TAMACHTILIS 29
NEKUIKATIL 121 Moneki tikmatiskej timotsakuiliskej
Maj nochipa timoyekpiakan para amo titajtakolchiuaskej
“Xiijsatokan uan nochipa ximotataujtijtokan para amo namotajtakolmakaskej” (MAT. 26:41).
TEIN TIMOMACHTISKEJ
Tikmatij ke moneki timochikauaskej amo titajtakolchiuaskej, sayoj ke amo no moneki tikchiuaskej teisa tein kichiuas maj titajtakokan.
1, 2. 1) ¿Toni tanejmachtij Jesús? 2) ¿Keyej imomachtijkauan kikaujteujkej? (No xikonita taixkopimej).
“NAMEJUAN nankinekij nankichiuaskej tein kuali, sayoj ke namonakayo tein tajtakolej amo chikauak” (Mat. 26:41b). Ika nejin tajtolmej, Jesús kinextij ke kiajsikamatia ke timopolouaj porin titajtakolejkej, sayoj ke no kinekik technejmachtis ke amo moneki tiknemiliskej ke nochipa uelis tikchiuaskej tein kuali yetok. Tepitsin achto ke Jesús kijtoskia nejin, itatitaniluan kijtojkaj ke amo keman kikauaskiaj (Mat. 26:35). Yejuan kinekiaj kichiuaskej tein kuali, sayoj ke amo momakayaj cuenta ke keman kipiaskiaj ouijkayomej okachi ouij kinkisaskia amo tajtakolchiuaskej. Yejua ika Jesús kiniluij: “Xiijsatokan uan nochipa ximotataujtijtokan para amo namotajtakolmakaskej” (Mat. 26:41a).
2 ¿Toni kichiujkej tatitanilmej keman kikitskijkej Jesús para kitsakuaskej? Yejuan moujkej uan amo ijsatoyaj kemej Jesús kiniluijka. Uan kichiujkej tein kijtojkej ke amo keman kichiuaskiaj: kikaujteujkej Jesús uan cholojkej (Mat. 26:56).
Jesús kiniluij imomachtijkauan maj ijsatonij uan maj tachixtonij para amo tajtakolchiuaskej, sayoj ke yejuan kikaujteujkej. (Xikonita párrafo 1 uan 2).
3. 1) ¿Keyej moneki timoyekpiaskej para amo keman tikauaskej Jehová? 2) ¿Toni tikitaskej itech nejin tamachtilis?
3 Tejuan amo no moneki tiknemiliskej ke niman uelis tikchiuaskej tein kuali. Maski tikixtalijkejya amo keman tikauaskej Jehová, moneki tikelnamikiskej ke kemej titajtakolejkej ueliskia tiknejnekiskej tikchiuaskej tein amo kuali (Rom. 5:12; 7:21-23). Xa ijsiujka uelis panos teisa tein kichiuas maj tiknejnekikan titajtakolchiuaskej. Komo amo keman tiknekij tikauaskej Jehová uan Jesús, moneki nochipa tiijsatoskej ijkon kemej Jesús tanejmachtij. Uan yejua nejon tein tikitaskej itech nejin tamachtilis. Yekinika, tikitaskej toni uelis kichiuas maj titajtakokan. Uan no, tikitaskej keniuj uelis timoyekpiaskej para amo titajtakolchiuaskej. Uan satepan, tikitaskej toni moneki nochipa tikchiujtoskej para amo keman titajtakolchiuaskej.
¿DE TONI MONEKI TIMOYEKPIASKEJ PARA AMO TITAJTAKOLCHIUASKEJ?
4, 5. ¿Keyej moneki timoyekpiaskej para amo titajtakolchiuaskej nion tepitsin?
4 Maski tiueyitajtakoskej oso amo, nejon ipa kichiuas maj amo kuali timouikakanok iuan Jehová. Uan no, ueliskia kichiuas maj satepan okachi titajtakokan.
