1, 2. Kemej kijtoua Salmo 25:14, ¿toni moneki tikchiuaskej para okachi kuali timouikaskej iuan Jehová?

 ¿TONI kualtsitsin taman moneki tiknextiskej para uelis kuali timouikaskej iuan aksa? Xa tikonijtoskia ke moneki timotasojtaskej uan timopaleuiskej. Xa tikonnemilis ke para uelis kuali se mouikas iuan aksa amo moneki se mouis. Sayoj ke kemej kijtoua texto kampa mokixtia nejin tamachtilis, akin kinekij kuali mouikaskej iuan Jehová moneki kimojkatokaskej (xikonixtajtolti Salmo 25:14).

² Maski miak xiujmejya tiktekitilijtokej Jehová oso amo, tinochin moneki tiksentokaskej tikmojkatokaskej. Sayoj ke, ¿toni kijtosneki se kimojkatokas Dios? ¿Toni techpaleuis maj tikmojkatokakan? ¿Uan toni techmachtia kemej kimojkatokakej Dios tayekankatakeual Abdías, tayekankatiopixkat Jehoiadá uan tekiuaj Jehoás?

3. Xikonijto toni uelis kichiuas maj timouikan uan keniuj techpaleuia.

³ Komo tikmachiliaj ke techpanoti teisa tein amo kuali, ipa timomoujtiaj uan nejon techpaleuia maj tikmatikan toni tikchiuaskej. Maj tikitakan seki taman. Kemej timouij tipanuetsiskej, techpaleuia maj amo semi timotokikan kampa uejkapan. Kemej timouij maj techpano tein amo kuali, amo timotokiaj kampa uelis timokokoskej. Kemej tikmouiliaj tikchiuiliskej teisa totasojikniuj uan amo kuali iuan timouikaskejok, yejua ika amo tikyolkokouaj.

4. ¿Keniuj Satanás kineki maj tikitakan Jehová?

⁴ Satanás kineki maj tikmouilikan Jehová. Kineki maj tikneltokakan tein Elifaz kiluij Job: ke Jehová yejua se Dios  akin momakepa uan nochipa kualantok uan ke amo keman uelis tikyolpaktiskej (Job 4:18, 19). Satanás kineki maj tikmouilikan Jehová uan maj amo tiktekitilikanok. Sayoj ke amo moneki tikmouiliskej yejuatsin, ta moneki tikpoujkaitaskej uan timouiskej tikyolkokoskej.

5. ¿Toni kijtosneki se kimojkatokas Dios?

⁵ Akin kimojkatoka oso semi kipoujkaita Dios, kitasojta uan amo kichiua nion teyi tein uelis kitsakuilis maj amo mouikaok iuan. Jesús kinextij ke ijkon “kimojkatokaya Dios” (Heb. 5:7). Yejua amo kimouiliaya Jehová (Is. 11:2, 3). Jesús semi kitasojtaya iTajtsin uan kinekia kitakamatis (Juan 14:21, 31). Tejuan no semi tikpoujkaitaj Jehová uan tikueyichiuaj porin yejuatsin tetasojta, tamatkej, kichiua tein kuali yetok uan semi chikauak. No tikmatij ke kemej semi techtasojta, tein tikchiuaj uelis kiyolpaktis oso amo. Komo amo tiktakamatij motayokoltia, sayoj ke komo tiktakamatij yolpaki (Sal. 78:41; Prov. 27:11).

6. ¿Toni se taman uelis tikchiuaskej para tikmojkatokaskej Dios? (Salmo 34:11).

⁶ Keman tiyolij ayamo tikmojkatokaj Jehová, yejua ika moneki timomachtiskej keniuj tikchiuaskej (xikonixtajtolti Salmo 34:11). Uelis peuas tikmojkatokaskej komo tikitaj tein kichijchiuak. Keman tikitaj ke tein Jehová kichijchiuak kinextia ke tel tamatkej, tel chikauak uan semi techtasojta, techpaleuis maj semi tikpoujkaitakan uan maj tiktasojtakan (Rom. 1:20). Se tokniuj siuat akin monotsa Adrienne, kijtoj: “Keman nikita tein Jehová kichijchiuak uan nikita ke tel tamatkej, semi nikmojkaita uan nikneltoka ke yejuatsin kimati toni okachi nechpaleuis”. Satepan ke tokniuj itech tanemilij nejin, kijtoj: “Amo keman nikchiuas nion teyi tein uelis ika nikauas Jehová, akin kichiuak maj ninemi”. ¿Uelis tikonxelos tepitsin tiempo nejin semana para itech tiontanemilis se taman tein Jehová kichijchiuak? Nejon mitsonpaleuis okachi xikonpoujkaita uan xikontasojta (Sal. 111:2, 3).

