1. ¿Toni tikonajsikamatik keman mitsonmachtijkej Biblia?

 ¿TIKONELNAMIKI nochi tein tikonajsikamatik keman mitsonmachtijkej Biblia? Xa tikonmojkaitak keman tikonmatik ke Dios kipia itokay. Uan xa mitsonyolseuij keman mitsonmachtijkej ke Dios amo kintajyouiltijtok itech tit akin momikilijkejya. Uan tionyolpakik keman tikonmatik ke akin tikontasojta uan momikilijkejya oksepa nemiskej uan iniuan tionyetos itech xochital.

2. Keman tikonajsikamatia tein Biblia tamachtia, ¿toni okseki taman monekik tikonchiujtias? (Efesios 5:1, 2).

² Keman peuak tionmomachtia iTajtol Dios, okachi tikontasojtak Jehová. Nejon mitsonpaleuij xikonchiua tein tionmomachtiaya. Peuak kuali tikonixpejpena toni tikonchiuas porin tikonkauak maj Biblia mitsonyolmajxiti. Kemej tikonnekia tikonyolpaktis Dios peuak tiontanemilia kemej yejuatsin uan tikonchiua tein kuali. Ijkon kemej se konetsin kichiua kemej ipopaj, tejuatsin no peuak tikonchiua kemej toTajtsin (xikonixtajtolti Efesios 5:1, 2).

3. ¿Toni uelis timotajtaniskej?

³ Maj timotajtanikan: “¿Okachi niktasojta Jehová axkan ke keman nimoauij? ¿Niknextia ke nitanemilia uan nikchiua kemej Jehová okachiok keman moneki nikintasojtas tokniuan?”. Komo amo semi titetasojtajok maj amo timosenkauakan. Tokniuan itech yekinika siglo no ijkon kinpanok. Sayoj ke Jesús amo kinemilij ke amo ueliskiajok mopataskej, uan tejuan no ijkon techita (Apoc. 2:4, 7). Kimattok ke uelis oksepa titetasojtaskej kemej keman peuak timomachtiaj.

4. ¿Toni tikitaskej itech nejin tamachtilis?

 ⁴ Itech nejin tamachtilis tikitaskej toni uelis techpaleuis maj okachi tiktasojtakan Jehová uan oksekin. Uan satepan tikitaskej keniuj techpaleuia tejuan uan oksekin keman ijkon tikchiuaj.

5, 6. 1) ¿Toni ouijkayomej kipanok tatitanil Pablo keman kitekitiliaya Jehová? 2) ¿Uan toni kipaleuij maj kisentoka kitekitili?

⁵ Tatitanil Pablo semi yolpakia keman kitekitiliaya Jehová, sayoj ke kemansa kipiaya ouijkayomej. Monekia yajtinemis uejka maski kemansa ouij kikisaya. Keman yajtinemia, ‘miakpa kiuikatoyaya at’ uan ‘moinnamikiliaya tachtekinij’. Kemansa kitajyouiltiayaj akin kitauelitayaj (2 Cor. 11:23-27). Uan tokniuan amo nochipa kitasojkamatiaj tein kichiuaya Pablo para kinpaleuis (2 Cor. 10:10; Filip. 4:15).

⁶ ¿Toni kipaleuij Pablo maj kisentoka kitekitili Dios? Tein kipanoka uan tein momachtiaya itech iTajtol, kipaleuij maj kuali kiixmati Jehová. Pablo kimatia ke Jehová kitasojtaya (Rom. 8:38, 39; Efes. 2:4, 5). Uan yejua no semi kitasojtak Jehová. Uan kinextij ke kitasojtaya ‘keman kinpaleuij tokniuan’ uan kisentokak ijkon kichiuak (Heb. 6:10).

7. ¿Toni techpaleuis maj okachi tiktasojtakan Jehová?

⁷ Moneki kuali timomachtiskej Biblia para okachi tiktasojtaskej Dios. Keman tikixtajtoltiaj, maj tiktemokan toni techmachtia de Jehová. Uan maj timotajtanikan: “¿Keniuj nejin versículos kinextiaj ke Jehová nechtasojta? ¿Uan keniuj nechpaleuiaj maj niktasojta yejuatsin?”.

8. ¿Keniuj techpaleuia maj okachi tiktasojtakan Dios keman tiktataujtiaj?

⁸ Komo mojmostaj tiktapouiaj Jehová tein tikmachiliaj, techpaleuis maj okachi tiktasojtakan (Sal. 25:4, 5). Uan Jehová technankilis keman tiktataujtiskej (1 Juan 3:21, 22). Khanh, b se tokniuj siuat akin nemi Asia, kijtoj: “Achto sayoj niktasojtaya Jehová porin nimomachtiaya Biblia. Sayoj ke keman nikitak ke nechnankilia keman niktataujtia, okachi peuak niktasojta uan nejon nechpaleuij maj nikchiua tein kiyolpaktia”.

9. ¿Toni techmachtia kemej Timoteo kintasojtak tokniuan?

