1. ¿Keyej tiitekitikauan Dios moneki timochiuaskej kemej seki koujmej? (No xikonita taixkopin).

 “KOMO se kouit kuetaxtik, amo ijsiujka kiposteki ejekat”. Nejin kinextia ke se kouit moneki yeski kuetaxtik uan mokelpachos para amo postekis keman chikauak taejekas. Tejuan no moneki kemej yeskia timokuetaxoskej oso timokelpachoskej para tiyolpakiskej keman tiktekitiliskej Jehová maski tikpiaskej ouijkayomej, ¿keniuj? Keman amo timosenkauaj maski mopatas teisa, uan keman tikpoujkaitaj tein kinemiliaj uan tein kiixtaliaj kichiuaskej oksekin.

2. ¿Toni techpaleuis maj amo timosenkauakan keman mopatas teisa, uan toni tikitaskej itech nejin tamachtilis?

² Tinochin akin tiktekitiliaj Jehová tiknekij tiyeskij tiyolyemankej, titeikneliskej uan amo tiktemoskej maj nochipa mochiua tein tiknemiliaj. Itech nejin tamachtilis tikitaskej keniuj nejin taman kinpaleuij seki tokniuan maj amo mosenkauakan keman mopatak kemej nemiaj uan keniuj tejuan no uelis ijkon tikchiuaskej. Sayoj ke yekinika timomachtiskej keniuj Jehová uan Jesús amo kitemouaj maj nochipa mochiua tein yejuan kinemiliaj.

3. ¿Keniuj tikmatij ke Jehová amo kitemoua maj nochipa mochiua tein kinemilia?

³ Biblia kijtoua ke Jehová kemej yeskia se “Tepejxit” porin kuali ijkatok uan amo teyi ueli kiolinia (Deut. 32:4). Sayoj ke amo no kitemoua maj nochipa mochiua tein kinemilia. ¿Keniuj tikmatij? Keman itech taltikpak mopata miak taman, Jehová no kipata seki taman para maj mochiua tein kinejneki. Uan kemej Jehová techchijchiuak kemej yejuatsin, tejuan no ueli timopataj keman mopata teisa. Maski tikpiaskej ouijkayomej, nochipa tikmatiskej toni tikchiuaskej porin Jehová  techmakani tayolmajxitilismej itech Biblia tein amo ouij moajsikamatij. Tein kichiua uan tein techyolmajxitia kinextia ke maski Jehová kemej yeskia se tepejxit amo kitemoua maj nochipa mochiua tein yejua kinemilia.

4. Xikonijto se taman tein kinextia ke Jehová teajsikamati (Levítico 5:7, 11).

⁴ Itanauatiluan Jehová nochipa tapaleuiaj uan ueli se kintakamati. Yejuatsin amo techchikaujkauia nion techtajtania maj tikchiuakan tein amo tiuelij. Maj tikitakan keniuj Jehová kuali kinajsikamatia israelitas. Dios amo kinchikaujkauiaya maj kitemakanij sayoj se taman akin kipiayaj tomin uan akin amo. Itech iTanauatil Moisés kijtouaya toni ueliskia kitemakaskej sejsemej (xikonixtajtolti Levítico 5:7, 11).

5. Xikonijto keniuj Jehová kinextij ke yolyemanik uan teiknelia.

⁵ Jehová teajsikamati porin yolyemanik uan teiknelia. Kinextij ke katka yolyemanik keman yaya kinixpoloti akin nemiaj Sodoma. Kintitanik seki ángeles maj kiluitij Lot maj cholo hasta kampa yetokej tepemej, sayoj ke Lot mouia yas ompa. Yejua ika motataujtij maj yejua uan ichankauan yanij Zóar, se xolal tein Dios no yaya kiixpoloti. Jehová amo kichikaujkauij Lot maj kitakamati tein kinauatijka uan kikauak maj youi Zóar maski amo kiixpoloskiaok nejon xolal (Gén. 19:18-22). Miak xiujmej satepan, Jehová no kinextij ke kinikneliaya akin nemiaj ompa Nínive. Kititanik tanauatijkej Jonás para maj kiniluiani ke Jehová yaya kinixpoloti porin kichiujtoyaj tein amo kuali. Sayoj ke keman ninivitas moyolpatakej, Jehová kintapojpoluij uan amo kinixpoloj (Jon. 3:1, 10; 4:10, 11).

