1. ¿Toni moneki tikchiuaskej para timakisaskej keman ejkos itonal Jehová?

 KEMAN Biblia ika tajtoua “itonal Jehová” kijtosneki keman kinixpolos akin kitauelitaj uan kinmakixtis itekitikauan. Ijkon kichiuak ne uejkauj, keman Jehová kintatsakuiltij seki xolalmej (Is. 13:1, 6; Ezeq. 13:5; Sof. 1:8). “Itonal Jehová” tein ualajtok peuas keman kinixpolos nochi taneltokalismej tein amo melaujkej uan tamis itech Armagedón. Komo tiknekij timomakixtiskej, moneki tikchiuaskejya tein techpaleuis. Jesús kijtoj ke ‘nochipa moneki maj titachixtokan’ para tikmatiskej toni tikchiuaskej keman ‘mochiuas tetsaujkatajyouilis’, uan moneki nochipa ijkon tikchiujtoskej (Luc. 12:40; Mat. 24:21).

2. ¿Keyej semi kuali maj timomachtikan tein kijtoua 1 Tesalonicenses?

² Itech yekinika amatajkuilol tein tatitanil Pablo kintitanilij tokniuan de Tesalónica, ika tajtoj seki taman tein kinpaleuiskia tokniuan maj kimatinij toni kichiujtoskiaj achto ke ejkoskia itonal Jehová. Pablo kimatia ke nejon amo niman ejkoskia (2 Tes. 2:1-3). Sayoj ke, kiniluij ke semi monekia maj kichiujtonij teisa uan maj kiitanij ke niman ejkoskia, tejuan no uelis tikchiuaskej nejon. Maj tikitakan keniuj Pablo kimelauak nejin eyi taman 1) keniuj ejkoskia itonal Jehová, 2) akonimej ixpoliuiskej uan 3) toni moneki tikchiujtoskej achto ke ejkos nejon tonal.

3. ¿Keniuj itonal Jehová ejkos youak kemej yeskia se tachtekkej? (No xikonita taixkopimej).

³ “Kemej se tachtekkej kistiuetsiki youak” (1 Tes. 5:2). Yejua nejin yekinika taman tein tatitanil Pablo ika tajtoj para kinextis keniuj ejkoskia itonal Jehová. Se tachtekkej ijsiujka kiichteki teisa uan kichiua youak keman amo akin kiitstok. No ijkon, itonal Jehová ejkotiuetsis uan amo akin kimattos. Xa hasta tejuan  akin tikueyichiuaj Jehová tikmojkaitaskej porin niman ejkotiuetsis. Sayoj ke tejuan amo tiixpoliuiskej, ta sayoj akin amo yolkualmej.

4. ¿Keniuj itonal Jehová tamati kemej ijkuak se siuat tajyouia porin kipiati ikonetsin?

⁴ “Kemej ijkuak se siuat tajyouia porin kipiati ikonetsin” (1 Tes. 5:3). Se siuat akin kipiati ikonetsin amo kiyekmati toni hora yolis, sayoj ke kuali kimati ke ipa yolis. Uan keman konetsin yolitiya, kitelkokoua uan amo ueli kitsakuilia. No ijkon, maski amo tikmatij katiyejua tonal uan katiyejua hora ejkos itonal Jehová, tikneltokaj ke kemaj ejkos. Tikmatij ke ijsiujka kichiuas tein kiixtalijtok uan kinixpolos akin amo yolkualmej.

5. ¿Keyej tetsaujkatajyouilis tamati kemej ijkuak yekin tanestiuj?

⁵ Kemej ijkuak yekin tanestiuj. Keman Pablo ika tajtoua expatika taman, oksepa ininka tajtoua tachtekinij akin tachtekij youak, sayoj ke axkan kipata kemej kimelaua. Kijtoua ke itonal Jehová tamati kemej ijkuak yekin tanestiuj (1 Tes. 5:4). Tachtekinij ijsiujtokej tachtektokej uan amo kiitaj ke tanestokya. Xa nion kiitaj ke tanestiujya uan ke uelisya kinixmatiskej. Itech tetsaujkatajyouilis no ijkon kinpanos akin kemej yeskiaj tachtekinij uan kichiuaj tein Dios amo kiyolpaktia. Tejuan amo ijkon tikchiuaj, ta tikixtopeuaj nochi tein Jehová amo kiuelita, uan timochikauaj tiyeskij tiyolkualmej itech nochi, tiyolmelaujkej uan timelaujkanemij (Efes. 5:8-12). Satepan Pablo ika tajtoua ome taman tein kinextia akonimej amo makisaskej itech itonal Jehová.

6. ¿Keyej miakej kemej yeskia kochtokej? (1 Tesalonicenses 5:6, 7).

