TAMACHTILIS 28
NEKUIKATIL 123 Maj tiktakamatikan inechikol Dios
¿Ueli tikonmati toni tein melauak uan toni amo?
“Xiyekijkatokan uan nochipa ximotalilikan cinturón tein kiixnextia nochi tein melauak” (EFES. 6:14).
TEIN TIMOMACHTISKEJ
Tikitaskej keniuj uelis tikmatiskej toni tein melauak tein Jehová techmachtiani, uan keniuj kinekij techkajkayauaskej Satanás uan akin techixnamikij.
1. ¿Keniuj tionmomachilia porin tikonmati tein melauak?
TIITEKITIKAUAN Jehová tiktasojtaj tein Biblia tamachtia uan itech titakuaujtamatij (Rom. 10:17). Tikneltokaj ke Jehová kiixtalij inechikol “tein kemej yeskia kalikxit uan tein kipaleuia tamachtilis tein melauak” (1 Tim. 3:15). Uan tikintakamatij akin techixyekanaj porin techmachtiaj tein yekmelauj kijtoua Biblia, uan no technauatiaj seki taman tein techpaleuia maj tikchiuakan tein Dios kineki (Heb. 13:17).
2. Kemej kijtoua Santiago 5:19, ¿toni ueliskia techpanos tiitekitikauan Jehová?
2 Maski tikmatijya toni tein melauak uan ke moneki tiktakamatiskej tein inechikol Dios technauatia, xa ipa ueliskia tikauaskej tein melauak (xikonixtajtolti Santiago 5:19). Satanás kiuelitaskia maj amo tikneltokakanok tein Biblia kijtoua uan tein technauatia inechikol Jehová (Efes. 4:14).
3. ¿Keyej moneki tiktakamatiskej tein melauak? (Efesios 6:13, 14).
3 (Xikonixtajtolti Efesios 6:13, 14). Amo uejkaua Satanás kijtos tein amo melauak para kichiuas maj miak altepemej kiixnamikikan Jehová (Apoc. 16:13, 14). No tikmatij ke Satanás okachi kitemos kinkajkayauas itekitikauan Dios (Apoc. 12:9). Yejua ika semi moneki maj tikmatikan toni tein melauak uan toni amo, no moneki maj tiktakamatikan tamachtilis tein melauak (Rom. 6:17; 1 Ped. 1:22). Moneki tikchiuaskej nejon para timakisaskej keman mochiuas tetsaujkatajyouilis.
4. ¿Toni tikitaskej itech nejin tamachtilis?
4 Itech nejin tamachtilis tikitaskej ome taman tein moneki tikchiuaskej para tikmatiskej toni yekmelauj tamachtia Biblia uan para tiktakamatiskej tein techmachtia inechikol Jehová. No tikitaskej eyi taman tein moneki tikchiuaskej para tiktakamatiskej tein melauak.
TEIN MONEKI TIKCHIUASKEJ PARA TIKMATISKEJ TONI TEIN MELAUAK
5. ¿Keniuj komo tikmojkatokaj Jehová techpaleuis maj tikmatikan tein melauak?
5 Maj tikmojkatokakan Jehová. Tikmojkatokaj Jehová keman tiknextiaj ke tiktasojtaj uan amo tikchiuaj tein amo kiuelita. Para tikyolpaktiskej Jehová moneki tikmatiskej toni kuali yetok uan toni amo, toni tein melauak uan toni amo (Prov. 2:3-6; Heb. 5:14). Moneki okachi tiktasojtaskej yejuatsin uan amo tikinmouiliskej oksekin, porin miakpa tein yejuan kiuelitaj Jehová kitauelita.
6. ¿Toni kichiujkej majtakti tapijpianij porin moujkej?
