Nopaj taixyekanaya itech Iglesia Unida de Canadá. Yejua ika nochi domingos kualkan techtitania iuan nokniuj siuapil para maj techmachtikan ika Biblia iniuan okseki konemej. A las 11 kualkan techuikaya tiopan maj titaueyichiuatij uan tiotak tiayaj iuan nomaj itech Kali kampa tiMosentiliaj. Niman tikitakej ke nejin ome taneltokalismej semi tatamamej katkaj.

Nomaj kintapouij tein momachtijtoya Bob Hutcheson uan isiuatsin Marion, akin tel kuali iniuan mouikaya, uan yejuan no mochiujkej itaixpantijkauan Jehová. Itech xiuit 1958, tokniuan Hutcheson nechuikakej iniuan eyi ininkoneuan itech ueyi nechikol kampa mosentiliaj akin ualeuaj itech tataman altepemej, tein monotsak “Voluntad Divina”, tein mochiuak ompa Nueva York uan uejkauak chikueyi tonalmej. Axkan nikajsikamati ke semi ouij katka maj no nechuikanij, uan semi niktasojkamati porin nejon ueyi nechikol amo keman nikelkaua.

Keman katka nitelpoch tinemiaj kampa kiniskaltiayaj tapialmej uan semi nikuelitaya nikinyekpias. Hasta niknemiliaya nimomachtis keniuj nikinpajtis tapialmej. Nomaj kitapouij se tayekankej itech nechikol tein niknekia nikchiuas uan nejon tokniuj nouan tajtoj. Nechelnamiktij ke tinemij itech “tonalmej keman tatamitiya”, uan nechiluij ox niknemilijkaya tein ueliskia panos komo miak xiujmej niaya  universidad porin xa kichiuaskia maj nikaua Jehová (2 Tim. 3:1). Semi niknemilij tein nechiluij uan nikixtalij okachi kuali amo nias.

Sayoj ke amo nikmatia toni nikchiuaskia keman amo nimomachtiskiaok. Nochi sábados uan domingos yaya nitanojnotsati maski amo semi nikuelitaya uan amo no niknekia nimochiuas precursor. Nopaj uan notío akin amo katkaj itaixpantijkauan Jehová, nechyolchikaujkej maj nitekititi Toronto itech se ueyi kali tein miakej kiixmatij uan kampa miakej tekitij. Notío kipiayaj se kuali tekit ompa, uan niknekik nias nitekititiuj.

Nitekitia nochi tonal uan hasta horas tein amo ixyetoyaj, uan no semi nietoya iniuan akin amo katkaj itaixpantijkauan Jehová. Nejon kichiuaya maj amo semi nioujok nechikolmej uan maj amo nitanojnotsati. Itech nejon xiujmej ninemia iuan noueyitat akin amo no katka itaixpantijkauj Jehová, sayoj ke satepan ke momikilij monekik niktemos kani ninemitiuj.

Tokniuan Bob uan Marion akin nechuikayaj ueyi nechikol itech xiuit 1958, nechyoleujkej maj iniuan ninemiti uan nechpaleuijkej maj kuali nimouika iuan Jehová, yejuan kemej yeskiaj notatuan. Itech xiuit 1960 nimoauij iuan semej ininkoneuan akin monotsa John. Uan kemej John mochiuak precursor, nimoyolchikauak okachi nitanojnotsas. Tokniuan kiitakej ke tel kuali nitekititoya yejua ika nechixtalijkej maj nikixyekana nechikol tein axkan tikixmatij kemej Tonemilis uan Totanojnotsalis.

Itech xiuit 1966, nimonamiktij iuan Randi Berge, se precursora akin semi kiuelitaya tapaleuis kampa monekiaj tanojnotsanij. Tokniuj akin takalpanoua itech circuito techpaleuij uan techyolchikauak maj titapaleuitij itech nechikol Orillia ompa Ontario. ¡Tikuikej tein tikpiayaj uan tiajkej!

Kemej nosiuatsin Randi semi yolpakia tanojnotsas no nikixtalij nimochiuas precursor keman tiajsikej ompa Orillia, uan nimochikauak okachi kuali nitamachtis. Semi niyolpakia keman nikinpaleuiaya oksekin ika Biblia maj kiixmatikan tein melauak. Semi nikuelitak nikinpaleuis se takatsin iuan isiuatsin de Orillia akin semi yolkualmej katkaj, yejuan  kipatakej kemej nemiaj uan motemaktijkej iuan Jehová.

