiaj keman tikueyitaliaj Jehová?

⁵ Satanás no techijtouilij se xolopijyot. Kijtoj ke tinochin tikauaskej Dios keman tikpiaskej se ouijkayot, uan ke amo tiktekitiliskejok komo tikitaj ke techpanoti tein amo kuali (Job 1:​9-11; 2:4). Sayoj ke Job akin amo kikauak Jehová kinextij ke Satanás xolopij. ¿Uan tejuan? Keman tikueyitaliaj Jehová, no tiknextiaj ke Satanás amo kijtoua tein melauak. Tisejsemej uelis tikixtaliskej amo tikauaskej Jehová uan tikyolpaktiskej keman nochipa tiktekitiliskej (Prov. 27:11).

6. ¿Keniuj uelis tikchiuaskej kemej tekiuaj David uan levitas? (Nehemías 9:5).

⁶ Akin kitasojtaj Jehová semi kinekij kiueyitaliskej itokay. Tekiuaj David kijkuiloj: “Maj nikueyitali Jehová; maj nikueyitali itokay ika nochi noyolo” (Sal. 103:1). David kimatia ke keman tikueyitaliaj itokay Dios, tikueyitalijtokej Jehová. Keman tikakij itokay, itech titanemiliaj keniuj tamati, keniuj kiixmatij uan tein kichijchiuak. David kiitaya ke itokay iTajtsin yektik uan kinekia kiueyitalis. Kijtoj ke kinekia kichiuas ika nochi iyolo. Levitas no kinemilijkej kiueyitaliskej Jehová uan ijkon kichiujkej. Yejuan kimatiaj ke amo uelia senkis kiueyitaliayaj itokay Jehová kemej yejuatsin kinamiki (xikonixtajtolti Nehemías 9:5). ¡Tikmatij ke Jehová semi yolpakik keman kiitak ke kiueyitaliayaj ika nochi ininyolo!

7. ¿Keniuj tikueyitaliaj Jehová keman titanojnotsaj uan keman iniuan titajtouaj oksekin?

⁷ Tejuan uelis tikueyitaliskej Jehová keman ika titajtoskej, uan keman tiknextiskej ke tiktasojtaj uan tiktasojkamatiliaj.  Keman titanojnotsaj tiktemouaj maj oksekin kinekikan iuan motokiskej uan maj kitasojtakan ijkon kemej tejuan tiktasojtaj (Sant. 4:8). Semi tikuelitaj tikinmachtiskej ika Biblia keniuj tamati Jehová, ke tetasojta, kichiua tein kuali yetok, tamatkej uan semi chikauak. No tikueyitaliaj uan tikyolpaktiaj keman timochikauaj tikchiuaskej kemej yejuatsin (Efes. 5:1). Keman ijkon tikchiuaj, oksekin xa kiitaj ke titamamej uan motajtaniaj keyej (Mat. 5:​14-16). Keman uelis iniuan titajtoskej, maj tikinmelauilikan keyej ijkon tikchiuaj. Ijkon, akin yolkualmej kinekiskej iuan motokiskej toDios. Keman ijkon tikueyitaliaj Jehová semi tikyolpaktiaj (1 Tim. 2:​3, 4).

TIKYOLPAKTIAJ JESÚS

8. ¿Akoni okachi kuali techmachtia keniuj uelis tikueyitaliskej itokay Jehová uan keyej?

⁸ Ne iluikak uan nikan taltikpak amo akin kuali kiixmati Jehová kemej Jesús (Mat. 11:27). Jesús kitasojta iTajtsin uan yejua akin okachi kuali technextilij keniuj uelis tikueyitaliskej Jehová (Juan 14:31). Keman kitataujtij iTajtsin se youak achto ke momikilis, kijtoj nejin keman ika tajtoj tein kichiuako: ‘Nikteixmatiltij motokay’ (Juan 17:26). ¿Keniuj kichiuak?

9. ¿Toni ika tajtoj Jesús para kinextis keniuj tamati Jehová?

⁹ Jesús amo sayoj kiniluij oksekin ke Dios monotsa Jehová. Judíos ipa kimatiajya nejon. Yejua ika Jesús kinmelauilij “keniuj tamati” (Juan 1:​17, 18). ITajtol Dios tein moijkuiloj itech Hebreo kijtoua ke Jehová tetasojta uan teiknelia (Éx. 34:​5-7). Sayoj ke Jesús kinpaleuij maj kuali kiajsikamatikan nejin keman kintapouij tein kipanok tekonetsin akin poliujtoya. Yejua kijtoj ke itat kiuejkaitak ikonetsin “keman ajsitiayaya” uan tsikuinik para kinamikitiuj, kinauaj uan kitapojpoluij, nejin technextilia ke Jehová semi tetasojta uan teiknelia (Luc. 15:​11-32). Tikmatij ke Jesús kinpaleuij oksekin maj kiajsikamatikan keniuj tamati Jehová.