6 Komo okachi tikinmouiliaj oksekin uan amo tikmojkatokaj Dios, peuas tikneltokaskej seki taman tein kiixnamiki tein tamachtia Jehová. Maj ininka titanemilikan 12 tapijpianij akin yajkej tachiatoj itech tal tein Jehová motenkaujka kinmakas israelitas. Majtakti tapijpianij okachi kinmouilijkej cananeos uan amo kitasojtakej Jehová, yejua ika kijtojkej: “Amo uelis tipankisaskej uan tikinteuiskej, porin yejuan okachi chikaujkej ke tejuan” (Núm. 13:27-31). Maski moitaya ke cananeos katkaj okachi chikaujkej ke israelitas, kielkaujtoyaj Jehová keman kijtojkej ke amo ueliskiaj kintaniskej. Monekia itech tanemiliskej tein Jehová kinekia maj kichiuakan israelitas. No monekia kielnamikiskej tein achto ininka kichiujka, ijkon ueliskia kiitaskej ke komo cananeos kiixnamikiaj Jehová akin kipia nochi chikaualis amo ueliskiaj kitaniskej. Sayoj ke Josué uan Caleb amo ijkon katkaj, yejuan takuaujtamatiaj uan kinekiaj kiyolpaktiskej Dios. Yejua ika kiniluijkej israelitas: “Komo tikyolpaktiaj Jehová, yejua techajxitis ompa uan techmakas nejon tal” (Núm. 14:6-9).
7. ¿Toni techpaleuis maj okachi tikmojkatokakan Jehová? (No xikonita taixkopin).
7 Komo nochipa tiknemiliaj tein kiyolpaktia Jehová achto ke tikixtaliskej tikchiuaskej teisa, techpaleuis maj okachi tikmojkatokakan yejuatsin (Sal. 16:8). Keman tikonixtajtoltis itech Biblia tein kipanok aksa, xionmotajtani: “Komo ompa nimoajsiskia, ¿toni nikixtaliskia nikchiuas?”. Xikonnemili ke tikonkaktok tein kijtojkej majtakti tapijpianij. ¿Tikonneltokaskia tein kijtouaj uan tikonmouiliskia cananeos? ¿Oso tikonnextiskia ke tikontasojta Jehová uan ke tikonneki tikonyolpaktis? Nochin israelitas akin ijkuak nemiaj amo kiitakej ke yekmelauj katka tein Josué uan Caleb kijtouayaj. ¿Toni kinpanok? Jehová amo kikauak maj kalakikan itech tal tein motenkaujka kinmakas (Núm. 14:10, 22, 23).
¿Akonimej tikintajtolkakiskiaj? (Xikonita párrafo 7).
8. ¿Toni moneki timochikauaskej tikchiuaskej, uan keyej?
8 Maj tiyolyemankej. Jehová kinmatiltia tein melauak akin yolyemankej (Mat. 11:25). Keman timomachtijtoyaj tein melauak, tiknextijkej ke tiyolyemankej uan tikaujkej maj oksekin techpaleuikan (Hech. 8:30, 31). Maski ijkon, moneki timoyekpiaskej para amo timoueyimatiskej. Komo timoueyimatij ueliskia tikitaskej ke tein tiknemiliaj no semi tapaleuia kemej tein tamachtia Biblia uan tein inechikol Jehová tanauatia.
9. ¿Toni techpaleuis maj tiksentokakan tiknextikan ke tiyolyemankej?
9 ¿Toni techpaleuis maj tiksentokakan tiknextikan ke tiyolyemankej? Maj tikelnamikikan ke Jehová okachi ueyi ke tejuan (Sal. 8:3, 4). No uelis tiktajtaniskej Jehová maj techpaleui maj tiyolyemankej para maj timokauakan maj techmachtikan. Jehová techpaleuis maj okachi tikpatiuitakan itanemililuan uan amo tein tejuan tiknemiliaj. Tein Biblia tamachtia uan inechikol techpaleuiskej maj tikmatikan toni kinemilia. Keman tikonixtajtoltis Biblia xikontemo toni kinextia ke Jehová kiuelita maj se yolyemanik uan ke kitauelita akin moueyimati. Uan xionmochikaua tikonnextis ke tionyolyemanik keman mitsonmakaskej se tekit kampa monekis tikonixyekanas oksekin oso tein miakej kimatiskej.
¿TONI MONEKI TIKCHIUASKEJ PARA TIKTAKAMATISKEJ TEIN MELAUAK?
10. ¿Inintechkopa akonimej Jehová kinixyekanani itekitikauan uan kiniluia toni moneki kichiuaskej?