Keman niajka Toronto, nikixmatik Arnold MacNamara, semej tokniuan akin taixyekanayaj ompa Betel. Yejua nechtajtanij ox tikuelitaskiaj titapaleuiskej kemej precursores especiales. Niman niknankilij: “Kemaj, sayoj ke amo nikneki nias Quebec”. No nikinchikoitaya canadienses akin nemiaj Quebec uan tajtouayaj francés, ijkon kemej kichiuayaj canadienses akin tajtouayaj inglés. Itech nejon xiujmej, akin nemiaj Quebec peuak kiixnamikij tekiuaj porin amo kinekiajok pouiskej iniuan oksekin akin ompa nemiaj.

Arnold nechnankilij: “Betel sayoj kintitantok precursores especiales ompa Quebec”. Amo teyi nikijtojok uan nikiluij ke kemaj. Ipa nikmatiaya ke Randi kinekia yas tapaleuitiuj ompa. Satepan nikitak ke tel kuali katka tein tikixtalijkej tikchiuaskej.

Satepan ke techmachtijkej tajtol francés makuil semanas, nejua uan Randi techtitankej iuan okse tokniuj uan isiuatsin maj tiakan Rimouski, tein moajsi kemej 540 kilómetros kampa ika ualkisa tonaltsin ompa Montreal. Sayoj ke ayamo semi kuali nitajtouaya francés. Uan keman itech nechikol nikixtajtoltij seki tanauatilmej, nikijtoj ke itech ueyi nechikol tein tikpiaskiaj techkalpanoskiaj “avestruces akin uejka kayomej”, uan amo nikijtoj “austriacos akin uejka kayomej”.

Ompa Rimouski amo tinemiaj sayoj akin iniuan tiajkej, ta no iniuan naui tokniuan akin amo kipiayaj inintakauj, yejuan semi kiuelitayaj tanojnotsaskej, uan no tinemiaj iniuan kalyetonij Huberdeau akin kinpiayaj ome ininsiuapipiluan. Nejin kalyetonij nemiaj itech se kali tein kipiaya chikome cuartos uan nochin tiksenixtauayaj renta. Kemej nochi tepamit katka istak, tikiluiayaj “Istak Kali”. Kemansa ompa tinemiaj tidocejmej hasta ticatorcejmej. Kemej Randi uan nejua titapaleuiayaj kemej precursores especiales, titanojnotsayaj desde kualkan hasta youak. Semi tiktasojkamatiaj porin nochipa touan tanojnotsaya aksa, maski hasta tiotak katka uan taseseyaya.

Tel kualtsin timouikayaj iniuan nejon precursores akin tel tekitiaj, hasta tikinitayaj kemej tochankauan. Kemansa tikchiuayaj tit uan ompa tisenyetoyaj uan tikpiayaj se tonal keman tikchijchiuayaj pierogis, se taman empanada tein tikijtitaliliayaj tein tikueliliskiaj. Semej tokniuan tatsotsonaya, yejua ika kemansa itech sábado timijtotiayaj uan ticantarouayaj.

Miakej akin nemiaj Rimouski kinekiaj okachi momachtiskej Biblia. Semi tiyolpakiaj porin itech makuil xiujmej miakej akin tikinmachtiayaj ika Biblia moauijkej, uan itech nechikol peuak miakiaj, hasta ajsikej 35 tanojnotsanij.

Keman tietoyaj ompa Quebec techpaleuij maj okachi kuali titanojnotsakan. Tikitakej keniuj Jehová techpaleuij keman ompa titapaleuijtoyaj uan techmakak nochi tein techpolouaya. Uan no, kuali tikinixmatkej akin tajtouaj francés, uan semi tikuelitakej kemej tajtouayaj uan kemej nemiaj. Nejin techpaleuij maj amo titechikoitakanok uan maj no tikintasojtakan oksekin akin amo nemij kemej tejuan (2 Cor. 6:13).