7. ¿Keniuj netataujtil uelis techpaleuis maj tikmojkatokakan Jehová?

⁷ Komo nochipa tiktataujtiaj Jehová, no techpaleuis maj tikmojkatokakan. Keman okachi iuan titajtouaj, okachi tikneltokaj ke yekmelauj nemi. Keman tiktajtaniaj maj techpaleui maj tikxikokan se ouijkayot, tikmatij ke yejuatsin techpaleuis porin semi chikauak. Keman tiktasojkamatiliaj porin kitemakak iKonetsin maj toka momikiliki, tikelnamikij ke yejuatsin semi techtasojta. Uan keman tiktataujtiaj maj techixyekana keman tikpiaj kuejmolmej, tikelnamikij ke semi tamatkej. Nejin netataujtilmej techpaleuiaj maj okachi tikpoujkaitakan Jehová uan maj tikixtalikan amo tikchiuaskej nion teyi tein ika ueliskia tikauaskej.

8. ¿Toni moneki tikchiuaskej para tiksentokaskej tikmojkatokaskej Jehová?

⁸ Biblia ininka tajtoua sekin akin kichiujkej tein kuali uan sekin tein amo kuali, moneki timomachtiskej tein kichiujkej para tiksentokaskej tikmojkatokaskej Jehová. Axkan ininka titajtoskej eyin akin uelis techmachtiskej miak taman. Yekinika maj ininka titajtokan ome itekitikauan Jehová akin amo keman kikaujkej: Abdías, akin katka itayekankatakeual tekiuaj Acab, uan tayekankatiopixkat Jehoiadá. Satepan no timomachtiskej tein kichiuak tekiuaj Jehoás de Judá, akin yolkuali katka sayoj ke satepan kikauak Jehová.

9. ¿Keniuj Abdías kipaleuij porin kimojkatokaya Jehová? (1 Reyes 18:3, 12).

⁹ Keman Biblia yekinika ika tajtoua Abdías, b kijtoua: “Abdías semi kimojkatokaya Jehová” (xikonixtajtolti 1 Reyes 18:3, 12). ¿Keniuj kipaleuij nejin? Amo takajkayauaya uan itech takuaujtamatiaj. Yejua ika, tekiuaj kiixtalij maj taixyekana ichan (no xikonita Nehemías 7:2). No semi yolchikauak katka porin kimojkatokaya Dios, se taman tein satepan monekik kinextis. ¿Keyej? Porin nemik keman taixyekantoya Acab, se takat akin tel amo yolkuali katka, yejua “okachi tajtakolchiuak iixpan Jehová ke nochin oksekin akin achto tekiuajtikej” (1 Rey. 16:30). Uan no, Acab monamiktijka iuan Jezabel, akin kiueyichiuaya Baal uan semi kitauelitaya Jehová, hasta kintsakuilisnekia majtakti uejueyi kalyetonij maj amo kiueyichiuanijok yejuatsin. Uan no kinmiktij miakej itanauatijkauan Dios (1 Rey. 18:4). ¡Semi ouij katka se kitekitilis Jehová itech nejon xiujmej!

10. ¿Keniuj Abdías kinextij ke semi katka yolchikauak?

¹⁰ ¿Keniuj Abdías kinextij ke semi katka yolchikauak? Keman Jezabel kintemojtinemia itanauatijkauan Jehová para kinmiktis, Abdías kincholtij itech tepekoyokmej 100 tanauatianij, uan kintalij sijcincuenta uan kinmakaya toni tayiskej uan toni kikuaskej (1 Rey. 18:13, 14). Komo Jezabel kimatiskia nejon, kimiktiskia nejin takat akin semi yolchikauak katka. Uan tikajsikamatij ke Abdías mouia maj kimiktikan. Sayoj ke yejua okachi kitasojtaya Jehová uan itekitikauan ke inemilis.

11. ¿Keniuj miakej itekitikauan Jehová kichiuaj kemej Abdías? (No xikonita taixkopin).