5 Tinochin kemansa tiknejnekij titajtakolchiuaskej, sayoj ke tisejsemej tataman tein amo kuali tein techyoltilana. Yejua ika tataman tein ueliskia ika titajtakolchiuaskej. Xa sekin mochikaujtokej amo auilnemiskej, oksekin xa mochikaujtokej amo kichiuaskej tein tel pitsotik kemej momajmatokaskej ininselti oso kiitaskej auilnemilis. Oksekin xa mochikaujtokej amo niman kualaniskejok, amo moueyinekiskej oso amo kimouiliskejok tein oksekin kijtoskej para kichiuaskej tein kuali yetok. Yejua ika Santiago kijtoj ke “sejse kiixnamiki se ouijkayot keman tein kinejneki kiyoltilana uan kitanejnektia” (Sant. 1:14).
6. ¿Toni moneki tikmatiskej?
6 ¿Tikonmati toni tein amo kuali mitsonyoltilana? Sayoj timokajkayaujtoskiaj komo tiknemiliaj ke nochipa uelis tikchiuaskej tein kuali, uan ke amo keman tiknejnekiskej tikchiuaskej tein amo kuali (1 Juan 1:8). Uan Pablo hasta kijtoj ke ‘akin kinixyekana ichikaualis Dios moneki motachiliskej amokan no kichiujkej tein amo kuali’ (Gál. 6:1). Yejua ika moneki tikmatiskej toni tein amo kuali techyoltilana uan tein ueliskia ika titajtakolchiuaskej (2 Cor. 13:5).
7. ¿De toni moneki okachi timoyekpiaskej? Xikonijto se neskayot.
7 Komo tikmatijya toni uelis kichiuas maj titajtakolchiuakan, ¿toni moneki tikchiuaskej? Maj tikchiuakan tein techpaleuis maj tikixtopeuakan. Maj tiknemilikan nejin: ne uejkauj, se xolal tein youaliujtoya ika tepamit, akin taixnamikiaj okachi ueliaj ijsiujka kalakiaj kampa yetoyaj puertas, yejua ika ompa itech puertas monekia okachi yetoskej tajpianij para kiyekpiaskej xolal. No ijkon moneki timoyekpiaskej ika tein tejuan tikmattokej ke uelis ijsiujka kichiuas maj titajtakolchiuakan (1 Cor. 9:27).
¿KENIUJ UELIS TIMOYEKPIASKEJ?
8, 9. ¿Toni monekia kichiuas telpoch akin ika tajtoua Proverbios capítulo 7 para amo tajtakos? (Proverbios 7:8, 9, 13, 14, 21).
8 ¿Keniuj uelis timoyekpiaskej para amo titajtakolchiuaskej? Maj tikitakan toni techmachtia Proverbios capítulo 7. Ompa ika motajtoua se telpoch akin auilnemik iuan se siuaauilnenkej. Versículo 22 kijtoua ke nejon telpoch “ijsiujka” kiajsito nejon siuat. Sayoj ke seki versículos achto kinextiaj ke yejua achto kichiujka seki taman tein yolik kichiuak maj tajtako.
9 ¿Toni kichiujka? Yekinika, youak panouaya kampa nemia nejon siuat. Satepan, kikuik ojti tein kiajxitiskia ichan (xikonixtajtolti Proverbios 7:8, 9). Uan keman kiitak nejon siuat, amo kitemoj oksekopa yas, ta mokauak maj kipitso uan maj kilui ke kitemakakaya netetayokolilmej para kuali mouikas iuan Dios. Xa kiluij nejin para maj telpoch kinemiliani ke tein kichiujtoya kuali yetoya (xikonixtajtolti Proverbios 7:13, 14, 21). Komo telpoch amo kichiuaskia nochi nejon, ueliskia motsakuilis uan amo kichiuaskia se tajtakol.