Satepan, Betel techtajtanij ox ueliskia tiaskej Tracadie, se xolaltsin tein yetoya kampa ika ualkisa tonaltsin ompa Nueva Brunswick. Nejin amo tikchiayaj uan ouij techkisak porin tikfirmarojkajya se amat kampa kijtouaya ke tinemiskiaj itech se kali, uan no nimotenkaujkaya nitamachtis seki horas  itech se escuela. Uan no, miakej akin tikinmachtiayaj ika Biblia yankuixtok mochiujkaj tanojnotsanij uan tikchijchiujtoyaj se yankuik Kali kampa tiMosentiliaj. Yejua ika tel ouij techkisak tikixtaliskej ox tiaskej oso amo.

Nochi itamian semana tikiluijkaj Jehová tein techtekipachouaya. Tiajkej Tracadie uan tikitakej ke semi taman katka ke Rimouski. Sayoj ke tikijtojkej ke kemej Jehová kinekia maj ompa titapaleuikan, ompa tietoskiaj. Tikaujkej maj Jehová techpaleui uan tikitakej keniuj kichiujtiajki (Mal. 3:10). Randi motemakaya tapaleuis uan yolpakia porin kuali mouikaya iuan Jehová, uan nejon techpaleuij maj amo ouij techkisa timokalpataskej.

Ompa Tracadie sayoj moajsia se tayekankej, Robert Ross. Yejua uan isiuatsin Linda yajkej tapaleuitoj ompa kemej precursores, uan satepan ke yolik yekinika ininkonetsin kiixtalijkej ompa mokauaskej. Maski amo semi kemantiaj porin kiyekpiayaj ininkonetsin, semi techyolchikaujkej, porin kuali teseliayaj, taxikouayaj uan yolpakiaj keman tanojnotsayaj.

Keman tikuikayajya ome xiuit ompa Tracadie techiluijkej maj tikchiuakan okse taman tekit tein amo tikchiayaj: maj titakalpanokan itech circuito. Chikome xiujmej titakalpanojkej itech nechikolmej kampa tajtouaj inglés, uan satepan techtitankej maj titakalpanotij itech se circuito kampa tajtouaj francés ompa Quebec. Tokniuj Léonce Crépeault, akin takalpanouaya itech distrito nechiluiaya ke kuali niktemakaya tanojnotsmej. a Sayoj ke satepan kijtouaya: “¿Toni uelis tikchiuas para maj motanojnots okachi tapaleui?”. Ika tein nechiluiaya nechpaleuij maj notanojnots okachi moajsikamati uan maj tapaleui.

Nochipa nikelnamiki ueyi nechikol kampa mosentiliaj akin ualeuaj itech tataman altepemej, tein mochiuak ompa Montreal itech xiuit 1978 tein monotsak “Fe Victoriosa”. Nitekitik kampa mochijchiuaya takual uan tikchiayaj maj mosentilikan kemej 80 mil. Sayoj ke taman kemej yaya tikintamakatij, nochi mopataka: tein yaya tiktemakatij, máquinas, uan kemej tikchijchiuaskiaj. Tikpiayaj 20 uejueyi refrigeradores, sayoj ke kemansa amo kualtiayaj. Se tonal achto ke peuaskia ueyi nechikol, amo uelik tikalakkej para titachijchiuaskiaj, porin tajtankaj ompa mauiltiskej uan techkaujkej maj tikalakikan hasta tajkoyouan, uan monekia tikxotaltiskej hornos achto ke tanesiskia para tikchijchiuaskiaj tein kikuaskiaj kualkan. Semi tisioujkej, sayoj ke nechmachtij miak taman keman nikitak ke akin iniuan nitekitik, semi  takuaujtamatiaj uan yolpakiaj. Tein nechpanok nechpaleuij maj kuali nimouika iniuan nejon tokniuan uan hasta axkan kuali timouikaj. Amo keman nikelkaua nejon ueyi nechikol tein tikpiakej ompa Quebec, kampa itech xiujmej 1940 uan 1960 techtajyouiltijkej akin semi techtauelitayaj.

Uan keman mochiuak okseki uejueyi nechikolmej ompa Montreal no nimomachtij miak taman keman nikitaya tein kichiuayaj okseki takalpanouanij. David Splane, akin axkan poui iniuan Oloch Taojtokaltianij kiixyekanak se ueyi nechikol. Satepan keman mochiuak okse ueyi nechikol, nejua nitaixyekanak, uan David semi nechpaleuij.

