1, 2. ¿Akoni katka Sadoc? (1 Crónicas 12:22, 26-28).

 XIKONNEMILI ke mosentilijkej panoua 340 mil para kiixtaliskej David kemej tekiuaj ompa Israel. Eyi tonal takamej mokaujkej itech tepetsitsin tein amo uejka yetokej de Hebrón, mouetskitiaj, monojnotsaj uan mokuikatiaj para kiueyichiuaskej Jehová (1 Crón. 12:39). Ompa yetok se telpoch akin monotsa Sadoc, miakej xa amo kiitaj. Sayoj ke Jehová kiitak uan kinekia maj tikmatikan ke ompa yetoya (xikonixtajtolti 1 Crónicas 12:22, 26-28). Sayoj ke, ¿akoni katka Sadoc?

² Sadoc katka se tiopixkat akin iuan tekitia tayekankatiopixkat Abiatar. No katka tamatkej uan kiajsikamatia tein Jehová kinekia porin yejuatsin kipaleuiaya (2 Sam. 15:27). Yejua ika, miakej yayaj kiitatij para maj kinyolmajxitiani. No semi yolchikauak katka. Itech nejin tamachtilis tikitaskej keniuj Sadoc kinextij ke katka yolchikauak.

3. 1) ¿Keyej moneki maj tiyolchikaujkej? 2) ¿Toni tikitaskej itech nejin tamachtilis?

³ Axkan, Satanás okachi kitemoua maj amo titakuaujtamatikanok iuan Jehová (1 Ped. 5:8). Yejua ika, moneki tiyeskij tiyolchikaujkej para titaxikoskej hasta maj Jehová kiixpolo Satanás uan nochi tein kiixyekana (Sal. 31:24). Maj tikitakan eyi taman kampa uelis tiknextiskej ke tiyolchikaujkej kemej Sadoc.

MAJ TIKTAYEKANALTIKAN ITAIXYEKANALIS DIOS

4. ¿Keyej moneki maj tiyolchikaujkej para tiktayekanaltiskej iTaixyekanalis Dios? (No xikonita taixkopin).

⁴ Akin tiktekitiliaj Jehová moneki tiyeskij tiyolchikaujkej para tiktayekanaltiskej iTaixyekanalis Dios (Mat. 6:33). Kemej axkan semi mochiua tein amo kuali, moneki maj tiyolchikaujkej para tikchiuaskej tein Jehová technauatia  uan para titanojnotsaskej (1 Tes. 2:2). Axkan miakej amo kuali mouikaj porin kinpaleuiaj tataman políticos, yejua ika moneki maj tiyolchikaujkej para amo tikpaleuiskej nion se (Juan 18:36). Uan no, miakej itekitikauan Jehová amo kipiaj miak tomin, kinmaganij oso kintsakuanij porin amo mokalakiaj itech política oso porin amo mochiuaj soldados.

5. ¿Keyej monekia maj Sadoc yolchikauak para ueliskia kipaleuis David?

⁵ Sadoc amo sayoj yajki Hebrón porin kiixtalijkej David kemej tekiuaj, ta no kiuikaya nochi tein kikuiskia komo monekia tateuis (1 Crón. 12:38). Yejua kiixtalijka yas tateuitiuj iuan David uan kipaleuis Israel komo kiixnamikiaj. Nejin telpoch semi yolchikauak katka.

6. ¿Keniuj tein kichiuak David kipaleuij Sadoc maj yolchikauak? (Salmo 138:3).

⁶ ¿Toni kipaleuij Sadoc maj yolchikauak? Yejua kimatia tein kichiujkej okseki takamej yolchikaujkej, uan nejon semi kipaleuij. Semej katka David. Nochin israelitas kiixtalijkej kemej tekiuaj porin katka yolchikauak keman “kinixyekanaya soldados israelitas keman yayaj tateuitij” (1 Crón. 11:1, 2). David takuaujtamatia iuan Jehová uan kitajtaniaya maj kipaleui keman kiixnamikiaj akin kitauelitayaj (Sal. 28:7; xikonixtajtolti Salmo 138:3). Sadoc no kiitaya tein kichiuayaj okseki takamej yolchikaujkej, kemej Jehoiadá uan ikoneuj Benaya, uan 22 takamej akin kinixyekanayaj tateuianij akin kipaleuijkej David (1 Crón. 11:22-25; 12:26-28). Nochin yejuan kiixtalijkaj tapaleuiskej maj David mochiua tekiuaj.