10. 1) ¿Keyej tikmatij ke Jesús kikuik itokay iTajtsin uan kinekia maj oksekin no kikuinij? (Marcos 5:19; no xikonita taixkopin). 2) ¿Toni kineki Jesús maj tikchiuakan?

¹⁰ ¿Kinekia Jesús maj itokay iTajtsin no kikuinij oksekin? Kemaj. Xa sekin taixyekananij itech taneltokalis kinemiliayaj ke kemej itokay Dios semi yektik, amo monekia kijtoskej. Sayoj ke kemej nejon tamachtilis amo ualeuaya itech iTajtol Dios, Jesús kisentokak kikuik itokay iTajtsin. Maj itech titanemilikan keman Jesús kipajtij se takat akin nemia itech tal tein pouia Gerasa, yejua kipiaya amokuali ejekamej. Miakej akin ompa nemiaj semi momoujtijkej uan kitataujtijkej Jesús maj yani okseko (Mar. 5:​16, 17). Sayoj ke Jesús kinekia maj nochin kiixmatikan itokay Jehová. Yejua ika, achto ke yas kiluij nejon takat maj kintapouiani oksekin keniuj kipaleuijka Jehová, uan amo tein yejua kichiujka (xikonixtajtolti Marcos 5:19). a ToTekiuaj Jesús, kineki maj no ijkon tikchiuakan, maj tikinnextilikan oksekin ke Dios monotsa Jehová (Mat. 24:14; 28:​19, 20). Keman ijkon tikchiuaj tikyolpaktiaj Jesús.

11. ¿Toni Jesús kinnextilij itatojtokakauan maj tajtanikan keman motataujtiayaj? Uan kemej kijtoua Ezequiel 36:​23, ¿keyej semi moneki?

¹¹ Jesús kimatia ke Jehová kineki maj moueyitali itokay para maj nochin kimatikan  ke amo melauak tein kijtouiliaj. Yejua ika kinmachtij itatojtokakauan maj motataujtikan ijkon: “ToTajtsin akin tietok ne iluikak, maj nochin kiitakan ke motokay semi ueyi” (Mat. 6:9). Jesús kimatia ke nejin yejua tein okachi monekia maj mochiua (xikonixtajtolti Ezequiel 36:23). Sayoj yejua Jesús akin okachi kiueyitaliani itokay iTajtsin. Maski ijkon, keman kikitskijkej akin kitauelitayaj kiteluilijkej ke kiuijuikaltijka iTajtsin. Yejua kiitaya ke keman aksa kichiuaya nejon katka tel fiero. Uan achto ke kikitskiskiaj, semi moyolkokouaya porin kimatiaya ke ika nejon kiteluiliskiaj uan kimiktiskiaj. Uan xa yejua ika “semi yoltajyouijtoya” (Luc. 22:​41-44).

12. ¿Keniuj Jesús kichiuak nochi tein uelik para kiueyitalis itokay iTajtsin?

¹² Para kiueyitalis itokay iTajtsin, Jesús taxikoj keman kitajyouiltijkej, kiuijuikaltijkej uan keman kipantijkej miak taman. Yejua kimatia ke nochipa kitakamatia iTajtsin yejua ika amo monekia mopinaujmatis (Heb. 12:2). No kimatia ke keman tel tajyouijtoya, yejua Satanás akin kiixnamiktoya (Luc. 22:​2-4; 23:​33, 34). Satanás kinekia maj Jesús amo kitakamatiniok Jehová, sayoj ke amo uelik kichiuak nejon, ¡amo mochiuak tein kinekia! Jesús senkis kinextij ke Satanás takajkayaua uan ke Jehová kemaj kinpia itekitikauan akin amo kikauaj maski kipiaj ouijkayomej.

13. ¿Toni moneki tikchiuaskej para tikyolpaktiskej toTekiuaj?

¹³ ¿Tikonneki tikonyolpaktis moTekiuaj Jesucristo? Komo ijkon, xikonsentoka xikonueyitali itokay Jehová uan xikonpaleui oksekin maj kuali kiixmatikan. Ijkon uelis tikonchiuas kemej Jesús (1 Ped. 2:21). Tejuatsin no uelis tikonyolpaktis Jehová kemej kichiuak Jesús uan tikonnextis ke Satanás, akin kitauelita se xolopij.

TIKINPALEUIAJ OKSEKIN MAJ MOMAKIXTIKAN

14, 15. ¿Toni panoua keman tikinpaleuiaj oksekin maj kiixmatikan Jehová?