⁶ “Akin kochij” (xikonixtajtolti 1 Tesalonicenses 5:6, 7). Pablo kijtoj ke akin kemej yeskia kochtokej yejuan akin amo  makisaskej. Keman aksa kochi amo kimati toni mochiujtok kampa yetok uan keniuj ijsiujka panoua tiempo. Uan amo kimati keman mochiua teisa tein uelis kipaleuis oso kijtakos. Axkan, miakej no kemej yeskia kochtokej, amo kinekij mouikaskej iuan Dios (Rom. 11:8). Amo kineltokaj tein kinextia ke tinemijya itech “tonalmej keman tatamitiya” uan ke amo uejkaua mochiuasya tetsaujkatajyouilis. Keman miakej kiitaj ke panoua teisa tein amo keman mochiujtoya, kinpaleuia maj kinekikan momachtiskej Biblia kampa ika tajtoua iTaixyekanalis Dios. Sayoj ke miakej amo kinekij kisentokaskej momachtiskej, uan niman kemej yeskia oksepa kochij. Uan miakej kineltokaj ke ejkos tonal keman Dios kintatsakuiltis akin amo yolkualmej sayoj ke kinemiliaj ke uejka poliuiok (2 Ped. 3:3, 4). Sayoj ke tejuan tikmatij ke ijkon kemej panotiuj tonalmej, okachi moneki maj titachixtokan kemej tayolmajxitia Biblia.

7. ¿Keyej akin Dios kinixpolos kemej yeskia uintitokej?

⁷ “Akin tauanaj”. Tatitanil Pablo kijtoj ke akin Dios kinixpolos tamatij kemej akin tauanaj. Akin tauanaj amo kimatij toni kichiujtokej, uan tein kichiuaj amo kuali kinkisa. No ijkon akin amo yolkualmej amo kichiuaj tein Dios tanejmachtijtok uan ika tein kichiuaj uelis ixpoliuiskej. Sayoj ke tatitanil kinyolmajxitia akin kichiuaj kemej Cristo maj yektalnamiktokan oso maj ixpetantokan uan maj amo uintitokan (1 Tes. 5:6). Se akin motelmachtia tein ika tajtoua Biblia kijtoua ke keman se ixpetantok “se yolseujtok, kuali se tanemilia uan nejon tapaleuia maj kuali se kiixejeko tein se kichiuas”. Sayoj ke, ¿keyej moneki tiyolseujtoskej uan kuali titanemiliskej? Porin nejon techpaleuis maj amo timokalakikan itech política uan itech nochi taman tein kichiuaj. Uan no, ijkon kemej okachi motokijtiuj itonal Jehová, okachi techchikaujkauiskej maj no titapaleuikan. Sayoj ke maj amo techtekipacho toni tikchiuaskej, porin ichikaualis Dios techpaleuis maj tiyolseujtokan uan maj kuali titanemilikan, uan techpaleuis maj kuali tikixpejpenakan toni tikchiuaskej (Luc. 12:11, 12).

8. Kemej kijtoua 1 Tesalonicenses 5:8, ¿toni techpaleuis maj tiijsatokan uan maj kuali titanemilikan? (No xikonita taixkopin).

⁸ ‘Maj timotalilikan teposkoton uan teposkuatsakuiloni’. Pablo kijtoj ke titamatij kemej soldados akin tachixtokej uan kipiaj tein ika moteuiskej (xikonixtajtolti 1 Tesalonicenses 5:8). Se soldado nochipa moneki kipias tein ika moteuis keman kinotsaskej maj tateuiti. Tejuan no tiknextiaj ke titachixtokej achto ke ejkos itonal Jehová komo nochipa titakuaujtamatij uan titetasojtaj, nejin kemej yeskia timotaliliskiaj se teposkoton. No tiknextiaj ke titachixtokej komo tiknemiliaj keniuj Dios techmakixtiti, nejin kemej yeskia timotaliliskiaj teposkuatsakuiloni. Komo tikchiuaj nejin semi techpaleuis.

9. ¿Keniuj techpaleuia komo titakuaujtamatij?

⁹ Ijkon kemej teposkoton kipaleuiaya iyolo soldado, keman titakuaujtamatij uan titetasojtaj no techpaleuia maj timoyekpiakan ika tein tiknemiliaj uan tein tiknejnekij. Nejin techpaleuis maj tiksentokakan tiktekitilikan Jehová uan maj tiktojtokakan Jesús. Kemej titakuaujtamatij, tikneltokaj ke Jehová techtatiochiuis porin tiktemouaj tikueyichiuaskej (Heb. 11:6). No techpaleuia maj amo tikauakan toTaixyekankauj Jesús maski tikpiaskej miak ouijkayomej. Para okachi titakuaujtamatiskej uan tikixnamikiskej ouijkayomej, moneki tikitaskej keniuj tokniuan amo kikauanij Jehová maski kintajyouiltiaj oso amo kipiaj toni ika moixpanoltiskej. Uan para amo tiknejnekiskej timotomintiskej,  maj tikitakan tein kichiuanij akin amo kipiaj miak taman porin kitekitiliaj Jehová. b

10. ¿Keniuj techpaleuia komo tiktasojtaj Dios uan oksekin?