⁹ Seki xiujmej satepan ke Pablo mochiuak imomachtijkauj Cristo, kiixmatik se telpoch akin kuali tekititoya uan monotsaya Timoteo. Nejin telpoch kitasojtaya Jehová uan no oksekin. Satepan, Pablo kiniluij tokniuan akin nemiaj Filipo: “Amo nikpia okse kemej yejua, akin yekmelauj kitemoua keniuj namechpaleuis” (Filip. 2:20). Pablo amo kijtoj ke Timoteo tel kuali tamachtiaya oso ke tel kuali kichiuaya teisa, ta okachi kiitaya keniuj nejin telpoch kintasojtaya tokniuan. Xa kalnechikolmej kitelnektoyajya maj Timoteo kinkalpanouani (1 Cor. 4:17).

10. ¿Keniuj Anna uan itakatsin kinextijkej ke kintasojtayaj tokniuan?

¹⁰ Tejuan no tiktemouaj keniuj tikinpaleuiskej tokniuan (Heb. 13:16). ¿Nankielnamikij Anna, akin ika titajtojkej itech tamachtilis 29? Satepan ke panok se tetsauit, Anna uan itakatsin kinkalpanotoj seki tokniuan uan kiitakej ke ininchan  uejueliujka. Yejua ika, amo kipiayaj tasal tein chipauak para motaliliskej. Anna kijtoua toni kichiujkej: “Tikuikakej inintasal, tikpakkej, tikplancharojkej uan tikkejkelpachojkej. Nejin tein tikchiujkej amo semi ouij katka, sayoj ke tapaleuij maj hasta axkan kuali timouikakan iniuan”. Anna uan itakatsin kinpaleuijkej nejon tokniuan porin kintasojtayaj (1 Juan 3:17, 18).

11. 1) ¿Keniuj momachiliaj oksekin keman tikinnextiliaj ke tikintasojtaj? 2) Kemej kijtoua Proverbios 19:17, ¿toni kichiua Jehová keman kiita ke tikintasojtaj oksekin?

¹¹ Keman tikualtakamej uan tikintasojtaj oksekin, tiknextiaj ke tikchiujtokej kemej Jehová. Tein tikchiuaskej uelis kinpaleuis miakej maski amo tikmatiskej keniuj nion akonimej. Khanh, tokniuj siuat akin ika titajtojkej itech párrafo 8, kualtsin kinelnamiki nochin akin kipaleuijkej, yejua kijtoua: “Semi nikintasojkamatilia nochin tokniuan siuamej akin nechuikayaj maj nitanojnotsati. Semi tetasojtayaj. Yayaj nechtemotij, nechuantiaj teisa oso nechtamakayaj uan nechyekpiayaj para maj kuali niajsi nochan. Axkan nikajsikamati ke semi ouij kinkisaya, sayoj ke yolpakiaj keman nechpaleuiayaj”. Nejin amo kijtosneki ke nochin techtasojkamatiliskej keman tikinpaleuiskej. Keman Khanh kinelnamiki akin kipaleuijkej kijtoua: “Maski nejua no nikuelitaskia nikinpaleuis akin nechpaleuijkej, amo nikmati kani nemij. Sayoj ke Jehová kemaj kimati kani moajsij, yejua ika niktataujtia maj kinpaleui”. Jehová kiita tein tikchiuaj para tikinpaleuiskej oksekin maski tepitsin. Yejuatsin kiita kemej teisa tein kipia miak ipatiuj uan kineki techtatiochiuis (xikonixtajtolti Proverbios 19:17).

12. ¿Keniuj takamej akin moauijkejya uelis kinextiskej ke kintasojtaj tokniuan itech nechikol? (No xikonita taixkopimej).

 ¹² Tokniuan takamej, ¿keniuj uelis nankinextiskej ke nankintasojtaj tokniuan itech nechikol? Xiktemokan keniuj nankinpaleuiskej. Se tokniuj telpoch akin monotsa Jordan kitajtanij se tayekankej toni ueliskia kichiuas para okachi kinpaleuis tokniuan. Tokniuj tayekankej kiluij ke kuali kichiujtoya tekit uan kiyolmajxitij toni ueliskiaok kichiuas para okachi tapaleuis. Kiyolmajxitij maj okachi kualkan ajsi itech Kali kampa tiMosentiliaj uan maj kintajpalo oksekin, maj tanankiliani itech nechikolmej, maj okachi tanojnotsa iniuan tokniuan uan maj kitemouani keniuj kinpaleuis oksekin. Keman Jordan kichiuak tein kiyolmajxitijkej kipaleuij maj kiseliani okseki tekimej itech nechikol uan no maj okachi kintasojtani tokniuan. Kiajsikamatik ke keman se tokniuj kiixtaliaj kemej tapaleuijkej itech nechikol, amo ijkuak peua kinpaleuia tokniuan, ta ipa kichiujtokya uan kisentoka kichiua (1 Tim. 3:8-10, 13).