10 Xiontakuaujtamati itech inechikol Jehová. Ne uejkauj Jehová kinmatiltij israelitas itanauatiluan itechkopa Moisés uan satepan itechkopa Josué (Jos. 1:16, 17). Israelitas kuali yetoyaj keman kinpoujkaitayaj takamej akin Jehová kinixpejpenka. Xiujmej satepan, katkaj 12 tatitanilmej akin taixyekanayaj keman peuak moajsi nechikol kampa kichiuayaj kemej Cristo (Hech. 8:14, 15). Satepan no kinpaleuiayaj oksekin tayekananij de Jerusalén. Kemej tokniuan kichiuayaj tein kinnauatiayaj “kisentokakej okachi takuaujtamatkej uan mojmostaj momiakilijtiayaj” (Hech. 16:4, 5). Axkan Jehová no techtatiochiuia keman tikchiuaj tein technauatia inechikol. Sayoj ke, ¿keniuj momachiliskia komo amo tikintakamatij tokniuan akin kinixpejpenak para maj techixyekanakan? Uelis tikmatiskej komo tikitaj tein panok keman israelitas yajtoyaj para ajsiskej itech tal tein Jehová motenkaujka kinmakas.
11. ¿Toni kinpanok akin kiixtopeujkej takat akin Jehová kiixpejpenka maj kiixyekana ixolal? (No xikonita taixkopimej).
11 Keman israelitas yajtoyaj para ajsiskej itech tal tein Jehová motenkaujka kinmakas, seki takamej ueyichiuanimej kiixnamikkej Moisés uan tanauatil tein Jehová kinmakaka. Yejuan kijtojkej: “Nochi xolal [amo sayoj Moisés] yektik, uan Jehová iniuan yetok” (Núm. 16:1-3). Maski Jehová kiitaya ke “nochi xolal” katka yektik yejua kiixpejpenka Moisés para maj kiixyekana ixolal (Núm. 16:28). Yejua ika, keman kijijtojkej Moisés tein melauj kijijtojtoyaj Jehová. Amo kinemilijkej toni kinekia Jehová ta sayoj kinemiliayaj tein yejuan kinejnekiaj: kitemouayaj yejuan taixyekanaskej uan maj miakej kinixmatinij. Jehová kinixpoloj israelitas akin kiixnamikiaj uan akin kinixyekanayaj (Núm. 16:30-35, 41, 49). Axkan Jehová no kinixtopeua akin amo kitakamatij tein inechikol tanauatia.
¿Akonimej tikinpaleuiskiaj? (Xikonita párrafo 11).
12. ¿Toni techpaleuia maj nochipa titakuaujtamatikan itech inechikol Jehová?
12 Miak taman techpaleuia maj titakuaujtamatikan itech inechikol Jehová. Keman akin kiixyekanaj nechikol kiitaj ke moneki mopatas kemej tikajsikamatiaj se tamachtilis de Biblia oso maj mopata seki taman, niman kichiuaj (Prov. 4:18). Uan kichiuaj nejin porin kinekij kiyolpaktiskej Jehová. Uan no, mochikauaj moixyekanaskej ika tein kijtoua Biblia keman kiixtaliaj teisa. Nochin tiitekitikauan Jehová moneki ijkon tikchiuaskej.
13. ¿Toni kijtosneki “kuali tajtolmej tein ipa ixyetokya”, uan toni moneki tikchiuaskej?
13 “Nochipa xikelnamikto kuali tajtolmej tein ipa ixyetokya” (2 Tim. 1:13). ¿Toni “tajtolmej tein ipa ixyetokya”? Yejua tein tamachtia Biblia (Juan 17:17). Nochi tein tikneltokaj yejua tein Biblia tamachtia. Inechikol Jehová techmachtiani maj tikyekitakan ke nochi tein tikneltokaj yejua tein tamachtia Biblia. Komo nochipa ijkon tikchiuaj kuali tietoskej.
14. ¿Keniuj seki tokniuan peuak amo kielnamikijok “kuali tajtolmej tein ipa ixyetokya”?