7. 1) ¿Akonimej techmachtiaj axkan ke moneki tiyeskij tiyolchikaujkej? 2) ¿Toni mitsonmachtia video de tokniuj Nsilu?

⁷ Semi techyolchikaua keman tiknemiliaj tein kichiujkej itekitikauan Jehová para kipaleuiskej iTaixyekanalis. Keman  Jesucristo nemia nikan taltikpak kampa Satanás taixyekana, amo mokalakij itech política (Mat. 4:8-11; Juan 6:14, 15). Nochipa takuaujtamatik ke Jehová kiyolchikauaskia. Axkan no techpaleuia tein kichiuanij miakej telpochmej akin amo kinekij mochiuaskej soldados nion tapaleuiskej itech política. Uelis tikontemos tein kinpanouani nejin tokniuan itech jw.org. a

MAJ TIKINPALEUIKAN TOKNIUAN

8. ¿Kemanian moneki maj tayekananij yolchikaujkej para kinpaleuiskej tokniuan?

⁸ Tiitekitikauan Jehová tikuelitaj timosenpaleuiskej (2 Cor. 8:4). Sayoj ke kemansa moneki maj tiyolchikaujkej para tikchiuaskej nejon. Keman itech se altepet peua moteuiaj, tayekananij kimatij ke moneki kinyolchikauaskej tokniuan, kinpaleuiskej ika teisa oso xa monekis kinuikiliskej amaixmej oso okseki taman tein kinpolos. Kemej kintasojtaj tokniuan motemakaj kinmakaskej tein kinpoloua, maski uelis kinpanos tein amo kuali (Juan 15:12, 13). Ijkon kinextiaj ke yolchikaujkej kemej Sadoc.

9. Kemej kijtoua 2 Samuel 15:27-29, ¿toni kiluij David maj kichiua Sadoc? (No xikonita taixkopin).

⁹ David ueliskia kimiktiskej. Absalón, ikoneuj David kiixtalijka kimiktis para mochiuas tekiuaj (2 Sam. 15:12, 13). Yejua ika David monekia niman cholos de Jerusalén. Yejua kiniluij itekitikauan: “¡Maj niman tikcholuikan Absalón, porin komo nikan techajsiki amo uelisok ticholoskej!” (2 Sam. 15:14). Keman cholojkajya, David kiitak ke monekia maj aksa mokaua Jerusalén para maj kimati tein kiixtaliskia kichiuas Absalón. Yejua ika kititanik Sadoc uan okseki tiopixkamej maj tapijpiatij (xikonixtajtolti 2 Samuel 15:27-29). Monekia moyekpiaskej porin tein David kiniluijka maj kichiuakan ouij katka uan  ueliskia kinmiktiskej. Absalón sayoj itech tanemiliaya, tateuiaya uan takajkayauaya. Xikonnemili toni ueliskia kinchiuilis nejon takamej komo kimatiskia ke kipijpiatoj para kipaleuiskej David.

10. ¿Keniuj Sadoc uan oksekin kipaleuijkej David?

¹⁰ David kiluij Sadoc uan okse itasojikniuj Husái maj kipaleuianij ika tein kinemilijtoya kichiuas (2 Sam. 15:32-37). Husái monekia kinextis ke kipaleuiaya Absalón uan kiyolmajxitij keniuj monekia kiteuis David. Nejon kipaleuiskia David maj kimati toni kichiuas komo kiteuiayaj. Satepan, Husái kiluij Sadoc uan Abiatar tein kichiuaskiaj (2 Sam. 17:8-16). Uan yejuan kinauatijkej David (2 Sam. 17:17). Jehová kinpaleuij Sadoc uan okseki tiopixkamej maj kimakixtikan David (2 Sam. 17:21, 22).

