1. Xikonmelaua keyej moneki timokauaskej maj Jehová techixyekana.

 XIKONNEMILI ke tionyajki koujtaj uan tionmopoloto. Kampa tionyetok tafierojkan porin onkakej okuilimej tein tekuaj, seki xiujmej tein tepajuiaj uan okuiltsitsin tein tetipiniaj. No uelis tionmometstelos uan tionuetsis. ¿Melauj ke tikonuelitaskia maj mitsonuika aksa akin kuali ixmattok para maj amo mitsonpano teisa? Kampa tinemij tamati kemej nejon koujtaj kampa uelis techpanos tein amo kuali. Porin miak taman uelis kichiuas maj amo kuali timouikakanok iuan Dios. Sayoj ke tejuan tikpiaj akoni kuali techixyekana, uan yejua Jehová. Yejuatsin techiluia toni moneki tikchiuaskej para maj amo techpano tein amo kuali uan maj tinemikan nochipaya itech xochital.

2. ¿Keniuj techixyekana Jehová?

² ¿Keniuj techixyekana Jehová? Kichiua ika iTajtol, no kichiua maj tokniuan takamej techixyekanakan. Yejuatsin kichiua maj “takeual takuaujtamach uan tamatkej” techmaka tamachtilis tein techpaleuia maj kuali titaixpejpenakan (Mat. 24:45). Jehová amo sayoj kinkui nejin tokniuan para techixyekanas, ta no akin takalpanouaj itech circuito uan tokniuan tayekananij itech nechikol, yejuan techyolchikauaj uan techyolmajxitiaj para maj titaxikokan keman tikpiaj ouijkayomej. Semi tiktasojkamatiliaj Jehová porin kuali techixyekana itech nejin tonalmej keman okachi mochiua tein amo kuali. Nejin techpaleuia maj tiksentokakan kuali timouikakan iuan Jehová uan satepan maj ueli tinemikan nochipaya.

3. ¿Toni tikitaskej itech nejin tamachtilis?

³ Maski ijkon, xa kemansa techouijmakas timokauaskej maj Jehová techixyekana. Okachiok keman yejuatsin kichiua maj techpaleuikan takamej akin tajtakolejkej. ¿Keyej? Porin xa tein techiluiskej amo tikuelkakiskej. Oso xa tiknemiliskej ke tein techiluiaj amo tapaleuia, uan yejua ika tiknemiliskej  ke amo yejua Jehová akin ijkon tanauatia. Keman ijkon techpanos, moneki okachi titakuaujtamatiskej ke yejua Jehová akin kinixyekantok itekitikauan. Uan ke semi techpaleuis komo timokauaj maj yejuatsin techixyekana. Itech nejin tamachtilis tikitaskej nejin eyi taman tein techpaleuis maj okachi iuan titakuaujtamatikan, 1) keniuj Jehová kinixyekanak itekitikauan ne uejkauj, 2) keniuj techixyekantok axkan uan 3) keniuj techpaleuis komo nochipa timokauaj maj techixyekana.

¿KENIUJ JEHOVÁ KINIXYEKANAK ISRAELITAS?

4, 5. ¿Keniuj kinextij Jehová ke kinixyekantoya israelitas itechkopa Moisés? (Xikonita taixkopin ipeujyan amaix).

⁴ Jehová kiixtalij Moisés para maj kinkixtiani israelitas de Egipto uan kinnextilij ke yejua nejon takat akin yejuatsin kiixtalijka para maj kinixyekana. Keman yejuatsin kinyekantiaya tonayan ika se mixti uan youak kinyekantiaya ika se tit, kinnextilij ke yejua Moisés akin kiixpejpenka (Éx. 13:21). Moisés kitojtokak nejon mixti uan nejon tit uan yejua ika israelitas uan yejua ajsikej itech mar Rojo. Israelitas peuak motelmoujtiaj keman kinemilijkej ke amo ueliskiaj choloskiajok porin kintsakuiliaya ueyiat uan tateuianij egipcios kintojtokayaj. Kitajtakoltijkej Moisés porin ompaka kinuikak. Sayoj ke yejua amo mopoloj, porin yejua Jehová akin kichiuak maj Moisés kinuikani ompakauin (Éx. 14:2). Satepan Jehová kinmakixtij ika se ueyi milagro (Éx. 14:​26-28).