¹⁴ ¿Keyej tikijtouaj ke keman tikueyitaliaj itokay Jehová tikinpaleuiaj oksekin maj momakixtikan? Porin Satanás “kintanemililtsakua” “akin amo taneltokaj”  (2 Cor. 4:4). Yejua ika miakej kineltokiliaj tein kijtoua uan kinemiliaj ke Dios amo yekmelauj nemi, ke amo kitekipachoua keniuj tikueyichiuaj, ke amo toka motekipachoua oso ke tel amo yolkuali uan kintajyouiltia nochipaya akin amo yolkualmej. Satanás kichiua nochi nejon porin kineki maj kinemilikan ke Jehová amo yolkuali uan maj nion akin iuan motoki. Sayoj ke keman titanojnotsaj uan tikinpaleuiaj oksekin maj kiixmatikan toTajtsin, titapaleuiaj maj Satanás amo kichiua tein kineki uan tikueyitaliaj itokay Jehová. ¿Keniuj tapaleuia nejon?

¹⁵ Tein Biblia tamachtia semi tapaleuia. Keman tikinmachtiaj oksekin akoni Jehová uan keniuj tamati, semi tikmojkaitaj tein kichiuaj. Yejuan amo mokauaj maj kinkajkayauaok Satanás uan peua kiitaj toTajtsin kemej tejuan tikitaj. Semi kimojkaitaj keman kimatij ke Jehová semi chikauak (Is. 40:26). Iuan takuaujtamatij porin yejuatsin nochipa kichiua tein kuali yetok (Deut. 32:4). No kinmachtia miak taman porin Jehová semi tamatkej (Is. 55:9; Rom. 11:33). Uan semi yolseuij keman momachtiaj ke yejuatsin tetasojtalis (1 Juan 4:8). Keman iuan motokiaj Jehová okachi kineltokaj ke uelis nemiskej nochipaya uan ke uelis mochiuaskej ikoneuan. Semi kualtsin maj tikinpaleuikan oksekin maj iuan motokikan toTajtsin. Uan no, keman ijkon tikchiuaj, Jehová techita ke “tiitekitikaikniuan” (1 Cor. 3:​5, 9).

16. ¿Keniuj kipaleuia aksa keman kimati keniuj monotsa Dios? Xikonijto se neskayot.

¹⁶ Keman aksa ika tiknojnotsaj Biblia, xa sayoj tikmachtiskej ke Dios monotsa Jehová. Uan komo yolkuali, nejon uelis kipaleuis maj kipata kemej nemi. Se ichpoch akin monotsa Alía b moskaltij iniuan ichankauan akin amo kineltokaj tein tamachtia Biblia. Sayoj ke yejua amo kiuelitaya tein momachtiaya uan kimachiliaya ke amo uelia iuan mouikaya Dios. Keman peuak momachtia iniuan itaixpantijkauan Jehová amo ijkon tanemiliayaok.  Keman kimatik ke itech miak Biblias kikixtilijkaj itokay Dios uan peuak kinotsaj kemej toTekotsin oso no taman kiluiayaj, yejua amo kineltokaya. Keman momachtij keniuj monotsa Dios semi kipatak kemej nemia uan peuak kiita kemej se itasojikniuj. Yejua kijtoj: “¡Notasojikniuj kipia itokay!”. No kijtoua: “Axkan semi niyolseujtok uan se tatiochiualis maj nikixmati itokay Dios”. Steve katka se tatsotsonkej uan ichankauan katkaj judíos akin tel taneltokayaj. Kemej kiitaya ke amo kichiuayaj tein kineltokayaj, amo kinekia pouisok itech se taneltokalis. Sayoj ke keman momikilij se ichankauj, kinekik yetos iuan se itasojikniuj keman kimachtijtoyaj Biblia. Semi yolpakik keman kimatik keniuj monotsa Dios. Yejua kijtoua: “Nion tepitsin nikmatia keniuj monotsa Dios”. Uan no kijtoua: “Hasta ijkuak nikmatik ke Dios yekmelauj nemi. Nikmatik ke nikajsika se notasojikniuj”.

17. ¿Keyej tikonneki tikonsentokas tikonueyitalis itokay Jehová? (No xikonita taixkopin).

¹⁷ ¿Tikiniluiaj oksekin keniuj monotsa Dios uan tikinpaleuiaj maj kiixmatikan keman titanojnotsaj oso titamachtiaj? Komo ijkon tikchiuaj tikueyitaliaj itokay. Yejua ika, xikonsentoka xikonpaleui oksekin maj kimatikan keniuj tamati Jehová, uan ijkon tikonueyitalis itokay. Komo ijkon tikonchiua, tikonpaleuis oksekin maj momakixtikan, tikonchiuas kemej toTekiuaj Jesucristo, uan tikonyolpaktis Jehová, toTajtsin akin semi techtasojta. Maj tinochin tikijtokan kemej akin kijkuiloj Salmo 145:2: “Nikueyichiuas motokay [...] nochipaya”.