14 ¿Toni uelis panos komo amo tikelnamikij “kuali tajtolmej tein ipa ixyetokya”? Maj tikitakan tein panok itech yekinika siglo. Seki tokniuan kijtojtinemiaj ke itonal Jehová ejkokaya. Xa moajsia se amat kampa kijtouaya nejon uan tein kijtouayaj ke kijkuilojka tatitanil Pablo. Seki tokniuan de Tesalónica amo kiitakej ox yekmelauj katka nejon uan yejua ika kineltokakej, uan no peuak tetapouiaj. Amo kinkajkayauaskiaj komo kielnamikiskiaj tein Pablo kinmachtijka keman iniuan yetoya (2 Tes. 2:1-5). Tatitanil Pablo kiniluij maj amo kineltokanij nochi tein kikakiaj. Uan kemej amo kinekia maj oksekin no ijkon kinpanouani, kiniluij nejin tajtolmej keman kitamiijkuiloj ojpatika amatajkuilol tein kintitanilij: “Nejua Pablo, nikmaijkuiloua nejin tajtolmej tein ika namechtajpaloua. Nochipa ijkon nikijkuiloua nochi noamatajkuiloluan, para xikmatikan ke nejua nitajkuiloj” (2 Tes. 3:17).
15. ¿Toni techpaleuis maj amo techkajkayauakan? Xikonijto toni panok ne uejkauj. (No xikonita taixkopimej).
15 ¿Toni techmachtia tein Pablo kinijkuilouilij akin nemiaj Tesalónica? Komo techtapouiaj teisa tein se kimojkaita oso tikakij teisa tein amo tamachtia Biblia, maj niman tiknextikan ke titamatinij. Ne uejkauj, keman taixyekanaya Unión Soviética, akin techixnamikiaj kimoyaujkej se amat tein kijtouayaj ke kijkuilojkaj itech ueyi kali kampa techixyekanaj. Ompa kijtouaya maj tokniuan kichiuanij okse nechikol kampa ininselti moixyekanaskiaj. Maski moitaya ke tein kijtouayaj katka melauak, tokniuan akin amo kikaujkej Jehová amo kineltokakej. Kiitakej ke tein ompa kijtouaya amo katka tein yejuan momachtijkaj. Axkan, akin kiixnamikij tein Biblia tamachtia kikuij tein moita itech internet uan itech redes sociales para techkajkayauaskej uan techxexeloskej. Uelis timopaleuiskej para maj amo niman ‘techtapololtikan’ komo tikyekitaj ox tein tikakij uan tein tikixtajtoltiaj yejua tein timomachtijkejya itech Biblia (2 Tes. 2:2; 1 Juan 4:1).
Maj amo tikauakan maj techkajkayauakan ika tein uelis moitas ke melauak. (Xikonita párrafo 15). a
16. Kemej kijtoua Romanos 16:17, 18, ¿toni moneki tikchiuaskej keman sekin amo kineltokaskejok tein Biblia tamachtia?
16 Xikonueyichiua Jehová iniuan akin amo keman kikauaj. Dios kineki maj tinochin tiksenueyichiuakan, uan uelis ijkon tikchiuaskej komo tiktakamatij tein tamachtia Biblia. Akin amo kineltokajok tein Biblia tamachtia uan kiixnamikij, kinxexelouaj tokniuan itech nechikol. Yejua ika Dios techiluia maj amo iniuan timouikakan porin ueliskia peuas tikneltokaskej tein amo melauj uan amo tiktakamatiskejok Jehová (xikonixtajtolti Romanos 16:17, 18).
17. ¿Toni panos komo tikmatij toni tein melauak uan amo keman tikauaj?
17 Komo tikmatij toni tein melauak uan amo keman tikauaj, nochipa kuali timouikaskej iuan Jehová (Efes. 4:15, 16). Amo no tikneltokaskej nochi tein Satanás tamachtis uan tein ika takajkayauas, uan Jehová nochipa techpaleuis keman mochiujtos tetsaujkatajyouilis. Amo keman xikonkaua tein melauak uan “Dios akin teyolseuia” nochipa mouan yetos (Filip. 4:8, 9).
NEKUIKATIL 122 Maj tiksentokakan tiktekitilikan Dios
a TEIN NESI ITECH TAIXKOPIMEJ: Moixnextia. Ne uejkauj, tokniuan akin nemiaj Unión Soviética kiselijkej se carta tein moitaya ke kititaniaj de kali kampa techixyekanaj, sayoj ke kijkuilojkaj akin kinixnamikiaj. Axkan, akin techixnamikij xa kijtouiliskej tein amo melauak inechikol Jehová itech internet para techkajkayauaskej.