⁵ Moisés 40 xiujmej kitojtokak nejon mixti para kiixyekanas ixolal Dios itech taluakyan. a Kemansa Jehová kichiuaya maj mixti motaliani ikuapan itakenkal Moisés, kampa nochin ueliskiaj kiitaskej (Éx. 33:​7, 9, 10). Desde ompa Jehová kinojnotsaya Moisés, uan yejua kiniluiaya israelitas toni kinauatijka Jehová maj kichiuakan (Sal. 99:7). Yejua ika israelitas kiitayaj miak taman tein kinpaleuiaya maj kineltokakan ke Jehová kinixyekantoya itechkopa Moisés.

6. ¿Toni kichiujkej israelitas keman Jehová kinixyekantoya? (Números 14:​2, 10, 11).

⁶ Sayoj ke miakej israelitas amo kinekkej kineltokaskej nochi tein kiitayaj, tein kinextiaya ke Jehová kiixpejpenka Moisés para maj yejua kiniluiani tein kinekia (xikonixtajtolti Números 14:​2, 10, 11). Kemej miakpa amo kineltokakej ke Jehová kiixpejpenka Moisés, yejuatsin amo kinkauak maj kalakikan itech tal tein motenkaujka kinmakas (Núm. 14:30).

7. ¿Akonimej mokaujkej maj Jehová kinixyekana? (Números 14:24; no xikonita taixkopin).

⁷ Sayoj ke seki israelitas kemaj mokaujkej maj Jehová kinixyekana. Jehová kijtoj nejin de semej israelitas akin ijkon kichiuak: “Caleb [...] kisentokak nechtojtokak ika nochi iyolo” (xikonixtajtolti Números 14:24). Dios kitatiochiuij uan hasta kikauak maj kiixpejpena kani nemis itech xolal Canaán (Jos. 14:​12-14). Israelitas akin nenkej satepan ke Caleb momikilij, no kichiujkej kemej yejua uan mokaujkej maj Jehová kinixyekana. “Nochipa kitakachiujkej” Josué, takat akin Jehová kiixtalij maj kinixyekana israelitas uan kiixpatak Moisés (Jos. 4:14). Yejua ika, Jehová kintatiochiuij uan kinkauak maj kalakikan itech tal tein motenkaujka kinmakas (Jos. 21:​43, 44).

8. ¿Keniuj Jehová kinixyekanak israelitas keman nemiaj tekiuanij? (No xikonita taixkopin).

⁸ Xiujmej satepan, Jehová kinixtalij jueces para maj yejuan kiixyekanakan ixolal. Satepan keman nemiaj tekiuanij, kinixtalij tanauatianij para maj kichiuakan nejin  tekit. Tekiuanij akin amo keman kikaujkej Dios kintakamatkej tanauatianij. Kemej tekiuaj David, yejua kikakik uan kitakamatik tein kiluij tanauatijkej Natán keman kimelauak (2 Sam. 12:​7, 13; 1 Crón. 17:​3, 4). Tekiuaj Jehosafat kikakik tein kiluij tanauatijkej Jahaziel uan kinyolchikauak akin nemiaj Judá maj takuaujtamatinij iniuan itanauatijkauan Dios (2 Crón. 20:​14, 15, 20). Uan keman israelitas semi motekipachojtoyaj, tekiuaj Ezequías kiluij tanauatijkej Isaías maj kinpaleui (Is. 37:​1-6). Nochipa keman tekiuanij mokauayaj maj Jehová kinixyekana, yejuatsin kintatiochiuiaya uan kinpaleuiaya israelitas (2 Crón. 20:​29, 30; 32:22). Nochin ueliaj kiajsikamatiaj ke Jehová kinkuia tanauatianij para kiixyekanas ixolal. Sayoj ke miakej tekiuanij uan israelitas amo kinkakiaj tanauatianij (Jer. 35:​12-15).