¹¹ Axkan miakej itekitikauan Jehová nemij kampa amo kinkauaj maj tanojnotsakan. Maski kinpoujkaitaj tekiuanij, tokniuan sayoj kiueyichiuaj Jehová kemej kinamiki, ijkon kemej kichiuak Abdías (Mat. 22:21). Kinextiaj ke kimojkatokaj Dios keman kitakamatij yejuatsin uan amo takamej (Hech. 5:29). Yejua ika kisentokaj  tanojnotsaj uan monechikouaj kemej amo kinitaskej (Mat. 10:16, 28). No kiitaj maj tokniuan kiselikan tamachtilis tein moneki. Maj tikitakan tein kipanok Henri, se tokniuj takat akin nemi África kampa achto amo kinkauayaj maj tanojnotsakan. Itech nejon xiujmej, Henri motemakak kinuikilis amaixmej tokniuan. Yejua kijtoua: “Nejua amo semi nitajtoua. Yejua ika nikmati ke tein nechpaleuij maj niyolchikauak yejua porin semi nikpoujkaita Jehová”. Tejuatsin no uelis yeski semi tionyolchikauak kemej Henri komo tikonmojkatoka Dios.

12. ¿Keniuj Jehoiadá uan isiuatsin kinextijkej ke amo kikauayaj Jehová?

¹² Tayekankatiopixkat Jehoiadá kimojkatokaya Jehová, nejon kipaleuij maj amo keman kikaua uan maj kinpaleuiani oksekin maj no kiueyichiuakan yejuatsin. Keman Atalía, isiuapil Jezabel, peuak taixyekana ompa Judá maski amo kinamikia, Jehoiadá kinextij ke semi kimojkatokaya Dios. Miakej kimouiliayaj Atalía porin tel amo yolkuali katka. Yejua kinekia kisentokas taixyekanas, yejua ika kitemoj kinmiktis nochin iixuiuan akin kinnamikia maj taixyekanakan (2 Crón. 22:10, 11). Sayoj ke Jehosabeat, isiuatsin Jehoiadá, kimakixtij se okichpiltsin akin monotsaya Jehoás. Yejua uan itakatsin, kicholtijkej uan kiyekpiakej. Ijkon amo kintamimiktijkej ichankauan David akin kinnamikia taixyekanaskej. Jehoiadá amo kikauak Jehová uan amo kimouilij Atalía (Prov. 29:25).

13. ¿Keniuj Jehoiadá oksepa kinextij ke amo kikauaya Jehová?

¹³ Keman Jehoás kipiaya chikome xiuit, Jehoiadá oksepa kinextij ke amo kikauaya Jehová. Yejua kuali kiixtalij tein kichiuaskia. Komo mochiuaya tein kinekia, Jehoás mochiuaskia tekiuaj, se ichankauj David akin kinamikia maj taixyekana. Uan komo amo mochiuaya tein kiixtalijka, xa kimiktiskiaj Jehoiadá. Sayoj ke kemej Jehová kipaleuij, mochiuak kemej kiixtalijka. Levitas, uan akin kinixyekanayaj ininchankauan, kipaleuijkej Jehoiadá maj kiixtali maj tekiuajti Jehoás uan tanauatij maj kimiktikan Atalía (2 Crón. 23:1-5, 11, 12, 15; 24:1). “Satepan, Jehoiadá kichiuak maj tekiuaj uan xolal motenkauanij iuan Jehová ke nochipa yeskiaj ixolal” (2 Rey. 11:17). “No kintalij akin tajpiayaj puertajtenoj itech ichan Jehová para maj amo kalakini akin mopitsotilijka ika teisa” (2 Crón. 23:19).

14. ¿Keniuj Jehová kiueyitalij Jehoiadá porin yejua no ijkon kichiuak?

¹⁴ Jehová kijtojka: “Nikinueyitalis akin nechueyitaliaj”, uan ijkon kichiuak iuan Jehoiadá (1 Sam. 2:30). Jehová kichiuak maj moijkuilo itech iTajtol tein kuali tein kichiuak tayekankatiopixkat Jehoiadá para techmachtis (Rom. 15:4). Uan keman Jehoiadá momikilij, Jehová kitatiochiuij keman “kitokkej itech iXolal David iniuan tekiuanij, porin kichiujka tein kuali itech Israel uan iuan Dios akin melauak uan ichan” (2 Crón. 24:15, 16).

15. ¿Toni techmachtia tein kichiuak uan tein kipanok Jehoiadá? (No xikonita taixkopimej).

