TAMACHTILIS 31
“Xiksentokakan xiyekijkatokan, amo ximotsinkixtikan”
“Nokniuantsitsin, xiksentokakan xiyekijkatokan, amo ximotsinkixtikan” (1 COR. 15:58).
NEKUIKATIL 122 Maj tiksentokakan tiktekitilikan Dios
TEIN MOITAS a
1, 2. ¿Keniuj no titamatij kemej uejkapan kali tein kichijchiujkej ompa Tokio? (1 Corintios 15:58).
ITECH xiuit 1978, peuak kichijchiuaj se uejkapan kali tein kipiaya 60 pisos ompa Tokio (Japón). Keman kiitayaj, miakej motajtaniayaj ox taxikoskia porin semi talolinia. Sayoj ke amo keman uetsik. ¿Keyej? Porin ingenieros kichijchiujkej kemej no uelis moolinis keman talolinis uan kuali yekijkatos. Akin tikchiuaj kemej Cristo titamatij kemej nejon uejkapan kali. ¿Keniuj?
2 Akin kitekitilia Jehová moneki kemej yeskia kuali yekijkatos oso kiixtalis nochipa kitakamatis itanauatiluan Jehová, sayoj ke amo no moneki kitemos maj nochipa mochiua tein kinemilia (xikonixtajtolti 1 Corintios 15:58). Moneki ‘niman kitakamatis’ Dios uan amo keman kitapanauilis itanauatiluan. Sayoj ke ‘amo no moneki nochipa kitemos maj mochiua tein kinemilia’ (Sant. 3:17). Komo ijkon titanemiliaj kuali titaixejekoskej uan amo timotaliliskej tanauatilmej nion tiktapanauiliskej tein Dios technauatia. Itech nejin tamachtilis tikitaskej kemanian kemej yeskia moneki kuali tiyekijkatoskej uan amo timotsinkixtiskej. No tikitaskej makuil taman tein Satanás kikui para kichiuas maj amo tiktakamatikan Jehová uan toni uelis tikchiuaskej.
¿ITECH TONI TAMAN KEMEJ YESKIA MONEKI TIYEKIJKATOSKEJ?
3. ¿Toni technauatia Jehová itech Hechos 15:28, 29?
3 Jehová yejua akin kinamiki maj techmaka tanauatilmej uan nochipa kichiua maj itanauatiluan amo ouij moajsikamatikan (Is. 33:22). Oloch taojtokaltianij itech yekinika siglo kijtoj eyi taman tein akin tikchiuaj kemej Cristo moneki tiktakamatiskej: 1) maj sayoj tikueyichiuakan Jehová uan amo tein kiueyichiuaj nikan taltikpak, 2) maj tikpoujkaitakan esti kemej Jehová technauatia, uan 3) maj tiktakamatikan keman Biblia kijtoua ke sayoj moneki mosentekaskej akin monamiktijkejya (xikonixtajtolti Hechos 15:28, 29). ¿Keniuj uelis tiknextiskej ke tiktakamatij Jehová ika nejin eyi taman?
4. ¿Keniuj tiknextiaj ke sayoj tikueyichiuaj Jehová? (Apocalipsis 4:11).
4 Sayoj tikueyichiuaj Jehová uan amo tein kiueyichiuaj nikan taltikpak. Jehová kinnauatijka israelitas maj sayoj yejuatsin kiueyichiuanij (Deut. 5:6-10). Uan keman Satanás kitemoj maj Jesús motajtakolmaka, yejua kinankilij ke sayoj moneki tikueyichiuaskej Jehová (Mat. 4:8-10). Yejua ika, amo tikinueyichiuaj tatadiosmej. Uan amo no tikueyichiuaj aksa akin taixyekana itech taneltokalis, se tekiuaj, se akin mauiltia, akin tatsotsona oso oksekinok akin semi kinixmatij. Tejuan sayoj tikueyichiuaj Jehová akin ‘kichijchiuak nochi’ (xikonixtajtolti Apocalipsis 4:11).
5. ¿Keyej tikpoujkaitaj tonemilis uan esti kemej Jehová technauatia?