Titakalpanojkej itech circuito 36 xiujmej, uan satepan itech 2011 nechyoleujkej maj no niktemaka Tamachtilis tein kiseliaj Tayekananij. Itech ome xiuit, Randi uan nejua tikpapatakej 75 camas kampa tikochiaj. Maski ouij katka, amo nenkaj tein tikchiujkej. Itamian semana, keman tamia tamachtilis, tayekananij semi motasojkamatiaj porin kimachiliayaj ke tokniuan Oloch Taojtokaltianij kinpaleuiayaj maj kuali mouikakan iuan Jehová.

Satepan nechixtalijkej maj niktemaka tamachtilis tein kiseliaj akin kiteixmatiltiaj iTaixyekanalis Dios. Miakpa, akin momachtiayaj semi motekipachouayaj uan siouiaj porin monekia momachtiskej chikome horas, kichiuaskej tarea eyi hora youak uan momachtiskej naui oso makuil taman tamachtilis tein kipanoltiskiaj itech sejse semana. Nejua uan okse tokniuj akin no tamachtiaya tikiniluiayaj ke sayoj ueliskia kichiuaskej komo Jehová kinpaleuiaya. Amo keman nikelkaua keniuj kimojkaitayaj keman kiitayaj ke komo kitemouayaj maj Jehová kinpaleui, ueliaj kichiuayaj okachi ke tein kinemiliayaj.

Kemej nomaj semi ininka motekipachouaya akin kinmachtiaya ika Biblia, nejon tapaleuij maj kinekikan kitekitiliskej Jehová, uan no tapaleuij maj nopaj kiseliani tamachtilis tein melauak. Eyi tonal satepan ke nomaj momikilij, nopaj kichiuak teisa tein tikmojkaitakej: ajsik itech Kali kampa tiMosentiliaj para kikakis se tanojnots. Uan peuak youi nochi nechikolmej, ijkon kichiuak 26 xiujmej. Maski amo keman moauij, tayekananij nechiluijkej ke yejua akin achto ajsia itech Kali kampa tiMosentiliaj.

Nomaj nochipa technextilij keniuj monekia tikueyichiuaskej Jehová nejua uan eyi nokniuan siuamej. Yejuan uan inintakauan kitekitiliaj Jehová. Omen yetokej Betel: se yetok Portugal uan okse Haití.

Randi uan nejua oksepa titapaleuiaj kemej precursores especiales nikan Hamilton (Ontario). Keman titakalpanouayaj itech circuito, semi tikuelitayaj iniuan tiaskej tokniuan maj takalpanotij uan maj tamachtitij. Sayoj ke axkan tiyolpakij no titamachtiskej uan tikitaskej keniuj akin tikinmachtiaj okachi kitasojtaj Jehová. No okachi kuali tikinixmatij tokniuan itech nechikol, uan no techyolchikaua tikitaskej keniuj Jehová kinyekpia keman kuali yetokej uan keman amo.

Semi tiktasojkamatij keman tikelnamikij keniuj miakej toka motekipachojkej. Tejuan no semi timochikauaj ininka ‘timotekipachoskej’ oksekin keman tikinyolchikauaj maj okachi kitekilikan Jehová (2 Cor. 7:6, 7). Yetoyaj se kalyetonij akin temomaj, teokichpil uan tesiuapil katkaj precursores. Niktajtanij tepopaj ox amo kinemiliaya no mochiuas precursor. Sayoj ke nechiluij ke yejua kinpaleuijtoya ichankauan. Niktajtanij: “¿Amo tiknemilia ke Jehová okachi kuali kinyekpias ke tejua?”. Nikyolchikauak maj kiyejyeko kichiuas tein ichankauan kichiujtoyajya uan yolpakiaj, uan tajko xiuit satepan mochiuak precursor.

Randi uan nejua tiksentokaskej tikintapouiskej “akin nemiskej satepan” ‘ikualtsin tachiualis’ Jehová, uan tikchiaj maj no yolpakikan kitekitiliskej yejuatsin ijkon kemej tejuan tiyolpakinij (Sal. 71:17, 18).