13. ¿Toni kipaleuij Christian maj oksepa mochiua tayekankej?

¹³ ¿Tiontekitik kemej tayekankej oso tapaleuijkej ne uejkauj? Jehová amo kielkaua tein tikonchiuak nion keyej tikonchiuak (1 Cor. 15:58). Uan kisentoka kiita keniuj tikontasojta yejuatsin uan tokniuan. Se tokniuj akin monotsa Christian tel amo kuali momachilij keman kiluijkej ke amo yeskiaok tayekankej. Sayoj ke amo mosenkauak, yejua kijtoua: “Nikixtalij ke maski amo nitekitiskiaok kemej tayekankej, niksentokaskia nikchiuaskia nochi tein niueliskia porin niktasojta Jehová”. Satepan oksepa kiixtalijkej kemej tayekankej. Christian kijtoua: “Amo  nikmatia ox oksepa ueliskia nikchiuas. Sayoj ke komo Jehová nechikneliaya uan kinekia maj oksepa nitekiti kemej tayekankej, nikchiuaskia porin niktasojta yejuatsin uan tokniuan”.

14. ¿Toni techmachtia tein kijtoj se tokniuj siuat de Georgia?

¹⁴ Tiitekitikauan Dios no tikintasojtaj akin amo itaixpantijkauan Jehová (Mat. 22:37-39). Se tokniuj siuat de Georgia, akin monotsa Elena, kijtoua: “Achto sayoj nitanojnotsaya porin niktasojta Jehová. Sayoj ke, keman okachi niktasojtaya noTajtsin, no okachi nikintasojtaya oksekin. Niknemiliaya toni ouijkayomej kipiayaj uan toni kiuelitaskiaj ika tajtoskej. Keman ijkon nitanemiliaya okachi niknekia nikinpaleuis” (Rom. 10:13-15).

15, 16. Ijkon kemej kinextiaj taixkopimej, ¿keniuj tapaleuia keman tiknextiaj ke titetasojtaj?

¹⁵ Keman tikintasojtaj tokniuan no kinpaleuia oksekin. Keman mochiujtoya ueyi kokolis COVID-19, Paolo uan isiuatsin kinpaleuijkej miakej tokniuan siuamej akin xiuejkejya maj kuali kikuikan inintableta oso inincelular para maj ika tanojnotsakan. Semej de yejuan ouij kikisaya kikuis itepos, sayoj ke momachtij uan kinyoleuak ichankauan maj touan mosentilikan keman tikelnamikij imikilis Cristo. Mosentilijkej 60 ika Zoom. Tein kichiujkej Paolo uan isiuatsin kipaleuij nejin tokniuj uan ichankauan. Satepan, tokniuj kitajkuilouilij Paolo: “Tasojkamatik  porin titechmachtij akin tixiuejkejya, amo keman nikelkauas keniuj Jehová toka motekipachoj uan nochi tein monekik nankichiuaskej para nantechpaleuiskej”.

¹⁶ Nejin tein panok kimachtij Paolo se taman tein motelneki. Yejua uelik kiitak ke okachi moneki maj se tetasojta ke se kimatis oso uelis se kichiuas miak taman, uan no kijtoj: “Seki xiujmej nikinkalpanoj nechikolmej itech circuito. Tokniuan xa amo kielnamikij nochi tanojnotsmej tein niktemakak, sayoj ke kemaj kielnamikij keniuj nikinpaleuij”.

17. ¿Akoni okachi kipaleuia keman titetasojtaj?

¹⁷ Keman tiknextiaj ke titetasojtaj, no techpaleuia tejuan. Ijkon kinextia tein kipanok Jonathan akin nemi Nueva Zelanda. Se sábado keman tel tonaya kiitak ke se precursor tanojnotstoya iselti. Jonathan kiixtalij tanojnotsas nochi sábados tiotak iuan nejin tokniuj. Yejua amo kimatia ke tein yaya kichiuati semi kipaleuiskia. Jonathan kijtoua: “Amo nikuelitaya nitanojnotsas, sayoj ke keman nikitaya keniuj nejon precursor tel kuali tamachtiaya uan tel miakej kinmachtiaya, okachi peuak nikuelita nitanojnotsas uan no nikajsik se notasojikniuj akin semi nechpaleuij maj okachi niktekitili Dios, maj nikuelita nitanojnotsas uan maj kuali nimouika iuan Jehová”.

18. ¿Toni kineki Jehová maj tikchiuakan?

¹⁸ Jehová kineki maj tinochin tiktasojtakan yejuatsin uan oksekin. Kemej tikitakejya, para tiktasojtaskej Jehová moneki tikixtajtoltiskej iTajtol, itech titanemiliskej uan tiktataujtiskej mojmostaj. Uan para tiknextiskej ke tikintasojtaj tokniuan moneki tikinpaleuiskej ika tein kinpoloua. Keman okachi titetasojtaskej, okachi kuali timouikaskej iuan Jehová uan iniuan tokniuan. ¡Uelis kuali timouikaskej iniuan nochipaya!