¿KENIUJ JEHOVÁ KINIXYEKANAK TOKNIUAN ITECH YEKINIKA SIGLO?

9. ¿Keniuj Jehová kinixyekanak tokniuan itech yekinika siglo? (No xikonita taixkopin).

⁹ Itech yekinika siglo, Jehová kiixtalij nechikol kampa kichiuaj kemej Cristo. ¿Keniuj kiixyekanak ixolal nejon tiempo? Kiixtalij Jesús maj taixyekana itech nechikol (Efes. 5:23). Sayoj ke Jesús amo tajtouaya iuan sejse tokniuj para kiluis toni kichiuas, ta kinkuia tatitanilmej uan tayekananij de Jerusalén para kiixyekanas tekit (Hech. 15:​1, 2). Uan no, itech sejse nechikol, kinixtalijkej tayekananij maj kinixyekanakan tokniuan (1 Tes. 5:12; Tito 1:5).

10. 1) ¿Toni kichiujkej miakej tokniuan itech yekinika siglo keman kiniluiayaj toni monekia kichiuaskej? (Hechos 15:​30, 31). 2) ¿Keyej ne uejkauj kinixtopeujkej akin Jehová kinkuika para kinixyekanas itekitikauan? (Xikonita recuadro “ ¿Keyej sekin amo kinekij kineltokaskej ke Jehová kinkui takamej para kiixyekanas ixolal?”).

¹⁰ ¿Tatakamatkej tokniuan itech yekinika siglo keman tatitanilmej kiniluiayaj toni monekia kichiuaskej? Miakej kuali kikakkej uan tatakamatkej. Hasta “yolpakkej porin kinyolchikauak” tein kiniluijkej (xikonixtajtolti Hechos 15:​30, 31). Uan ¿keniuj Jehová kinixyekanani itekitikauan axkan?

¿KENIUJ JEHOVÁ TECHIXYEKANA AXKAN?

11. Xikonijto toni kinextia ke Jehová kinpaleuijtok takamej akin kinixpejpenak para kiixyekanas ixolal.

¹¹ Axkan Jehová kisentoka kiixyekana  ixolal uan kichiua ika iTajtol uan iKonetsin akin taixyekana itech nechikol. ¿Ueli tikitaj ke Jehová kisentoka kinixtalia takamej para maj techixyekanakan? Kemaj, maj tiknemilikan tein panok satepan den xiuit 1870. Charles Russell uan itasojikniuan kiajsikamatkej ke itech xiuit 1914, iTaixyekanalis Dios peuaskia taixyekanaskia ijkon kemej Biblia kijtojka ke mochiuaskia (Dan. 4:​25, 26). ¿Keniuj kimatkej nejin? Momachtijkej tein Biblia kijtojka ke panoskia. Uan Jehová kinpaleuij maj kiajsikamatikan tein momachtiayaj. Tein panok itech nochi taltikpak itech xiuit 1914, kinextij ke iTaixyekanalis Dios peujkaya taixyekana: peuak yekinika Ueyi neteuilis itech nochi taltikpak uan peuak mochiuaj tetsaujkakokolismej, miakkan talolinia uan mayanmikiaj (Luc. 21:​10, 11). Moyekitak ke Jehová kinkuitoya nejon takamej akin yolkualmej para kipaleuis ixolal.

12, 13. ¿Toni moixtalij keman mochiujtoya Ojpatika Ueyi Neteuilis para maj okachi motanojnotsa uan motamachti?