11. ¿Keniuj uelis tiyeskij tiyolchikaujkej kemej Sadoc komo techiluiaj maj tikinpaleuikan tokniuan?

¹¹ ¿Keniuj uelis tiyeskij tiyolchikaujkej kemej Sadoc keman techtajtaniskej maj tikinpaleuikan tokniuan maski uelis techpanos tein amo kuali? 1) Maj tikchiuakan tein technauatiaj. Keman ijkon panos semi moneki maj titatakamatikan para amo tixexeliujtoskej. Yejua ika moneki tikchiuaskej tein technauatiaj tokniuan akin taixyekanaj itech sucursal (Heb. 13:17). Tayekananij moneki miakpa momachtiskej tein technauatiaj maj tikchiuakan achto uan keman mochiua se tetsauit (1 Cor. 14:33, 40). 2) Maj tiyolchikaujkej, sayoj ke no maj kuali titanemilikan (Prov. 22:3). Kuali xiontanemili achto ke tikonchiuas teisa. Ijkon amo mitsonpanos tein amo kuali. 3) Maj titakuaujtamatikan iuan Jehová. Yejua ininka motekipachoua nochin uan kineki maj kuali tietokan. Uan uelis techpaleuis maj tikinmakakan tokniuan tein kinpoloua.

12, 13. ¿Toni mitsonmachtia tein kinpanok Víktor uan Vitali? (No xikonita taixkopin).

¹² Maj tikitakan tein kinpanok Víktor uan Vitali, ome tayekananij akin  kinuikiliayaj takual uan at tokniuan ompa Ucrania. Víktor kijtoua: “Miakkan tiktemojtinemiaj takual. Uan miakpa tikuejkakakiaj ke motatojtoponilijtoyaj. Se tokniuj kitemakak seki takual tein kieujtoya uan nejon kinpaleuij miakej tokniuan maj moixpanoltikan seki tonalmej. Nikelnamiki ke keman titakalakijtoyaj itech carro, se bomba uetsik kemej 20 metros uejka, sayoj ke amo toponik. Nochi tonal niktataujtijtoya Jehová maj nechpaleuiani maj niyolchikauak para ueliskia niksentokas nikinpaleuis tokniuan”.

¹³ Vitali kijtoua: “Semi monekia maj tiyolchikaujkej. Para niajsis kampa yekinika monekia nias niuejkauak 12 horas. Keman niajtoya semi niktataujtijtiaya Jehová”. Vitali katka yolchikauak sayoj ke no kuali kinemiliaya tein kichiuaya: “Nochipa niktataujtij Jehová maj nechpaleuiani maj nitamatkej uan maj nikitani tein amo ueli nikchiua. Sayoj nipanouaya kampa tekiuanij tekauayaj. Keman nikitak ke tokniuan mosenpaleuiayaj okachi nitakuaujtamatik. Kiajchiuayaj tein tatsakuiliaya itech ojti, kisentiliayaj takual uan kikalakiayaj itech carro, uan Víktor uan nejua techmakayaj takual uan kani timokauaskej”.

MAJ NOCHIPA TIKTAKAMATIKAN JEHOVÁ

14. ¿Keniuj timomachiliaj keman aksa akin tiktasojtaj kikaua Jehová?

¹⁴ Se taman tein okachi techyolkokoua yejua keman se tochankauj oso se totasojikniuj kikaua Jehová (Sal. 78:40; Prov. 24:10). Uan komo kuali iuan timouikayaj xa okachi techyolkoua. Komo ijkon mitsonpanouani, tein kipanok Sadoc semi mitsonpaleuis.

15. ¿Keyej monekik yeski yolchikauak Sadoc para kisentokas kitakamatis Jehová? (1 Reyes 1:5-8).