5 Tikpoujkaitaj tonemilis uan esti kemej Jehová technauatia. ¿Keyej? Porin Jehová kijtoua ke toesyo kichiua maj tiyoltokan, uan yejuatsin techtayokolij tonemilis (Lev. 17:14). Keman Jehová tanauatij ke ueliskia se kikuas nakat, kijtoj ke amo ueliskia se kikuas esti (Gén. 9:4). Uan keman kinmakak israelitas iTanauatil Moisés no ijkon kijtoj (Lev. 17:10). Uan itech yekinika siglo kichiuak maj tokniuan oloch taojtokaltianij kinnauatianij tokniuan maj amo kikuikan esti (Hech. 15:28, 29). Tejuan tikixtaliaj tiktakamatiskej nejin tanauatil keman tikixpejpenaj toni taman pajti tikseliskej. b
6. ¿Toni techpaleuis maj tiksentokakan tiktakamatikan Jehová keman technauatia ke moneki tichipaujkanemiskej?
6 Timochikauaj tiktakamatiskej keman Biblia kijtoua ke sayoj moneki mosentekaskej akin monamiktijkejya (Heb. 13:4). Tatitanil Pablo techyolmajxitia ijkon: “Xikmiktikan tein amo kuali tein namotech yetok”. Ika nejin tajtolmej techyolchikaua maj tikixpolokan tein amo kuali tein tiknejnekij. Yejua ika, senkis amo tikitaj nion tikchiuaj teisa tein uelis kichiuas maj tiauilnemikan (Col. 3:5; Job 31:1). Komo tein tiknemiliaj oso tein tikchiuaj ika uelis timotajtakolmakaskej, niman tikixtopeuaj para uelis tiksentokaskej kuali timouikaskej iuan Dios.
7. ¿Toni moneki tikixtaliskej tikchiuaskej uan keyej?
7 Jehová kineki maj ‘tiktakamatikan ika nochi toyolo’ (Rom. 6:17). Tejuan amo ueli tikixpejpenaj katiyejua tanauatil tiknekij tiktakamatiskej, sayoj ke moneki tikelnamikiskej ke tein technauatia nochipa techpaleuia (Is. 48:17, 18; 1 Cor. 6:9, 10). Timochikauaj tikyolpaktiskej Jehová uan titanemiliskej kemej salmista akin kijtoj: “Nikixtalijya nochipaya niktakamatis motanauatiluan” (Sal. 119:112). Tikmatij ke Satanás kichiuas nochi tein uelis para maj amo tiktakamatikan Jehová. ¿Keniuj kichiua?
¿KENIUJ SATANÁS KITEMOUA MAJ AMO TIKTAKAMATIKAN JEHOVÁ?
8. ¿Keyej Satanás kichiua maj techtajyouiltikan?
8 Kichiua maj techtajyouiltikan. Satanás kichiua maj techchikaujkauikan uan maj techtajyouiltikan para amo tiktakamatiskej Jehová, yejua kemej yeskia kineki techkuas, kijtosneki ke kineki maj amo kuali timouikakanok iuan Jehová (1 Ped. 5:8). Tokniuan itech yekinika siglo, kinmojmoujtijkej, kinmagakej, uan kinmiktijkej porin kiixtalijkajya kitakamatiskej Jehová (Hech. 5:27, 28, 40; 7:54-60). Uan axkan, Satanás no kichiua maj techtajyouiltikan. Uan nejin ueli tikitaj porin ompa Rusia uan itech okseki altepemej semi kintajyouiltianij tokniuan. Uan okseki tokniuan tataman kemej kinixnamikij.
9. Xikonijto keyej moneki timoyekpiaskej para maj Satanás amo techuetsilti.
9 Kichiua maj techchikaujkauikan. Satanás amo sayoj techtajyouiltia, ta no kitemoua ‘keniuj techuetsiltis’ (Efes. 6:11). Maj tikitakan tein kipanok Robert keman yetoya tapajtiloyan porin motelkokouaya uan monekia kitekiskej. Yejua kiniluijka tapajtianij ke amo kinekia maj kitalilikan esti. Akin yaya kitekiti kiluijka ke amo kitaliliskia. Sayoj ke se youak achto ke kitekiskiaj, keman ichankauan amo ompa yetoyajok, okse tapajtijkej kiitato uan kiluij ke amo kitaliliskiaj esti, sayoj ke ompa kipiaskiaj seki komo monekiskia. Xa nejon tapajtijkej kinemilij ke kemej ichankauan Robert amo ompa yetoyajok kijtoskia ke kemaj kiselis esti, sayoj ke yejua kiluij ke ipa amo kiseliskia maski ueliskia kipanos teisa.
10. ¿Keyej tel amo kuali yeskia komo tikakij tein kinemiliaj akin amo kitekitiliaj Jehová? (1 Corintios 3:19, 20).