6. ¿Toni kinextia ke Jesús teajsikamati kemej Jehová?

⁶ Jesús teajsikamati kemej Jehová, uan ijkon kinextij keman yetoya nikan taltikpak. Se tonal kipaleuij se siuat akin amo katka israelita maski kinauatijkaj maj kinpaleui “sayoj israelitas, akin kemej yeskia ichkamej tein poliujtokej”. Nejon siuatsin kitataujtij maj kipajti isiuapil akin ‘kipiaya se amokuali ejekat tein semi kitajyouiltiaya’. Jesús kiiknelij uan kipajtij (Mat. 15:21-28). Maj no itech titanemilikan tein Jesús kijtoj tepitsin satepan ke kipeualtij itekiuj. Yejua kijtoj: “Akin nechixtopeua […], nejua no nikixtopeuas” (Mat. 10:33). Sayoj ke amo kiixtopeuak Pedro keman expa kijtoj ke amo kiixmatia. Jesús kimatia ke Pedro moyolpatakaya uan ke amo keman kikauaskia. Satepan ke Jesús oksepa nemik, monextij iixpan Pedro uan xa kiluij ke semi kitasojtaya uan ke kitapojpoluijkaya (Luc. 24:33, 34).

7. Ijkon kemej kijtoua Filipenses 4:5, ¿keniuj tiknekij maj techixmatikan?

⁷ Tikitakejya ke Jehová uan Jesús teajsikamatij. ¿Uan tejuan? Jehová kineki maj no titeajsikamatikan (xikonixtajtolti Filipenses 4:5). Maj timotajtanikan: “¿Kiitaj oksekin ke nikinajsikamati uan  nikpoujkaita tein kinemiliaj? ¿Oso nechixmatij ke amo niteajsikamati uan ke sayoj nikneki maj mochiua tein nejua niknemilia? ¿Nochipa niktemoua maj kichiuakan teisa kemej nejua niknemilia ke kuali yetok? ¿Oso nikaki tein kinemiliaj oksekin uan komo ueli nikaua maj mochiua tein oksekin kijtouaj?”. Komo okachi titeajsikamatij okachi tikchiujtoskej kemej Jehová uan Jesús. Axkan maj tikitakan ome taman kampa moneki tiknextiskej ke titeajsikamatij: keman mopata kemej tinemij uan keman oksekin amo tanemiliaj kemej tejuan uan amo kiixtaliaj tein tejuan tiknekiskiaj.

8. ¿Toni uelis techpaleuis maj tikajsikamatikan ke mopatak kemej tinemij? (No xikonita nota).

⁸ Moneki maj tikajsikamatikan keman mopatas kemej tinemij. Tein mopatas uelis kichiuas maj amo tikmatikan toni tikchiuaskej. Xa keman tikokoxkakuij, amo tikpiajok tomin, oso tekiuanij kichiuaj maj titajyouikan (Ecl. 9:11; 1 Cor. 7:31). Xa no ouij techkisas komo inechikol Jehová techiluia maj titapaleuitij okseko oso maj tikchiuakan okse taman tekit. Sayoj ke uelis titaxikoskej komo tikchiuaj nejin naui taman: 1) maj tikajsikamatikan ke mopatak kemej tinemiaj, 2) maj tiknemilikan toni tikchiuaskej axkan uan amo tein achto tikchiuayaj, 3) maj tiknemilikan tein tikseliskej uan 4) maj tikinpaleuikan oksekin. b Maj tikitakan keniuj tein kinpanok seki tokniuan kinextia ke nejin naui taman semi tapaleuia.