¹⁵ Keman David katka xiuejya uan yaya momikilitia, ikoneuj Adonías kinekia mochiuas tekiuaj maski Jehová kinekia maj Salomón kiixpatani David (1 Crón. 22:9, 10). Sadoc nochipa kitakamatik Jehová, sayoj ke itasojikniuj Abiatar kiixtalij kipaleuis Adonías (xikonixtajtolti 1 Reyes 1:5-8). Nejin kinextiaya ke Abiatar amo kitakamatik David uan nion no Jehová. Xikonnemili keniuj Sadoc semi kiyolkokoj nejon porin panoua kemej 40 xiujmej sentekitikej kemej tiopixkamej (2 Sam. 8:17). Sentekitikej keman monekik kiyekpiaskej “tatiochiualkaxon tein iaxka toTajtsin Dios” (2 Sam. 15:29). Kipaleuijkaj David uan kichiujkaj miak taman para kitekitiliskej Jehová (2 Sam. 19:11-14).

16. ¿Toni kipaleuij Sadoc maj nochipa kitakamati Jehová?

¹⁶ Sadoc nochipa kitakamatik Jehová maski Abiatar kiixnamikik David, uan David nochipa iuan takuaujtamatik Sadoc. Keman David kiluijkej tein Adonías yaya kichiuati kintemoj Sadoc, Natán uan Benaya para maj kiixtalikan Salomón kemej tekiuaj (1 Rey. 1:32-34). No semi kipaleuij Sadoc tein kichiujkej okseki itekitikauan Jehová akin nochipa kitakamatkej Dios uan kipaleuijkej David, kemej Natán (1 Rey. 1:38, 39). Keman Salomón mochiuak tekiuaj, kiixtalij tiopixkat Sadoc para “maj kiixpata Abiatar” (1 Rey. 2:35).

17. ¿Keniuj uelis tikonchiuas kemej Sadoc keman aksa akin semi tikontasojta kikaua Jehová?

¹⁷ ¿Keniuj uelis tikonchiuas kemej Sadoc komo aksa akin semi tikontasojta kikaua Jehová? Xikonnexti ke sayoj tikonneki tikontakamatis yejuatsin (Jos. 24:15). Jehová mitsonpaleuis uan mitsonyolchikauas para tikonchiuas tein kuali yetok. Nochipa xikontataujti uan kuali xionmouika iniuan itekitikauan. Jehová semi  kiyolpaktia keman kiita ke tikontakamati, uan semi mitsontatiochiuis (2 Sam. 22:26).

18. ¿Toni mitsonmachtia tein kinpanok Marco uan Sidse?

¹⁸ Maj tikitakan tein kipanok Marco uan isiuatsin Sidse. Omen isiuapipiluan kikaujkej Jehová keman moskaltijkej. Marco kijtoua: “Desde ke yolij tokoneuan semi tikintasojtaj uan nochipa tiknekij tikinyekpiaskej. Yejua ika keman kikauaj Jehová semi teyolkokoua”. No kijtoua: “Sayoj ke Jehová semi techpaleuiani. Keman semi nimoyolkokoua Sidse nechyolseuia uan nechyolchikaua para maj nikchiua tein kuali yetok, uan nejua no ijkon nikchiua keman yejua moyolkokoua”. Sidse kijtoua: “Sayoj ueli titaxikouanij porin Jehová techpaleuiani. Amo kuali nimomachiliaya porin niknemiliaya ke notajtakol maj nosiuapipiluan kikauanij Jehová, yejua ika niktapouij yejuatsin keniuj nimomachiliaya. Satepan, se tokniuj siuat akin miak xiujmejya amo nikitstoya motokij nouan, nechajkolkitskij, nechixitak uan nechiluij: ‘Sidse, xikelnamiki ke amo tejua motajtakol’. Jehová nechpaleuiani maj niyolpaki uan maj niksentoka niktekitili”.

19. ¿Toni tikonixtalia tikonchiuas?

¹⁹ Jehová kineki maj nochin itekitikauan yolchikaujkej (2 Tim. 1:7). Sayoj ke yejua amo kineki maj tiknemilikan ke nochi ueli tikchiuaj toselti, ta kineki maj iuan titakuaujtamatikan. Yejua ika, keman monekis tikonnextis ke tionyolchikauak nochipa xikontemo maj Jehová mitsonpaleui. Yejuatsin mitsonpaleuis xionyolchikauak kemej Sadoc (1 Ped. 5:10).