¹² Maj no itech titanemilikan tein panok keman mochiujtoya Ojpatika Ueyi Neteuilis. Seki tokniuan akin kiixyekanaj tekit itech ueyi kali kampa techixyekanaj, momachtijkej tein kijtoua Apocalipsis 17:8 uan kiajsikamatkej ke satepan ke panoskia Ojpatika Ueyi Neteuilis, ayamo mochiuaskia Armagedón, ta tepitsin taseuiskia uan nejon tapaleuiskia maj motanojnotsa. Yejua ika, inechikol Jehová kiixtalij maj mochiuani teisa tein moitaya ke xa amo tapaleuiskia, peuak motemaka tamachtilis tein kiluiayaj Colegio Superior Bíblico de la Watchtower de Galaad, porin kinekiaj kinmachtiskej misioneros maj tanojnotsatij itech miak altepemej. Hasta keman mochiujtoya ueyi neteuilis kintitankej tokniuan maj tanojnotsatij miakkan. Uan no, takeual takuaujtamach uan tamatkej kiixtalij maj motemaka tamachtilis tein kiluiayaj Curso en el Ministerio Teocrático, b para kinpaleuis tokniuan maj okachi kuali tamachtikan. Nejin kinpaleuij itekitikauan Jehová maj kimatikan keniuj tanojnotsaskej porin satepan kichiuaskiaj nejon tekit.

¹³ Tikyekitaj ke Jehová kiixyekantoya ixolal itech nejon xiujmej tein semi ouijkej  katkaj. Desde ke tamik Ojpatika Ueyi Neteuilis, itekitikauan Jehová uelini tanojnotsanij miakkan. Miakej kiixmatinij Jehová, uan axkan motanojnotsa itech nochi taltikpak.

14. ¿Keyej titakuaujtamatij ke inechikol Jehová uan tayekananij kuali techixyekanaj? (Apocalipsis 2:1; no xikonita taixkopin).

¹⁴ Axkan, tokniuan akin pouij iniuan Oloch Taojtokaltianij kisentokaj kitemouaj maj Cristo kinixyekana. Tein technauatiaj maj tikchiuakan, achto kuali kiitaj ox yejua tein Jehová uan Jesús kinekij. Uan satepan yejuan kinnauatiaj takalpanouanij itech circuito uan tayekananij maj kinmatiltikan nechikolmej. c Tokniuan tayekananij akin taijitalmej uan nochin tayekananij itech nechikolmej yetokej “iyekmakopa” Cristo (xikonixtajtolti Apocalipsis 2:1). Kemej yejuan tajtakolejkej kemansa mopolouaj, ijkon kemej kinpanok Moisés, Josué uan tatitanilmej (Núm. 20:12; Jos. 9:​14, 15; Rom. 3:23). Sayoj ke tikmatij ke Jesús senkis kiixyekana takeual takuaujtamach uan tamatkej uan no kinixyekana tayekananij, uan kisentokas ijkon kichiuas “hasta keman tantiasya tein mochiujtok itech taltikpak” (Mat. 28:20). Yejua ika uelis titakuaujtamatiskej ke yejuatsin kinkui nejon takamej para techixyekanas.

¿KENIUJ TECHPALEUIA KOMO TIMOKAUAJ MAJ JEHOVÁ TECHIXYEKANA?

15, 16. ¿Toni mitsonmachtia tein kichiujkej akin mokaujkej maj Jehová kinixyekana?