¹⁰ Komo titetasojtaj techpaleuis maj titachixtokan uan maj kuali titanemilikan (Mat. 22:37-39). Kemej tiktasojtaj Dios techpaleuia maj tiksentokakan titanojnotsakan maski kemansa ouij yeski (2 Tim. 1:7, 8). Kemej no tikintasojtaj akin amo kineltokaj Jehová, timochikauaj tikinpaleuiskej ika teléfono oso ika carta maj kiixmatikan yejuatsin. Amo tiknemiliaj ke amo keman uelis kichiuaskej tein kuali, ta tikchiaj maj mopatakan uan maj kichiuakan tein kuali (Ezeq. 18:27, 28).

11. ¿Keniuj techpaleuia komo tikintasojtaj tokniuan? (1 Tesalonicenses 5:11).

¹¹ Tejuan no tikintasojtaj tokniuan uan tiknextiaj keman timosenyolchikauaj uan timosenpaleuiaj (xikonixtajtolti 1 Tesalonicenses 5:11). Soldados akin sentateuiaj mosenpaleuiaj. Keman tateuijtokej ueliskiaj kikokoskej aksa akin no iniuan tateuijtok, sayoj ke amo keman kiyokoliskiaj kimagaskej. No ijkon tejuan amo keman tikinyokoliskiaj tikinyolkokoskej tokniuan uan amo timomakepaskiaj komo techchiuiliskiaj teisa tein amo kuali (1 Tes. 5:13, 15). Okse taman kemej tiknextiskej ke tikintasojtaj tokniuan yejua keman tikinpoujkaitaj akin taixyekanaj itech nechikol (1 Tes. 5:12). Keman Pablo kintajkuilouilij tokniuan de Tesalónica, ayamo kiajxitiaya nion se xiuit ke mochiujka nejon nechikol. Xa tokniuan tayekananij ayamo kimatiaj miak taman uan mopolouayaj, sayoj ke monekia kinpoujkaitaskej. Ijkon kemej motokijtiuj tonal keman mochiuas tetsaujkatajyouilis, xa monekis maj okachi timokauakan maj techixyekanakan tayekananij itech nechikol, porin xa amo uelis titanotsaskejok itech ueyi kali kampa techixyekanaj uan Betel, uan amo uelisok techixyekanaskej. Yejua ika, axkan moneki maj tikintasojtakan uan tikinpoujkaitakan tayekananij itech nechikol. Maski tein yeski  panos, maj amo tikitakan keman mopolouaj, ta tein kuali tein kichiuaj, uan maj amo tikelkauakan ke Jehová kikaua maj Cristo kinixyekana nejin takamej akin amo kikauaj.

12. ¿Keyej tein tikchiaj techpaleuia maj tiknemilikan tein kuali?

¹² Ijkon kemej teposkuatsakuiloni kiyekpiaya itsontekon soldado, keman tiknemiliaj keniuj Dios techmakixtis no techpaleuia maj kuali titanemilikan. Kemej itech titakuaujtamatij tein tikchiaj, tikitaj ke nochi tein onkak nikan taltikpak nion tepitsin techpaleuia (Filip. 3:8). No techpaleuia maj tiyolseujtokan uan maj kuali tietokan. Yejua nejon tein kinpanok Wallace uan Laurinda, akin tapaleuijtokej ompa África. Itech eyi semana, se momikilij ipopaj uan okse imomaj. Kemej mochiujtoya kokolis COVID-19 amo uelik mokepkej ininaltepeuj para yetoskej iniuan ininchankauan. Wallace kijkuiloj: “Semi nechpaleuia porin nikmati ke akin momikilijkejya oksepa nemiskej. Amo niknemilia keniuj yetoyaj tepitsin achto ke momikiliskiaj, ta keniuj yetoskej tepitsin satepan ke oksepa nemiskej itech xochital. Nejin nechpaleuia maj niyolseujto uan maj amo semi nimotayokolti”.

13. ¿Toni moneki tikchiuaskej para maj Jehová techmaka ichikaualis?