9. ¿Toni kichiujkej seki misioneros para kixikoskej ouijkayomej tein amo kichiayaj?

⁹ Maj tikajsikamatikan ke mopatak kemej tinemiaj. Emanuele uan Francesca tapaleuiaj kemej misioneros, uan kintitankej okse altepet. Keman ompa ajsikej peujkej momachtiaj tajtol tein ompa tajtouayaj uan peuak kinixmatij tokniuan itech nechikol. Sayoj ke peuak ueyi kokolis COVID-19, uan amo uelik mosentilijkejok iniuan tokniuan. Uan no, imomaj Francesca ijsiujkamikik. Francesca semi kinekia kinitatiuj ichankauan, sayoj ke kemej mochiujtoya ueyi kokolis amo uelik yajki. ¿Toni kipaleuij? Yekinika, Emanuele uan Francesca mosentataujtijkej uan kitajtanijkej Jehová maj kinpaleui maj kixikokan ouijkayot uan maj amo moteltayokoltikan. Itechkopa inechikol, Jehová kinpaleuij keman okachi monekia. Semi kinyolchikauak tein kijtoj se tokniuj itech se video, yejua kijtoj: “Komo niman tiktemouaj timomatiskej kemej axkan timoajsij, niman oksepa peua tiyolpakij uan okachi amo ouij tikajsij keniuj titepaleuiskej”. c Ojpatika, kiixtalijkej okachi kuali tanojnotsaskej ika teléfono uan hasta peuak kimachtiaj aksa ika Biblia. Uan expatika, mokaujkej maj tokniuan kinpaleuianij uan semi kintasojkamatilijkej porin kintasojtayaj. Se tokniuj siuat akin semi tetasojta kinijkuilouiliaya se texto den Biblia uan kintitaniliaya, ijkon kichiuak se xiuit. ¿Toni techmachtia nejin? Komo tikajsikamatij ke mopatak kemej tinemij, tiyolpakiskej ika tein ueli tikchiuaj.

10. ¿Toni kichiuak se tokniuj siuat keman mopatak seki taman?

¹⁰ Maj tiknemilikan toni tikchiuaskej axkan uan tein uelis tikseliskej. Christina, se  tokniuj siuat de Rumania akin axkan nemi Japón, semi moyolkokoj porin inechikol kampa tajtouayaj inglés ixpoliuik. Maski ijkon, yejua amo sayoj itech tanemiliaya tein panoka, ta kinemilij okachi tapaleuis itech se nechikol kampa tajtouaj japonés uan peuak okachi tanojnotsa itech nejon tajtol. Kiluij se siuat akin achto iuan tekitia maj kipaleui maj okachi ueli tajto japonés ika Biblia uan folleto Tiyolpakiskej nochipaya, uan siuat kinekik. Christina okachi peuak tajtoua japonés. Uan siuat akin achto iuan tekitia kinekik momachtis Biblia. ¿Toni techmachtia? Komo amo sayoj ika titanemiliaj tein techpanok uan tiknemiliaj tein tikseliskej, tiyolpakiskej maski mopatas teisa.

11. ¿Toni kichiujkej se tokniuj uan isiuatsin keman amo kipiayajok tomin?

¹¹ Maj tikinpaleuikan oksekin. Itech altepet kampa amo techkauaj maj titanojnotsakan peuak tasojti tomin, yejua ika se tokniuj uan isiuatsin kipanokej seki ouijkayomej porin amo kipiayajok tekit. ¿Toni kinpaleuij maj taxikokan? Yekinika, amo semi kikouayajok miak taman. Uan ojpatika, amo semi itech tanemiliayaj tein kipanotoyaj, ta kinpaleuiayaj oksekin keman okachi tanojnotsayaj (Hech. 20:35). Tetakauj kijtoj: “Kemej okachi tiktekitiliayaj Dios, amo tikpiayaj tiempo para itech titanemiliskej tein amo kuali tein techpanotoya”. ¿Toni techmachtia nejin? Ke komo mopata kemej tinemiaj, maj tikelnamikikan ke moneki maj tikinpaleuikan oksekin, uan uelis okachi tikinpaleuiskej keman tikinnojnotsaskej ika Biblia.