10. ¿Toni no uelis techpanos tejuan ijkon kemej kipanok telpoch akin ika tajtoua Proverbios?
10 Se akin kitekitilia Jehová xa no ueliskia ijkon kipanos. Xa tajtakolchiuas uan kinemilis ke nochi ijsiujka panok, uan ueliskia kijtos: “Amo nikmati keniuj panok”. Sayoj ke komo itech tanemilia seki taman tein achto kichiujka, kiitas ke nejon kichiuak maj tajtako. Xa kuali mouikaya iuan akin amo kitasojta Jehová, peuak moixpetania ika tein amo kuali, kiitaya tein amo kuali itech internet, oso yaya kampa amo monekia. Xa amo motataujtiayaok, amo kiixtajtoltiayaok Biblia, amo yayaok nechikolmej uan amo tanojnotsayaok. Uan ijkon kemej kipanok telpoch tein ika tajtoua Proverbios, xa achto kichiujka seki taman tein yolik kichiuak maj tajtako.
11. ¿Toni moneki tikchiuaskej komo amo tiknekij titajtakolchiuaskej?
11 ¿Toni techmachtia? Tikmatij ke amo moneki titajtakolchiuaskej, sayoj ke amo no moneki tikchiuaskej teisa tein kichiuas maj titajtakokan. Uan yejua nejon tein kijtoj Salomón satepan ke kitetapouij tein panok iuan telpoch uan siuaauilnenkej. Keman ika tajtoj nejon siuat kijtoj: “Amo xiktajtolkaki” (Prov. 7:25). Uan no kijtoj: “Uejka xieto de kampa yejua yetok uan amo ximotoki ikaltenoj” (Prov. 5:3, 8). Nejin techmachtia ke amo moneki tikchiuaskej nion teyi tein uelis kichiuas maj titajtakokan. a Xa kemansa hasta monekis amo tikchiuaskej seki taman tein okseki tokniuan kiitaskej ke kuali yetok, sayoj ke xa tejuan ueliskia ika titajtakoskej (Mat. 5:29, 30).
12. ¿Toni kiixtalij kichiuas Job, uan keniuj nejon kipaleuiskia maj amo tajtakolchiua? (Job 31:1).
12 Komo amo tiknekij tikchiuaskej teisa tein ueliskia ika titajtakoskej moneki tikchiuaskej kemej Job. Kemej yejua amo kinekia auilnemis iuan nion se siuat. Kijtoj: “Nikixtalijya amo keman nikixnejnekis se siuapil” (xikonixtajtolti Job 31:1). Nejon kipaleuiskia maj amo auilnemi. Tejuan no uelis tikixtaliskej amo tikchiuaskej teisa tein ueliskia ika titajtakoskej.
13. ¿Keyej moneki timoyekpiaskej komo peua tiknemiliaj tein amo kuali? (No xikonita taixkopimej).
13 No moneki timoyekpiaskej para amo tiknemiliskej tein amo kuali (Éx. 20:17). Sekin kijtouaj ke komo sayoj kinemiliaj tein amo kuali uan amo kichiuaj, kuali yetok. Sayoj ke nejon amo melauj. Komo semi ika titanemiliaj okachi tiknejnekiskej tikchiuaskej. Uan nejon kichiuas maj techouijmaka tikixtopeuaskej tein amo kuali. Sayoj ke kemansa ipa tiknemiliskej tein amo kuali. ¿Toni moneki tikchiuaskej? Maj niman itech titanemilikan tein kuali, nejon techpaleuis maj amo tiknejnekikan tikchiuaskej tein tiknemiliaj, nion maj titajtakokan. (Filip. 4:8; Col. 3:2; Sant. 1:13-15).
Amo moneki tikchiuaskej nion teyi tein uelis kichiuas maj titajtakokan. (Xikonita párrafo 13).
14. ¿Toni no techpaleuis maj amo tiknejnekikan titajtakolchiuaskej?