¹³ “Amo xiktsakuilikan ichikaualis Dios maj tekiti namotech” (1 Tes. 5:19). Pablo kijtoj ke ichikaualis Dios tamati kemej tit tein kemej yeskia xotatok toijtik. Keman Jehová techmaka ichikaualis tiktelnejnekij tikchiuaskej tein kuali yetok uan tiyolpakij okachi tiktekitiliskej (Rom. 12:11). Para maj Jehová techmaka ichikaualis moneki tiktajtaniskej, timomachtiskej iTajtol uan tiksentokaskej tipouiskej itech inechikol. Komo tikchiuaj nejin, tikaujtoskej “maj techixyekana ichikaualis Dios’ (Gál. 5:22, 23).

14. Komo tiknekij maj Dios kisentoka techmaka ichikaualis, ¿toni amo moneki tikchiuaskej? (No xikonita taixkopimej).

¹⁴ Jehová techmaka ichikaualis, sayoj ke moneki timoyekpiaskej. Amo tiknekij tikchiuaskej nion teyi tein kitsakuilis maj totech tekiti ichikaualis Dios. Komo tiknekij maj Jehová techmaka ichikaualis, moneki tichipaujkanemiskej uan amo tiknemiliskej  tein amo kuali. Yejuatsin amo techpaleuisok komo peua tiknemiliaj uan tikchiuaj tein amo kuali (1 Tes. 4:7, 8). Komo tiknekij maj Jehová kisentoka techpaleui, no moneki maj ‘amo tikixtopeuakan tein Dios kitematiltia itechkopa aksa’ (1 Tes. 5:20). Itech nejin versículo, keman kijtoua “tein Dios kitematiltia itechkopa aksa”, kijtosneki ke Dios ika ichikaualis techmatiltia tein panos keman ejkos itonal. Uan ¿toni moneki tikchiujtoskej achto ke ejkos? Tejuan amo tiknemiliaj ke uejka poliui para ejkos itonal Jehová oso ke amo tikitaskejok Armagedón, ta tiknekij maj niman ejko. Yejua ika timochikauaj tichipaujkanemiskej uan tikchiuaskej ‘tein kinextis ke tikueyichiuaj Dios ika nochi toyolo’ (2 Ped. 3:11, 12).

15. ¿Toni moneki tikchiuaskej para maj amo akin techkajkayaua? (1 Tesalonicenses 5:21).

¹⁵ Amo uejkaua, akin kitauelitaj Dios kijtoskej: “¡Axkan tiyolseujkanemijya uan amo timouijok!”, nejin panos maski amo tikyekmatij keniuj kichiuaskej (1 Tes. 5:3). Itech nochi taltikpak, yejuan kimoyauaskej tein amo kuali ejekamej kichiuaskej maj kijtokan uan ika nejon kinkajkayauaskej tel miakej (Apoc. 16:13, 14). ¿Timokauaskej maj no techkajkayauakan tejuan? Amo techkajkayauaskej komo tikchiuaj nejin tein tayolmajxitia Biblia: “Xikyekitakan nochi” (xikonixtajtolti 1 Tesalonicenses 5:21). Keman nikan kijtoua “xikyekitakan” itech tajtol griego mokuia keman akin kikouaya plata oso oro kiitaya ox yekmelauj chijchiujtoya ika nejon. Tejuan no moneki tikyekitaskej ox yekmelauj tein tikakij oso tein tikixtajtoltiaj. Tokniuan de Tesalónica semi monekia maj kichiuanij nejin, sayoj ke tejuan okachi moneki ijkon tikchiuaskej porin motokijtiuj tonal keman mochiuas tetsaujkatajyouilis. Amo moneki tikneltokaskej nochi tein techiluiaj, ta moneki tikitaskej uan kuali tiknemiliskej ox tein tikitaj uan tein tikakij no yejua tein kijtoua inechikol Jehová uan Biblia. Nejin techpaleuis maj amo tikneltokakan nion teyi tein kitematiltiskej amo kuali ejekamej (Prov. 14:15; 1 Tim. 4:1).

16. ¿Toni tein kualtsin tikchiaj uan toni moneki tikchiujtoskej?

¹⁶ Tikmatij ke itekitikauan Jehová makisaskej itech tetsaujkatajyouilis, sayoj ke amo tikmatij toni techpanos mosta tisejsemej (Sant. 4:14). Maski timomikiliskej achto ke mochiuas tetsaujkatajyouilis oso tiyoltoskejok, tikyekmatij ke Jehová kichiuas maj tinemikan nochipaya komo amo tikauaj. Tokniuan taixpejpenalmej yetoskej iluikak iuan Cristo, uan okseki ichkamej nemiskej nikan taltikpak itech xochital. Sayoj ke axkan moneki maj itech titanemilikan tein Jehová motenkaua techmakas uan maj tikchiujtokan tein techpaleuis keman ejkos itonal Jehová.