10 Kemej tanemiliaj akin amo kiueyichiuaj Dios. Komo titanemiliaj kemej akin amo kitakamatij Jehová, no peuas tikixtopeuaskej yejuatsin uan itanauatiluan (xikonixtajtolti 1 Corintios 3:19, 20). “Inintamatilis akin nemij nikan taltikpak” kichiua maj tikchiuakan tein tejuan tiknejnekij. Maj tikitakan tein panok itech nechikolmej ompa Pérgamo uan Tiatira. Miakej tokniuan no peuak auilnemij uan kinueyichiuaj tatadiosmej kemej kichiuayaj akin ompaka nemiaj. Jesús kiniluij nejon ome nechikolmej ke tel amo kuali tein kichiujtoyaj porin amo kiitayaj ke tajtakol maj se auilnemi (Apoc. 2:14, 20). Axkan, miakej akin nemij kampa tejuan tinemij kinekij maj no titanemilikan kemej yejuan. Xa tochankauan oso akin tikinixmatij, techyolchikauaskej maj tikchiuakan tein tiknekij uan maj tiktapanauilikan itanauatiluan Jehová. Xa techiluiskej ke kuali yetok maj tikchiuakan tein tiknekij uan ke tein Biblia tanauatia amo tapaleuiaok axkan.
11. ¿Toni amo moneki tikchiuaskej?
11 Kemansa xa tiknemiliskej ke seki taman tein Jehová technauatia moneki okachi techmelauilis. Xa hasta tiknekiskej ‘tikchiuaskej seki taman tein amo ijkuiliujtok’ (1 Cor. 4:6). Ijkon kichiujkej taixyekananij itech taneltokalis akin moajsiaj keman Jesús nemia nikan taltikpak. Kiajxitilijkej iTanauatil Moisés okseki tanauatilmej tein yejuan kiixtalijkaj uan nejon kichiuaya maj oksekin tel ouij kitakamatinij (Mat. 23:4). Sayoj ke keman Jehová technauatia itech iTajtol uan inechikol maj tikchiuakan teisa, nochipa kuali moajsikamati uan amo moneki maj tikajxitilikanok (Prov. 3:5-7). Yejua ika amo tikchiuaj nion teyi tein amo ijkuiliujtok itech Biblia nion tikajxitiliaj tanauatilmej tein amo monekiok para maj oksekin kitakamatikan.
12. ¿Keniuj takajkayaua Satanás?
12 Takajkayaua. Satanás kinkajkayaua uan kinxexeloua oksekin keman kichiua maj kineltokakan ‘ke tein kinemiliaj tapaleuia’ uan keman kichiua maj kinejnekikan “tein kitayekanaltiaj nikan taltikpak” (Col. 2:8). Itech yekinika siglo, Satanás kikuik inintamachtilis tamatinij uan tein tamachtiayaj oksekin, inintamachtilis judíos tein amo moajsia itech Biblia uan tamachtilis tein kijtouaya ke akin kichiuaj kemej Cristo monekia kisentokaskej kitakamatiskej iTanauatil Moisés. Ika nejin kinkajkayauak porin kichiuak maj amo kitakamatikanok Jehová, akin okachi tamatkej. Axkan ika redes sociales uan okseki taman, Satanás kichiua maj momoyaua miak taman tein amo melauak uan tein takajkayauaj políticos. Keman mochiujtoya kokolis COVID-19 momoyauak miak taman tein amo yekmelauj. c Itaixpantijkauan Jehová akin kichiujkej tein kinnauatiaya inechikol, amo semi motekipachojkej kemej akin kineltokakej tein motakajkayauaya (Mat. 24:45).
13. ¿Keyej amo moneki tikauaskej maj nion teyi techkuili totiempo?
13 Tein techtapololtia. Moneki kuali tikitaskej “toni okachi tayekantok” (Filip. 1:9, 10). Onkak miak taman tein uelis kichiuas maj tikpolokan tiempo uan maj amo tikchiuakanok tein moneki. Seki taman kemej titakuaskej, titatayiskej, timoixpetaniskej uan titekitiskej, uelis kichiuas maj tikauakan tein okachi tayekantok (Luc. 21:34, 35). Uan no, mojmostaj tikakij uan tikixtajtoltiaj keniuj motajtolteuiaj políticos. Maj amo tikauakan maj nochi nejin techkuili totiempo. Komo amo timoyekpiaj, itech toyolijtik ueliskia semej tikpaleuijtoskej. Satanás kikui nejin makuil taman para techuetsiltis uan maj amo tiktakamatikanok Jehová. Maj tikitakan keniuj uelis tikixtopeuaskej para maj amo techuetsilti.