12. ¿Keniuj techpaleuia tein kichiuak Pablo maj titeajsikamatikan keman titanojnotsaj?

¹² Keman tikteixmatiltiaj iTajtol Dios, moneki titeajsikamatiskej. Porin akin tikinnojnotsaj tataman tein kineltokaj, tein kinemiliaj uan kayomej itech tataman xolalmej. ¿Keyej moneki tikchiuaskej kemej tatitanil Pablo? Porin yejua teajsikamatia uan kimatia keniuj kinnojnotsas oksekin. Jesús kititanik “iniuan akin amo judíos” (Rom. 11:13). Yejua ika Pablo kinnojnotsak judíos, griegos, akin motelmachtijkaj, uejueyichiuanimej, tekiuanij uan kuoujtajtekitinij. Para ueliskia kinpaleuis akin kinnojnotsaya maski katkaj tatamamej Pablo mochikauak ‘mochiuas kemej yejuan’ (1 Cor. 9:19-23). Keman kinnojnotsaya kielnamikia kani ualeuayaj uan tein kineltokayaj. ¿Toni techmachtia nejin? Okachi techkakiskej keman titanojnotsaj komo tikmatij keniuj tikchiuaskej uan tiknemiliaj keniuj uelis tikinpaleuiskej.

13. ¿Keyej semi moneki maj tikpoujkaitakan kemej tanemiliaj oksekin? (1 Corintios 8:9).

¹³ Komo amo tiktemouaj maj nochipa mochiua tein tiknemiliaj, amo ouij techkisas tikpoujkaitaskej tein kinemiliaj oksekin. Tikmatij ke seki tokniuan siuamej kiuelitaj moixchijchiuaskej oso moixpintaroskej uan sekin amo. Seki tokniuan kiuelitaj kiyekoskej tein teuintij, sayoj ke oksekin amo kinekij tayiskej, uan oksekin tataman kemej moyekpiaj para amo kokolispeuaskej. Komo nochipa tiknemiliaj ke tein tikijtouaj yejua tein okachi kuali uan tikchiuaj maj oksekin no tanemilikan kemej tejuan, uelis tikinuetsiltiskej uan tikchiuaskej maj amo kuali mouikakanok iniuan tokniuan itech nechikol. ¡Tel amo kualtsin yeskia maj pano nejon! (Xikonixtajtolti 1 Corintios 8:9; 10:23, 24). Komo tikchiuaj tein Biblia tayolmajxitia  techpaleuis maj kuali titaixejekokan uan maj kuali timouikakan iniuan oksekin. Maj tikitakan ome taman kemej uelis ijkon tikchiuaskej.

14. ¿Toni tayolmajxitilis techpaleuis maj tikmatikan keniuj timochijchiuaskej uan timotakentiskej?

¹⁴ Kemej timotakentiaj uan kemej timochijchiuaj. Jehová amo techiluia toni tasal uelis timotaliliskej, sayoj ke techyolmajxitia keniuj uelis timotakentiskej. Kemej timotakentiaj moneki kiueyitalis Dios, moneki kinextis ke amo tikchiuaj tein tejuan tiknemiliaj uan maj kinexti ke ‘tiyektalnamikij uan amo timotelpanoltiaj’ (1 Tim. 2:9, 10; 1 Ped. 3:3). Amo tiknekij maj sayoj kiitakan keniuj timotakentiaj. Tein Biblia tayolmajxitia no uelis kinpaleuis tokniuan tayekananij maj amo yejuan kiixtalikan keniuj timotakentiskej uan timoxiluiskej. Itech se nechikol seki telpochmej kitekiaj inintson uan moxiluiayaj kemej oksekin akin amo momachtiayaj. Tokniuan tayekananij monekia kinpaleuiskej. Sayoj ke amo monekia yejuan kiixtaliskej keniuj moxiluiskej. ¿Keniuj ueliskia kinpaleuiskej? Tokniuj takalpanojkej kinyolmajxitij tayekananij ke ueliskia kiniluiskej nejin: “Komo tipanoua taixpan uan akin takaktokej amo semi kikakij tein tikijtojtok ta okachi mitsitaj tejua, nejon kinextiskia ke amo timotakentia nion timochijchiua kemej kinamiki”. Nejin tapaleuij maj tokniuan telpochmej kiajsikamatinij toni monekia kichiuaskej uan amo tayekananij kiniluijkej. d