¹⁵ Keman timokauaj maj Jehová techixyekana no techpaleuia axkan. Andy uan isiuatsin Rose, d kichiujkej tein Biblia tayolmajxitia keman kijtoua maj amo tiktemokan tikpiaskej miak taman (Hebreos 13:5). Ijkon uelik tapaleuijkej maj mochijchiuakan kalmej kampa timosentiliaj uan okseki kalmej kampa titaueyichiuaj. Rose kijtoua: “Tineminij itech kalmej tein semi tsikitsitsin uan kemansa amo tikpianij kani timotakualchiuiskej. Uan no, semi nikuelita nikinkixtis taixkopimej, sayoj ke monekik niknamakas seki nocámaras uan okseki taman tein no nikuia para nikixtis taixkopimej. Maski nichokak keman niknamakak, nikixtalijkaya amo nimoyolkokos porin nikaujka miak taman, ta niyolpakis porin axkan okachi niktekitilia Jehová ijkon kemej kichiuak Sara, isiuatsin Abrahán” (Heb. 11: 15). ¿Yolpakij porin kiixtalijkej nejon? Rose kisentoka kijtoua: “Semi tiyolpakij porin tikmatij ke tikchiujtokej nochi tein tiuelij para tiktekitiliskej Jehová. Nochipa keman tikchiuaj tekit tein Jehová technauatia, tiknemiliaj toni tikchiuaskej itech xochital”. ¿Uan toni kinemilia Andy? Yejua kijtoua: “Semi tiyolpakij porin nochipa timochikauaj tiktekitiliskej Jehová”.

¹⁶ ¿Keniuj no techpaleuia komo timokauaj maj Jehová techixyekana? Maj tikitakan tein kipanok se tokniuj siuat akin monotsa Marcia. Keman amo yayaok tamachtiloyan, kinemilij mochiuas precursora ijkon kemej kiyolmajxitijkaj (Mat. 6:33; Rom. 12:11). Yejua kijtoua: “Ueliskia nimomachtis universidad uan naui xiuit amo nitaxtauaskia. Sayoj ke nejua okachi niknekia niktekitilis Jehová, yejua ika nikixtalij nimomachtis teisa tein nechpaleuiskia maj niktani tomin uan maj nimochiua precursora. Semi kuali tein nikixtalij nikchiuas. Axkan nitapaleuia kemej precursora regular, uan kemej nejua nikixtalia kemanian nitekitis, ueli nitapaleuia Betel seki tonalmej uan no nikchiua okseki taman tein ika niktekitilia Jehová”.

17. ¿Keniuj no techpaleuia komo nochipa timokauaj maj Jehová techixyekana? (Isaías 48:​17, 18).

¹⁷ Kemansa inechikol Jehová technejmachtia tein uelis techpanos komo tiktemouaj timotomintiskej, uan no techiluia toni uelis kichiuas maj amo tiktakamatikanok Dios. Komo timokauaj maj Jehová techixyekana keman monekis tikixtaliskej toni tikchiuaskej, kuali tietoskej porin amo techkuejmolos totanemilil uan amo tikpiaskej miak ouijkayomej (1 Tim. 6:​9, 10). Ijkon uelis okachi tiktekitiliskej Jehová. Sayoj nejon kichiuas maj semi tiyolpakikan uan maj tiyolseujtokan (xikonixtajtolti Isaías 48:​17, 18).

18. ¿Keyej tikonneki tionmokauas maj nochipa mitsonixyekana Jehová?

¹⁸ Jehová kisentokas kinkuis takamej para kiixyekanas ixolal keman mochiujtos tetsaujkatajyouilis uan keman Jesús taixyekantos mil xiujmej (Sal. 45:16). ¿Tiksentokaskej timokauaskej maj Jehová techixyekana maski amo tikchiuaskejok tein tejuan tikuelitaskiaj? Komo axkanya titatakamatij, amo techouijmakas tikchiuaskej satepan. Yejua ika maj nochipa timokauakan maj Jehová techixyekana, uan nejin no tikchiuaj keman tikintakamatij takamej akin yejuatsin kinixtalij maj techyekpiakan (Is. 32:​1, 2; Heb. 13:17). Uelis titakuaujtamatiskej iuan Jehová akin techixyekana porin yejuatsin techpaleuia maj nochipa kuali iuan timouikakan uan maj satepan ueli tinemikan nochipaya itech xochital.