¿TONI UELIS TIKCHIUASKEJ PARA AMO TIUETSISKEJ?
Para amo tikauaskej Jehová maj tikelnamikikan keyej timotemaktijkej uan timoauijkej, maj timomachtikan iTajtol Dios uan maj itech titanemilikan, maj nochipa tiktakamatikan Jehová uan maj iuan titakuaujtamatikan. (Xikonita párrafos 14 hasta 18).
14. ¿Toni techpaleuis maj amo keman tikauakan Jehová?
14 Maj tiknemilikan keyej timotemaktijkej uan timoauijkej. Tikchiujkej nejin porin tiknekiaj tiktekitiliskej Jehová. Xikonelnamiki toni mitsonpaleuij xikonneltoka ke yejua nejin tein melauak. Peuak tikonixmati Jehová, uan peuak tikonpoujkaita uan tikontasojta kemej moTajtsin. Okachi peuak tiontakuaujtamati uan tionmoyolpatak. Peuak amo tikonchiuaok tein Jehová kitauelita uan tikonchiua tein kiyolpaktia. Kuali tionmomachilij keman tikonitak ke Dios mitsontapojpoluijtoya (Sal. 32:1, 2). Tikonixtalij tionyas nechikolmej uan tikontapouis oksekin tein tionmomachtiaya. Kemej tionmotemaktijya iuan Dios uan tionmoauijya, kinextia ke tikonchiujtokya tein mitsonpaleuis xionnemi nochipa uan ke tikonixtalijya ijkon tikonsentokas (Mat. 7:13, 14).
15. ¿Keniuj techpaleuia komo timomachtiaj iTajtol Dios uan itech titanemiliaj?
15 Maj timomachtikan iTajtol Dios uan maj itech titanemilikan. Se kouit moneki kuali toktos inaluayo para amo uetsis, no ijkon tejuan, komo titakuaujtamatij iuan Jehová amo teyi uelis techuetsiltis. Uan keman kouit moskaltia, inaluayo no moskaltia uan okachi motoka itech tal, no ijkon panoua keman timomachtiaj iTajtol Dios uan itech titanemiliaj, okachi titakuaujtamatij uan tikneltokaj ke tein Dios tamachtia yejua tein okachi kuali (Col. 2:6, 7). Maj tiknemilikan keniuj ne uejkauj Jehová kinpaleuij itekitikauan ika tein kinnauatij uan kinyolmajxitij. Ezequiel kuali kiitstiaya keman se ángel kitamachiujtiaya templo. Tein kiitak, amo sayoj Ezequiel kipaleuij maj okachi takuaujtamati, ta tejuan no techmachtia keniuj uelis tiktakamatiskej itanauatiluan Jehová para tikueyichiuaskej kemej kiyolpaktia (Ezeq. 40:1-4; 43:10-12). d Tejuan no semi techpaleuis komo tikxelouaj tiempo para timomachtiskej uan itech titanemiliskej tamachtilismej tein kipia iTajtol Dios tein okachi ouijkej.
16. ¿Keniuj kipaleuij Robert maj achtook kiixtaliani amo keman kikauas Jehová? (Salmo 112:7).
16 Maj tikixtalikan amo keman tikauaskej Dios. Itech se nekuikatil, tekiuaj David kijtoj ke nochipa kitasojtaskia Jehová. Kijtoj ijkon: “Amo keman nimitskauas, noDios” (Sal. 57:7). Tejuan no uelis titakuaujtamatiskej iuan Jehová uan amo keman tikauaskej (xikonixtajtolti Salmo 112:7). Maj oksepa tikitakan tein kipanok Robert, akin ika titajtojkej itech párrafo 9. ¿Toni kipaleuij maj amo kikaua Jehová? Keman kiluijkej ke ompa kipiaskiaj esti komo monekiskia, yejua kinnankilij ke komo kinemiliayaj kitaliliskej esti niman kisaskia de ompa. Robert kijtoua: “Nikixtalijkaya toni nikchiuaskia uan amo nechtekipachouaya tein ueliskia panos”.
Komo okachi titakuaujtamatij amo tikauaskej Jehová maski tikpiaskej tein yeski ouijkayot. (Xikonita párrafo 17).