14 ¿Toni no techpaleuis maj amo tiknejnekikan titajtakolchiuaskej? Moneki senkis tikneltokaskej ke komo tiktakamatij itanauatil Jehová nochipa techpaleuis. Xa kemansa techouijmakas tiknemiliskej uan tiknejnekiskej tikchiuaskej tein Jehová kineki, sayoj ke komo timochikauaj tikchiuaskej yekmelauj tiyolpakiskej.
15. ¿Keniuj techpaleuia komo tiknejnekij tikchiuaskej tein kuali?
15 Moneki tiknejnekiskej tikchiuaskej tein kuali. Komo ‘tiktauelitaj tein amo kuali uan tiktasojtaj tein kuali’, tikixtaliskej amo keman tikchiuaskej teisa tein ika titajtakoskej (Amós 5:15). Komo tiknejnekij tikchiuaskej tein kuali, no techpaleuis maj tikixtopeuakan tein yeski tein ika ueliskia titajtakolchiuaskej.
16. Komo tikchiuaj tein techpaleuis maj okachi tiktasojtakan Jehová, ¿keniuj nejon techpaleuis maj tiknejnekikan tikchiuaskej tein kuali? (No xikonita taixkopimej).
16 ¿Toni techpaleuis maj tiknejnekikan tikchiuaskej tein kuali? Komo tikchiujtokej tein techpaleuis maj okachi tiktasojtakan Jehová. Keman tiouij nechikolmej uan keman titanojnotsatij techpaleuia maj tiknejnekikan tikyolpaktiskej Jehová, uan amo teyi kichiuas maj tiknejnekikan titajtakolchiuaskej (Mat. 28:19, 20; Heb. 10:24, 25). Komo tikixtajtoltiaj uan timomachtiaj Biblia uan itech titanemiliaj, no techpaleuia maj tiknekikan tikchiuaskej tein kuali uan maj tikixtopeuakan tein amo kuali (Jos. 1:8; Sal. 1:2, 3; 119:97, 101). Uan no, maj tikelnamikikan ke Jesús tayolmajxitij nejin: “Nochipa ximotataujtijtokan para amo namotajtakolmakaskej” (Mat. 26:41). Keman tikxelouaj tiempo para tiktataujtiskej toTajtsin, tikauaj maj yejuatsin techpaleui uan okachi tiknejnekij tikyolpaktiskej (Sant. 4:8).
Komo tikchiuaj tein techpaleuis maj okachi tiktasojtakan Jehová, amo tiknejnekiskej titajtakolchiuaskej. (Xikonita párrafo 16). b
MAJ NOCHIPA TIMOYEKPIAKAN
17. ¿Toni kiouijmakaya amo kichiuasok Pedro?
17 Xa seki taman tein techyoltilanaya amo tikchiuajok, sayoj ke okseki taman xa techouijmakaok tikixtopeuaskej. Yejua nejon kipanok tatitanil Pedro porin kinmouilij oksekin. Yejua expa kijtoj ke amo kiixmatia Jesús (Mat. 26:69-75). Satepan Pedro amo mouikok porin kiteixmatiltij akoni katka Jesús ininixpan Uejueyi Tamelauanij. Moitaya ke amo kinmouiliayaok oksekin (Hech. 5:27-29). Sayoj ke seki xiujmej satepan, peuak amo iniuan takuaok tokniuan akin amo katkaj judíos porin “kinmouiliaya judíos” (Gál. 2:11, 12). Pedro oksepa peuak moui, uan amo tikmatij ox kemansa amo mouikok.