15. ¿Toni tanauatilmej uan tayolmajxitilis moneki tikelnamikiskej keman timopajtiskej? (Romanos 14:5).

¹⁵ Kemej se moyekpias para amo se kokolispeuas. Tisejsemej akin tiktekitiliaj  Dios moneki tikixpejpenaskej keniuj timoyekpiaskej (Gál. 6:5). Achto ke timopajtiskej moneki tikelnamikiskej ke Biblia kijtoua ke amo kuali yetok maj tikuikan esti uan naualot (Hech. 15:20; Gál. 5:19, 20). Yejua nejin tein okachi tayekantok. Uan okseki taman tisejsemejya moneki tikixpejpenaskej. Seki tokniuan kitemouaj tapajtijkej para maj kinpajti uan sekin mopajtiaj ika okseki taman. Maski tejuan tiknemiliaj ke se taman pajti okachi kuali, moneki tikinpoujkaitaskej tokniuan uan amo tikinchikaujkauiskej maj kichiuakan tein tejuan tikchiuaj. Yejua ika semi techpaleuis komo tikelnamikij nejin naui taman: 1) sayoj iTaixyekanalis Dios senkis kiajchiuas nochin kokolismej (Is. 33:24); 2) maj sejse tokniuj kiita toni okachi kipaleuis (xikonixtajtolti Romanos 14:5); 3) maj amo tikinijijtokan tokniuan ika tein kiixtaliskej kichiuaskej nion maj tikchiuakan maj tajtakokan (Rom. 14:13), uan 4) akin tikchiuaj kemej Cristo timotasojtaj uan tikitaj ke okachi moneki maj kuali timouikakan iniuan tokniuan itech nechikol uan amo tein tejuan tiknemiliaj (Rom. 14:15, 19, 20). Komo nochipa tikelnamikij nejin naui taman, tapaleuis maj itech nechikol nochin kuali timouikakan.

16. ¿Keniuj tayekananij uelis kinextiskej iniuan okseki tayekananij ke amo kitemouaj maj nochipa mochiua tein yejuan kinemiliaj? (No xikonita taixkopimej).

¹⁶ Tokniuan tayekananij moneki kinextiskej ke amo kitemouaj maj nochipa mochiua tein kinemiliaj (1 Tim. 3:2, 3). Se tokniuj tayekankej amo moneki nochipa kichias maj kichiuakan tein yejua kijtoua sayoj porin okachi xiuejya ke oksekin. Yejua kimati ke ichikaualis Jehová uelis kichiuas maj okse tokniuj tayekankej kijto teisa tein okachi tapaleuis. Uan tokniuan tayekananij akin amo kitemouaj maj nochipa mochiua tein kinemiliaj, kiseliaj tein moixtalia maski no taman kemej tanemiliaj.

17. ¿Keniuj techtatiochiuia Jehová keman tikchiuaj kemej yejuatsin?

¹⁷ Keman amo tiktemouaj maj nochipa mochiua tein tejuan tiknekij Jehová semi techtatiochiuia. Okachi kuali timouikaj iniuan tokniuan itech nechikol, no tiyolpakij porin itech inechikol Jehová semi titatamamej uan tataman kemej titanemiliaj. Uan no tiyolpakij porin tikchiujtokej kemej Jehová, Dios akin amo kitemoua maj nochipa mochiua tein yejuatsin kinemilia.