17. ¿Toni techmachtia tein kipanok Robert? (No xikonita taixkopimej).
17 Robert amo kikauak Jehová porin desde achto ipa kiixtalijkaya toni kichiuaskia keman ajsiskia itech tapajtiloyan. Yekinika, semi kinekia kiyolpaktis Jehová. Ojpatika, momachtij Biblia uan toamaixuan kampa ika tajtouaj ke moneki tikpoujkaitaskej tonemilis uan esti. Uan expatika, kineltokaya ke Jehová kitatiochiuiskia komo kitakamatia. Ijkon kemej Robert, amo no keman tikauaskej Jehová maski tikpiaskej ouijkayomej.
Barac uan takamej akin iuan youij kintokatiouij itateuijkauan Sísara. (Xikonita párrafo 18).
18. ¿Toni techmachtia tein kipanok Barac? (Xikonita taixkopin ipeujyan amaix).
18 Maj iuan titakuaujtamatikan Jehová. Maj tiknemilikan keniuj juez Barac tatanik porin mokauak maj Jehová kiixyekana. Itech nejon tonalmej, israelitas amo kipiayaj toni ika moteuiskej. Maski ijkon, Jehová kiluij Barac maj kiteuiti Sísara uan itateuijkauan cananeos akin kipiayaj miak taman tein ika moteuiskej (Juec. 5:8). Siuatanauatijkej Débora kiluij Barac maj temo de tepet Tabor kampa tal tamanis uan maj kinteuiti Sísara uan 900 carros tein ika tateuiayaj. Barac tatakamatik maski israelitas ueliskiaj tapoloskej porin akin kinixnamikiaj kipiayaj carros tein ijsiujka motalouayaj. Keman tateuianij pantemotiayaj, Jehová kichiuak maj tel chikauak kioui, carros mosokitokkej, uan Jehová kichiuak maj tatani Barac (Juec. 4:1-7, 10, 13-16). Jehová no uelis kichiuas maj titatanikan komo iuan titakuaujtamatij uan tikchiuaj tein technauatia inechikol (Deut. 31:6).
MAJ TIKIXTALIKAN AMO KEMAN TIKAUASKEJ JEHOVÁ
19. ¿Keyej tejuatsin tikonixtalijtok amo tikonkauas Jehová?
19 Itech nejin tonalmej keman tatamitiya, moneki tiksentokaskej timochikauaskej amo tikauaskej Jehová (1 Tim. 6:11, 12; 2 Ped. 3:17). Maj amo techmojmoujti kemej tanemiliaj akin amo kiueyichiuaj Dios, komo techtajyouiltiaj, techchikaujkauiaj, tein Satanás takajkayaua uan tein uelis techtapololtis (Efes. 4:14). Maj tiksentokakan tiyekijkatokan uan maj amo timotsinkixtikan, maj nochipa tikixtalikan tiktasojtaskej Jehová uan maj tiktakamatikan itanauatiluan. No moneki maj amo tiktemokan maj nochipa mochiua sayoj tein tejuan tiknemiliaj. Itech okse tamachtilis tikitaskej ke Jehová uan Jesús amo kitemouaj maj mochiua sayoj tein yejuan kinemiliaj, uan keniuj tejuan no uelis ijkon tikchiuaskej.
NEKUIKATIL 129 Maj tiksentokakan titaxikokan
a Satanás kitemouani maj tejuan tikixtalikan toni kuali yetok uan toni amo, ijkon kichiuani desde keman Adán uan Eva nemiaj. Yejua kiuelitaskia maj no ijkon titanemilikan keman Jehová uan inechikol technauatiaj seki taman. Nejin tamachtilis techpaleuis maj amo tikixtopeuakan itanauatiluan Jehová kemej kichiuaj akin Satanás kinixyekana, uan no maj nochipa tiktakamatikan Jehová.
b Para okachi tikonmatis keyej akin kichiuaj kemej Cristo kipoujkaitaj esti kemej Jehová kineki, xikonita amaix Uelis tiyolpakiskej nochipaya itech tamachtilis 39.
c Xikonita itech jw.org video “Amo nochi xikneltoka tein kitematiltiaj” tein moajsi kampa kijtoua pizarra animada.
d Komo tikonneki tikonmatis okachi, xikonita amaix La adoración pura de Jehová: ¡por fin restaurada! itech capítulos 13 uan 14.