18. Maski tiknemiliayaj ke amo tikchiuaskejok tein amo kuali, ¿toni ueliskia techpanos?
18 Ijkon kemej Pedro, xa kemansa oksepa tikchiuaskej tein tiknemiliayaj ke amo keman tikchiuaskiajok. Se tokniuj takat kijtoua: “Majtakti xiuit amo nikitstoyaok auilnemilis uan niknemilij ke amo keman nikitaskiaok. Sayoj ke kemansa oksepa niknejnekia nikitas”. ¡Tokniuj amo keman mosenkauak! Kiitak ke mojmostaj monekia kichiuas teisa para amo kiitasok, uan xa moneki nochipa ijkon kichiuas. Isiuatsin uan tokniuan tayekananij kipaleuianij maj amo kiitaok auilnemilis uan yejua no moyekpiani.
19. ¿Toni techpaleuis komo tiknejnekijok tikchiuaskej tein amo kuali?
19 Komo tiknejnekijok tikchiuaskej tein amo kuali, ¿toni techpaleuis maj amo titajtakolchiuakan? Maj ‘tiijsatokan’ ijkon kemej tayolmajxitij Jesús. Maski tikonnemilis ke amo keman tikonchiuasok teisa tein amo kuali, xikonsentoka xionmoyekpia para amo tiontajtakolchiuas (1 Cor. 10:12). Xikonsentoka xikonchiua tein ipa mitsonpaleuiani. ‘Xikonchiua nochi tein tionuelis’, tein mitsonpaleuis amo xiontajtakolchiua (2 Ped. 3:14).
¿KENIUJ TECHPALEUIS KOMO TIMOYEKPIAJ?
20, 21. 1) ¿Keniuj techpaleuia komo timoyekpiaj para amo titajtakoskej? 2) Komo tejuan timochikauaj amo titajtakolchiuaskej, ¿keniuj techpaleuis Jehová? (2 Corintios 4:7).
20 ¿Techpaleuia keman timoyekpiaj para amo titajtakolchiuaskej? ¡Kemaj! Xa ueliskia timoyolpaktiskej komo titajtakolchiuaj, sayoj ke amo uejkauas. Okachi kuali maj tiktakamatikan itanauatiluan Jehová porin ijkon tiyolpakiskej nochipaya (Heb. 11:25; Sal. 19:8). Uan nejin ueli tikchiuaj porin yejuatsin techchijchiuak kemej tiknekiskej tiktakamatiskej (Gén. 1:27). Keman tinemij kemej Jehová kineki, techpaleuia maj kuali timomachilikan uan satepan maj tinemikan itech se xochital (1 Tim. 6:12; 2 Tim. 1:3; Jud. 20, 21).
21 Maski ‘tonakayo tein tajtakolej amo chikauak’, amo kijtosneki ke amo uelis timopataskej. Jehová touan yetok para techpaleuis (xikonixtajtolti 2 Corintios 4:7). Tikyekmatij ke yejuatsin techmaka chikaualis tein toselti amo ueli tikpiaj. Sayoj ke tejuan moneki nochipa timochikauaskej amo tikchiuaskej teisa tein ueliskia ika titajtakoskej. Komo timochikauaj timoyekpiaskej, uelis titakuaujtamatiskej ke Jehová technankilis keman tiktataujtiskej maj techpaleui (1 Cor. 10:13). Yejuatsin techpaleuis maj timoyekpiakan uan maj amo titajtakokan.
NEKUIKATIL 47 Maj mojmostaj tiktataujtikan Jiova
a Komo tiontajtakolchiuak, nejin tamachtilismej uelis mitsonpaleuis: amaix Uelis tiyolpakiskej nochipaya, tamachtilis 57, puntos 1 hasta 3, uan tamachtilis “Maj nochipa titachiakan taixpan”, tein kisak itech amaix Tanejmachtijkej metsti noviembre xiuit 2020, páginas 27 hasta 29, párrafos 12 hasta 17.
b TEIN NESI ITECH TAIXKOPIMEJ: Se tokniuj, kualkan kiixtajtoltia texto tein moita mojmostaj, kiixtajtoltia Biblia nepantaj keman moseuia, uan tiotak yetok itech nechikol tein mochiua itajkotian semana.