¹⁵ Tein kichiuak Jehoiadá techpaleuia tinochin maj okachi tikmojkatokakan Dios. Tayekananij uelis kichiuaskej kemej Jehoiadá keman nochipa kitemoskej keniuj kinyekpiaskej itekitikauan Dios (Hech. 20:28). Tokniuan akin xiuejkejya uelis momachtiskej ke komo kimojkatokaj Jehová uan amo keman kikauaj, yejuatsin kinpaleuis maj kichiuakan tein kineki, amo kinixtopeua. Telpochmej uelis kiitaskej  keniuj Jehová mouikak iuan Jehoiadá, uan kinpoujkaitaskej akin xiuejkejya, okachiok akin miak xiujmejya kitekitilijtokej Jehová (Prov. 16:31). Uan tinochin uelis tikchiuaskej kemej levitas uan akin kinixyekanayaj ininchankauan keman kipaleuijkej Jehoiadá: moneki tikintakamatiskej uan tikinpaleuiskej akin techixyekanaj (Heb. 13:17).

16. ¿Keniuj kinextij Jehoás ke amo kitasojtaya Jehová?

¹⁶ Jehoiadá kipaleuij tekiuaj Jehoás keman katka telpoch maj kiyolpakti Jehová (2 Rey. 12:2). Sayoj ke satepan ke Jehoiadá momikilij, Jehoás peuak kintajtolkaki uejueyi chiuanimej de Judá akin kitekitiliayaj tekiuaj uan kinekepilijkaj Jehová. Nejin kichiuak maj yejua uan xolal peuanij ‘kiueyichiuanij koujmej uan tatadiosmej’ (2 Crón. 24:4, 17, 18). Maski Jehová semi kiyolkokoj nejon, “kisentokaya kintitania tanauatianij para maj mokepanij iuan”. Sayoj ke “yejuan amo kinekiaj kinkakiskej”. Amo kikakkej nion iokichpil Jehoiadá, akin monotsaya Zacarías, akin katka tanauatijkej uan tiopixkat, uan no katka iprimo Jehoás. Hasta tanauatij maj kimiktikan Zacarías maski ichankauan kipaleuijkaj Jehoás maj amo kimiktikan. ¡Tel amo motasojkamatia! (2 Crón. 22:11; 24:19-22).

17. ¿Toni kipanok Jehoás?

¹⁷ Jehoás peuak amo kimojkatokaok Dios, uan tel amo kuali tein kipanok ijkon  kemej Jehová kijtojka: “Akin nechixtopeuaj no nikinixtopeuas” (1 Sam. 2:30). Satepan, tateuianij sirios akin amo miakej katkaj kinteuijkej itateuijkauan Jehoás, uan kintankej maski yejuan katkaj tel miakej uan kitelkokojkej. Keman sirios yajkej, itekitikauan Jehoás kimiktijkej porin kimiktijka Zacarías. Uan kemej tel amo yolkuali katka, nion kitokkej kampa kintokayaj tekiuanij (2 Crón. 24:23-25; xikonita nota de estudio “hijo de Baraquías”, itech Mateo 23:35).

18. Kemej kijtoua Jeremías 17:7, 8, ¿toni techpaleuis maj amo timochiuakan kemej Jehoás?

¹⁸ ¿Toni techmachtia tein kipanok Jehoás? Yejua katka kemej se kouit tein amo yektoktoya uan para amo uetsis monekia maj kikoujkechikan. Keman momikilij tayekankatiopixkat Jehoiadá, akin kemej yeskia kikoujkechijtoya oso kipaleuiaya Jehoás, yejua peuak kinkaki akin kinekepilijkaj Jehová uan no kinekepilij. Nejin techmachtia teisa tein motelneki: amo sayoj moneki tikmojkatokaskej Jehová porin tochankauan ijkon kichiuaj uan techpaleuiaj, ta moneki tikchiujtoskej tein techpaleuis maj okachi tiktasojtakan uan tikpoujkaitakan Jehová. Yejua ika moneki nochipa timomachtiskej, itech titanemiliskej tein timomachtiaj uan timotataujtiskej (xikonixtajtolti Jeremías 17:7, 8; Col. 2:6, 7).

19. ¿Toni kichia Jehová maj tikchiuakan?

¹⁹ Jehová amo techtajtania maj tikchiuakan tein amo tiuelij. Uan Eclesiastés 12:13 kijtoua tein kineki maj tikchiuakan, ompa kijtoua: “Xikmojkatoka Dios akin melauak uan xiktakamati itanauatiluan, porin yejua nejin nochi tein moneki maj se kichiua”. Komo tikmojkatokaj Jehová, uelis tikxikoskej tein yeski ouijkayot tein tikpiaskej uan tikchiuaskej kemej Abdías uan Jehoiadá, akin amo kikaujkej Jehová. Nion teyi uelis kichiuas maj amo timouikakanok iuan yejuatsin.